মথি8
1ইশু য়্যাগ্যইসো লেতা উইপাদাংনুওয়া উইসে দিংঙাবিহা আকো নুনুই হুইপায়ে।2আত্রংরাং ইচো য্যাসো মেইপুওয়া দিংঙা লেমসা আকো কোকোইতা নোংরেমসা জাংয়ে, “উটকেওয়া, নাতিবেমি সাংপাকো কেংনাহা কাহিংয়া সাংপাকো চুরোওয়া।”3ইশুহা আকো তোইতা খুই এমসা জাংয়ে, “নাতি সাংকো তামসা কা কেংরোওয়া।” আত্রংতারাং আকো য্যাহা সাংচপুয়ে।4ইশুহা আকুহিংয়া জাংয়ে, “কাং, ই নুওয়াংহা হাংসুহিংনে মাজাং। আদো পাউবিকোতা হোমসা আপনিহিং তিংপা আসা মোসাকো লাতেওয়া লিংপাংতা ত্যাবাপা ভেটি পিচামসা তাংসাহিং নাতিহা সাংতেয়ো তামসা প্রমান পিচা।”5ইশু কোর্ফরনহুম শহরতা ওয়াংনুওয়া ইচো রোমি কেপ্ট্যাইন ওয়াংমসা আকুহিং জাংচায়ে,6“ও প্রভু, কুং ডেইয়াহা তেইমক্যইওয়া য়োংন্যা নিওয়াকো সোতা নেহা দুঃখ মুমসা ন্যাগুতা জিংদিংনা।”7ইশুহা আকুহিংয়া জাংয়ে, “কা ওয়াংমসা আকুহিং সাংপারোওয়া।”8আদো কেপ্ট্যাইনহা জাংয়ে, “ও প্রভু, নাতিহা কুং সাতা ওয়াংনেক্যইপা এসেপাকো টেবো কা মোকো, আদো য়্যইদি মেংচে জাংপি, কুং ডেইয়াহা সাংচপুরোওয়া।9হাংপাতানাহা কারে কাইজিবিকো অধিকারতা নিও, আসা কুং অধিকারতারে সিপাইবি নিও। কা ইচোহিং ‘হ্যাতু’ তানাহা আকুহা হ্যামগা, আসা দোসরাহিং ‘ওয়াং’ তানাহা আকুহা ওয়াংমগা। কুং ডেইয়াহিং ‘এপা জো’ তানাহা আত্রংহা আকুহা জোমগা।”10ই নুওয়াং হিংমসা ইশুহা আআংপেপেচপুয়ে আসা আপনিকো নুনুই হুইওয়া দিংঙাবিহিং জাংয়ে, “আজিপ্পারাং কা নাবিহিং জাংরোওয়া, এসেপাকো টেবো দেংওয়া নিওয়া দিংঙাহা কাহা ইস্রাইলিবিকো প্যাকোতারে মোদোয়াংতো।11কা নাবিহিং জাংরোওয়া, নুসো আসা দিসোহা দোসরা জ্যাকো দিংঙা উইসে লেরোওয়া, অব্রাহাম, ইসাহাক আসা য়াকুবহিংপা লোডিংবাকো রাজ্যতা চাওয়া-আংওয়াতা গারোওয়া।12আদো সেংজাকো রাজ্যতা য়ুংকো তামসা জেংওয়া ইস্রাইলিবিহা বাইরে নাঘিওয়াতা বাডোইচাপুরোওয়া আসা আউতাহা আবিহা কাইরোওয়া আসা সেতাং কিট্টিওয়া।”13আকো নোইতাহা ইশুহা জাংয়ে, “তুরোওয়া, নেহা নাতিহা হোপুই, নাকো দেংমি ত্যাবাপারাং জিংরোওয়া।” আত্রংরাং কেপ্ট্যাইনকো ডেইয়াহা সাংচপুয়ে।14আকো নোইতা ইশুহা পত্রসকো সাতা হোয়ে। আউতা আকুহা পত্রসকো জুমেহিংয়া চোরোউ-চোরোউপা হাইমসা জিংদিংওয়া তিংয়ে।15ইশুহা আকো খুই সুয়ে আসা আকো হাইওয়াহা সাংচপুয়ে। আকুহা লোমসা আকুহিং চাওয়া-আংওয়াবি পিচায়ে।16জিরুং জিংপুনুওয়া দিংঙাবিহা সিংঙো দ্যইংচপুওয়া আসা উইসে হাইমবিহিং ইশুকোতা পারায়ে। ইশুহা আপনি য়্যইমসারাং সিংঙোবিহিং নোপায়ে আসা তাংসা হাইওয়াবিহিং সাংপায়ে।17এপারাং এশাইয়া অগমবক্তাকো জাংওয়া নুওয়াংহা তাংসা জিংয়ো: “আকুরাং য়োংকো জুপাকো য়োংন্যা আসা হাইওয়া-মোংওয়াবিহা আপনিরাং পুচায়ে।”18ইশুহা আপনিকো হুরাপা উইসে দিংঙা তিংমসা আপনিকো য়োংতোংবিহিং জাংয়ে, “তে, য়াংবিহা দাব্রিকো নুব্যাতা হ্যাকো।”19আত্রংরাং ইচো তাংজিকো উটকেওয়াহা আকোতা ওয়াংমসা জাংয়ে, “উটকেওয়া, নাতি হাংতা হ্যাবা কারে নাতিহিংপারাং হ্যারো।”20ইশুহা আকুহিংয়া জাংয়ে, “কাং, মাংস্রিবিকোহা গুংচোইকো হোরোংবা আসা জিয়া-জিপেইবিকোহা বাসা নিও, আদো দিংঙাকো চেংওয়াকোহা পোরো একো জায়গারে মোতো।”21আসা য়োংতোংবিকো প্যাকোতাহা ইচোহা জাংয়ে, “প্রভু, নাগাইহা কাহিং হোমসা কুং আপাকো সিপুওয়া জুপা লিকাকো পিচা।”22ইশুহা আকুহিংয়া জাংয়ে, “নাতিহা কুং নুনুই হুই, সিপুওয়া জুপাবিহা আবিরাং আপনিকো সিপুওয়া জুপাহিং লিচপুকো।”23ইশুহা নোওয়াইতা বাইয়ে আসা য়োংতোংবিরে আকুহিংপারাং চিত্তা ঝাহাদিকো নুব্যা হ্যাদাংয়ে।24একবিরি ঝাহাদিতা টেবো বিংঙা হ্যায়ে। তিকো চুরা লোমসা নোওয়াইহিংনাং নুপাপুদাংয়ে, আদো ইশুহা নোওয়াইতারাং জিংদিংওয়া নিমি।25আসা য়োংতোংবিহা ইশুহিংয়া এপা জাংমসা টুসুয়ে, “বাচাইপি প্রভু! য়াংবিহা নুচপুমসা সিপুদাংতেনা।”26ইশুহা আবিহিংয়া জাংয়ে, “নাবিহা হাংপা চুসুংমগা? হানি নাবিকো দেংওয়াহা?” আসা লোমসা আকুহা বিংঙা আসা ঝাহাদিহিং চিংচাইয়ে, আসা আকু চিংচাইনতানি বিংঙা আসা ঝাহাদিহা চিচোপুয়ে।27এপা জিংওয়া তিংমসা আবি তাংসা আআংপেপেচপুয়ে আসা জাংয়ে, “ইহা হেপাজিংওয়া দিংঙা মেতা? ইকো জাংওয়াহা বিংঙা জেসে আসা ঝাহাদিবিরে হিংমুং।”28ইশু ঝাহাদিকো নুব্যাই গদরিনিবিকো জায়গাতা দেরেনুওয়া আউতাহা তোম্যইবিরিসো সিংঙো দ্যইংচপুওয়া নিহসো দিংঙাবিহা আকুহিং দোসুয়ে। আবিহা সিওপারাং চুসুংমাইসুক্যইপা নিমি। আকো সোতা আকু জায়গাসোহা হাংসুরে তেইমক্যইমি।29আবিহা এপা জাংমসা ঙাসুয়ে, “ও সেংজাকো চেংওয়া, নাতিহা কাবিহিং হাং জোকো ওয়াংমগা? ন্যায় জোকো সময় মাজিংয়াংদো নাতিহা কাবিহিং দুঃখ পিচাকো ওয়াংমগা?”30আবিকোসো আস্যস্যই তানাংতা উইসে পাকাবিকো পারা য়োচোইদিংমি।31আসা আকু সিংঙোবিহা ইশুহিং জাংচায়ে, “কাবিহিংমি নোপাপুদানাহা আকু পাকাবিকো নাপোতা হোকো পিচা।”32আসা ইশুহা আকু সিংঙোবিহিংয়া জাংয়ে, “হোপুই!” আত্রংহা আবিহা নিহসো দিংঙাকোসো নোপুমসা পাকাবিকো নাপোতা হোপুয়ে। আসা পাকাকো পারাবিহা তাংসা য়্যাগ্যইসো ট্যইংমসা ঝাহাদিতা নুচপুমসা সিপুয়ে।33পাকা ল্যাচোইমবিহা ক্যাপুয়ে, আসা শহরতা হোমসা তাংসা নুওয়াং আসা আকু সিংঙো দ্যইংচপুওয়াবিহিংয়া হাং জিংপুমমে আকু তাংসা হিংপায়ে।34ই নুওয়াং হিংমসা শহরকো তাংসা দিংঙাবিহা ইশুহিং দোসপাকো লেয়ে, আসা আকুহিং তিংমসা দিংঙাবিহা আবিকো জায়গাসো হ্যাপুই তামসা আকুহিংয়া জাংচায়ে।
The Seed Company