মথি24
1আকো নোইতা ইশুহা দেমসাসো নোমসা হ্যাদাংনুওয়া আকো য়োংতোংবিহা আকুহিংয়া দেমসাকো এনতাওয়া সাবি তিংপাকো তামসা আকো আবেইতা ওয়াংয়ে।2আদো আকুহা আবিহিংয়া জাংয়ে, “নাবিহা ই তাংসা তিংদিংয়ো, মোকোতা? আজিপ্পারাং কা নাবিহিং জাংরোওয়া, ইরুং লুংটুইকো তোইতা ইরুং লুংটুইরে মায়ুংরোওয়া, তাংসা হ্যাপুরোওয়া।”3ইশু জেইতুন য়্যাগ্যইতা গাদিংনুওয়া য়োংতোংবিহা চিচিপা ওয়াংমসা আকুহিং উইয়ে, “কাবিহিং জাংওয়া ই নুওয়াংহা হাত্রং জিংকোগা? নাকো লারেমসা লেপাদাংওয়া আসা ই বাসিমতিহা দাংপুদাংওয়া নিও তাওয়াকো চিহ্নহিংয়া কাবিহা হেপা সিদা চ্যইকোগা?”4ইশুহা আবিহিংয়া জাংয়ে, “হোশিয়ার য়ুং, হাংসুরে নাবিহিং ল্যহইপাকো মোছুকো,5হাংপাতানাহা উইসে দিংঙাবিহা ‘খ্রীষ্টগা’ তামসা কুং মিংতা লেরোওয়া আসা উইসে দিংঙাবিহিংয়া ল্যহপারোওয়া।6নাবিহা লুইসুয়ে তাওয়া আসা লুইসুওয়াকো দেরেংবি হিংরোওয়া। আদো আত্রংহা নাবিহা মাচ্ছুংগে। আকু তাংসা নুওয়াংবিহা জিংনেকোরাংগা, আদো বাসিমতিহা আত্রংতারাং মাদাংরোওয়া।7হাংপাতানাহা জ্যাকো তোইতা জ্যা আসা রাজ্যকো তোইতা রাজ্য বিরোধ জোসুরোওয়া, আসা জায়গা জায়গাতা চাওয়া আংওয়াবি মামুংপা জিংপুরোওয়া আসা নিংঙা হ্যারোওয়া।8আদো ই তাংসাহা দেপাওয়া চুসুংমাইসুং-ক্যইওয়াহা দুঃখকো শুরু মেংচেগা।9“আত্রংহা আবিহা নাবিহিংয়া প্যইমসা সতায়রোওয়া আসা কোইচ্যাপাকো স্যাপুরোওয়া, আসা কুং মিংকো সোতা তাংসা জ্যাবিহা নাবিহিংয়া আচকাপা জোরোওয়া।10আত্রংহা উইসে দিংঙাবিহা দেংকোরে ল্যাপুরোওয়া, আসা ইচোহা দোসরাহিং ধোকা আসা আচকাপা জোরোওয়া।11উইসে প্যায়োং য়্যইওয়া অগমবক্তাবি লেরোওয়া আসা উইসে দিংঙাবিহিংয়া দুদুইপারোওয়া।12আসা মেংতাওয়া সিওপা জিংপুওয়াকো সোতা উইসে দিংঙাবিকোতাহা জেজেংওয়ারে মোতোপা জিংপুরোওয়া।13আদো নোইস্যা চোইপা সহায়মসা সাডুংপা য়ুংবিহা বাচেরোওয়া।14আসা তাংসা জ্যাকো দিংঙাবি হিংকো তামসা বাসিমতিকো আরিকোংপে চোইপা সেংজাকো রাজ্যকো এনতাওয়া দেরেং হিংপারোওয়া, আকো নোইতা মেংচে বাসিমতিহা দাংপুরোওয়া।15“অগমবক্তা দানিয়েলকো ‘দেমসাকো পবিত্র জায়গাতা আচকাক্যইওয়া সোংসা এওয়া নিরোওয়া’ তামসা জাংওয়াহা নাবিহা তিংরোওয়া। (ই জাংওয়া নুওয়াংহা পড়াইমবিহা কোইকো।)16আত্রংহা হাংসু য়হুদিয়াতানি, আবিহা য়্যাগ্যইবিতা ক্যাচপুকো।17সাকো কেংবুতা নিমবিহা সাকো লিতা উইমসা নাপোতা নিওয়া সোংসাবি লাকো তামসা মোহোকো।18লুংনিংতা কাংপামবিহা লুচাওয়া আংদুংবি লাকোরে সাতা লাকামসা মোহোকো।19আত্রংহা ফেমাতা চেং নিওয়াবি আসা য়ো পেয়াংওয়া আয়ুবিহিংয়া হাসেকো চুসুং-মাইসুংক্যইপা জিংকোমে!20সেইগু আসা সানুকো দিনতা ক্যামঘ্যইকো তামসা নাবিহা সেংজাকোতা পাচাই।21হাংপাতানাহা আত্রংকো দিনতাহা এপাজিংওয়া টেবো দুঃখকো দিনবি দেয়োংরোওয়া, এপাজিংওয়াহা বাসিমতিহিং দিংওয়াসোহা হাত্রংরে নেচোইপা মাজিংয়াংতো, আসা হাত্রংরে জিংকোরে মাজিংরোওয়া।22সেংজামি আকু দুঃখকো দিনহিংয়া লিয়োপা মোজোপিনাহা, হাংসুরে বাচেমক্যইকোগা, আদো আপনিকো জেংওয়া দিংঙাবিকো সোতা আকুহা আকু দিনবিহা লিওপা জোপিরোওয়া।23“আত্রংহা নাবিহিংয়া দোসরামি ‘কাং, খ্রীষ্টহা ইতা নিও আসা উতা নিও’ তামসামি জাংনাহা এপাজিংওয়া নুওয়াংবিতাহা মাদেং।24হাংপাতানাহা প্যায়োংকো খ্রীষ্টবি, আসা প্যায়োং অগমবক্তাবি তিংরেরোওয়া, আবিহা টেরবো টেরবো চিহ্নবি তিংপামসা ছুওয়া সেই সেংজাকো জেংওয়া দিংঙাবিহিংনে ল্যইপারোওয়া।25কাং, কাহা নাবিহিংয়া ই নুওয়াংহা নাগাইসোরাং জাংপুনতেমি নিও।26“দিংঙাবিমি নাবিহিংমি ‘কাং, খ্রীষ্টহা চিচ্চোওয়া জায়গাতা নিও’ তামসামি জাংনাহা বাইরে নোমসা মাহ্যা। আসা ‘কাং, আকুহা নাপো সিরিবিতা নিও’ তামসা জাংদো আবিকো তোইতা মাদেং।27হাংপাতানাহা হেপা নুব্যাসো তিত্রাইনু দিব্যাতা চোইপা হাহাইপা তিংমমে, এপারাং দিংঙাকো চেংওয়া লেনুরে তিংরোওয়া।28হাংতা অ্যাপুওয়ানি, আউতাহা সিগুংবিরে পুংসুমগা।29“আকু দুঃখকো দিনবিতাহা তাত্রিংপা সিনিহা নাটুংপা জিংপুরোওয়া, আসা তারিরে হাংজি মিচারোওয়া, আসা পুইমাবিহা ডিংবাসো হুইচারোওয়া আসা ডিংবাকো সেবিহা য়াচপুরোওয়া।30আত্রংহা দিংঙাকো চেংওয়াকো চিহ্নহা ডিংবাতা তিংরোওয়া, আসা বাসিমতিকো তাংসা জ্যাকো দিংঙাবিহা লোচোপেংগেংপা জিংপুরোওয়া, আসা আবিহা দিংঙাকো চেংওয়াহিংয়া ডিংবাকো মুওয়াবিতা সে আসা টেবো মহিমাতা দেপাওয়া তিংরোওয়া।31আকুহা আপনিকো লোডিংবাকো পোইংবিহিংয়া পেপনেকো টেবো আওয়াজতা চিত্তা নিংপুরোওয়া, আসা আবিহা ডিংবাকো ইচো আরিসোহা দোসরা আরি চোইপা তাংসা জায়গাসোরাং আকো জেংওয়াবিহিং জমা জোরোওয়া।32“আদো মুইরাকো সিংতেংসো ইচো নুওয়াং ঝি। হাত্রং আকো গেইবেবি নোমরাংগাং, আসা সিংতেংহা নোইচু নোইদাং, আত্রংহা বোওয়াহা আবেইতা দেপাদাংতেও তামসা নাবিহা সিদা চ্যইমগা।33এপারাং কুং জাংওয়া ই তাংসা নুওয়াংবি জিংদিংওয়া নাবি তিংনুওয়া কা লেপাদাংতেয়ুং তামসা নাবিহা গেরোওয়া।34কা নাবিহিংয়া আজিপ্পারাং জাংরোওয়া, ই তাংসা নুওয়াংবি মাজিংয়াংনু চোইপা নেকো দিংঙাবিহা মাসিরোওয়া।35ডিংবাসো বাসিমতিহা য়াংপুরোওয়া, আদো কুং জাংওয়া নুওয়াংবিহা হাত্রংরে মায়াংরোওয়া।36“আদো আকু দিন আসা সময়বিহা হাত্রং জিংকোমে তামসাহা হাংসুরে মেগেমগা, লোডিংবাকো পোইংবিরে মেগেমগা আসা চেংওয়ারে মেগেমগা, আদো সেংজা আপা মেংচে গেমগা।37দিংঙাকো চেংওয়া লারেমসা লেপানুওয়া নোহাকো সময়তা ত্যাবাপা জিংরোওয়া।38হাংপাতানাহা ব্যান্যা হ্যানুরোমা নাগাই নোহা তিকো জাহাজকো নাপোতা মোহোয়াংনু চোইপা দিংঙাবিহা চাদিংমগা, আংদিংমগা আসা বিয়ৌবি জোদিংমগা।39আসা বান্যাসো জোওমসা সিপুনুরোমা নাগাইহা হাং জিংকোমে তাওয়া আবিহা হাইরে মেগেয়াংমগা। আকু ত্যাবাপারাং দিংঙাকো চেংওয়া লেনুরে জিংরোওয়া।40আকু সময়তাহা নিহসো দিংঙাবিহা নিয়াংতা কাম জোদিংওয়া কোকোইত্তা ইচোহিংয়া পুরাচারোওয়া ইচোহিংয়া হুইতেরোওয়া।41নিহসো মেমেবিহা ওয়াংটা হুইসুদিংনুওয়া ইচোহিংয়া পুরাচারোওয়া, ইচোহা হুইতেরোওয়া।42আকো সোতারাং নাবিরে হাত্রংদো তৈয়ার য়ুং, হাংপাতানাহা নাবিকো প্রভু হাত্রংকো দিন লেকোমে নাবিহা সিদা মোচ্যইরোওয়া।43সাকো গিরিওয়াহা কুইওয়া হাত্রং ওয়াংকোমে তামসা সিদা চ্যইনাহা আকুহা মাজিংপা সাহিং খুইমসা কুকো মিচাকোগা তাওয়া নুওয়াং নাবিহা কোইকো জো।44আকো সোতারাং নাবিরে হাত্রংদো তৈয়ার য়ুং, হাংপাতানাহা দিংঙাকো চেংওয়াহা নাবি মোনোমি চুইনুরাং লেরোওয়া।45“হাংসু ডেইয়া দেংকো চুওয়া আসা দুংজি নিওয়া নিংগা, আকুহিংয়া সাকো গিরিহা আকো সাহিং কাংকো চি ত্যইমসা দোসরা ডেইয়াবিহিং সময়-সময়তা চাওয়া-আংওয়াবি পিচাকো তামসা খুইতেমগা।46আকু সাকো গিরি লায়োংমসা ওয়াংনুওয়া আকুমি দোসরা ডেইয়াবিহিং এপারাং জোদিংওয়া দোসুনাহা, আকুহিংয়া ইনাম পিচারোওয়া।47আজিপ্পারাং, কা জাংরোওয়া, আকু সাকো গিরিহা আকু ডেইয়াহিংয়া আকো তাংসা পুংজিবিকো তোইতা অধিকার পিচারোওয়া।48আদো আকু মেংতাওয়া ডেইয়ামি আকো তুংসিংতা, ‘কুং গিরিহা তানাংতা হোমি নিও, আসা সেন্নেপা মেলেরোওয়া’49তামসা কাম জোওয়া ব্যারোবিহিং ডুমসা গাইমবিহিংপা চাকো আংকো কেংনাহা,50আকু ডেইয়াকো গিরিওয়াহা আকু মেগেমি চুইনু আসা মোনোমি চুইনুকো সময়তারাং দেরেরোওয়া।51আসা আকো গিরিওয়াহা আকুহিংয়া সিওপারাং ডুমসা তেপি দিংঙাবিহিংপা চিত্তা দন্ড পিচারোওয়া। আউতা আকুহা কাইরোওয়া আসা সেতাং কিট্টিরোওয়া।”
The Seed Company