মথি23
1আত্রংহা ইশুহা উইসে দিংঙাবি আসা আপনিকো য়োংতোংবিহিং জাংয়ে,2“তাংজিকো উটকেওয়াবি আসা ফরিসিবিহা মোসাকো লিংপাংহিং ঝিপাওয়া অধিকার মুংচামি নিও।3আকো সোতা আবিকো জাংওয়া হিং, আসা জো, আদো আবিকো জোমি ত্যাবাপাহা মোজো, হাংপাতানাহা আবিহা ঝিপাকোহা ঝিপামগা, আদো আপনিবিহা মোজোমগা।4আবিহা পুউকো মাঠুইওয়া লিংপাংকো ব্যা জিংমসা দিংঙাবিকো বুচুংতা এমগা। আদো আবি আপনিহা আকু তোরোইকোরে ইক্র্যোই ক্র্যোইসোরে মাসুমগা।5“আদো আবিহা আপনিকো তাংসা কামবিহা দিংঙাবিহিং তিংপাকো সোতা মেংচে জোমগা। আবিহা আপনিকো তিঙাং আসা খুইবিতাহা লিংপাংতা লামি নিওয়া টেরবো টেরবো বুটিবি বানাইমসা জিংমগা, আসা আপনিহিং তাংজি তিংপাকো সোতা লুওয়া আংদুংবিতা হিয়ো-হিয়োপা ঝুমকাবি থ্যইমগা।6চাওয়া-আংওয়াবিতা আদর আসা জোংসুওয়া সাবিতা এনতা-এনতাওয়া গাদুবিতা গাকো কেংমগা,7আসা হাতিবিতা দিংঙাবি অভিবাদন তামসা জাংওয়া আসা উটকেওয়া তাপিওয়া এনতামগা।8“আদো নাবিহিংয়া হাংসুরে ‘উটকেওয়া’ তামসা মাজাংকো, হাংপাতানাহা নাবিকোহা ইচো মেংচে উটকেওয়া নিও, আসা নাবিহা তাংসা ডুওয়া-এবি আসা আনা-হুম্রিবিগা।9নাবিহা বাসিমতিতা হাংসুহিংনে আপা তামসা মাজাংঘ্যই, হাংপাতানাহা নাবিকোহা ইচো মেংচে আপা নিও, আকুহা লোডিংবাতা য়ুংমগা।10নাবিহিংয়া হাংসুরে ‘উটকেওয়া’ তামসা মাজাংকো, হাংপাতানাহা নাবিকোহা ইচো মেংচে উটকেওয়া নিও, আকুহা খ্রীষ্টগা।11নাবিকো প্যাকোতাহা হাংসু টেবোনি, আকুহা নাবিকো ডেইয়া জিংরোওয়া।12হাংসু আপনি টেবো জিংকো কেং, আকুহা আপেচপা জিংপুরোওয়া, আসা হাংসু আপনিহিং আপেচপা জোকো কেং, আকুহা টেবো জিংপুরোওয়া।13“টেবো দুঃখ ওয়াংরোওয়া, নাবি তাংজিকো উটকেওয়া আসা ফরিসি তেপিবাই! হাংপাতানাহা নাবিহা দিংঙাবিকো সোতাহা সেংজাকো রাজ্যকো লাপুং তুংমি নিও। নাবিহা আপনিরে মোহোমগা, আসা হোদাংওয়াবিহিংনে হোকো মিচামগা।14[নাবিকোতা টেবো দুঃখ ওয়াংরোওয়া, তাংজিকো উটকেওয়া আসা ফরিসি তেপিবাই! নাবিহা মুরিংবিহিং ল্যইপামসা আবিকো সা আসা মোংটো-কেটোবি গিংচামগা, আসা তিংপাকো সোতা ডালাইপা পাচাইমগা। আকো সোতা নাবিহা দোসরারোমা সিওপা দন্ড মুংরোওয়া।]15“নাবিকোতা টেবো দুঃখ ওয়াংরোওয়া, নাবি তাংজিকো উটকেওয়া আসা ফরিসি তেপিবাই! হাংপাতানাহা নাবিহা ইচো দিংঙাহিং য়হুদিবিকো তাংজিতা পারারো তামসা মোংটো আসা ঝাহাদিকো ন্যাতা তেইমগা, আসা আকু য়হুদিবিকো লিংপাংতা ওয়াংপুনতেনুওয়া নাবিহা আকুহিংয়া নাবিরোমা সিওপা নরকতা দন্ড মুংওয়া বানাইমগা।16“টেবো দুঃখ ওয়াংরোওয়া, নাবি মিচো মাতিংওয়া উটকেওয়াবাই! হাংসু জাংদিংগা, দেমসাকো তোইতা নোপোইনুওয়া হাংসুনে হাইরে মাজিং, আদো দেমসাকো সুনকো তোইতা নোপোইনুওয়া আকু নোপোইওয়াসো জিংচপুরোওয়া।17হাইরে মেগেওয়া আসা মিচো মাতিংওয়াবাই, হানি ডিয়োমগা? সুনগা না সুনহিং পবিত্র জোওয়া দেমসাগা?18‘ভেদিকো তোইতা নোপোইনুওয়া হাইরে মাজিংমগা, আদো আকো তোইতা এওয়া ভেটিকো তোইতা নোপোইনাহা আকু নাপোইওয়াসোহা জিংচপুমগা।’19ও মিচো মাতিংওয়াবাই, হানি ডিয়োমগা? ভেটিগা না ভেটিহিং পবিত্র জোওয়া ভেদিগা?20আকো সোতা ভেদি সুমসা নাপোইওয়াহা ভেদি আসা আউতা পিচাওয়া তাংসা ভেটিবি সুমসা নাপোইমগা।21দেমসাকো তোইতা নাপোইওয়াহা দেমসা আসা আকো নাপোতা নিওয়াকো তোইতা নাপোইমগা।22লোডিংবাকো তোইতা নাপোইওয়াহা সেংজাকো গাদিংকো আসা আউতা গাওয়া সেংজাকো মিংতারাং নাপোইমগা।23“নাবিকোতাহা টেবো দুঃখ ওয়াংরোওয়া, নাবি তাংজিকো উটকেওয়া আসা ফরিসি তেপিবাই! হাংপাতানাহা নাবিহা পুদিনা, সোঁপ আসা জিরাকো দশাংশ সেংজাহিং পিচামগা, আদো লিংপাংকো মাটা নুওয়াং ন্যায়, লামতুওয়া আসা দেংওয়াবিকোহা প্যারামাপামগা। আকু দোসরা নুওয়াংবিহিংপাহা নাবিহা ই লিংপাংকো নুওয়াংবিরে জোনেকোগা।”24ও নাবি মিচো মাতিংওয়া অগুওয়াবাই, নাবিহা মুদুহিংয়া য়িমগা, আদো ত্যাইরম্যাহিংয়া হুইচপুমগা।25“নাবিকোতাহা টেবো দুঃখ ওয়াংরোওয়া, তাংজিকো উটকেওয়া আসা ফরিসি তেপিবাই! হাংপাতানাহা নাবিহা চোপোই আসা বারাংকোহা বাইরে কাটুহা মেংঝিমগা, আদো নাপো কাটুসোহা বাংওয়া আসা আপনিকো মেংতাওয়া ইচ্ছাহিং স্যামক্যইওয়াসো মেইওয়া নিমগা।26মিচো মাতিংওয়া ফরিসিবাই, নাগাইহা চোপোই আসা বারাংকো নাপো কাটু মাইঝি, আসা আকো বাইরে কাটুরে চাইচাইপা জিংকো।27“নাবিকোতাহা টেবো দুঃখ ওয়াংরোওয়া, তাংজিকো উটকেওয়া আসা ফরিসি তেপিবাই, হাংপাতানাহা নাবিহা চুরাই ন্যাওয়া তাম্যইবি ত্যাবাপা নিও, হানি বাইরে কাটুসো জেজেংপা তিংমমে, আদো নাপো কাটুসোহা সিপুওয়া দিংঙাবিকো লুইটোবি আসা তাংসা মেংতাওয়াসো মেইমি নিমগা।28এপারাং নাবিরে বাইরে দিংঙাবিকো নাগাইতা তাংজি তিংমগা, আদো নাপোতাহা তেইপি আসা মেংতাওয়াসো মেইমি নিমগা।”29“নাবিকোতাহা টেবো দুঃখ ওয়াংরোওয়া, নাবি তাংজিকো উটকেওয়া আসা ফরিসি তেপিবাই! হাংপাতানাহা নাবিহা অগমবক্তাবিকো সোতা তোম্যইবি বানাইমগা, তাংজি নিওয়াবিকো তাম্যইহিং সাজাইমগা,30আসা জাংমগা, ‘কাবিকো আপনিকো আটা আজাবিকো সময়তা অগমবক্তাবিহিং স্যায়ে, আদো কাবিরে আবিহিংপামি নিনাহা আবিহিংপা এপা কাম জোকো মায়ুজ্রুকোগা।’31এপারাং নাবিহা অগমবক্তাবিহিং স্যাওয়াকো চেংচুংবিগা তাওয়াকো প্রমানহা নাবি আপনিবিরাং পিচামগা।32নাবিকো আটা আজাবিকো শুরু জোওয়া পাপকো কামবি পুরা জো।33“ও পুইয়াবাই, আসা লিং নিওয়া পুইয়াকো চেংবাই! নাবিহা হেপা নরককো দন্ডসো ক্যাকো ছুকোগা?34আকো সোতা কা নাবিকোতা অগমবক্তাবিহিং, দুংজি নিওয়া দিংঙাবিহিং আসা তাংজিকো উটকেওয়াবিহিং নিংপুরোওয়া। আবিকো প্যাকোতাহা নাবিহা লেরাহিংয়া স্যাপুরোওয়া, লেরাহিংয়া ক্রুসতা থ্যইপুরোওয়া, আসা লেরাহিংয়া আপনিকো জোংসুওয়া সাবিতা সাটাসো ডুরোওয়া, আসা শহর শহরবিতা সতায়রোওয়া।35এপারাং বাসিমতিতা ক্যাপাওয়া তাংসা তাংজি নিওয়া দিংঙাবিকো য়ুতিহা তাংজি নিওয়া হাবিলকো য়ুতিসোহা বেরেক্য়াকো চেংওয়া জকরিয়াকো য়ুতি চোইপা, হাংসুহিং নাবি পবিত্র দেমসা আসা ভেদিকো প্যাকোতা স্যাপুমমে, আকু দোষহা নাবিকো তোইতা হুইরোওয়া।36আজিপ্পারাং, কা নাবিহিং জাংরোওয়া, ই তাংসা দোষবিহা নেকো দিংঙাবিকো তোইতা হুইরোওয়া।37“ও য়রুশালেম, ও য়রুশালেম, নাতিহা অগমবক্তাবিহিং স্যায়ে আসা সেংজাকো নাবিকোতা নিংপুমবিহিংয়া নাবিহা লুংটুই টোয়ে! হেপা কেকাকো আংমা আপনিকো চেংবেবিহিং বেগ্রেংকো লিতা তুংমসা এমমে, এপারাং কা নাকো চেংবিহিংয়া জমা জোকো কেংয়ে, আদো নাতিহা মামানেতো।38কাং, কা নাবিকো সাহিংয়া পেইপুরোওয়া আসা আকু সাহা চিচ্চোপা জিংপুরোওয়া।39হাংপাতানাহা কা নাবিহিংয়া জাংরোওয়া, ‘প্রভুসেংজাকো মিংতা ওয়াংওয়াহা আশিষিত নিও’ তামসা মাজাংনু চোইপা নাবিহা কাহিংয়া মাতিংরোওয়া।”
The Seed Company