মথি7
1ইশুহা ন্যাসারাং জাংয়ে, “দোসরাহিং দোষ মাটিংপা, আসা সেংজারে নাবিহিংয়া দোষ মাটিংপারোওয়া।2হাংপাতানাহা হেপা নাবি দোসরাবিহিং দোষি তিংপামে, এপারাং সেংজারে নাবিহিংয়া দোষি তিংপারোওয়া। হেপা নাবি দোসরাহিং জোমমে, এপারাং সেংজারে নাবিহিংনে জোরোওয়া।”3“নাবিহা দোসরাকো মিচোকো সিংচা তিংমগা, আদো আপনিকো মিচোকো সিংদ্রাংহা হাংপাসা মাতিংমগা?4নাবিকো আপনিকো মিচোতা সিংদ্রাং নিনাহা, আপনিকো আপু-এবিহিংয়া হেপা জাংকো চুকোগা? ‘হানি কা নাকো মিচোকো সিংচা নোপাপিরে তামসা।’5ও তেপিবাই! নাগাইহা নাকো আপনিকো মিচোকো সিংদ্রাংহিং নোপা, আসো মেংচে দোসরাকো মিচোকো সিংচা নোপাকো চোসোপা তিংরোওয়া।”6হানি পবিত্রনি, আকুহা খিয়াবিহিং মিচাগে, মোকোনাহা আকু খিয়াবিহা তুইপেং হুরামসা নাবিহিংনাং চিরোওয়া। নাবিকো মোতিবিহা পাকাবিকো নাগাইতা মাবাডোই, মোকোনাহা আকু পাকাবিহা আকুহিংয়া হিনদ্যা-চিদ্যাপুরোওয়া।7“য়াচা, নাবিহা মুংচারোওয়া। মোচোই, নাবিহা দোচারোওয়া। লাপুংবেচা, নাবিকো সোতা ওয়েপিরোওয়া।8হাংপাতানাহা য়াচামবিহিংয়া পিচারোওয়া, মোচোইমবিহা দোচারোওয়া আসা লাপুং বেচামবিকো সোতাহা ওয়েপিরোওয়া।9নাবিতাহা হাংসু এপাজিংওয়া আপা নিংগা, আপনিকো চেংওয়া কোব্রেং য়ানুওয়া লুংটুই পিচাওয়া?10আসা নায়া য়ানুওয়া পুইয়া পিচাওয়া?11এপারাং নাবিহা মেংতাপা জিংমসারে আপনিকো চেংওয়া-চেমেবিহিং এনতাওয়া নুওয়াংবি পিচাকো গেনাহা আকুরোমা লোডিংবাতা নিওয়া নাবিকো সেংজা আপাহা আকোতা য়াচামবিহিংয়া ঝান হাসে এনতা-এনতাওয়া নুওয়াংবি পিচাকোগা।12“দিংঙাবিহা নাবিহিং হেপা জোপিকো তামসা নাবি নোমমে, এপারাং নাবিরে আবিহিং জোপ্পি। ইরাং মোসাকো লাওয়া তাংজিকো লিংপাং আসা অগমবক্তাবিকো জাংতেওয়া মাটা নুওয়াংগা।13“আপেচাওয়া লাপুংসো সেংজাকো রাজ্যতা হোতু, হাংপাতানাহা টেবো লাপুং আসা টেবো ন্যাতাহা নরকতা পুরামগা। ই ন্যাতাসো হোমবিহা উইসে নিমগা।14আপেচাওয়া লাপুংসো আপেচাওয়া ন্যাতাহা হ্যামরাপা জিংমগা, আদো আকুরাং সাদিতা চোইপামগা। ই ন্যাতাহিং দোচওয়াবিহা সিওপা মাতামগা।15“প্যায়োং অগমবক্তাবিকোসো হোশিয়ার য়ুং, আবিহা বাইরেসোহা লুকা ত্যাবাপা জিংমসা ওয়াংরোওয়া, আদো নাপোসোহা চুসুং-মাইসুংক্যইওয়া চুংচাকো দোমা ত্যাবাপা জিংরোওয়া।16নাবিহা আবিহিংয়া আবিকো কামসোরাং নাইরোওয়া। সোসাকো সিংতেংসোহা আংগুর আসা লুংদিংকো সিংতেংসো মুইরাসে সেকোগা?17এপা জোমসারাং এনতাওয়া সিংতেংসোহা এনতাওয়া ফল সেমগা। আদো মেংতাওয়া সিংতেংসোহা মেংতাওয়া ফলরাং সেমগা।18এনতাওয়া সিংতেংহা মেংতাওয়া ফল সেমক্যইমগা, আসা মেংতাওয়া সিংতেংরে এনতাওয়া ফল সেমক্যইমগা।19এনতাপা ফল মেশেওয়া তাংসা সিংতেংবিহিংয়া নেমসা মেহতা বাডোইপুরোওয়া।20এপারাং নাবিরে অগমবক্তাবিহিংয়া আবিকো কাম জোওয়াবিসোরাং নাইরোওয়া।21“কাহিং ‘প্রভু, প্রভু’ তাওয়াবিতাহা লেরাহা সেংজাকো রাজ্যতা হোচা মামুংরোওয়া। লোডিংবাতা নিওয়া কুং আপাকো ইচ্ছা সেই কাম জোমবি মেংচে হোচা মুংরোওয়া।22ন্যায় জোওয়া দিনতাহা উইসে দিংঙাবিহা কাহিং এপা জাংরোওয়া, ‘প্রভু, ও প্রভু, কাবিহা নাকো মিংতা আগমবাণী মায়্যইংগা? নাকো মিংকো সে লাংমসা জেসাংবি মোনোপাংগা? আসা নাকো মিংতা আআংপেপেচপুওয়া কামবি মোজোংগা?’23আত্রংহা কা আবিহিংয়া জাংরোওয়া, ‘ও মেংতাপা কাম জোমবাই! নাবিহিংয়া কা মানাইয়াংনা। কুংসো তানাং হ্যাতু।’24“আজিপ্পারাং, কুং জাংওয়া ই নুওয়াং হিংমসা জোমবিহা সাডুংওয়া পাত্যারুংতা হুটিং চুমসা আপনিকো সা বানাইওয়া দুংজি নিওয়া দিংঙা ত্যাবাপা জিংমগা।25সা বানাই পুনতেনুওয়া টেবো ওয়্যাতি ওয়্যায়ে, ব্যান্যা হ্যায়ে, বিংঙা হ্যায়ে, আসা আকু সাতা সুচপুয়ে, আদো আকু সাহা ম্যাহ্যাতো, হাংপাতানাহা আকুহা সাডুংওয়া লুংটুইতা হুটিং চুউমসা বানাইওয়া সা নিমগা।26“আদো হাংসু কুং জাংওয়া হিংমসারে মোজো, আবিহা বার্পুইকো তোইতা সা বানাইওয়া তৌউজি দিংঙা ত্যাবাপা জিংমগা।27সা বানাইপুনতেনুওয়া ওয়্যাতি ওয়্যায়ে, বান্যা হ্যায়ে, বিংঙা হ্যায়ে আসা আকু সাতা সুচপুয়ে, আসা আকু সাহা হ্যাপুমসা বিনাশ জিংপুয়ে।”28ইশুহা এপা জিংওয়া নুওয়াং ঝিপাপুনতেনুকো নোইতাহা আকু হিংদিংওয়া উইসে দিংঙাবিহা আআংপেপেপা জিংপুয়ে,29হাংপাতানাহা আকুহা দোসরা তাংজিকো উটকেওয়াবি বেপা মোকোপা, আদো ইচো অধিকার নিওয়া দিংঙা ত্যাবাপা জিংমসা ঝিপাচাংমি।
The Seed Company