প্রকাশ10
1কাহা বাদলতা মেরোইচপুওয়া দোসরা ইচো সে নিক্যইওয়া লোডিংবাকো পোইংহিং লোডিংবাসো উইওয়া তিংয়ে। আকো পোরোতাহা দিংস্রাই নিমি, আসা য়ুওয়াইহা সানি ত্যাবাপা আসা কোকোইবিহা মেহকো হুটিং ত্যাবাপা নিমি।2আকো খুইতাহা ওয়েমসা এওয়া ইচো আপেচাওয়া মুট্ঠা নিমি। আকুহা আপনিকো দাংক্রেং কোকোইহা ঝাহাদিতা আসা কেক্রেং কোকোইহা মোংটোতা এহে।3আসা সিংহ জ্যামবেপা আকুহা সাডিংপা ঙায়ে, আসা আকু ঙানুওয়া নীচো ডিংবা গারাং-গুরুংপা খ্যামবেপা আওয়াজ লেয়ে।4হাত্রং আকু নীচো ডিংবা গারাং-গুরুংওয়াবিহা আপনি আপনিকো আওয়াজবি নোপা, আত্রংহা কাহা হিগাতা লাকো শুরু জোদাংমি, আত্রংরাং লোডিংবাসো এপা জাংওয়া আওয়াজ কা হিংয়ে, “আকু নীচো ডিংবা গারাং-গুরুংপা জিংওয়াবিকো নোপাওয়া আওয়াজহিংয়া তুংসিং নাপোতা এহ, আসা আকুহা মালাঘ্যই।”5আত্রংহা ঝাহাদিতা আসা মোংটোতা জাওয়া হানি লোডিংবাকো পোইংহিং কা তিংমমে, আকুহা আপনিকো দাংক্রেং খুইহা লোডিংবাতা তোরোইয়ে।6আসা হাত্রংদো ঙাজ্যইং য়ুংওয়া, লোডিংবা আসা আউতা নিওয়া নুওয়াংবি, বাসিমতি আসা আউতা নিওয়া নুওয়াংবি, ঝাহাদি আসা আউতা নিওয়া নুওয়াংবি দিংওয়া সেংজাকো মিংতা লোডিংবাকো পোইংহা নাপোইমসা জাংয়ে, “নেহা সময় মোতো।”7আদো আকু দিনবিতাহা হাত্রং সাত নম্বর লোডিংবাকো পোইং আপনিকো পেপনে মুইদাং, আত্রংহা আকুহা আপনিকো ডেইয়া অগমবক্তাবিহিং ঘোষনা জোমি ত্যাবাপা সেংজাকো নাপোকো নুওয়াংবিহা পুরা জিংরোওয়া।8আত্রংহা লোডিংবাসো কাহা কুং হিংওয়া আওয়াজহা কাহিংয়া ন্যাসারাং এপা জাংয়ে, “হ্যাতু, ঝাহাদি আসা মোংটোতা জাওয়া পোইংকো খুইতা নিওয়া সোকুকো মুট্ঠা য়ুচা।”9আসা কাহা লোডিংবাকো পোইংকোতা হোয়ে আসা আকু হিগাকো মুট্ঠা য়ায়ে। আসা আকুহা কাহিং জাংয়ে, “ই য়ুচা, আসা চা। ইসোহা নাকো ফেমাহিংয়া য়্যাচোংপা জোরোওয়া, আদো নাকো নামুতাহা আকুহা সুউমাকো পুটি ত্যাবাপা থেহজিংপা জিংরোওয়া।”10কাহা আকু লোডিংবাকো পোইংকো খুইসোহা আকু মুট্ঠা চুংয়ে, আসা চায়ে। কুং নামুতাহা আকুহা সুউমাকো পুটি ত্যাবাপা থেহজিংপা জিংপুয়ে, আদো আকু চাপুনতেনুওয়া কুং ফেমাহা য়্যাচোংপা জিংপুয়ে।11আত্রংহা কাহিংয়া ই নুওয়াং জাংয়ে, “নাতিহা উইসে দিংঙাবি, জ্যাবি, ক্যাবি আসা জাইপুবিকো বিষয়তা ন্যাসারাং অগমবাণী য়্যইনেরোওয়া।”
The Seed Company