প্রকাশ16
1আত্রংহা দেমসাসো ওয়াংওয়া ইচো লোডিংবাকো পোইংহা সাডিংপ্পা ঙামসা এপা জাংওয়া কা হিংয়ে: “নাবিহা হোতু, আসা সেংজাকো সেদ্রাংওয়া আকু নীচো কচৌরা বাসিমতিতা হোকাতু।”2আকো নোইতাহা ইচো লোডিংবাকো পোইংহা আপনিকো কচৌরাহা বাসিমতিতা হোকায়ে, আসা আকো সোতা আকু সেংচেংকো ছাপ নিওয়া আসা আকো মুর্তিহিং হুইওয়া দিংঙাবিহিংয়া আচকাক্যইওয়া আসা সিওপা তুচাওয়া মাকাবি লোয়ে।3দোসরা লোডিংবাকো পোইংকো কচৌরাহা ঝাহাদিতা হোপুউয়ে, আসা আকু ঝাহাদিহা সিপুওয়া দিংঙাকো য়ুতি ত্যাবাপা জিংপুয়ে। আসা ঝাহাদিতা ঙাজ্যইং নিওয়া তাংসা প্রাণীবিহা সিপুয়ে।4আসা তিন নম্বর লোডিংবাকো পোইংহা আপনিকো কচৌরাহা তিকো পাটিংবিতা আসা জোরাবিতা হোপুউয়ে, আসা আকু জোরাবিহা য়ুতি জিংপুয়ে।5আত্রংহা তিকো চি লাংওয়া লোডিংবাকো পোইংহা এপা জাংওয়া কা হিংয়ে, “ও পবিত্র সেংজা, হাংসু নিমমে আসা নিদিংমমে, নাকো আপনিকো ইন্সাফতাহা ন্যায় জোওয়াহা ঠিক নিও,6হাংপাতানাহা আবিহা পবিত্র দিংঙাবি আসা অগমবক্তাবিহিং স্যামি নিও, আসা নাতিহা আবিহিংয়া য়ুতি আংকো পিচামি নিও। আকু সজায়হা আবিহা মুংনেকোরাংগা।”7আত্রংহা বেদিহা এপা জাংওয়া কা হিংয়ে, “ওই, সে নিওয়া প্রভুসেংজা, নাকো ইন্সাফহা আজিপ্পা আসা ন্যায় জোওয়াহা ঠিক নিও।”8আকো নোইতা চার নম্বর লোডিংবাকো পোইংহা আপনিকো কচৌরাহা সানিকো তোইতা হোপুউয়ে, আকো সোতা সানিহা দিংঙাবিহিংয়া আকো মেহসো ঝান ওংপাপুয়ে।9দিংঙাবিহা লোউচাওয়াসো ওংপুয়ে, আসা আবিহা আকু দুঃখকো তোইতা অধিকার নিওয়া সেংজাকো মিংকো নিন্দা জোয়ে। আদো আবিহা পশ্চতাপ জোকো আসা আকুহিং মহিমা জোকো ইন্কার জোয়ে।10আসা পাঁচ নম্বর লোডিংবাকো পোইংহা আপনিকো কচৌরাহা আকু সেংচেংকো গাদিংতা হোপুউয়ে, আসা আকো রাজ্যতা নাটুংপা জিংপুয়ে, আসা আকু সেংচেংকো নুনুই হুইওয়া দিংঙাবিহা কোইচ্যা-বিংচ্যাওয়াসো আপনিকো সেতাং কিট্টিয়ে।11আবিকো সিওপা তুচাওয়া আসা মাকাবিকো সোতা আবিহা লোডিংবাকো সেংজাহিংয়া সরাপেয়ে, আদো আপনিকো জোওয়া মেংতাওয়া কামবিকো সোতা পশ্চতাপ জোকোহা আবিহা ইন্কার জোয়ে।12আত্রংহা ছয় নম্বর লোডিংবাকো পোইংহা আপনিকো কচৌরাহা টেবো জোরা য়ুপ্রেটিসতা হোপুইয়ে, আসা জোরাকো তিহা সিইপুয়ে আসা নুসো ওয়াংওয়া জাইপুবিকো সোতা ন্যাতা তৈয়ার জিংয়ে।13আত্রংহা কাহা য়ুপুই পুইয়াকো নামুসো, আকু সেংচেংকো নামুসো আসা প্যায়োং য়্যইওয়া অগমবক্তাবিকো নামুসো তায়াবি ত্যাবাপা সুংচো আচকাক্যইওয়া লাংবেবি নোপুওয়া তিংয়ে।14আবিহা আআংপেপেচপুওয়া তিংপাওয়া মেংতাওয়া লাংবেবিগা। আবিহা তাংসা বাসিমতিকো জাইপুবিকোতা হোচাংমগা, আসা সে নিওয়া সেংজাকো টেবো দিনতা লুইসুকো আবিহিং জমা জোমগা।15“কাং, কা কুইওয়া ত্যাবাপা লেরোওয়া। আকু দিংঙাহা আশিষিত নিও, হাংসু হোশিয়ার য়ুংমমে আসা আপনিকো আংদুংহিং জগায়মসা এমমে। মেনা আকুহা পাইক্রি তেইনেরোওয়া, আসা আকো পাইক্রিহা তিংপুরোওয়া।”16আবিহা জাইপুবিহিংয়া আকু জায়গাতা জমা জোয়ে, হানিহিং হিব্রু ক্যাতা আর-মাগেদ্দোন তামমে।17আসা সাত নম্বর লোডিংবাকো পোইংহা আপনিকো কচৌরাহা বিংঙাতা হোপুউয়ে, আসা দেমসাকো গাদিংসো এপা জাংওয়া ইচো সাডিংপা আওয়াজ নোয়ে, “নেহা মাচায়ে।”18আত্রংহা তিত্রাইয়ে, গারাং-গুরুংপা খ্যায়ে আসা দোসরা আওয়াজবিরে নোয়ে, চাসুং-মাইসুংক্যইওয়া নিংঙা হ্যায়ে, এসেপাকো চুসুং-মাইসুংক্যইওয়া নিংঙা, কি বাসিমতিতা দিংঙাবিহিং দিংনুসোহা নেচোইপা এপা জিংওয়াহা হাত্রংরে মাজিংয়াংমগা।19আসা আকু টেবো শহরহা সুংদ্যাতা পাংটি পাংটি জিংপুয়ে, আসা দেশ-দেশকো শহরবিহা চোচোনোনোপা জিংপুয়ে। সেংজাহিংয়া টেবো বেবিলোনকো প্যারাতাংয়ে, আসা আকুহা আপনিকো সেদ্রাংকো চাসুং-মাইসুংক্যইওয়াসো মেইপুওয়া কচৌরাহা আকুহিং আংকো পিচায়ে।20আসা তাংসা বোইদাবিহা য়াংপুয়ে আসা য়্যাগ্যইবিরে হাংতা হ্যাপুমে মোদোতো।21চালিশ-চালিশ কিলোকো ঝেসেবি দিংঙাবিকো তোইতা হুইচায়ে, আসা দিংঙাবিহা ঝেসেকো দুঃখকো সোতা সেংজাহিং শ্রাপেয়ে, হাংপাতানাহা ই দুঃখহা সিওপারাং চুসুং-মাইসুংক্যইপা নিমি।
The Seed Company