মথি15
1য়রুশালেমসো লেওয়া লেরা ফরিসিবি আসা তাংজিকো উটকেওয়াবিহা ইশুকোতা লেয়ে, আসা জাংয়ে,2“নাকো য়োংতোংবিহা আটা আজাবিকো ল্যচ্যইপ্যচ্যইহিংয়া হাংপা মামানেমগা? আবিহা চানুরোমা নাগাইকো লিংপাংতা নিওয়ারে পুরা মোজোমগা।”3আকুহা আবিহিংয়া জাংয়ে, “নাবিরে হাংপা আপনিকো লিংপাংকো সোতা সেংজাকো লিংপাংহিংয়া মামানেমগা?4হাংপাতানাহা সেংজাহা জাংমি নিও, আপনিকো আয়ুসো আপাহিংয়া আদর জো, আসা আয়ু আপাকো তোইতা হাংসু মেংতাপা য়্যই, আকুহা আজিপ্পারাং সিনেরোওয়া।5আদো নাবিহা জাংমগা, ‘হাংসু আপনিকো আয়ুসো আপাহিং নাতিহা কুংসো হাং য়ুচাকো কেংমে, আকুহা কাহা সেংজাহিং পিচাপুনতেমি নিও’ আকো সোতা আপনিকো আপাহিংয়া আদর জোমঘ্যইরোওয়া।6এপা জোমসারাং নাবিহা আপনিকো ল্যচ্যইপ্যচ্যইকো সোতা সেংজাকো য়্যইদিহিংয়া হাইরে টেকামাচুইপা জোপুমি নিও।7ও তেপিবাই! এশাইয়া অগমবক্তাকো জাংতেওয়া নুওয়াংবিহা নাবিহিংয়া তিতিয়ে:8‘ই দিংঙাবিহা কাহিংয়া নামুসো মেংচে আদর জোমগা,আদো ইবিকো তুংসিংহা কুংসো তানাং নিও।9নাবিকো কাহিং তাচাওয়াহা তেংবেগা,আদো নাবিকো ঝিপাওয়াহা দিংঙাবিকো ঝিপাওয়া লিংপাং মেংচেগা।’”10ইশুহা দিংঙাবিহিং মোউমসা জাংয়ে, “হিং, আসা কোই।11নামুসো চামসা নাপোতা হোওয়া চাওয়া-আংওয়াবিসোহা দিংঙাহিংয়া মেংতাপা মোজোমগা। আদো হানি নুওয়াং নামুসো বাইরে নো, আকুরাং দিংঙাহিংয়া মেংতাপা জোমগা।”12আকো নোইতা য়োংতোংবিহা ওয়াংমসা আকুহিং জাংয়ে, “নাতিহা গেদিংগা? ফরিসিবিহা নাকো নুওয়াং হিংমসা সেদ্রাংপুমি নিনা।”13আদো আকুহা জাংয়ে, “লোডিংবাতা নিওয়া কুং আপাকো মাতিংওয়া সিংতেংবিহা তাংসা ডেবেসোরাং ওইচপুরোওয়া।14আবিকো নুওয়াংরাং মাহিংগে, আবিহা মিচো মাতিংওয়া উটকেওয়াবিগা। মিচো মাতিংওয়া ইচো দিংঙাহা দোসরা মিচো মাতিংওয়াহিং ত্যইংনাহা আবি নিহসোসা হোক্রাতা হুইচারোওয়া।”15পত্রসহা আকুহিংয়া জাংয়ে, “কাবিহিং ই মিংচিতা জাংওয়া নুওয়াংহা হাং জাংকো কেংমে কোইপাপি।”16ইশুহা জাংয়ে, “নাবিরে নেচোইপা মোকোইয়াংগা?17নাবিহা মেগেয়াংগা, হানি চাওয়া-আংওয়াবি নামুকো নাপোতা হো, আকুহা ফেমাতা হোমসা বাইরে নোপুমগা।18আদো হানি নুওয়াং নামুসো বাইরে নো, আকুহা তুংসিংসো নোমগা, আসা আকুসোরাং দিংঙাহিংয়া মেংতাপা জোমগা।19হাংপাতানাহা দিংঙাকো তুংসিং নাপোসোরাং মেংতাপা নোওয়া, স্যাওয়া, নুংনাংসুওয়া, কুইওয়া, আজ্যাপা জাংজ্রুওয়া আসা মিছিপা জোওয়া নুওয়াংবিহা বাইরে নোমগা।20ই নুওয়াংবিসোহা দিংঙাবিহিংয়া মেংতাপা জোপামগা। আদো খুই মাদুপা চাওয়াসোহা আকুহিংয়া মেংতাপা মোজোমগা।”21ইশুহা আকু জায়গাহিং হুইতেমসা তুরোস আসা সিদোনকো শহরকো হুরাপা নিওয়া জায়গাবিতা হোপুইয়ে।22আকু জায়গাসোহা ইচো কনানী মেমে লেমসা ঙামসা জাংয়ে, “ও প্রভু, দাউদকো চেংওয়া, কুং তোইতা লামতুপি। কুং চেমেহিংয়া জেসাং দ্যইচপুওয়াকো সোতা সিওপারাং দুঃখ মুংদিংনা।”23ইশুহা আকুহিংয়া হাইরে মাজাংতো। আকো য়োংতোংবিহা আকোতা ওয়াংমসা আকুহিং জাংচায়ে, “ইহিংয়া নিংপি, হাংপাতানাহা ইহা ঙামসা য়োংকো নুনুই হুইদিংনা।”24ইশুহা আকুহিং জাংয়ে, “কাহিংয়া ইস্রাইল জ্যাকো য়াংপুওয়া লুকাবিকো সোতা মেংচে নিংপুমগা।”25আদো আকু মেমেহা ওয়াংমসা আকো নাগাইতা চুনুইমসা জাংয়ে, “ও প্রভু, কাহিং য়ুজ্রুপি।”26আকুহা জাংয়ে, “আপেবিকো চাদিংওয়া কোব্রেং গিংমসা কিয়াবিহিং পিচাওয়াহা এনতাওয়া মোকো।”27আকু মেমেহা জাংয়ে, “আজিপ্পারাংগা প্রভু, আদো কিয়াবিরে আপনিকো গিরিবি চাদিংনু হুইচাওয়া চোংব্রাবি য়োমসা চামগা।”28আত্রংহা ইশুহা আকুহিংয়া জাংয়ে, “ও মেমে, নাকো দেংওয়াহা টেবো নিয়ুং! নাকো নোওয়া সেই তাংসা নাতিহিংয়া জিংকো।” আকু মেমেকো চেমেহা আত্রংতারাং সাংচপুয়ে।29ইশুহা আউসো নোমসা গালীলি ঝাহাদিকো আরি আরিসো জিংপুমসা হোয়ে, আসা য়্যাগ্যইকো তোইতা হোমসা আউতা গায়ে।30আত্রংহা উইসে দিংঙাবিহা আকোতা ওয়াংয়ে, আসা আবিকো চিত্তা পারাওয়া তেইকো মাচুওয়া, চা-সিওয়া, মিচো মাতিংওয়া, য়্যইকো মাচুওয়া আসা লেরা উইসে হাইওয়া দিংঙাবিহিং আকো নাগাইতা পারায়ে, আসা আকুহা আবি তাংসাহিং সাংপাপিয়ে।31আত্রংহা য়্যইকো মাচুমবিহা য়্যইওয়া, সাঁপেবিহা সাংওয়া, তেইকো মাচুমবিহা তেইওয়া, আসা মিচো মাতিংবিরে তিংকো চুওয়া তিংমসা দিংঙাবিহা আআংপেপেপা জিংপুয়ে, আসা আবিহা ইস্রাইলকো সেংজাহিং তাচায়ে।32আত্রংহা ইশুহা য়োংতোংবিহিং আপনিকো আবেইতা মোউমসা জাংয়ে, “ই দিংঙাবিহিং তিংমসা কাহা সিওপারাং লামতুনা। ইবিহা সাসুংয়ুসো কাহিংপারাং নিও। ইবিহিংয়া চাওয়া হাইরে মোতো। ইবিহিংয়া কা নুইতোং মিনিংপুরো। মোকোনাহা ইবিহা ন্যাতাতা আমা পাংপুমসা লোবোসুংপুরোওয়া।”33আত্রংহা য়োংতোংবিহা ইশুহিংয়া জাংয়ে, “এসে উইসে দিংঙাবিহিংয়া ই চিচ্চোওয়া জায়গাতাহা চাকো পিচাকোহা কাবিহা এসে কোব্রেং হাংতা লাকোগা?”34ইশুহা আবিহিংয়া জাংয়ে, “নাবিহিংপাহা হাসে ইচো কোব্রেং নিংগা?”
আবিহা জাংয়ে, “নীচো কোব্রেং আসা ইপু নিহপু আপেচাওয়া নায়া মেংচে নিনা।”35ইশুহা তাংসা দিংঙাবিহিংয়া ওয়াংবোইতা গাকো তামসা জাংয়ে।36আকুহা আকু নীচো কোব্রেং আসা নায়াবি চুংমসা সেংজাহিং গারানি তামসা জাংপুনতেনুওয়া কোব্রেং ছিমসা য়োংতোংবিকোতা সোইয়ে, আসা য়োংতোংবিহা দিংঙাবিহিং চোপিয়ে।37আউতা নিওয়া দিংঙাবিহা তাংসারাং চাসুয়ে, আসা গাইয়ে। আসা লাওয়া কোব্রেংকো চোংব্রাবিহা আবিহা নীচো চেরেং মেইপক্যইপা য়োয়ে।38মেমেবি আসা চেংচুংবিহিং ল্যামসা আউতা চাওয়াহা পোজা দিংঙাবিদাং মেংচে চার হাজার গাংদাং মাগাংদাংপা নিমি।39আকো নোইতাহা ইশুহা আকু দিংঙাবিহিংয়া আউসো নিংপিয়ে। আসা আকুহা নোওয়াইতা বাইমসা মাগাদান তাওয়া লোইতা হ্যাপুয়ে।
আবিহা জাংয়ে, “নীচো কোব্রেং আসা ইপু নিহপু আপেচাওয়া নায়া মেংচে নিনা।”35ইশুহা তাংসা দিংঙাবিহিংয়া ওয়াংবোইতা গাকো তামসা জাংয়ে।36আকুহা আকু নীচো কোব্রেং আসা নায়াবি চুংমসা সেংজাহিং গারানি তামসা জাংপুনতেনুওয়া কোব্রেং ছিমসা য়োংতোংবিকোতা সোইয়ে, আসা য়োংতোংবিহা দিংঙাবিহিং চোপিয়ে।37আউতা নিওয়া দিংঙাবিহা তাংসারাং চাসুয়ে, আসা গাইয়ে। আসা লাওয়া কোব্রেংকো চোংব্রাবিহা আবিহা নীচো চেরেং মেইপক্যইপা য়োয়ে।38মেমেবি আসা চেংচুংবিহিং ল্যামসা আউতা চাওয়াহা পোজা দিংঙাবিদাং মেংচে চার হাজার গাংদাং মাগাংদাংপা নিমি।39আকো নোইতাহা ইশুহা আকু দিংঙাবিহিংয়া আউসো নিংপিয়ে। আসা আকুহা নোওয়াইতা বাইমসা মাগাদান তাওয়া লোইতা হ্যাপুয়ে।
The Seed Company