মর্কুস16
1সানুকো দিন হাপুনতেনুওয়া মরিয়োম মগদিলিনি, য়াকুবকো আয়ু মরিয়োম আসা সোলোমিহা ইশুকো সিপুওয়া জুপাতা ন্যাকো তামসা ওহও্যহওয়া মোলোম আসা চুইতি চ্যইয়ে।2আইতাবারেকো হাপকুং সানি ত্যইনতানি আবিহা তোম্যইতা হোয়ে।3আত্রং ন্যাতাসো হোদাংনুওয়া আবিহা তাইবিলারাই উইসুয়ে, “য়াংবিহিংয়া হাংসু তোম্যইকো হোংব্যইসো লুংটুই ওয়েংপাপিকোগা?”4আদো আবিহা তোম্যইতা দেকানুওয়া লুংটুইহা ওয়েংপাপুনতেওয়া তিংয়ে। আকু লুংটুইহা টেবো নিমি।5আবি তোম্যইকো নাপোতা হোমসা কাংনুওয়া হাংপাওয়া আংদুং লুওয়া ইচো ওয়াংটেংটেংগেংওয়া পোজাহিং তোম্যইকো দাংক্রেং কাটুতা গাদিংওয়া তিংয়ে। ই তিংমসা আবিহা চুসুংপুয়ে।6আকু পোজাহা আবিহিং জাংয়ে, “মোচ্ছুংগে, নাবিহা ক্রুসতা স্যাপুওয়া নাসরতকো ইশুহিং মোদিংগা? আকুহা ঙারোমসা হোপুনতেও! আকুহিং এওয়াহা ইতারাংগা, কাংকে! নেহা আকুহা ইতা মোতো।”7আদো নাবিহা হোমসা আকো য়োংতোংবিহিং আসা পত্রসহিং জায়াতু, “আকুহা নেতেইসোরাং গালীলতা হোপুনতেও। আকুহা নাবিহিং জাংমবেপারাং নাবিহা আকুহিংয়া আউতারাং তিংরোওয়া তামসা জাংপি।”8আকু মেমেবিহা আআংপেপেপা চুসুংপুমসা পিপিং-দোদোউপা আকু তোম্যইসো নোপুমসা হোপুইয়ে। আকো সোতা আবিহা সিওপা চুসুংপুমসা হাংসুহিংনে হাইরে জাংমক্যইতো।9[ইশুহা আইতাবারে হাপকুংসো সিপুওয়াসো ঙারোমসা নাগাইহা আকুহা মগদিলিনি মরিয়োমহিংপা দোসুয়ে। ই মগদিলিনিকোসোরাং ইশুহা নীচো মেংতাওয়া জেসাং নোপামগা।10মরিয়োমহা হোমসা ইশুকো য়োংতোংবিহিং জাংয়ায়ে, আত্রংহা আবিহা তুংসিং চিচামসা কাইসুদিংমি।11মরিয়োমহা ইশুকো ঙারোওয়া আসা আপনিকো তিংওয়া নুওয়াংহা য়োংতোংবিহিং হিংপায়ে। আদো ই নুওয়াংহা আবিহা মাদেংতো।12আকো নোইতা ইশুকো নিহসো য়োংতোংবি লোইতা হোদাংনুওয়া ইশুহা আবিহিংপা দোসরা য়ুওয়াইতা তিংয়ায়ে।13আবিহা লারেমসা দোসরা য়োংতোংবিহিং হিংপারেহে, আদো আবিকো জাংওয়ারে আবিহা মেদেংতো।14আকো নোইতা ইশুহা আপনিকো এগারচো য়োংতোংবি চাকো গাদিংনুওয়া আবিকো প্যাকোতা তিংয়ায়ে। আপনি আপনিকো তুংসিং লুংটুই বেপা জোমসা আকুহিং সিমসা ঙারোওয়া তিংওয়াবিকো জাংওয়া নুওয়াংবিরে নাবিহা মাদেংতো তামসা য়েংয়ে।15ইশুহা আকু য়োংতোংবিহিং জাংয়ে, “নাবিহা বাসিমতিকো আরিকোংপেতা হোতু, আসা সেংজাকো দিংওয়া তাংসা দিংঙাবিহিং এনতাওয়া দেরেং হিংপাতু।16হাংসু দেং, আসা বাপ্তিস্মা লাং, আবিহা উদ্ধার মুংচারোওয়া, আদো হাংসু মাদেং সেংজাকো নাগাইতা আকুহা দোষি জিংরোওয়া আসা দন্ড মুংরোওয়া।17কাহিং দেংওয়া দিংঙাবিহা আআংপেপেচপুওয়া কামবি জোরোওয়া আবিহা কুং মিংতা জেসাং গিহরোওয়া, আবিহা মোকোইওয়া ক্যাবি য়্যইরোওয়া,18আবিহা কুং মিংতা পুইয়াবি প্যইরোওয়া, আসা লিংবি আংসুদো আবিহিংয়া হাইরে মাজিং, আসা হাইমবিকো পোরোতা খুই ওইমসা পাচাইনুওয়া হাইমবিরে সাংরোওয়া।”19য়োংতোংবিহিং ই তাংসা জাংওয়াকো নোইতা প্রভু ইশুহা লোডিংবাতা তোরোইচাপুয়ে। আউতা আকুহা সেংজাকো দাংক্রেং কাটুতা গায়ে।20আসা য়োংতোংবিহা হোমসা সেংজাকো দেরেং তাংসাতা হিংপায়ে। প্রভুহা আবিকোতা জিংমসা কাম জোয়ে, আসা আবিকো এনতাওয়া দেরেং হিংপাওয়াতা আআংপেপেচপুওয়া কামবিসোরাং আজিপ্পারাংগুং তামসা তিংপায়ে।]
The Seed Company