মথি14
1আত্রংকো সময়হা গালীলতা রাজ জোওয়া হেরোদ এনতিপাসহা ইশুকো জোওয়া কামবিকো নুওয়াং হিংয়ে,2আসা আকুহা আপনিকো কাম জোমবিহিং জাংয়ে, “ইহা বাপ্তিস্মা পিচাওয়া য়হুন্নাগা। ইহা সিপুওয়াসোহা ঙারোমকোগুং। আকো সোতা সেতা ই কামবিহা আকোসো জিংমসা জোদিংয়ো।”3হাংপাতানাহা হেরোদহা আপনিকো এ ফিলিপকো মে হেরোদিয়াসকো সোতা য়হুন্নাহিংয়া প্যইমসা জেলতা সুংমসা এওয়া নিমি।4য়হুন্নাহা হেরোদহিংয়া এপা জাংওয়া নিমি, “লিংপাং অনুসারহা নাতিহা নাকো একো মেহিংয়া এপা আপনিকো মে বানাইমসা এচামতুকোগা।”5এপা জাংপুওয়াকো সোতা হেরোদহা য়হুন্নাহিংয়া স্যাকো কেংদিংমি, আদো আকুহা দিংঙাবিহিংপা চুসুংমি, হাংপাতানাহা দিংঙাবিহা য়হুন্নাহিংয়া অগমবক্তাগা তামসা দেংমি।6আদো সাইয়ুহা হেরোদকো কেওয়া দিনকো য়াংতাওয়াতা হেরোদিয়াসকো চেমেহা আবিকো প্যাকোতা য়োইমসা হেরোদহিং গাগ্রুপায়ে।7এপা জিংনুওয়া আকুহা আকু চেমেহিংয়া হাই য়াদো পিচারো তামসা নাপোইয়ে।8আকো আয়ুকো ঝিপাওয়া সেই চেমেহা জাংয়ে, “বাপ্তিস্মা পিচাওয়া য়হুন্নাকো পোরো কাহিংয়া বারাংতা পিচা।”9ই হিংমসা জাইপু হেরোদহা সিংদুয়ে, আদো আকো কেওয়া দিনতা ওয়াংওয়া উইসে দিংঙাবিকো নাগাইতা নাপোই পুনতেওয়াকো সোতা আকুহা আকু চেমেকো য়াওয়া সেই তাংসা জোপি তামসা আজ্ঞা জোয়ে।10আসা আকুহা জেলতা য়হুন্নাকো পোরো ঠেপাকো নিংপুয়ে।11আকো পোরোহা বারাংতা পামসা আকু চেমেহিং পিচায়ে। চেমেহা আকুহা আপনিকো আয়ুকোতা সারেয়ে।12আকো নোইতা য়হুন্নাকো য়োংতোংবিহা লেমসা আকো সিপুওয়া জুপা পুমসা লিকাপুয়ে। আসা আবিহা হোমসা ইশুহিং দেরেং জাংয়ায়ে।13হাত্রং ইশু য়হুন্নাহিং স্যাপাপুওয়া দেরেং হিং, আত্রংহা আকুহা নোওয়াইতা বাইপুমসা ইচোদাং আউসো ইচো চিচ্চোওয়া জায়গাতা হোয়ে। ই হিংনুওয়া উইসে দিংঙাবিহা শহরবিসো তেইপুমসা আকুহিংপা হুইসপুয়ে।14ইশুহা নোওয়াইসো উইনুওয়া উইসে দিংঙাবিহিং তিংয়ে। আকু উইসে দিংঙাহিং তিংমসা আকো তুংসিংহা আবিকো তোইতা লামতুপুয়ে, আসা আকুহা আউতা নিওয়া হাইমবিহিং সাংপায়ে।15জিরোং জিংপুনুওয়া য়োংতোংবিহা এপা জাংমসা আকোতা ওয়াংয়ে, “ইতাহা হাইরে মোতো, আসা সিনিরে হুইপুনতেয়ো। ই উইসে দিংঙাবিহিং নিংপি, আসা ইবিহা আবেই আবেইকো লোই-লোইতা হোমসা আপনিকো সোতা চাওয়া আংওয়াবি চোইচাপুকো।”16আদো ইশুহা আবিহিং জাংয়ে, “আবিহা হ্যামঘ্যইকো। নাবিরাং আবিহিংয়া চাকো পিচা।”17আবিহা আকুহিংয়া জাংয়ে, “ইতা কাবিকোতা ঙাচো কোব্রেং আসা নিহপু নায়া মেংচে নিও।”18আত্রংহা আকুহা জাংয়ে, “আকুহা কুংতা পা।”19আকুহা দিংঙাবিহিংয়া ওয়াংবোইতা গাকো জাংয়ে, আসা আকু ঙাচো কোব্রেং আসা নিহপু নায়া চুংমসা লোডিংবাতা ন্যইমসা সেংজাহিং গারানি তায়ে, আসা কোব্রেংবি ছিমসা য়োংতোংবিহিং পিচায়ে, আসা য়োংতোংবিহা দিংঙাবিহিং চোপিয়ে।20আবি তাংসা গাইক্যইপা চায়ে, আসা লাওয়া চোংব্রাবিহা আবি য়োনুওয়া বার্চো ডেংগে মেইপুয়ে।21মেমেবি আসা চেংচুংবি ল্যামসা চাওয়া আংওয়াবিহা আউতা পাঁচ হাজার পোজা দিংঙাবি নিমি।22আকো নোইতা ইশুহা দিংঙাবিহিং নিংপুনতেনুওয়া য়োংতোংবিহিংয়া নোওয়াইতা বাইপামসা আকুরোমা নাগাই দাব্রিকো নুব্যাই হ্যাকো পিচায়ে।23আসা উইসে দিংঙাবিহিং নিংপুনতেনুওয়া আকুহা ইচোদাং পাচাইকো তোলোংওয়া য়্যাগ্যইতা হোয়ে। মারিমোপুনুওয়া ইশুহা ইচোদাং য়্যাগ্যইতা নিমি।24আদো নোওয়াইহা আত্রং চোইপাহা ঝাহাদিকো চেব্রেসোহা প্যাকোতা দেকানতেমি। আসা বিংঙাহা তুইপেং ভিওয়াকো সোতা নোওয়াইহিংয়া ঝাহাদিতা চুরা লোমসা নাগাই হোমক্যইতো।25হাপকুং হোহোইনুওয়া ইশুহা তিকো তোইসো তেইপামসা য়োংতোংবিকোতা লেপায়ে।26হাত্রং য়োংতোংবি আকুহিংয়া তিকো তোই-তোই তেইদিংওয়া তিং, আত্রংহা আবিহা চুসুংপুমসা জাংয়ে, “ইহা জেসাংগা!” আসা আবিহা সিওপারাং চুসুংপুমসা চিলিংসুয়ে।27আদো আত্রংতারাং ইশুহা জাংয়ে, “মাচ্ছুংগে, কারাংগা, সাডুংপা য়ুং।”28পত্রসহা আকুহিংয়া জাংয়ে, “ও প্রভু, নাতিরাং বেনাহা কাহিংয়া নাকোতা তিকো তোই-তোই তেইপামসা ওয়াংকো আজ্ঞা পিচা।”29আকুহা জাংয়ে, “লেই।”
পত্রসহা নোওয়াইসো উইমসা ইশুকোতা তিকো তোই-তোই তেইপামসা লেহে।30আদো বিংঙা সিওপা ভিওয়া আসা চুরা লোওয়া তিংমসা আকুহা চুসুংপুয়ে। আসা তিতা নুচপুদাংনুওয়া “ও প্রভু, কাহিং বাচাইপি” তামসা ঙামসা জাংয়ে।31ইশুহা তাত্রিংপা আকো খুই প্যইমসা জাংয়ে, “হানি নাকো দেংওয়াহা, নাতিহা হাংপা সন্দেহ জোমগা?”32হাত্রং আবি নোওয়াইতা ল্যই, আত্রংহা বিংঙা ভিওয়াহা সাংয়ে।33নোওয়াইতা নিওয়া য়োংতোংবিহা আকুহিংয়া নোংসুয়ে, আসা জাংসুয়ে, “আজিপ্পারাং নাতিহা সেংজাকো চেংওয়া গুং।”34নুব্যা দেকানুওয়া আবিহা গনেসোরেত তাওয়া জায়গাতা উইয়ে।35হাত্রং আকু জায়গাকো দিংঙাবি ইশুহিং নাই, আত্রংহা আবিহা দিব্যা নুব্যাকো জায়গাবিতা দেরেং কাইপুয়ে, আসা দিংঙাবিহা উইসে হাইওয়াবিহিং আকোতা পারায়ে।36আবিহা আকো আংদুংকো আরিকো নামু মেংচে সুচা মুংকো তামসা আকুহিং জাংচায়ে, আসা হাসে ইচো দিংঙাবি আকো আংদুংহিং সুচানি, আবিহা তাংসা সাংচপুয়ে।
পত্রসহা নোওয়াইসো উইমসা ইশুকোতা তিকো তোই-তোই তেইপামসা লেহে।30আদো বিংঙা সিওপা ভিওয়া আসা চুরা লোওয়া তিংমসা আকুহা চুসুংপুয়ে। আসা তিতা নুচপুদাংনুওয়া “ও প্রভু, কাহিং বাচাইপি” তামসা ঙামসা জাংয়ে।31ইশুহা তাত্রিংপা আকো খুই প্যইমসা জাংয়ে, “হানি নাকো দেংওয়াহা, নাতিহা হাংপা সন্দেহ জোমগা?”32হাত্রং আবি নোওয়াইতা ল্যই, আত্রংহা বিংঙা ভিওয়াহা সাংয়ে।33নোওয়াইতা নিওয়া য়োংতোংবিহা আকুহিংয়া নোংসুয়ে, আসা জাংসুয়ে, “আজিপ্পারাং নাতিহা সেংজাকো চেংওয়া গুং।”34নুব্যা দেকানুওয়া আবিহা গনেসোরেত তাওয়া জায়গাতা উইয়ে।35হাত্রং আকু জায়গাকো দিংঙাবি ইশুহিং নাই, আত্রংহা আবিহা দিব্যা নুব্যাকো জায়গাবিতা দেরেং কাইপুয়ে, আসা দিংঙাবিহা উইসে হাইওয়াবিহিং আকোতা পারায়ে।36আবিহা আকো আংদুংকো আরিকো নামু মেংচে সুচা মুংকো তামসা আকুহিং জাংচায়ে, আসা হাসে ইচো দিংঙাবি আকো আংদুংহিং সুচানি, আবিহা তাংসা সাংচপুয়ে।
The Seed Company