মথি9
1আকো নোইতা ইশুহা নোওয়াইতা বাইপুমসা ঝাহাদিকো দিব্যা আপনিকো য়ুংওয়া শহরতা লায়োংয়ে।2আসা দিংঙাবিহা ইচো সাঁপেহিং ন্যাগু নিপারাং পুপামসা আকোতা পারায়ে। আকু দিংঙাবিকো দেংওয়া তিংমসা ইশুহা আকু সাঁপেহিং জাংয়ে, “ও চেংওয়া, নাতিহা সাডুংপা জিং, নাকো পাপহা ছমা জিংপুনতেয়ো।”3ইশুকো ই নুওয়াং জাংওয়া হিংমসা ইচো নিহসো তাংজিকো উটকেওয়াবিহা তাইবিলারাই জাংসুয়ে, “ই দিংঙাহা সেংজা ত্যাবাপা জোমসা পাপহিং ছমা জিংয়ো তামসা সেংজাহিং নিন্দা জোয়ো।”4আবিকো তুংসিংকো নুওয়াং কোইমসা ইশুহা জাংয়ে, “নাবিহা তুংসিংতা হাংপা এপাজিংওয়া মেংতাওয়া নোচেং নোমগা?5নেহা জাংকে, ই দিংঙাহিংয়া ‘নাকো পাপ ছমা জিংয়ো তাকো’ মোকোনাহা ‘লোমসা হোতু’ তাকো হানি জাংতোংপা নিংগা?6আদো কাং, ই বাসিমতিতা দিংঙাকো চেংওয়াহা দিংঙাকো পাপহিং ছমা জোওয়া অধিকার নিও তামসা নাবিহা গেকো ছুকো।” আসা আকুহা আকু সাঁপেহিং জাংয়ে, “লো, আসা আপনিকো ন্যাগু য়োপুমসা সাতা হোতু।”7আত্রংহা আকু দিংঙাহা তাত্রিংপা লোমসা সাতা হোপুয়ে।8ই আআংপেপেচপুওয়া কাম তিংমসা আকু দিংঙাবিহা চুসুংপুয়ে। সেংজাহা দিংঙাহিং এপা জিংওয়া সে পিচাওয়া তিংমসা আবিহা আকুহিংয়া প্রশংসা জোয়ে। ইশুহা মথিহিং মোউওয়া (মর্কুস ২:১৬-১৭; লুক ৫:২৭-৩২)9ইশুহা আউসো হ্যাদাংনুওয়া মথি মিং নিওয়া ইচো দিংঙাহিং তোংক্যা জুমবিকো গাচাংওয়া জায়গাতা গাদিংওয়া তিংয়ে, আসা আকুহিং জাংয়ে, “কুং নুনুই লেই।” আসা আকুহা লোমসা আকো নুনুই হুইপুয়ে।10আসা জিরুং মথিকো সাতা চাকো গানুওয়া, উইসে তোংক্যা জুমবি আসা দোসরা পাপিবি লেমসা ইশু আসা আকো য়োংতোংবিহিংপা চাকো গায়ে।11হাত্রং ইচো নিহসো ফরিসিবি ই তিং, আত্রংহা আবিহা ইশুকো য়োংতোংবিহিং জাংয়ে, “নাবিকো উটকেওয়াহা হাংপাসা তোংক্যা জুমবি আসা দোসরা পাপিবিহিংপা চাচাংমগা?”12ইশুহা ই হিংমসা জাংয়ে, “মাহাইমবিহিংয়া ডাক্তার মোঘ্যইমগা, আদো হাইমবিহিংয়া ঘ্যইমগা।13আদো নাবিহা তাংজিকো হিগাতা লাওয়া ই নুওয়াংহা হাং জাংকো কেংমে তামসা কোইকো জো, ‘কাহিংয়া বলিদান মোকো, নাবিকো লামতুওয়া ঘ্যইরোওয়া।’ হাংপাতানাহা কা তাংজি নিওয়াবিহিং মোকো, আদো পাপিবিহিং বাচাইকো লেমগা।”14আকো নোইতা বাপ্তিস্মা পিচাওয়া য়হুন্নাকো য়োংতোংবিহা ইশুকোতা লেহে আসা আকুহিং উইয়ে, “কাবি আসা ফরিসিবিহা হাত্রংদো উপাস য়ুংচামগা। আদো হাংপা নাকো য়োংতোংবিহা উপাস মায়ুংমগা?”15ইশুহা আবিহিং জাংয়ে, “বিয়ৌতা হোনুওয়া বিয়ৌলা চিত্তা নিনু চোইপা দিংঙাবিহা লোচোপেংঙেংপা জোমসা য়ুংকোগা? আদো আকু দিন দেয়োংরোওয়া, হাত্রং আবিহিংপা বিয়ৌলাহিং ওয়েংপাপুই, আত্রংহা আবিহা উপাস য়ুংরোওয়া।16“হাংসুরে জেবে আংদুংতাহা চুবে আংদুং মোতোরোওয়া, হাংপাতানাহা চুবে আংদুংমি তোনাহা জেবে আকু আংদুংহা চোংচপুমসা ন্যাসারাং সিওপা য়াইপুরোওয়া।17“হাংসুরে জেবে বেকোংকো জিয়োতাহা চুবে আংগুরকো য়ু মোওয়্যাইরোওয়া, মোকোনাহা জিয়োহা ওয়্যাপুরোওয়া, আসা য়ুরে ক্যাপুরোওয়া, আসা জিয়োরে মেংতাপা জিংপুরোওয়া। চুবে আংগুরকো য়ুহা চুবে বেকোংকো জিয়োতারাং এনেমগা, আসা নিহসোসা এনতাপা জিংমগা।”18ইশু ই নুওয়াং জাংওয়া কোকোইত্তা আউতা ইচো য়হুদিবিকো মাটা দিংঙা দেয়োংয়ে। আকুহা ইশুকো কোকোইতা নোংমসা জাংচায়ে, “উটকেওয়া, কুং চেমেহা নেগাতিগা সিপুনা, আদো নাতিমি ওয়াংমসা আকো তোইতা খুই ওইপিনাহা আকুহা ঙারোরোওয়া।”19ইশুহা লোপুমসা আকুহিংপারাং হোয়ে আসা য়োংতোংবিরে আকো নুনুই হুইপুয়ে।20আত্রংরাং ইচো লো বার্নিংসো য়ুতি মাচ্যাওয়া মেমেহা নুনুইসো লেমসা ইশুকো আংদুংকো আরিহিং সুয়ে,21হাংপাতানাহা আকুহা আকো “আংদুং মেংচে সুচা মুংদো কাহা সাংপুরোওয়া তামসা নোমি নিমি।”22ইশু নোই ল্যামসা কাংনুওয়া আকু মেমেহিং তিংয়ে, আসা জাংয়ে, “চেমে সাডুংপা জিং, নাকো দেংওয়াসো নাতিহিংয়া সাংপামি নিও।” আত্রংতারাং আকু মেমেহা সাংচপুয়ে।23আসা ইশুহা মাটা য়াইরসকো সাতা দেকায়ে, আকুহা আউতা সিপুওয়া জুপাহিং লিকাদাংনুকো বাশি মুইওয়াবি আসা উইসে দিংঙাবিহা চিলিংসুমসা কাইসুদিংওয়া তিংয়ে।24ইশুহা আবিহিং জাংয়ে, “বাইরেতা হ্যাতু, হাংপাতানাহা চেমেহা মিসিয়াংতো, আদো জিংদিংনা।” আবিহা আকো এপাজাংওয়া হিংমসা লেংসুয়ে।25তাংসাহিং বাইরে নোপাপুনতেনুওয়া আকুহা নাপোতা হোয়ে, আসা আকু চেমেকো খুই সুয়ে, আসা আকু চেমেহা তাত্রিংপা লোয়ে।26আসা আকু নুওয়াংহা আকু লুংবিকো তাংসা জায়গাতা বেইপুয়ে।27ইশুহা আকু জায়গাহিং হুইতেমসা হ্যাদাংনুওয়া নিহসো মিচো মাতিংওয়া দিংঙাবিহা “ও দাউদকো চেংওয়া, কাবিকো তোইতা লামতুপি” তামসা আকো নুনুই নুনুই হুইপুয়ে।28আকু সাতা দেকানতেনুকো নোইতাহা আকুহা সাকো নাপোতা হোয়ে, আসা আকু নিহসো মিচো মাতিংওয়া দিংঙাবিরে ইশু নিওয়াতা দেয়োংয়ে। ইশুহা আবিহিংয়া জাংয়ে, “কা ইহা জোকো চুরোওয়া তামসা নাবিহা দেংমগা?”
আবিহা আকুহিংয়া “ওই প্রভু” তামসা জাংসুয়ে।29আত্রংহা আকুহা আবিকো মিচো সুমসা জাংয়ে, “নাবিকো দেংমি ত্যাবাপারাং নাবিহিংয়া জিংকো।”30আসা আবিহা তিংকো চুয়ে। ইশুহা আবিহিংয়া “ই নুওয়াং হাংসুহিংনে মাজাংকো তামসা আজ্ঞা জোয়ে।”31আদো আবিহা হোয়ে, আসা আকু লোইকো তাংসা জায়গাতা আকো নুওয়াং হিংপায়ে।32আসা আবি হোপুনতেনুকো নোইতা দিংঙাবিহা ইচো সিংঙো দ্যইংচপুমসা য়্যইমক্যইওয়া দিংঙাহিং ইশুকোতা পারায়ে।33ইশু জেসাং নোপাপুনতানি আকু লেংবাহা য়্যইকো চুপুয়ে, আসা উইসে দিংঙাবিহা “ইস্রাইয়েল লোইতা এপাজিংওয়া হাত্রংরে মাতিংয়াংতো” তামসা আআংপেপেচপুয়ে।34আদো ফরিসিবিহা জাংসুয়ে, “জেসাংবিকো গিরিকো সেসো ইহা জেসাংবি নোপাচাংমগা।”35ইশুহা তাংসা শহর আসা লোইকো জোংসুওয়া সাবিতা ঝিপামসা সেংজাকো রাজ্যকো এনতাওয়া দেরেং হিংপামসা তাংসা দিংঙাবিকো য়োংন্যাবি সাংপামসা তেইয়ে।36উইসে দিংঙাবিহিং তিংমসা আকো তুংসিংহা আবিকো তোইতা লামতুপুয়ে, হাংপাতানাহা আবিহা গোইত্র মাতাওয়া লুকাবি ত্যাবাপা দুঃখ মুংওয়া আসা লাংচ্যা দিংঙাবি ত্যাবাপা নিমি।37আকুহা য়োংতোংবিহিং জাংয়ে, “মোইপ্যাহা উইসে নিও, আদো লুকুইবিহা লিয়োপা নিও।38নাবিহা মোইপ্যাকো গিরিহিংপা মোইপ্যা য়োওয়া লুকুইবি নিংপিকো তামসা পাচাই।”
আবিহা আকুহিংয়া “ওই প্রভু” তামসা জাংসুয়ে।29আত্রংহা আকুহা আবিকো মিচো সুমসা জাংয়ে, “নাবিকো দেংমি ত্যাবাপারাং নাবিহিংয়া জিংকো।”30আসা আবিহা তিংকো চুয়ে। ইশুহা আবিহিংয়া “ই নুওয়াং হাংসুহিংনে মাজাংকো তামসা আজ্ঞা জোয়ে।”31আদো আবিহা হোয়ে, আসা আকু লোইকো তাংসা জায়গাতা আকো নুওয়াং হিংপায়ে।32আসা আবি হোপুনতেনুকো নোইতা দিংঙাবিহা ইচো সিংঙো দ্যইংচপুমসা য়্যইমক্যইওয়া দিংঙাহিং ইশুকোতা পারায়ে।33ইশু জেসাং নোপাপুনতানি আকু লেংবাহা য়্যইকো চুপুয়ে, আসা উইসে দিংঙাবিহা “ইস্রাইয়েল লোইতা এপাজিংওয়া হাত্রংরে মাতিংয়াংতো” তামসা আআংপেপেচপুয়ে।34আদো ফরিসিবিহা জাংসুয়ে, “জেসাংবিকো গিরিকো সেসো ইহা জেসাংবি নোপাচাংমগা।”35ইশুহা তাংসা শহর আসা লোইকো জোংসুওয়া সাবিতা ঝিপামসা সেংজাকো রাজ্যকো এনতাওয়া দেরেং হিংপামসা তাংসা দিংঙাবিকো য়োংন্যাবি সাংপামসা তেইয়ে।36উইসে দিংঙাবিহিং তিংমসা আকো তুংসিংহা আবিকো তোইতা লামতুপুয়ে, হাংপাতানাহা আবিহা গোইত্র মাতাওয়া লুকাবি ত্যাবাপা দুঃখ মুংওয়া আসা লাংচ্যা দিংঙাবি ত্যাবাপা নিমি।37আকুহা য়োংতোংবিহিং জাংয়ে, “মোইপ্যাহা উইসে নিও, আদো লুকুইবিহা লিয়োপা নিও।38নাবিহা মোইপ্যাকো গিরিহিংপা মোইপ্যা য়োওয়া লুকুইবি নিংপিকো তামসা পাচাই।”
The Seed Company