মথি16
1ফরিসিবি আসা সদুকিবিহা ইশুকোতা লেয়ে, আসা আকুহিং লোডিংবাসো লেনাহা ইচো চিহ্ন তিংপা তামসা পরিক্ছা জোয়ে।2আদো আকুহা আবিহিংয়া জাংয়ে, “জিরোং জিংপুনুওয়া নাবিহা জাংমগা, ‘জুকুংকো দিনহা এনতাপা জিংরোওয়া, হাংপাতানাহা ডিংবাহা অ্যালুইপা নিও।’3আসা হাপকুংহা জাংমগা, ‘ডিংবাহা অ্যালুইপা আসা নাটুংপা জিংমি নিও, হিনিহা বিংঙা হ্যারগুং।’ নাবিহা ডিংবাকো মোকে-চোকেওয়া কাংমসা হাং জিংকোমে জাংকো চুমগা, আদো সময়কো চিহ্নবি কাংমসা হাং জিংকোমে তামসা হাংপা জাংকো মাচুমগা।4হিনি জুকুংকো ই দিংঙাবিহা মেংতাওয়া আসা নুনাংসুওয়াবি নিও। ইবিহা আআংপেপেচপুওয়া চিহ্নবি মেংচে মোমগা, আদো অগমবক্তা য়োনাকো চিহ্ন ল্যামসা দোসরা হাইরে ন্যইচা মামুংরোওয়া।” আকো নোইতা ইশুহা আবিহিং হুইতেমসা আউসো হ্যাপুইয়ে।5আকো নোইতাহা য়োংতোংবিহা ঝাহাদিকো নুব্যাই দেকানুওয়া আবিহা কোব্রেং পাকো লারিংপুয়ে তামসা প্যারাতাংয়ে।6ইশুহা আবিহিংয়া জাংয়ে, “হোশিয়ার য়ুং, ফরিসি আসা সুদুকিবিকো সোঁরাসো জোগেমসা য়ুং।”7য়োংতোংবিহা তাইবিলারাই জাংসুয়ে, “য়াংবি কোব্রেং মাপামকো সোতা, আকুহা এপা জাংমদোওয়া।”8ইশুহা ই নুওয়াং সিদা চ্যইমসা জাংয়ে, “হানি নাবিকো দেংওয়াহা? হাংপা নাবিহা কোব্রেং মাপানা তামসা আপনি লারাই য়্যইসুদিংগা?9নাবিহা নেচোইপা মোকোইয়াংগা? পাঁচ হাজার দিংঙাবিহিং ঙাচো কোব্রেংসো চাকো পিচানুওয়া নাবিহা হাসে ইচো ডেংগে য়োংগা? নাবিহা আকু লারিংপুংগা?10আসা ন্যাসারাং নীচো কোব্রেংসো চার হাজার দিংঙাহিং চাকো পিচানুওয়া নাবিহা লাওয়া কোব্রেংহা হাসে ইচো ডেংগে য়োংগা? আকুরে লারিংপুংগা?11কাহা নাবিহিংয়া কোব্রেংকো তোইতা জাংওয়া মোকোমি তামসা নাবিহা হাংপা মোকোইমগা? আদো ফরিসি আসা সুদুকিবিকো সোঁরাসো হোশিয়ার য়ুং।”12আত্রংহা আবিহা কোইয়ে, আকুহা কোব্রেং বুইপাওয়া সোঁরাকো মোকো, ফরিসি আসা সুদুকিবিকো ঝিপাওয়াবিসো হোশিয়ার য়ুংকো তামসা জাংমকো গুং।13ইশুহা কোইসোরিয়া ফিলিপ্পীকো জায়গাতা ওয়াংপুনতেনুওয়া, আকুহা আপনিকো য়োংতোংবিহিং উইয়ে, “দিংঙাবিহা দিংঙাকো চেংওয়াহিংয়া হাংসুগা তামসা জাংমগা?”14আবিহা জাংয়ে, “লেরাহা বাপ্তিস্মা পিচাওয়া য়হুন্না, লেরাহা জাংসুয়ে এলিয়া, আসা লেরাহা য়র্মিয়া, মোকোনাহা অগমবক্তাবিতাহা ইচোদোওয়া তামসা জাংসুচাংমি।”15আকুহা আবিহিংয়া জাংয়ে, “নাবিহা হাং জাংকোগা, কাহা হাংসুগা?”16সিমোন পত্রসহা জাংয়ে, “নাতিহা ঙাজ্যইং সেংজাকো চেংওয়া, মুক্তি পিচাওয়া জাইপু খ্রীষ্ট।”17ইশুহা আকুহিংয়া জাংয়ে, “য়োনাকো চেংওয়া সিমোন, নাতিহা আশিষিত নিও, হাংপাতানাহা নাতিহা দিংঙাকো নোচেংসো নোওয়া জাংওয়া মোকো, আদো লোডিংবাতা নিওয়া কুং আপারাং নাতিহিং কোইপামগা।18কা নাতিহিংয়া জাংরোওয়া, নাতিহা পত্রসগা (পত্রস তাওয়াহা পাত্যারুংগা)। ই পাত্যারুংতারাং কা কুং মন্ডলিবিহিং জাপারোওয়া, আসা ই কুং মন্ডলিহিংয়া সিদিংকো সেরে জিয়োমক্যইরোওয়া।19কা নাতিহিংয়া সেংজাকো রাজ্যকো লাপুং ওয়েওয়া গোইচোবি পিচারোওয়া। হানি নাতি বাসিমতিতা দাঁ, আকুহা লোডিংবাতা দাঁচপুরোওয়া, আসা হানি নাতি বাসিমতিতা ওয়ে, আকুহা লোডিংবাতা ওয়েচপুরোওয়া।”20আকো নোইতাহা আকুহা য়োংতোংবিহিংয়া কা মুক্তি পিচাওয়া খ্রীষ্টগা তাওয়া নুওয়াং হাংসুহিংনে মাজাংকো তামসা জাংয়ে।21আকু সময়সো ইশুহা য়োংতোংবিহিংয়া আকুহা য়রুশালেমতা হোনেরোওয়া, আসা আউতা য়হুদি মাটা ওয়ারাংপাবি, মাটা পাউবি আসা তাংজিকো উটকেওয়াবিকোসো উইসে নুওয়াংতা কোইচ্যানেরোওয়া, সিনেরোওয়া আসা সাসুংয়ুকো নোইতাহা ন্যাসারাং সিওয়াসো ঙারোনেরোওয়া তাওয়া নুওয়াংবিহা আত্রংসো য়ুতা আকুহা আকো য়োংতোংবিহিং ল্যায়ে।22আদো পত্রসহা আকুহিংয়া ইদ্যাতা পুরামসা এপা জাংমসা য়েংয়ে, “প্রভু, সেংজাহা নাকো তোইতা হাত্রংরে এপা মাজোকো।”23আদো আকুহা পত্রসকোতা ন্যইমসা জাংয়ে, “ও শয়তান, কুং আবেইসো ওয়েংপু, নাতিহা কুং ন্যাতাতা কুটিওয়া লুংটুই একো কেংদিংয়ো, হাংপাতানাহা নাতিহা সেংজাকো নুওয়াংতা মোকো, আদো দিংঙাবিকো নুওয়াংতা প্যারাপামগুং।”24আকো নোইতা ইশুহা আকো য়োংতোংবিহিং জাংয়ে, “হাংসু কুং নুনুই হুইকো কেং, আকুহা আপনিকো জুপাকো ইচ্ছাহিংয়া ল্যানেরোওয়া, আসা আপনিকো ক্রুস পুমসা কুং নুনুই হুইনেরোওয়া।25হাংপাতানাহা হাংসু আপনিকো সাদিহিং বাচাইকো কেং, আকুহা য়াংপারোওয়া, আদো হাংসু কুং সোতা আপনিকো সাদি য়াংপা, আকুহা তুতেংজু য়ুংওয়া সাদি মুংচারোওয়া।26দিংঙাহা বাসিমতিতা নিওয়া তাংসাহিংনাং আপনিকো খুইতা পারাদো, হাত্রংরে মিশিওয়া সাদিবেমি য়াংপাপুনাহা হাং তোইংদ্যা নিংগা? আসা দিংঙাহা আপনিকো সাদিকো সোতাহা হাং পিচাকো চুকোগা?27হাংপাতানাহা দিংঙাকো চেংওয়াহা আপনিকো আপাকো মহিমাতা আপনিকো লোডিংবাকো পোইংবিহিংপা লেরোওয়া, আসা আত্রংহা আকুহা তাংসা দিংঙাবিহিং আবিকো কাম জোওয়া সেই ইনাম পিচারোওয়া।28আজিপ্পারাং, কা নাবিহিংয়া জাংরোওয়া, ই জাওয়াবিতাহা লেরাহা দিংঙাকো চেংওয়াহিংয়া আপনিকো রাজ্যতা দেপাওয়া মাতিংনু চোইপা মিসিরোওয়া।”
The Seed Company