প্রকাশ14
1ন্যাসারাং কা কাংহে, আসা কাহা সিয়োন লাগাতা লুকাহিং জাদিংওয়া তিংয়ে। আকো মিং আসা আকো আপাকো মিং, আপনি আপনিকো টিংঙাংতা ল্যাওয়া এক লাখ চুয়াল্লিশ হাজার দিংঙাবি আকুহিংপা নিমি।2টেবো ঝর্না আসা ডিংবাকো গারাংগুরুংকো শব্দবেপা লোডিংবাসো ইচো টেবো আওয়াজ লেওয়া কা হিংয়ে। আকু আওয়াজহা গোংটাং খ্যাপাওয়াবিকো উইসে গোংটাং বেওয়া ত্যাবাপারে হিংয়ে।3আকু একলাখ চুয়াল্লিশ হাজার দিংঙাবিহা মাটা গাদিংকো নাগাই আসা আকু দিচো ঙাজ্যইং সেংচেংবি আসা মাটা ওয়ারাংপাবিহা নাগাই জামসা ইচো চুবে লেদি লেহদিংমি। বাসিমতিতাহা মোল তামসা উদ্ধার মুংওয়া এক লাখ চুয়াল্লিশ হাজার দিংঙাবি ল্যামসা ই লেদিহা হাংসুরে ঝিকো মাছুতো।4আবিহা নামেরি মেমেবি বেপা চোসোপা নিও, হাংসু মানুংনাংসুয়াংমমে। আবিহা লুকাকো নুনুই মেংচে হুইমি নিমগা। আবিহিংয়া বাসিমতিকো দিংঙাবিকোসো বাচাইমি নিমগা আসা সেংজা আসা লুকাকো সোতা হাংসুরোমা নাগাই চড়াইওয়া ভেটিগা।5আবিকো নামুতা হাইরে প্যায়োং মামুংতো। আবিহা নির্দোষ নিও।6আকো নোইতা কাহা ডিংবাতা ভুইদিংওয়া দোসরা ইচো লোডিংবাকো পোইংহিং তিংয়ে। তাংসা জ্যা, জিরি, ক্যা আসা দেশকো দিংঙাবিহিং হিংপাকো আকুহা হাত্রংদো য়ুংওয়া এনতাওয়া দেরেং পামসা লেপামগা।7আকুহা সাডিংপা ঙামসা জাংয়ে, “সেংজাসো চুসুংকো জো, আসা আকো প্রশংসা জো, হাংপাতানাহা আকো দিংঙা জ্যাহিং ন্যায় জোওয়া সময়হা দেয়োংতেহে। ডিংবা, বাসিমতি, ঝাহাদি আসা তাংসা তিকো পাটিংবি বানাইওয়া সেংজাহিং মান-আদর পিচাকো জো।”8আত্রংহা নাগাইকো লোডিংবাকো পোইংকো নুনুইহা দোসরা লোডিংবাকো পোইংহা এপা জাংমসা লেহে, “তাংসা দাংপুয়ে! টেবো শহর বেবিলোনরে দাংপুয়ে, হাংপাতানাহা ই শহরহা বাসিমতিকো তাংসা জ্যাবিহিং আকো নুংনাংসুওয়াকো পোইপাসো পিয়াংমসা আবিহিং গাইপাপুয়ে।”9আকু নিহসো লোডিংবাকো পোইংবিকো নোইতা তিন নম্বর লোডিংবাকো পোইংহা সাডিংপা এপা জাংমসা ঙায়ে, “হাসে ইচো সেংচেংহিং অর্থাৎ আকো মুর্তিহিং মান-আদর জোমসা আকো ছাপ আপনিকো টিঙাংতা মোকোনাহা খুইতা লাং,10আবিহিংয়া সেংজাহা আপনিকো সেদ্রাংওয়াকো পোইপাসো পিয়াংরোওয়া। আবিহা পবিত্র লোডিংবাকো পোইংবি আসা লুকাকো নাগাই মেহ আসা গন্দকতা কোইচ্যানেরোওয়া।11আসা আবিহিং পুংওয়া মেহকো মুদুইহা সদাইদিন য়ুতা য়ুতা ভুইপুমসা হোপুরোওয়া। হাসে ইচো আকু সেংচেংহিং আসা আকো মুর্তিহিং মান, আদর জো, আসা আকো ছাপ লাগাই, জেংপা-লিপা আপনিকো সজায়সো সাচা মামুংরোওয়া।”12সেংজাকো পবিত্র দিংঙাবি, হাংসু সেংজাকো য়্যইদিহিং মানে আসা প্রভু ইশুকোতা দেংওয়া এমমে, আবিহা স্থির জিংমসা য়ুংনেরোওয়া।13আকো নোইতা লোডিংবাসো এপা জাংদিংওয়া ইচো শব্দ কা হিংয়ে, “ই নুওয়াং লা: ইসো য়ুতা হাসে ইচো দেংমসা প্রভুকো সেওয়াতা সিমমে, আবিহা আশিষিত গা।” পবিত্র লাংবেহা এপা জাংমসা জবাব পিচায়ে। “আজ্জিপ্পারাংগা, হাংপাতানাহা ইসো য়ুতা আবিহা আপনিকো দুঃখ আসা কোইচ্যাওয়াসোহা আরাম মুংচারোওয়া আসা আবিকো কামহা আবিহিংপারাং হোপুরোওয়া।”14আকো নোইতা কা কাংহে, আউতা হাংপাওয়া ইচো বাদল তিংয়ে আসা আকো তোইতা ইচো দিংঙাকো চেংওয়াকো রুপ নিওয়া হাংসুমে ইচো গাদিংওয়া তিংয়ে। আকো পোরোতাহা সুনকো মুকুট নিমি আসা খুইতা ইচো দুকোইওয়া কাচি নিমি।15দোসরা ইচো লোডিংবাকো পোইংহা সেংজাকো দেমসাসো নোমসা বাদলতা গাদিংওয়াহিং এপা জাংমসা টেবো শব্দসো ঙায়ে, “কাচিসো মোইপ্যা চ্যা, হাংপাতানাহা সময় জিংতেহে। বাসিমতিকো মোইপ্যাহা মিংতেহে।”16আউসোহা বাদলতা গাদিংওয়ারাং আপনিকো কাচি বাসিমতিতা চালাইয়ে আসা বাসিমতিকো মোইপ্যাবি চ্যাচপুয়ে।17আকো নোইতা কাহা লোডিংবাতা সেংজাকো দেমসাসো লেওয়া দোসরা ইচো লোডিংবাকো পোইংহিং তিংহে। আকো খুইতারে দুকোইওয়া কাচি নিমি।18আসা মেহকো তোইতা অধিকার নিওয়া দোসরা ইচো লোডিংবাকো পোইংহা বেদিসো লেহে। আকুহা কাচি চুংওয়া লোডিংবাকো পোইংহিং টেবো আওয়াজতা এপা জাংমসা ঙায়ে, “কাচি চালাই আসা বাসিমতিকো আংগুরকো দুংরাইবি ঠেপুই, হাংপাতানাহা আবিহা মিংতেহে।”19আউসোহা আকু লোডিংবাকো পোইংহা আপনিকো কাচি বাসিমতিতা চালাইয়ে আসা আংগুরকো ঝুপ্পাবি ঠেপুয়ে। আসা আংগুরহিং ছুইমি ত্যাবাপা সেংজাকো চুসুংমাইসুংক্যইওয়া সেদ্রাংওয়াকো য়োটিতা বাডোইপুয়ে।20শহরকো বাইরেতা নিওয়া আকু আংগুরহা ছুইচপুয়ে আসা আকুসোহা তিন সো কিলোমিটার হিয়োপা আসা পাঁচ ফুট গহিরো য়ুতিকো জোরা বাংয়ে।
The Seed Company