প্রকাশ12
1আকো নোইতা লোডিংবাতা ইচো আআংপেপেচপুক্যইওয়া টেবো চিহ্ন তিংয়ে: সানিহিং লুওয়া ইচো মেমেহিং আউতা তিংয়ে, আকো কোকোইকো লিতাহা তারি নিমি, আসা আকুহা পোরোতা বার্চো পুইমাকো মুকুট লুমি নিমি।2আকু মেমেহা চেং বুংমি নিমি, আসা আকুহা চেং কেকো ফেমা সু লোমসা সিওপারাং চিলিংদিংমি।3আসা লোডিংবাতা দোসরা ইচো চিহ্ন তিংয়ে: নীচো পোরো, ত্যাচো দাং আসা পোরোতা নীচো মুকুট লুওয়া টেবো অ্যালুইওয়া য়ুপুই পুইয়া তিংয়ে।4আকো মেরোংসো লোডিংবাকো তিন ভাগতাহা এক ভাগ পুইমাবিহিংয়া সাইমসা বাসিমতিতা বাডোইপুয়ে। চেং কেনতানি আকুহিং হুইচপুরো তামসা আকু য়ুপুই পুইয়াহা চেং কেদাংওয়া মেমেকো আবেইতা জায়ে।5আকু মেমেহা তাংসা জ্যাকো দিংঙাবিহিং চাকো দ্যইসো শাসন জোওয়া ইচো চেংওয়াহিং চেংপায়ে। আকো চেংওয়াহিংয়া সেংজাকোতা তোরোইপুমসা আকো গাদিংতা পুরায়ে।6আকু মেমেহা চিচ্চোওয়া জায়গাতা ক্যাপুয়ে, হাংতা এক হাজার দুইশো সাট্টি দিন চোইপা আকুহিং কাং-য়োকো তামসা সেংজাহা আকো সোতা জায়গা তৈয়ার জোমসা এমি নিমমে।7আসা লোডিংবাতা লুইসুয়ে। মাইকেল আসা আকো পোইংবিহা আকু য়ুপুই পুইয়াহিংপা লুইসুয়ে। পুইয়া আসা আকো পোইংবিরে লুইসুয়ে,8আদো আবিহা পোঙায়ে, আসা আবিকো সোতা লোডিংবাতাহা হাইরে জায়গারাং মোতো।9আকু টেবো য়ুপুই পুইয়াহিংয়া লেতা বাডোইপুয়ে, আকুহা শুরুকো পুইয়াগা, হানি তাংসা বাসিমতিহিং ল্যইপাওয়া দিয়াবলস শয়তানমে। আকুহিংয়া বাসিমতিতা বাডোইপুয়ে আসা আকো পোইংবিহিংনে আকুহিংপারাং চিত্তা বাডোইপুয়ে।10আত্রংহা কাহা লোডিংবাতা এপা জাংদিংওয়া ইচো টেবো আওয়াজ হিংয়ে, “নেহা কাবিকো সেংজাকো মুক্তি, সে, রাজ্য আসা আকো খ্রীষ্টকো অধিকার লেমি নিও। হাংপাতানাহা কাবিকো এবিহিং দোষ লাগাইওয়া, হাংসু কাবিকো সেংজাকো নাগাইতা নাবিহিং জেইসুং লিসুং দোষ লাগাইচাংমে, আকুহা লিতা বাডোইচাপুমি নিও।11আবিহা লুকাকো য়ুতি আসা আপনিকো গাওয়াইকো য়্যইদিকো কারণ আকুহিংয়া জিয়োমি নিও, আসা আবিহা সিপুনু চোইপারে আপনিকো সাদিকো জেজেংওয়া মেএতো।12আকো সোতা ও লোডিংবাতা য়ুংবাই, নাবিহা গাগ্রু। আদো বাসিমতি আসা ঝাহাদিহিংয়া ধিক্কার নিও! হাংপাতানাহা আপনিকো সময় লিয়োপা নিও তামসা সিদা চোইমসা দিয়াবলসহা সেদ্রাংপামসা নাবিকোতা লিতা লেমি নিও।”13হাত্রং আকু য়ুপুই পুইয়াহা আপনিহিং বাসিমতিতা বাডোইচপুওয়া তিং, আত্রংহা আকুহা চেংওয়া চেংপাওয়া আকু মেমেহিং ঘিপুয়ে।14আদো আকু মেমেহিংয়া আকু পুইয়াহা নাগাইসো চিচ্চোওয়া জায়গাতা ভুইপুমসা হ্যাকোসোতা টেবো টাংজাকো নিহসো বেগ্রেং পিচায়ে। আকু চিচ্চোওয়া জায়গাহা লো সুংনিংসো পেকো চোইপা আকু মেমেহিং কাং-য়োকো সোতা তৈয়ার জোওয়া নিমি।15আকু মেমেহিং ব্যান্যাসো জোচাকো তামসা আকু পুইয়াহা মেমেকো নুনুইসো আপনিকো নামুসো জোরা ত্যাবাপা তি নোপায়ে।16আদো বাসিমতিহা আকু মেমেহিং সহায়তা জোয়ে, আসা য়ুপুই পুইয়া আপনিকো নামুসো তি নোপাওয়া জোরাহিং বাসিমতিহা আপনিকো নামু গামসা হুইচপুয়ে।17আত্রংহা আকু য়ুপুই পুইয়াহা আকু মেমেহিংপা সেদ্রাংপুয়ে, আসা আকো লেরা চেংবিহিংপা লুইসুুকো হোয়ে: অর্থাৎ আবিহিংপা, হাংসু সেংজাকো আজ্ঞাবি পালন জোমমে আসা ইশুকো গাওয়াই পিচামমে।18আসা আকু য়ুপুই পুইয়াহা ঝাহাদিকো আরিতা জায়ে।
The Seed Company