লুক1
1কাবিকো প্যাকোতা ইশুকো তোইতা জিংপুওয়া তাংসা নুওয়াংবি উইসে দিংঙাবিহা লামি নিও।2আকু জিংপুওয়া নুওয়াংবিহা নাগাইসোরাং আপনিকো মিচোসো তিংওয়াবি আসা ইকো তোইতারাং এনতাওয়া দেরেং হিংপামবিহা লামি নিও।3ও উটকেওয়া থিয়োফিলাস, কারে নাগাইসোরাং ইকো তোইতা এনতাপা মোয়ে, আসা নাতিহিংয়া ইকো তোইতা লাকোহা এনতাকোদোওয়া তাওয়া নোমসা লাদাংয়ো।4নেহা ই হিগা পড়াইমসা নাতিহিং ঝিপাওয়া নুওয়াংবিহা হাসেকো আজিপ্পামে নাতি আপনিরাং সিদা চ্যইরোওয়া।5য়হুদিয়া তাওয়া জায়গাকো জাইপু হেরোদকো সময়তা জোকোরিয়া মিং নিওয়া ইচো য়হুদিবিকো পাউ নিমি। আবিকো দলকো মিংহা অবিয়া নিমি, আকো মেহা হারুনকো জিরিকো নিমি। আকো মিংহা এলিসিবা নিমি।6আবি নিসমেইসা সেংজাকো নাগাইতাহা তাংজি নিওয়া দিংঙা নিমি। আবিহা প্রভুসেংজাকো আজ্ঞা আসা লিংপাংবিহা তাংসা মাল্যাপা জোচাংমি।7আদো আবিকোহা চেংচুংরে মোতোমি, হাংপাতানাহা এলিসিবাহা বেংদি নিমি, আসা আবি নিসমেইকোহা চেং চেংপাওয়া সময়রে পেংপুনতেমি নিমি।8সাইয়ু জোকোরিয়াহা সেংজাকো নাগাইতা পাউ জিংমসা সেওয়া জোদিংমি, হাংপাতানাহা সেংজাহিং সেওয়া জোওয়া পালোহা আবিকো দলকো নিমি।9পাউবিকো লিংপাংতা নিওয়া সেই সোকুতা লামসা বাদোইনুওয়া জোকোরিয়াকো মিংতা হুইয়ে। আকো সোতা আকুহা সেংজাকো দেমসাকো নাপোতা সাং চুংইয়াকো হোয়ে।10আকু সাং চুংইদাংনুওয়া উইসে দিংঙাবিহা বাইরেতা জাসুমসা সেংজাহিং পাচাইসুদিংমি।11আসা সাং চুংওয়া ভেদিকো দাংক্রেং কাটুতা ইচো প্রভুসেংজাকো লোডিংবাকো পোইং তিংরেয়ে।12আত্রংহা জোকোরিয়াহা লোডিংবাকো পোইংহিং তিংমসা চুসুংপুমসা আআংপেপেচপুয়ে।13আদো লোডিংবাকো পোইংহা জাংয়ে, “ও জোকোরিয়া, নাতিহা মাচ্ছুংগে, সেংজাহা নাকো পাচাইওয়া হিংয়ে। নেহা নাকো মে এলিসিবাহা নাকো সোতা ইচো চেংওয়া কেরোওয়া। নাতিহা আকো মিংহা য়হুন্না এপি।14আকু চেংওয়াসোহা নাতিহা য়াংতামসা গাগ্রুরোওয়া, আসা উইসে দিংঙাবিরে আকো কেওয়াতা য়াংতাসুরোওয়া,15হাংপাতানাহা আকুহা সেংজাকো মিচোকো নাগাইতা টেবো জিংরোওয়া। আকুহা আংগুরসো নোওয়া য়ুসো পুতকুইহা হাত্রংরে মাআংরোওয়া। আপনিকো আয়ুকো ফেমা নাপোসোরাং আকুহা পবিত্র লাংবেসো মেইপামসা লেরোওয়া।16ইস্রাইল জ্যাকো দিংঙাবিহিংয়া আকুহা আবিকো প্রভুসেংজাকোতা লাপারোওয়া।17আকুহা লাংবে আসা সেসো অগমবক্তা এলিয়াবেপা জিংমসা সেংজাকো ন্যাতা তৈয়ার জোরোওয়া। আকুহা আপা আসা চেংওয়া চেমেবিহিং চাংসপারোওয়া, আসা সেংজাকো নুওয়াং মাহিংবিহিংয়া সেংজাকো জাংওয়া নুওয়াং হিংওয়া দিংঙাবিকো দুংজিতা পুরারোওয়া। এপা জোমসারাং আকুহা সেংজাকো চেংবিহিংয়া তৈয়ার জোরোওয়া।”18আত্রংহা জোকোরিয়াহা আকু লোডিংবাকো পোইংহিংয়া জাংয়ে, “ই নুওয়াং কা হেপা গেকোগা? কা ওয়ারাংপুনতে আসা কুং মেকোরে লো পেংপুংমসা মেরেংপুনতে।”19আকু লোডিংবাকো পোইংহা জাংয়ে, “কা গাব্রিয়েলগা, কাহা সেংজাকো নাগাইতা জামগা। সেংজারাং কাহিংয়া নাতিহিংপা নুওয়াং য়্যইকো আসা ই এনতাওয়া দেরেং হিংপাকোরাং নিংপুমগা।20হাত্রং চোইপা ই নুওয়াং মাজিং, আত্রং চোইপা নাতিহা লেংবা জিংপুরোওয়া আসা য়্যইমক্যইরোওয়া, হাংপাতানাহা নাতিহা কুং জাংওয়া নুওয়াংতা মাদেংতো। কুং জাংওয়া ই নুওয়াংহা সময়তা তাংসা জিংরোওয়া।”21দিংঙাবিহা জোকোরিয়াহিংয়া দেমসাকো বাইরেতা খুইসুদিংমি, আসা আকো বাইরে নোকো গোইপুওয়াতা আআংপেপেচপা জিংদিংমি।22জোকোরিয়াহা বাইরে নোমসা লেনুওয়া আকুহা দিংঙাবিহিংপা হাইরে য়্যইমকোইতো, আসা জোকোরিয়াহা দেমসাতা দর্শন তিংয়ে তামসা দিংঙাবিহা কোইয়ে। আকুহা য়্যইকো মোচুমসা আবিহিংপা লাবে চামসা য়্যইস্রায়ে।23জোকোরিয়াহা তাংসা সেওয়া জোওয়া কাম তোইনতেনুওয়া আকুহা আপনিকো সাতা লাকাপুয়ে।24আকো নোইতাহা আকো মে ইলিসিবাকো ফেমাতা চেং দিংপুয়ে, আকো সোতা আকুহা তারি ঙারি চোইপা সাসো মোনোতো।25আসা আকুহা জাংয়ে, “দিংঙাবিকো নাগাইতা বেংদিমু তামসা লোস্যইপাওয়া য়াংপাকো সোতা সেংজাহা কুং তোইতা লামতুপা জোমি নিও।”26এলিসিবাকো ফেমাতা চেং দিংপুনুকো তারি টুউরিকো নোইতাহা সেংজাহা গাব্রিয়েল লোডিংবাকো পোইংহিংয়া গালীলকো নাসরত তাওয়া মিংকো শহরতা ইচো বিয়ৌ মোজোয়াংওয়া চোসোরি মেমেকোতা নিংপুয়ে। আকুহা দাউদ জাইপুকো জিরিকো য়োসেফ তাওয়া পোজাকো বাংকোত্যইপুনতেওয়া নিমি। আকু মেমেকো মিংহা মরিয়োম নিমি।28আকু লোডিংবাকো পোইংহা ওয়াংমসা জাংয়ে, “সেংজাকো তিমেওয়া নাতিহিংপা নিকো! প্রভুসেংজাহা নাতিহিংয়া সিওপা লামতুপা জোমি নিও। আকুহা নাতিহিংপারাং নিও।”29আদো মরিয়োমহা ই নুওয়াংসোহা আআংপেপেচপুয়ে, আসা ইহা “হেপা জিংওয়া তিমেওয়ামেতা” তামসা আংয়িং-উয়িংপা জিংপুয়ে।30আসা আকু পোইংহা জাংয়ে, “মাচ্ছুংগে মরিয়োম, হাংপাতানাহা নাতিহা সেংজাসো লামতুওয়া মুংচামি নিও।31নেহা কাং, নাতিহা চেং বুংরোওয়া আসা ইচো চেংওয়া চেংপারোওয়া। নাতিহা আকো মিংহা ইশু এপি।32আকুহা হাংসুরোমা টেবো জিংরোওয়া, আসা আকুহিংয়া টেবো সেংজাকো চেংওয়া তারোওয়া। প্রভুসেংজাহা আকুহিংয়া আকো আটা দাউদহিং ত্যাবাপা জাইপু বানাইরোওয়া।33আকুহা ইস্রাইল লোইকো তোইতা অধিকার জোরোওয়া, আসা আকো লোইহা হাত্রংরে মাদাংরোওয়া।”34আদো মরিয়োমহা লোডিংবাকো পোইংহিং উইয়ে, “ইহা হেপা জিংকো চুকোগা? হাংপাতানাহা কাহা বিয়ৌ মাজিংয়াংওয়া নামেরি মেমেগা।”35আকু পোইংহা মরিয়োমহিংয়া জাংয়ে, “সেংজাকো পবিত্র লাংবে নাকো জুপাতা লেরোওয়া, আকো টেবো সেকো লোদোংহা নাকো তোইতা হুইরোওয়া। আকো সোতা আকু কেদাংওয়া চেংহা পবিত্র জিংরোওয়া আসা সেংজাকো চেংওয়া তানেরোওয়া।36নেহা কাং, নাকো আপনিকো দিংঙা এলিসিবাহা মেরেংপুনতেদো চেং বুংমি নিও, হাংসু বেংদি নিমমে, নেহা আকোরে ফেমাতা চেং তারি টুউরি জিংপুনতেহে।37হাংপাতানাহা কাং, সেংজাকোসোহা মাতুরো তাওয়াহা হাইরে মোতো।”38আত্রংহা মরিয়োমহা জাংয়ে, “কাং, কাহা সেংজাকো ডেইয়ামুগা, কাহিংয়া নাকো জাংমবেপারাং জিংকো।” আসা আকু লোডিংবাকো পোইংহা আউসো হোপুয়ে।39আকো নোইতাহা মরিয়োমহা লোপুমসা সেন্নেপা য়হুদিয়া জায়গাকো য়্যাগ্যইকো আবেইকো লোইতা হোয়ে,40আসা জোকোরিয়াকো সাতা হোমসা এলিসিবাহিং অভিবাদন জোয়ে।41হাত্রং এলিসিবা মরিয়োমকো অভিবাদন তাওয়া হিং, আত্রংহা আকো ফেমাকো চেংহা তোইংয়ে আসা এলিসিবাহা পবিত্র লাংবেসো মেইপুয়ে।42আসা এলিসিবাহা সাডিংপা ঙামসা জাংয়ে, “নাতিহা মেমেসুতাহা আশিষিত নিও, আসা নাকো ফেমাকো চেংরে আশিষিত জিংকো।43আসা কাহা হাংপা এসেপাকো আদর জিংপুংগা, নাতিহা কুং প্রভুকো আয়ু জিংমসারে কুংতা ওয়াংতা?44হাংপাতানাহা কাং, নাকো অভিবাদন তাওয়া হিংতানি কুং ফেমাকো চেংহা য়াংতামসা কেরোউনা।45“নাতিহা ইচো আশিষিত মেমেগা, হাংপাতানাহা নাতিহা প্রভুসেংজাকো তাংসা জিংরোওয়া তাওয়া নুওয়াংবিহা দেংমি নিও।”46আসা মরিয়োমহা জাংয়ে, “সেংজাহিং তাচারোওয়া, কা কুং তুংসিং নাপোসোরাং।47কুং লাংবেহা গাগ্রুপা নিও, কাহিং মুক্তি পিচাওয়াহিংপা।48হাংপাতানাহা কা বেওয়া আপনিকো ডেইয়ামুহিং আকুহা লামতুপা জোমি নিও। তাংসা দিংঙাবিহা কাহিং আশিষিত তামসা ইসো য়ুতাহা জাংরোওয়া,49হাংপাতানাহা টেবো সে নিওয়া সেংজাহা কুং তোইতা টেবো কাম জোমি নিও।আকো মিংহা পবিত্র নিও।50আকোসো চুসুংওয়াবিহিংয়া আকুহা তুতেংজু চোইপা লামতুপা জোরোওয়া।51সেংজাহা আকো খুইকো সেসো সিওপা পুংটা জোওয়া দিংঙাবিকো নোচেংহিংয়া চোচোনোনোপা জোপুমি নিও।52আকুহা টেরবো টেরবো সে নিওয়া জাইপুবিহিংয়া আবিকো গাদিংসো ওয়েংপাপুমি নিও, আদো আপনিহিং চিয়োপা নোমবিহিংয়া এনতাওয়া জায়গাতা এমি নিও।53আকুহা আমা পাংপুমবিহিংয়া এনতাওয়া চাওয়া-আংওয়াবিসো গাইপামি নিও, আদো পুপুউবিহিংয়া আকুহা হাইরে মিচাপা নিংপুমি নিও।54সেংজাহা য়োংকো নাগাইকো আটা-আজাবিহিংপা নাপোইমসা জাংতেমেপা আপনিকো ডেইয়া ইস্রাইলহিং লামতুপা জোমি নিও।55আকুহা অব্রাহাম আসা আকো জিতেংবিহিংয়া লামতুপা জোকো হাত্রংরে মালারিংতো।”56আসা মরিয়োমহা ইলিসিবাহিংপা তারি সুংরি চোইপা য়ুংমসা আপনিকো সাতা লাকাপুয়ে।57হাত্রং এলিসিবাকো তারি চাং, আত্রংহা আকুহা ইচো চেংওয়া চেংপায়ে।58সেংজাহা আকো তোইতা টেবো লামতুপা জোমি নিও তামসা হিংমসা আকো সাবেইবি আসা আকুহিং নাইমবিহা আকুহিংপারাং য়াংতাসুয়ে।59চেং সায়্যায়ু চাংনুওয়া আবিহা চেংহিং খতনা জোকো ওয়াংয়ে, আসা তাইকো আপাকো মিংহিংপা দোদোইসুদাংপা চেংওয়াকোরে জোকোরিয়া মিং একো কেংদাংমি।60আদো এলিসিবাহা এপা জাংয়ে, “মোকোমি! ইকো মিংহা য়হুন্না এনেরো।”61আবিহা এলিসিবাহিংয়া জাংসুয়ে, “নাকো আপনিকো দিংঙাবিতাহা এপা জিংওয়া মিংহা হাংসুকোরে মোতো!”62আত্রংহা আকু দিংঙাবিহা আকু চেংকো আপাহিং লাবে চামসা উইয়ে, “নাতিহা নাকো চেংকো মিংহা হাং একোগা?”63জোকোরিয়াহা লাওয়া পাটি য়ামসা “ইকো মিংহা য়হুন্নাগা” তামসা লায়ে। ই তিংমসা আবিহা তাংসা আআংপেপেচপুয়ে।64আত্রংরাং আকুহা তাত্রিংপা য়্যইকো চুপুয়ে, আসা সেংজাহিং প্রশংসা জোয়ে।65ই তিংমসা আবিকো তাংসা সাবেইবিহা সেংজাসো চুসুংপুয়ে। য়হুদিয়াকো তাংসা য়্যাগ্যইকো দিংঙাবিকোতা ই নুওয়াংবিহা বেইপুয়ে।66ই নুওয়াং হিংবি তাংসা দিংঙাবিহা তুংসিংতা নোসুয়ে, আসা জাংসুয়ে, “ই চেংওয়াহা নোইতা হেপা জিংকোমে?” হাংপাতানাহা সেংজাকো সে আকু চেংওয়াকো তোইতা নিমি।67য়হুন্নাকো আপা জোকোরিয়াহা পবিত্র লাংবেসো জুপাতা মেইপুমসা সেংজাকো তুংসিংকো নুওয়াং য়্যইয়ে,68“ইস্রাইলকো প্রভুসেংজাকো মিং টেবো জিংকো, হাংপাতানাহা আকুহা লেমি নিও, আসা আপনিকো দিংঙাবিহিং য়ুজুরুমসা উদ্ধার জোমি নিও!69আকুহা য়োংকো সোতা আপনিকো ডেইয়া দাউদকো চিমাতা ইচো সে নিওয়া মুক্তি পিচাওয়াহিং নিংপুমি নিও,70আকুহা য়াংবিহিং মোসোংপা জোমবিকো খুইসো আসা য়াংবিহিং আচকাপা জোমবিকো সেসো তানাং এরোওয়া, তামসা জাংওয়া নুওয়াংবিহা নাগাইসোরাং পবিত্র অগমবক্তাবিকোসো জাংপুনতেমি নিমগা।72সেংজাহা য়োংকো আটা-আজাবিহিংপা নাপোইতেওয়া করারহিং নোমসা য়াংবিকো তোইতা লামতুপা জোমি নিও।73আকুহা য়োংকো আটা অব্রাহামহিংপা কা আজিপ্পারাং জোরোওয়া তামসা নাপোইওয়া নুওয়াংহা তাংসা জোমি নিও।74আসা য়াংবিহিং মোসোংপা জোওয়া দিংঙাবিকো খুইসো ওয়েংপাপিরোওয়া, তাকি য়াংবিহা মাচ্ছুংপা আকো নাগাইতা পবিত্র আসা এনতাপা জিংমসা তুতেংজু আকো সেওয়া জোকো চুউকো।76ও কুং চেংওয়া, নাতিহিংয়া টেবো অগমবক্তা তারোওয়া, হাংপাতানাহা নাতিহা প্রভুকো নাগাই নাগাই আকো ন্যাতাহিং চোপাকো হ্যানেরোওয়া।77পাপসো ছমা মুংমসা মুক্তি মুংচারো তাওয়া নুওয়াংহানাতিহা সেংজাকো দিংঙাবিহিং ঝিপারোওয়া।78য়োংকো সেংজাহা সাংমেপা আসা জেজেংপা জোওয়াগা। আকো সোতা আকুহা সিনিকো হাহাইওয়া ত্যাবাপা লোডিংবাসো য়োংকো তোইতা মুক্তি নিংপুরোওয়া।79আসা নাঘিইওয়াতা য়ুংওয়া আসা সিপুদাংতেওয়া দিংঙাবিহিং হাহাইওয়া তিংপারোওয়া, আকু হাহাইওয়াসোরাং য়াংবিহিংয়া তিমেওয়াকো ন্যাতাতা তেপোইরোওয়া।”80চেং য়হুন্নাহা জুপাতা ডেপুমসা আসা লাংবেতা সে তাপুমসা ডেপুয়ে, ইস্রাইলকো প্যাকোতা দেরেং মাহিংপায়াংনু চোইপা আকুহা চিচ্চোওয়া জায়গাতারাং য়ুংয়ে।
The Seed Company