মথি25
1ইশুহা ন্যাসারাং জাংয়ে, “সেংজাকো রাজ্যহা বিয়ৌকো বিয়ৌলাহিং ন্যাতা ইপো চোইপা দিব্রি পুমসা দোসপাকো হোওয়া ত্যাচো নামেরি মেমেবি ত্যাবাপাগা।2আবিকো প্যাকোতাহা ঙাচোহা দুংজি মাতাওয়া ঙাচোহা দুংজি নিওয়া মেমেবি নিমি।3আকু দুংজি মাতাওয়া নামেরি মেমেবিহা দিব্রিহা পুয়ে, আদো তেংকোইপা ক্রাংটিহা মাপুতো।4আদো আকু দুংজি নিওয়া ঙাচো নামেরিবিহা দিব্রি আসা বোত্রাতাহা ক্রাংটি পুয়ো।5আসা বিয়ৌকো বিয়ৌলাহা গোইপাপুমসা সেন্নেপা মোওয়াংনুওয়া আবিহা জিংদাংপুমসা জিংজুয়ে।6“আদো বারো বাজি লিসুং কাচিতাহা ‘বিয়ৌলা দেয়োংয়ে, আসা দোসপাকো ওয়াং’ তামসা জাংওয়া আওয়াজ হিংয়ে।7“আত্রংহা আকু নামেরি মেমেবিহা লোমসা আবিকো দিব্রি তৈয়ার জোয়ে।8আকু দুংজি মাতাওয়া নামেরিবিহা দুংজি নিওয়াবিহিং জাংয়ে, ‘কাবিহিংনে অ্যাইসি ক্রাংটি পিচা, হাংপাতানাহা কাবিকো দিব্রিহা সিপুদাংতেনা।’9“আকু দুংজি নিওয়া নামেরিবিহা জাংয়ে, ‘আঁহা, কাবিহিং আসা নাবিহিং তেংওয়া ক্রাংটি কাবিহিংপা মাতানা, আদো ক্রাংটি পিচাওয়াবিকোতা নাবিহা হোমসা চোইচাতু।’10“আদো আবি ক্রাংটি চোইয়াকো হোনুওয়া বিয়ৌলাহা দেরেয়ে। আসা আকু তৈয়ার নিওয়া নামেরি মেমেবিহা আকুহিংপা বিয়ৌতা চাকো আংকো হোয়ে, আসা লাপুংহা গিচপুয়ে।11“আকো নোইতাহা আকু দুংজি মাতাওয়া ঙাচো নামেরিবিরে আউতা দেরেমসা মোউসুয়ে, ‘প্রভু, প্রভু, কাবিহিংনে লাপুং ওয়েপি।’12“আদো আত্রংহা আকু বিয়ৌলাহা জাংয়ে, ‘কা আজিপ্পারাং নাবিহিং জাংরোওয়া, কা নাবিহিংয়া মানাইমি!’13“আকো সোতা তৈয়ার য়ুং, হাংপাতানাহা কা হানি দিনতা লেকোমে আসা হানি সময়তা দেরেকোমে নাবিহা সিদা মাচ্যইরোওয়া।”14ইশুহা ন্যাসারাং জাংয়ে, “লোডিংবাকো রাজ্যহা এপা নিও: তানাং হ্যাদাংওয়া ইচো দিংঙা নিমি। আকুহা আকো ডেইয়াবিহিং মোউমসা আকো ন্যাস্যা চিত্যইতেয়ে।15আকুহা ডেইয়াবিহিংয়া কাম জোকো ছুওয়া সেই ইচোহিংয়া ঙাচো সুনকো টাংকা, ইচোহিংয়া নিহসো সুনকো টাংকা, ইচোহিংয়া ইচো সুনকো টাংকা পিচাতেয়ে। আসা আকুহা তানাংতা হোপুইয়ে।16আকু ঙাচো সুনকো টাংকা মুংচাওয়া ডেইয়াহা সেন্নেপা হোমসা আকু ন্যাস্যাহিংয়া কাম জোমসা দোসরা ঙাচো সুনকো টাংকা কামাইয়ে।17এপারাং নিহসো সুনকো টাংকা মুংচাওয়া ডেইয়ারে দোসরা নিহসো সুনকো টাংকা কামাইয়ে।18আদো আকু ইচো সুনকো টাংকা মুংচাওয়া ইচো ডেইয়াহা হোমসা আকো গিরিকো টাংকাহা মোংটোতা লিইকাপুয়ে।19“আকো উইসে লো নোইতা আবিকো গিরি লায়োংমসা ডেইয়াবিহিং আকো ন্যাস্যাকো হিসাব য়ায়ে।20আকু ঙাচো সুনকো টাংকা মুংচাওয়া ডেইয়াহা দোসরা ঙাচো সুনকো টাংকা পামসা এপা জাংয়ো, ‘ও কুং গিরি, নাতিহা কাহিংয়া ঙাচো সুনকো টাংকা পিচামগা, আদো কাং, কাহা দোসরা ঙাচো সুনকো টাংকা কামাইমি নিও।’21“আকো গিরিহা আকুহিংয়া জাংয়ে, ‘ও আসল আসা এনতাওয়া দেংকো ছুওয়া ডেইয়া! নাতিহা এনতাপারাং জোয়ো। নাতিহা আস্যস্যই ন্যাস্যাতারে দেংকো ছুওয়া জিংয়ো, নেহা কা নাতিহিংয়া উইসে নুওয়াংতারে অধিকার পিচারোওয়া। নেহা কাহিংপারাং গাগ্রুপা জিং।’22“আসা নিহসো সুনকো টাংকা মুংচাওয়ারে ওয়াংমসা এপা জাংয়ে, ‘ও কুং গিরি, নাতিহা কাহিং নিহসো সুনকো টাংকা পিচামগা। আদো কাং, কাহা দোসরা নিহসো কামাইমি নিও।’23“আকো গিরিহা আকুহিংয়া জাংয়ে, ‘ও আসল আসা এনতাওয়া দেংকো চুওয়া ডেইয়া! নাতিহা এনতাপারাং জোয়ো। নাতিহা অ্যাইংসি ন্যাস্যাতারে দেংকো ছুওয়া জিংয়ো, নেহা কা নাতিহিংয়া উইসে নুওয়াংতারে অধিকার পিচারোওয়া। নেহা কাবিহিংপারাং গাগ্রুপা জিং।’24“আত্রংহা আকু ইচো সুনকো টাংকা মুংচাওয়া ডেইয়ারে লেমসা জাংয়ে, ‘ও কুং গিরিওয়া, নাকো তুংসিংহা লুংটুই বেপা নিও তামসা কা গেমগা। নাতিহা হাংতা মিমি আউতারে মোইপ্যা চ্যামগা, হাংতা অংসে মিমি আউতা অংসে য়োমগা।25আকো সোতা কা চুসুংপুমসা নাকো ন্যাস্যাহা পুমসা মোংটোতা লিকাপুয়ে। নাকো ন্যাস্যাহা কাং, ইতারাং নিও।’26“আকো গিরিহা আকুহিংয়া জাংয়ে, ‘নাতিহা মেংতাওয়া আসা ডুমক্যইওয়া ডেইয়া! কাহা হাংতা অংটি মিমি আউতারে অংসে য়োকো কেংমগা তামসাহা নাতিহা গেমিরাং নিমগা।27আকো সোতা নাতিহা কুং ন্যাস্যাহা পুমসা খিওয়া দিংঙাবিহিং কাম জোকো পিচানাহা তুকোগা। এপামি জোনাহা কা লায়োংমসা ওয়াংনুওয়া কুং ন্যাস্যাকো চেংবেবিরে কাহা মুংচাকোগা!’28আকো নোইতাহা গিরিওয়াহা আজ্ঞা জোয়ে, ‘ই ডেইয়াকোতা নিওয়া ন্যাস্যা গিংমসা ত্যাচো সুনকো টাংকা নিওয়া ডেইয়াহিং পিচাপুই।29হাংপাতানাহা হাংসুহিংপানি, আকুহা ন্যাসারাং মুংচারোওয়া, আসা আকোহা সিওপা জিংপুরোওয়া। হাংসুহিংপা মোতো, আকুহিংপা অ্যাইসি নিওয়ারে আকোসোহা গিংচপুরোওয়া।30ই কাম মাতাওয়া ডেইয়াহিংয়া বাইরে নাঘিওয়াতা বাডোইপুই। আউতাহা কাইমসা সেটাং কিট্টিরোওয়া’।”31“দিংঙাকো চেংওয়াহা আকো মহিমাতা আপনিকো লোডিংবাকো পোইংহিংপা লেনুওয়া আকো মহিমিত গাদিংতা আকুহা গারোওয়া।32বাসিমতিকো তাংসা জ্যাকো দিংঙাবিহা আকো নাগাইতা জমা জিংরোওয়া, আসা লুকাকো গোইত্রহা লুকাবিহিংয়া এতাবিসো ওয়েংপামি ত্যাবাপা দিংঙাবিহিংয়া ওয়েংপারোওয়া।33আকো দাংক্রেং কাটুতা লুকাবিহিং আসা কেক্রেং কাটুতা এতাবিহিং এরোওয়া।34“আত্রংহা জাইপুহা আকো দাংক্রেং কাটুকোবিহিং জাংরোওয়া, ‘ও, কুং আপাকোসো আশিষ মুংচাওয়াবাই! লেই, বাসিমতি দিংনুসোরাং নাবিকো সোতা তৈয়ার জোওয়া রাজ্যতা য়ুং।35হাংপাতানাহা কা আমা পাংনুওয়া নাবিহা কাহিংয়া চাওয়া পিচায়ো, কাহিং তি সেকেংনুওয়া নাবিহা পেয়াংয়ো, আসা কা তানাংসো কোইয়োংকো ওয়াংনুওয়া নাবিহা কাহিংয়া সাতা পুরায়ো।36আসা কা পাইক্রি নিনুওয়া আংদুং পিচায়ো, কা হাইনুওয়া নাবিহা কাহিং কাংপিয়ো, আসা কা জেলতা নিনুওয়া নাবিহা কাহিং কাংকো ওয়াংয়ো।’37“আত্রংহা তাংজি নিওয়া দিংঙাবিহা আকুহিংয়া জাংরোওয়া, ‘ও প্রভু, হাত্রং কাবি নাতিহিংয়া হাপাংওয়া তিংগা, আসা চাকো পিচাংগা? হাত্রং তি সেকেংওয়া তিংগা, আসা তি পেয়াংগা?38হাত্রং কাবি নাতিহিংয়া কাবিকো লোইতা কোইয়োংকো ওয়াংওয়া তিংগা, আসা নাতিহিং য়ুংকো পিচাংগা? আসা হাত্রং নাতিহিং পাইক্রি তিংগা, আসা আংদুং পিচাংগা?39আসা হাত্রং কাবি নাতিহিংয়া হাইওয়া আসা জেলতা য়ুংওয়া তিংগা, আসা কাবিহা নাকোতা ওয়াংগা?’40“আত্রংহা জাইপুহা আবিহিংয়া এপা জাংরোওয়া, ‘আজিপ্পারাং, কা নাবিহিংয়া জাংরোওয়া, নাবিহা ই কুং দিংঙাবিকোতাহা হানিরোমা চিয়োওয়াহিং হাই জো, নাবিহা আকুহা কাহিংনাং জোওয়াগা।’41“আকো নোইতাহা আকুহা কেক্রেং কাটুকো দিংঙাবিহিং জাংরোওয়া, ‘ও লেইসাওয়া দিংঙাবাই! কুংসো তানাং হোতু, শয়তান আসা আকো পোইংবিকো সোতা তৈয়ার জোওয়া হাত্রংরে মিসিওয়া মেহতা হোতু!42হাংপাতানাহা কা হাপাংপুমি নিমগা, নাবিহা কাহিংয়া চাকো মিচাতো। সেকেংপুমি নিমগা মেপেইয়াংতো।43কোইয়োংকো ওয়াংওয়া নিমগা, নাবিহা কাহিংয়া সাতা য়ুংকো মাপুরাতো। পাইক্রি নিমগা, নাবিহা কাহিংয়া আংদুং মিচাতো, হাইমি নিমগা আসা জেলতা নিমগা, নাবিহা কাহিংয়া কাংকো মোয়াংতো।’44“আত্রংহা আবিরে এপা জাংরোওয়া, ‘প্রভু, হাত্রং কাবি নাতিহিংয়া হাপাংওয়াসো সেকেংওয়া তিংগা, আসা কোইয়োংকো ওয়াংওয়া, পাইক্রি, হাইওয়া, জেলতা, তিংগা? আসা নাতিহিং মাকাংগা?’45“আত্রংহা জাইপুহা আবিহিংয়া জাংরোওয়া, ‘আজিপ্পারাং, কা নাবিহিংয়া জাংরোওয়া, ই তাংসা কুং দিংঙাবিকোতাহা হানিরোমা চিয়োওয়াহিং হাই মোজো, আকুহা নাবিহা কাহিংনাং মোজোওয়াগা।’46“আত্রংহা ইবিহা হাত্রংরে মিসিওয়া দন্ড মুংরোওয়া, আদো তাংজি নিওয়া দিংঙাবিহা হাত্রংরে মিসিওয়া সাদিতা হোরোওয়া।”
The Seed Company