ফিলিপ্পী4
1আকো সোতা কুং ডুওয়া এবাই আসা হুম্রিবাই, কা নাবিহিংয়া জেজেংপা জোমগা, আসা নাবিহিংয়া সিওপারাং গর্ব জোরোওয়া। নাবিহা কুং গাগ্রুওয়া আসা মুকুটগা। ও ব্যারোবাই, এপারাং নাবিহা প্রভুতা সাডুংপা জিংমসা য়ুং।2ইয়োদিয়াহিং আসা সন্তুখেহিংয়া নাবিহা প্রভুতাহা আনা আসা হুম্রি জিংমসা চাংচুমসা য়ুং তাওয়া কুং বিন্তি নিও।3ও কুং ভরসা জোকো ছুওয়া ব্যারো, ই নিহসো মেমে দিংঙাবিহিং সহায়তা পিচা, হাংপাতানাহা আবিহা এনতাওয়া দেরেং হিংপাওয়াতা কাহিংপারাং সিওপা কাম জোমি নিও আসা কাহিংপা মেংচে মোকো, আদো আবিহা ক্লেমেসহিংপা আসা দোসরা সাদিকো হিগাতা মিং নিওয়া কুং ব্যারোবিহিংপারে কাম জোয়ে।4প্রভুকোতা হাত্রংদো গাগ্রুকো জো, কা ন্যাসারাং জাংরোওয়া, গাগ্রুকো জো।5প্রভুহা সেন্নেপারাং লেরোওয়া, আকো সোতা নাবিকো নম্র জিংমসা য়ুংওয়াহা তাংসা দিংঙাবি সিদা চ্যইকো।6হাই নুওয়াংতারে সিংদুমঘ্যই, আদো নাবিহিং ঘ্যইওয়া নুওয়াংবিহা পাচাইমসা সেংজাকোতা য়াচা আসা গারানি তামসা বিনতি পিচাকো জো।7সেংজাকো তিমেওয়াহা হাংসুরে কোইকো মাছুক্যইপা নিও। ই তিমেওয়াহা নাবিকো তুংসিং আসা নোচেংহিং খ্রীষ্ট ইশুকোতা জোগায়মসা এরোওয়া।8নোইস্যাতাহা ডুওয়া এবাই আসা হুম্রিবাই, হানি নুওয়াং আজিপ্পা নিমমে, হানি নুওয়াং আদরনীয় নিমমে, হানি নুওয়াং ন্যায় সংঙ্গত নিমমে, হানি নুওয়াং শুদ্ধ নিমমে, হানি নুওয়াং জেজেংপা নিমমে, হানি নুওয়াং কৃপাময় নিমমে, য়দি হাংসু শ্রেষ্টতা আসা প্রশংসাকো য়োগ্য়্যমি নিনাহা ই নুওয়াংবিকো বিচার জো।9নাবিহা হানি নুওয়াং কুংসো ঝিমি নিমমে, গ্রহন জোমি নিমমে, হিংমি নিমমে আসা কুং জোওয়া তিংমি নিমমে, আকুরাং নাবিহা জো, আসা তিমেওয়াকো সেংজাহা নাবিহিংপা নিরোওয়া।10প্রভুতা কা সিওপারাং গাগ্রুপা নিও। উইসে সময়কো নোইতা ন্যাসারাং কাহিং প্যারাপাকো মৌকা মুংয়ো। ই জাংওয়াহা কাহিং প্যারা মাপাতো তাওয়া মোকো, আদো প্যারাপাওয়া মৌকা মামুংয়াংমগা।11কাহিং দরকার নিও তামসা জাংওয়া মোকো, হাংপাতানাহা হাই নুওয়াং কুংতা নি, আউতারাং সন্তুষ্ট য়ুংকো কাহা ঝিমি নিও।12ঘ্যইনু চুইবা, মোঘ্যইনু চুইবা, হেপা সাদিহিং নাগাই গ্যইপানেকোমে, কা গেদিংয়ো। হেপা জিংওয়া সময়তা চুইদো, গাইদো, হাপাংদো, উইসেতা জিংদো, আস্যস্যইতা জিংদো, কাহা সন্তুষ্ট য়ুংকো ঝিমি নিও।13কাহা খ্রীষ্টকো পিচাওয়া সেসোরাং ই তাংসা নুওয়াংবি জোকো ছুমগা।14আদো কুং দুঃখতাহা নাবিরে সহভাগী জিংপুয়ে, আকুহা এনতাপারাং জোয়ে।15শুরুতা কা এনতাওয়া দেরেং হিংপাদিংনুওয়া মাকেডোনিয়া হুইতেমসা হ্যাপুনুওয়া কাহিং সহায়তা জোওয়াহা নাবিকো মন্ডলি মেংচে নিমগা। আকুহা নাবিহা গেদিংমিরাং নিও। কাহিংপা পিচাওয়া য়ুচাওয়াহা নাবি মেংচে নিমগা।16হাংপাতানাহা থেসলোনিকেতারে নাবিহা কাহিং ইকোইরোমা সিওপারাং কুং সোতা সহায়তা কাইপুয়ে।17কাহা ভেটি মোওয়া মোকো, আদো কা নাবি এনতাওয়া কাম জোওয়াকো সোতা ইহা নাবিকো হিগাতা জম্মা জিংমসা হোকো।18কাহা মুংচানেওয়ারোমা সিওপা মুংচামি নিও। নাবিহা ইপাফ্রোডিটসকো খুইতা কাইপ্পিওয়া দানবি মুংচামসা কাহা গাগ্রুপা জিংপুমি নিও। আকু দানবিহা সেংজাহিং মনপোরেওয়া ও্যহও্যইপা মেনাংওয়া আসা গ্রহন য়োগ্য়্য বলিদানগা।19কুং সেংজা আপারাং নাবিকো খাঁচোহিংয়া পুরা জোপিরোওয়া। খ্রীষ্ট ইশুকোতা নিওয়া আকো হাত্রংরে মামাওয়া পুংজিসোরাং নাবিহিং গ্যইওয়া নুওয়াং পিচারোওয়া।20য়াংবিকো সেংজা আপাকো সদাইদিন মহিমা জিংকো। আমেন।21খ্রীষ্ট ইশুকোতা নিওয়া তাংসা সেংজাকো দিংঙাবিহিং কুং অভিবাদন নিও। ইতা কাহিংপা নিওয়া এবিরে নাবিহিং অভিবাদন কাইপুমি নিও।22খ্রীষ্ট ইশুকোতা নিওয়া তাংসা সেংজাকো দিংঙাবি আসা বিশেষ জোমসা রোমি সরকারকো দরবারতা নিওয়াবিরে অভিবাদন কাইপুমি নিও।23প্রভু ইশু খ্রীষ্টকো অনুগ্রহ নাবিকো লাংবেহিংপা নিকো।
The Seed Company