প্রকাশ20
1আকো নোইতাহা নাঘীওয়া লিমুকো গোইচো আসা টেবো সাংগ্লি খুইতা চুংওয়া ইচো লোডিংবাকো পোইং লোডিংবাসো উইপামসা লেপাদাওয়া কা তিংয়ে।2আকুহা আকু য়ুপুই পুইয়া, আকু শুরুকো পুইয়া, আকুহা দিয়াবালস শয়তানগা, আকুহিংয়া প্যইয়ে, আসা এক হাজার বর্ষাকো সোতা জিংমসা এপুয়ে।3আকুহা আকুহিংয়া নাঘীওয়া লিমুতা বাডোইপুয়ে, আসা আকু লিমুহিংয়া মেইমসা শিল লাগাইপুয়ে, হাংপাতানাহা এক হাজার বর্ষা মাপেংনু চোইপা জ্যা-জ্যাবিহিং আকুহা দুদুইপাকো মামুংকো। আকো নোইতাহা আম্যই সময়কো সোতা আকুহিংয়া ল্যানেরোওয়া।4আত্রংহা কাহা গাদিংবি আসা আকো তোইতা গাওয়াবিহিং তিংয়ে, হাংসুহিং ইন্সাপ জোকো অধিকার পিচামি নিমমে। আত্রংহা ইশুকো গাওয়াইকো সোতা আসা সেংজাকো য়্যইদিকো সোতা পোরো ঠেচপুমবিকো লাংবেবিহিং কা তিংয়ে। ইবিহা আকু সেংচেং আসা আকো মুর্তিহিং মাহুইতো আসা আকো ছাপ তিঙাংতা আসা খুইতা মালাগাইতো। আবিহা ন্যাসারাং ঙাজ্যইং জিংপুয়ে, আসা আবিহা খ্রীষ্টহিংপা এক হাজার বর্ষা চোইপা রাজ জোয়ে।5নাগাইকো ঙারোওয়াহা ইরাংগা। দোসরা সিপুমবিহা আকু এক হাজার বর্ষা মাপেংনু চোইপা মাঙারোতো।6নাগাইকো সিমসা ঙারোওয়াবিতা সহভাগী জিংওয়াবিহা আশিষিত আসা পবিত্রগা। হাংপাতানাহা ইবিহিংয়া দোসরা সিদিংকো সেহা হাইরে জোমক্যই, আদো ইবিহা সেংজাকো আসা খ্রীষ্টকো পাউবি জিংমসা আকুহিংপা এক হাজার বর্ষা চোইপা রাজ জোরোওয়া।7এক হাজার বর্ষা পেংপুনতেনুওয়া শয়তানহা আপনিকো কৈদসো ছুটকারা জিংরোওয়া,8আসা বাসিমতিকো দিদ্যা কাটুতা নিওয়া দেশ-দেশকো দিংঙাবিহিং দুদুইপাকো, অর্থাৎ গোগ আসা মাগোগহিং লুইসুকো সোতা জমা জোকো নোপামসা লেরোওয়া। আকো পারাহা ঝাহাদিকো বার্পুই সেই নিরোওয়া।9আবিহা তাংসা বাসিমতি মেইপা হোমসা পবিত্র দিংঙাবিকো হুরাপা আসা আকো জেজেংওয়া শহরহিং য়োইয়ে, আদো লোডিংবাসো মেহ হুইমসা আবিহিংয়া ওংপাপুইয়ে।10আবিহিং দুদুইপাওয়া আকু দিয়াবালসহিংয়া গন্দকসো লালাইদিংওয়া মেহকো হোরোংবাতা বাডোইপুয়ে, হাংতা আকু সেংচেং আসা প্যায়োং অগমবক্তা নিমমে। আউতাহা আবিহা জেইসুং লিসুং হাত্রংদো কোইচ্যা-বিংচ্যাওয়াবি পুনেরোওয়া।11আত্রংহা কাহা ইচো হাংপাওয়া গাদিং আসা আকো তোইতা গাদিংওয়াহিং তিংয়ে। আকো নাগাইসোহা বাসিমতি আসা ডিংবা ক্যাপুমসা হ্যাপুয়ে, আসা আবিকো সোতাহা হাংতারে জায়গা মামুংতো।12কাহা টেবো আসা আপেচাওয়া তাংসা সিপুমবিহিং গাদিংকো আবেইতা জাদিংওয়া তিংয়ে, আসা হিগাবি ওয়েয়ে, আসা দোসরা ইচো হিগারে ওয়েয়ে, হানি সাদিকো হিগামমে। আকু হিগাবিতা লাওয়া নুওয়াংবি অনুসার আবিকো কাম সেইরাং সিপুমবিকোহা ইন্সাপ জিংয়ে।13হাংসু ঝাহাদিতা সিপুমি নিমমে আবিহা ন্যায়কো সোতা সেংজাকো নাগাইতা জায়ে, সিদিং আসা বাসিমতিরে আবিকোতা নিওয়া সিপুমবিহিং পিচাপুইয়ে। আবি তাংসাকো আপনি আপনিকো কাম সেই ইন্সাপ জিংয়ে।14সিদিং আসা সিংপাংহিংয়া মেহকো হোরোংবাতা বাডোইপুয়ে। ই মেহকো হোরোংবাহা দোসরা সিদিংগা।15হাংসুকো মিং সাদিকো হিগাতা লাওয়া মাদো, আকুহিংয়া মেহতা বাডোইপুয়ে।
The Seed Company