প্রকাশ15
1কাহা লোডিংবাতা টেবো আসা আআংপেপেচপুওয়া দোসরা ইচো চিহ্ন তিংয়ে: ই নীচো লোডিংবাকো পোইংবিরাং নোইস্যাকো দুঃখবি নিমগা, ই জিংপুনতেনুকো নোইতাহা সেংজাকো সেদ্রাংহা মাচারোওয়া।2মেহহিংপা লাশিচপুওয়া কাঁচকো ঝাহাদি ত্যাবাওয়া কা তিংয়ে। আউতাহা সেংচেং আসা আকো মুর্তিকো তোইতা আসা আকো মিংকো সংখ্যাকো তোইতা জিয়োমবিহা আপনিকো খুইতা সেংজাকো বীণা পুমসা আকু কাঁচকো ঝাহাদিকো আরিতা জাসুদিংমি।3আবিহা এপা জাংমসা সেংজাকো ডেইয়া মোসাকো লেহদি আসা লুকাকো লেহদি লেহসুদিংমি, “ও সে নিক্যইওয়া প্রভুসেংজা, নাকো কামহা টেবো আসা আআংপেপেচক্যইপা নিও, জ্যা-জ্যাকো জাইপু, নাকো ন্যাতাহা তাংজি আসা আজিপ্পা নিও।4ও প্রভুসেংজা, নাকোসোহা হাংসু মাচ্চুসুংমগা? আসা নাকো মিংকো মহিমাহা হাংসু মোজোমগা? হাংপাতানাহা নাতি মেংচে পবিত্র নিও। তাংসা জ্যাবি ওয়াংমসা নাকো নাগাইতা চুনুইরেরোওয়া, হাংপাতানাহা নাকো তাংজিকো কামবিহা তিংরেমি নিও।”5ই নুওয়াংকো নোইতাহা লোডিংবাতা নিওয়া সেংজাকো দেমসাহিং ওয়েদিংওয়া কাহা তিংয়ে, হানি গাওয়াইকো পবিত্র তাম্বুমে।6হাংপাওয়া আসা চাচাইক্যইওয়া আংদুং লুওয়া আসা তুংসিংতা সুন ত্যাবাওয়া কোংন্যা জিংওয়া নীচো লোডিংবাকো পোইংবি নীচো দুঃখবি পামসা দেমসাসো বাইরে নোয়ে।7আকু ডিপু ঙাজ্যইং সেংচেংবিতাহা ইপুহা হাত্রংদো ঙাজ্যইং য়ুংওয়া সেংজাকো সেদ্রাংসো মেইওয়া সুনকো নীচো কচৌরা আকু নীচো লোডিংবাকো পোইংহিং পিচায়ে।8আসা সেংজাকো মহিমা আসা আকো সেকো কারণ দেমসাহা মুদুইসো মেইপুয়ে। আকু নীচো লোডিংবাকো পোইংবিকো নীচো দুঃখ মাত্যইনু চোইপা হাংসুরে দেমসাকো নাপোতা হোমক্যইতো।
The Seed Company