প্রকাশ11
1আকো নোইতাহা নাপেওয়া দ্যই ত্যাবাক্যইমকো ইচো মিপা কাহিং পিচায়ে, আসা ইচোহা কাহিং জাংয়ে, “লোপুমসা হোতু, সেংজাকো দেমসা আসা আকো বেদিহিং নো আসা দেমসাতা আরাধনা জোমবিহিং চেং,2দেমসাকো বাইরেকো লাঙাংহিংয়া মোনোওগ্যই, হাংপাতানাহা আকুহা দোসরা জ্যাবিহিং পিচপুমি নিও, আসা বিয়ালিশ মহিনা চোইপা পবিত্র শহরহিংয়া আবিহা হুইংদ্যা-চিদ্যাইসুরোওয়া।3কুং নিহসো সাক্ছিবিহিংয়া এক হাজার দুইশো সাট্টি দিন চোইপা বোরাকো আংদুং লুমসা অগমবাণী য়্যইওয়া সে কা পিচারোওয়া।”4বাসিমতিকো প্রভুকো নাগাইতা জাদিংওয়া জেইতুনকো নিহতেং সিংতেংবি আসা দিব্রি এওয়া নিহসো সামদানবিহা ইরাংগা।5হাংসু দিংঙাবি আবিহিং খতি জোকো ইচ্ছা জো, আবিকো নামুসো নোওয়া মেহসো দুসমনহিংয়া আবিহা দাংপারোওয়া। হাংসু দিংঙা আবিহিং খতি জোকো ইচ্ছা জো, আকুহা আকু কিসিমসোরাং সিনেরোওয়া।6আবি অগমবাণী য়্যইনুকো দিনবিতাহা ওয়্যাতি মোওয়্যাকো তামসা ডিংবাহিং মেইওয়া আবিহিংপা সে নিও, আসা তিবিহিংনে য়ুতি বানাইকো আসা আবিকো ইচ্ছা জিংওয়া সময়তাহা বাসিমতিতা তাংসা কিসিমকো বিপদ পারাওয়া আবিকোতা সে নিও।7আবিকো আপনিকো গাওয়াইকো কাম ত্যইপাপুনতেনুকো নোইতাহা নাঘীওয়া লিমুসো নোপামসা লেওয়া আকু সেংচেংহা আবিহিংপা লুইসুমসা আবিহিংয়া জিয়োমসা স্যাপুরোওয়া।8আবিকো সিপুওয়া জুপাবিহা আকু টেবো য়রুশালেম শহরকো ন্যাতাবিতা ইপুওয়া নিরোওয়া, হাংতা নাবিকো প্রভু ক্রুসতা থ্যইচপুমি নিমমে। ই শহরহা উদারণতাহা “সাদোম” আসা “মিশ্র দেশ” ত্যাবাপা জিংপুনতেমি নিও।9সাসুংয়ুসো ইব্রে চোইপা আবিকো সিপুওয়া জুপাবিহিংয়া দিংঙাবি, জিরিবি, ক্যাবি আসা জ্যা-জ্যাকো দিংঙাবিহা ন্যইরোওয়া আসা আকু সিপুওয়া জুপাবিহিংয়া লিকো মিচারোওয়া।10বাসিমতিতা য়ুংবিহা আবিকো সিপুওয়াতা য়াংতাসুরোওয়া, গাগ্রুসুরোওয়া আসা তাইবিলারাই সোংসাবি য়ুচাওয়া-পিচাওয়া জোরোওয়া, হাংপাতানাহা আকু নিহসো অগমবক্তাবিহা বাসিমতিতা য়ুংওয়াবিহিংয়া শাস্তি পিচামি নিমগা।11সাসুংয়ুসো ইব্রেকো নোইতাহা সেংজাসো লেওয়া সাদিকো শ্বাসহা আবিকো নাপোতা হোপুয়ে, আসা আবিহা আপনিকো কোকোইতা জাসুয়ে, আসা আবিহিং তিংওয়া দিংঙাবিহা সিওপারাং চুসুংসুয়ে।12আসা আবিহা লোডিংবাসোহা এপা জিংওয়া ইচো টেবো আওয়াজ হিংয়ে, “ইতা তোইতা ওয়াং।” আসা আবিকো দুসমনবিহা ন্যইওয়া-ন্যইওয়া কোকোইত্তা আবিহা বাদলতা জিংমসা লোডিংবাতা হোয়ে।13আত্রংকো সময়রাং টেবো নিংঙা হ্যায়ে, আসা শহরকো ত্যাচো ভাগতাহা এক ভাগহা দাংপুয়ে, আসা নিংঙা হ্যাপুওয়াতা সাত হাজার দিংঙাবি সিপুইয়ে। লেরা বাচেওয়াবিহা চুসুংপুয়ে আসা লোডিংবাকো সেংজাহিং মহিমা জোয়ে।14নিহদ্যা বিপদহা পেংপুয়ে, “কাং, সুংদ্যা বিপদহা ন্যাসারাং দেপাদাংতেয়ো।”15আসা সাত নম্বর লোডিংবাকো পোইংহা আপনিকো পেপনে মুইয়ে, আসা আকো নোইতাহা লোডিংবাতা এপা জাংওয়া টেবো-টেবো আওয়াজবি নোয়ে, “বাসিমতিকো রাজ্যহা কাবিকো প্রভুসেংজা আসা আকো খ্রীষ্টকো রাজ্য জিংপুমি নিও, আসা আকুহা হাত্রংদো রাজ জোরোওয়া।”16আসা সেংজাকো নাগাই আপনি আপনিকো গাদিংতা গাওয়া আকু ইকাইসো ডিচো মাটা ওয়ারাংপাবিহা চুনুইসুমসা সেংজাহিং নোংসুয়ে,17আসা জাংসুয়ে, “ও সে নিক্যইওয়া প্রভুসেংজা, কাবিহা নাতিহিং গারানি তারোওয়া, হাংসু নিদিংমমে, আসা নিমমে, হাংপাতানাহা নাতিহা আপনিকো টেবো অধিকার খুইতা লাংয়ে আসা রাজ জোকো শুরু জোয়ে।18জ্যা-জ্যাবিহা সেদ্রাংপুমি নিও, আদো নাকো সেদ্রাংহা তিংরেয়ো। সিপুনতেমবিকো ইন্সাফ জোকো সময় দেয়োংতেহে, আসা নাকো ডেইয়াবি আসা অগমবক্তাবিহিং আসা পবিত্র দিংঙাবিহিং আসা নাকো মিংসো চুসুংওয়া ডিয়ো-চিয়োওয়াবিহিং তাংসাহিং ইনাম পিচাওয়া সময়, আসা নাকো বাসিমতিহিং দাংপাওয়াবিহিং দাংপাকো সময় দেয়োংতেহে।”19লোডিংবাতা সেংজাকো দেমসাহা ওয়েচপুয়ে, আসা আকো দেমসাকো নাপোতাহা আকো করারকো সন্দুক আসা তিত্রাইওয়াকো হাহাইওয়া তিংপুয়ে। চুসুংক্যইওয়া আওয়াজ আসা ডিংবা গারাংগুরুং তাওয়া হিংয়ে। নিংঙা হায়ে আসা টেরবো টেরবো ঝেসেবি হুইয়ে।
The Seed Company