মর্কুস14
1সোরা মোলুওয়া কোব্রেং চাওয়া আসা নিস্তার মানক্যা দেয়োংকো সানিহয়ু মেংচে নিমি। মাটা পাউবি আসা তাংজিকো উটকেওয়াবিহা ইশুহিং চিচিপা স্যাকো নিয়ুং মোদিংমি।2আদো আবিহা এপা জাংমসা নোয়ে, “চাওয়া-আংওয়াকো দিনতাহা য়াংবিহা এপা জিংওয়া কামবি জোমতুরোওয়া, মোকোনাহা দিংঙাবিহা স্যাসু-লুইসুরোওয়া।”3আত্রংহা ইশুহা বেথানিয়া লোইকো য্যা চাপুওয়া সিমোনকো সাতা হোয়ে। ইশু চাকো গাদিংনুওয়া ইচো মেমেহা ওহও্যহপা মেনাংওয়া পাংকোইওয়া চুইতি বোত্রাতা পামসা লেহে। আকু চুইতিহা জোতামোসি সিংতেংসো বানাইওয়া নিমি। আকু মেমেহা বোত্রাকো পোরো ওয়াইপামসা ইশুকো পোরোতা আকু চুইতি লুয়ে।4আকো এপা জোওয়া ন্যইমক্যইপুমসা আউতা নিওয়া দিংঙাবিহা তাইবিলারাই জাংসুয়ে, “এসেপাকো পাংক্যইওয়া চুইতি হাংপাসা লাদু গাপুমগা?5ইবেমি পিইচাপুনাহা লাবে সুংরা জাতাংকো টাংকারোমা সিওপা মুংচাকোগা আসা আকু ন্যাস্যাহা জোরোংবিহিং চোপ্পিদো তুকোগা।” এপা জাংমসা আবিহা আকু মেমেহিং ঙামসা য়েংসুয়ে।6আদো ইশুহা জাংয়ে, “ল্যাপপি, হাংপা নাবিহা ই মেমেহিং য়েংমগা? আকুহা কুং সোতাহা এনতাওয়া কামরাং জোয়ে।7জোরোংবিহা হাত্রংদো নাবিহিংপারাং নিরোওয়া, নাবি হাত্রং ইচ্ছা জিং, আত্রংহা আবিহিং য়ুজ্রুকো চুরোওয়া, আদো কাহা হাত্রংদো নাবিহিংপা দাদাপা মাতারোওয়া।8আকুহা হাই জোকো ছু আকুরাং জোয়ে। আকু ওহ-ও্যহওয়া চুইতিহা কুং জুপাহিং ন্যাইমসা কা সিপুনুরোমা নাগাই লিকো তামসা তৈয়ার জোমি নিও।9আজিপ্পারাং কা নাবিহিং জাংরোওয়া, বাসিমতিকো তাংসা জায়গাতা হাংতা হাংতা এনতাওয়া দেরেং হিংপা, আউতা ইকো জোওয়া ই কামরে প্যারাপারোওয়া।”10ইশুকো বার্চো য়োংতোংবিতাহা য়হুদা ইস্করিয়োত তাওয়া ইচো ইশুকো য়োংতোংহা ইশুহিং প্যইপাকো তামসা মাটা পাউবিহিং হুইয়ায়ে।11মাটা পাউবিহা আকো নুওয়াং হিংমসা য়াংতাচপুয়ে, আসা আকুহিংয়া ন্যাস্যা পিচরো তামসা জাংয়ে। আসা য়হুদাহা ল্যহপামসা ইশুহিং প্যইপাকো তামসা মৌকা মোয়ে।12সোরা মোলুওয়া কোব্রেং চাওয়া য়হুদিবিকো নিস্তার মানক্যাকো নাগাইকো দিন দেয়োংমি নিমি। আত্রংকো দিনতারাং নিস্তার মানক্যাতাহা লুকা স্যাচাংমি। আকো সোতা য়োংতোংবিহা ইশুহিং উইয়ে, “প্রভু, কাবি হাংতা হোমসা নাকো সোতা নিস্তার মানক্যাকো চাওয়া-আংওয়া তৈয়ার জোওয়াকোগা?”13ইশুহা তাইকো নিহসো য়োংতোংবিহিং এপা জাংয়ে, “নাবিহা য়রুশালেম শহরতা হাতুউ। আউতা ইচো গাংরুতা তি পুউপুমসা হোদাংওয়া দিংঙাহিং দোসুরোওয়া। নাবিহা আকো নুনুই হোতু, আসা হানি সাতা আকু হো।14আকু সাকো গিরিওয়াহিং জাং, ‘কুং উটকেওয়াহা উইদিংমি কা আপনিকো য়োংতোংবিহিংপা গামসা য়হুদিবিকো নিস্তার মানক্যাতা চাওয়া সিরিহা হাংতা নিংগা?’15আকুহা নাতিবিহিংয়া তোইতা টেবো তাংসা চোপামসা এওয়া সিরি তিংপারোওয়া, আউতারাং য়োংকো সোতা নিস্তার মানক্যাকো চাওয়া-আংওয়াবি চোপা।”16আত্রংহা য়োংতোংবিহা শহরতা হোয়ে, আসা ইশু হেপা জাং, ওইপারাং য়োংতোংবিহা তিংয়ে, আসা নিস্তার মানক্যাকো চাওয়া-আংওয়াবি আউতা চোপায়ে।17জিরুং জিংপুনুওয়া ইশুহা তাইকো বার্চো য়োংতোংবিহিংপা আকু সাতারাং দেয়োংয়ে। ইশুহা তাইকো বার্চো য়োংতোংবিহিংপা গামসা চাওয়া।18আবি হাত্রং গামসা চাদিং, আত্রংহা ইশুহা জাংয়ে, “কা নাবিহিং আজিপ্পারাং জাংরোওয়া, নাবিকো প্যাকোসোরাং কাহিংপা চাদিংওয়া ইচোহা কাহিং প্যইপারোওয়া।”19ই নুওয়াং হিংনুওয়া য়োংতোংবিহা তুংসিং চিচাপুয়ে, আসা ইচো-ইচোপা হোমসা ইশুকোতা উইসুয়ে, “আকুহা কাগা?”20ইশুহা আবিহিং জাংয়ে, “আকুহা ই বার্চোতাহা ইচোগা, হাংসু কাহিংপা চোপোইতা কোব্রেং বুমসা চাদিং।21তাংজিকো হিগাতা লামি ত্যাবাপারাং দিংঙাকো চেংওয়াহা সিনেরোওয়া, আদো টেবো কোইচ্যাওয়া ওয়াংরোওয়া, আকু দিংঙাকোতাহা! হাংসু দিংঙাকো চেংওয়াহিং প্যইপামে! আকু দিংঙাহা আকো সোতা মেকেওয়ারাং এনতাকোগা।”22চাওয়া-আওয়া চাসুদিংনুওয়া ইশুহা কোব্রেং চুমসা সেংজা আপাহিং গারানি তায়ে। আসা আকুহা কোব্রেং ছিমসা য়োংতোংবিহিং পিচামসা জাংয়ে, “এই, ইহা কুং জুপাগা।”23আসা আকুহা চোপোই চুংমসা সেংজা আপাহিং গারানি তায়ে, আসা য়োংতোংবিহিং পিচায়ে। আসা আবিহা তাংসা আকু চোপোইসোরাং আংগুরকো সাইতি আংয়ে।24আত্রংহা ইশুহা আবিহিং জাংয়ে, “এই, ইহা সেংজাকো নাপোইতেওয়া চুবে করারহিং পক্কা জোওয়া কুং য়ুতিগা, হানি উইসে দিংঙাবিকো সোতা ক্যাপামমে।25কা আজিপ্পারাং ই নুওয়াং জাংদিংয়ো, হাত্রং চোইপা কা সেংজাকো রাজ্যকো চুবে আংগুরকো সাইতি মাআং, আত্রং চোইপা ন্যাসারাং কা আংগুরকো সাইতি মাআংরোওয়া।”26আসা আবিহা ইচো লেহদি লেমসা আউসো নোপুমসা জেইতুন য়্যাগ্যইতা হোপুয়ে।27ইশুহা য়োংতোংবিহিং জাংয়ে, “তাংজিকো হিগাতা সেংজাহা জাংমি নিও, ‘কা গোইত্রহিং স্যারোওয়া আসা লুকাবিহা ইতা উতা ক্যাপুরোওয়া।’28আদো কা সিমসা ঙারোনুওয়া নাবিরোমা নাগাই গালীলতা দেকানতেরোওয়া।”29আত্রং পত্রসহা ইশুহিং জাংয়ে, “তাংসা নাতিহিং হুইতেমসা ক্যাপুইদো কা নাতিহিংয়া মাহুইতেরো।”30ইশুহা পত্রসহিং জাংয়ে, “কা আজিপ্পারাং নাতিহিং জাংরোওয়া, জুকুং হাপকুংকো কেকা নিক্যা ওনুরোমা নাগাই নাতিহা কাহিং সুংকোই চোইপা মানাইমি তামসা জাংরোওয়া।”31আদো পত্রসহা সাদিংপা ঙামসা জাংয়ে, “নাতিহিংপা সিনেদো কা নাতিহিংয়া মানাইমি তামসা মাজাংরো।” আসা তাংসা য়োংতোংবিরে এপারাং জাংসুয়ে।32আকো নোইতা ইশুসো আকো য়োংতোংবিহা গেতসামানি তাওয়া জায়গাতা হোয়ে। আউতাহা ইশুহা য়োংতোংবিহিং জাংয়ে, “কা পাচাইয়াকো হোদাংয়ে, নাবিহা ইতারাং গায়ে।”33এপা জাংমসা ইশুহা পত্রসহিং, য়াকুবহিং, আসা য়হুন্নাহিং তাতিহিংপা পুরায়ে, আকো তুংসিংহা আরাংপারাংপা জিংপুদাংতেওয়া নিমি।34আকুহা আবিহিং জাংয়ে, “কুং তুংসিংহা আরাংপারাংপা জিংমসা মচুপা জিংপুদাংতেনা। নাবিহা মাজিংপা য়ুংয়ে।”35আসা ইশুহা আস্যই তানাং হোমসা লিতা চুনুইমসা “তুদানাহা কুংতা দেপাওয়া ই কোইচ্যাওয়াবি ওয়েংপাপি” তামসা পাচাইয়ে।36আকুহা এপা জাংয়ে, “আপা, ও আপা, নাতিহা হাই জিংদো জোকো চুমগা। ই কুংতা দেপাওয়া কোইচ্যাওয়াবি কুংসো ওয়েংপাপি, আদো কুং ইচ্ছাসো মোকো, নাকো ইচ্ছাসো জিংকো।”37আসা ইশুহা ন্যাসারাং য়োংতোংবিকোতা লায়োংনুওয়া য়োংতোংবিহিংয়া জিংদিংওয়া দোসুয়ে। আকুহা পত্রসহিং জাংয়ে, “সিমোন নাতিহা জিংদিংগা? এক ঘন্টারে নাতিহা ন্যইমসা য়ুংকো মাছুমগা?38মাজিংপা য়ুং, আসা পাচাই, নাবিহা পরিকছাতা মপোরেকো। আজিপ্পারাং লাংবেহা তৈয়ার নিয়ো, আদো জুপাতাহা সে মোতো।”39ন্যাসারাং ইশুহা হোমসা নাগাইকো ত্যাবাপারাং পাচাইয়ায়ে।40ন্যাসারাং পাচাইয়ামসা লেনুওয়া য়োংতোংবিহিংয়া তাংসাহিং জিংপুতেওয়া দোসুয়ে, হাংপাতানাহা আবিহা জিংদাংপুমসা মিচোরাং ওয়েমক্যইপা জিংপুনতেমি। আসা য়োংতোংবিহা আকুহিংয়া হাং জাংনেকোমে হাইরে জাংমক্যইতো।41সুংকোই চোইপা লায়োংমসা ইশুহা আবিহিং জাংয়ে, “নেদোপা নাবিহা জিংসুমসা সাসুদিংগা? নেহা তুয়ে, সময় দেয়োংতেহে। কাং, দিংঙাকো চেংওয়াহা পাপিবিকো খুইতা দেকাওয়া সময় জিংপুনতেয়ো।42লো! তে! কাং, কাহিং ল্যহপামসা প্যইপাওয়া দিংঙাহা দেরেনতেহে।”43ইশু য়্যইদিংওয়া কোকোইত্তা বার্চো য়োংতোংবিতাহা ইচো য়হুদা তাওয়া আউতা দেরেহে। আকুহিংপাহা দ্যইসো কাসুমা ওয়েওয়া উইসে দিংঙাবি নিমি। আবিহিংয়া মাটা পাউবি, আসা তাংজিকো উটকেওয়াবি আসা য়হুদি মাটা ওয়ারাংপাবি প্যইকো নিংপুওয়া নিমি।44আকু প্যইপাওয়া দিংঙাহা এপা জাংওয়া নিমি। “কা হাংসুহিং চুম্মা জো, আকুরাং ইশুগা, আকুহিংনাং প্যইচপুমসা পুরাচা।”45আসা য়হুদাহা ইশুকোতা হোমসা “ও উটকেওয়া” তামসা চুম্মা জোয়ে।46আত্রংরাং আবিহা ইশুহিং প্যইকায়ে।47আদো ইশুকো আবেইতা জাদিংওয়া ইচো দিংঙাহা কাসুমা য়োমসা টেবো পাউকো ডেইয়াকো নানুং ঠেপুয়ে।48ইশুহা আকু দিংঙাবিহিং জাংয়ে, “কাহা কুইওয়া দিংঙাগা? নাবিহা দ্যইসো কাসুমাবি পামসা প্যইকো লেমগা?”49সদাইদিন কা দেমসাতা দিংঙাবিহিং ঝিপাচাংনুওয়া আত্রংহা নাবিহা কাহিংয়া হাংপাসা মোপ্যইমগা? আদো তাংজিকো হিগাকো নুওয়াং তাংসা জিংকো।50আত্রংহা তাংসা য়োংতোংবিহা ইশুহিং হুইতেমসা ক্যাপুয়ে।51ইচো পোজাহা জুপাতা ইজো মেংচে সুতিকো আংদুং গুইমসা ইশুকো নুনুই হুইদিংমি। আসা আবিহা আকুহিংনে প্যইকো কেংয়ে,52আদো আকু দিংঙাহা আংদুং হুইতেমসা পাইক্রি ক্যাপুয়ে।53আবিহা ইশুহিংয়া য়হুদিবিকো টেবো পাউকো সাতা পুরায়ে। আউতা মাটা পাউবি, তাংজিকো উটকেওয়াবি আসা দোসরা য়হুদি মাটা ওয়ারাংপাবি দেরেহে।54পত্রসহা ইশুহিং তানাংসোরাং নুনুই হুইপামসা টেবো পাউকো সাকো লাঙাং চোইপা দেরেহে, আসা সা খুউওয়া দিংঙাবিহিংপা মে মেয়াংচামসা গাহে।55আকু মাটা পাউবি আসা জোংসুওয়া সাতা নিওয়া তাংসা দিংঙাবিহা ইশুহিং স্যানেরো তামসা ইশুকো তোইতা প্রমানবি মোসোইয়ে। আদো আবিহা ইশুকো তোইতা ইচো প্রমানরে দোপামক্যইতো।56ইশুকো তোইতা আবিহা কোওয়া মোকোওয়া অ্যাজাপা নুওয়াংবি জাংসুয়ে। আদো হাংসুকোরে তেকা মোচুইতো।57আকো নোইতা লেরাহা লোসুমসা ইশুকো তোইতা কোওয়া-মোকোওয়া এপা জিংওয়া নুওয়াংবি জাংসুয়ে,58“ই দিংঙাকো এপা জাংওয়া কাবি হিংয়ে, ‘দিংঙাবিকো বানাইওয়া দেমসাহিং য়্যামসা’ দিংঙাবিকো মাবানাইওয়া দেমসাহিং কা সাসুংয়ুংতা জাপারোওয়া।”59আদো ইতারে আবিকো য়্যইওয়াহা তেকা মুচুইতো।60টেবো পাউহা তাংসাকো প্যাকোতা জাপামসা ইশুহিং উইয়ে, “নাতিহা হাংপা মোয়্যইপা চেকেপা য়ুংমগা? আবিকো জাংওয়া নুওয়াংকো তোইতা নাতিহা হাইরে জাংকো মাতাংগা?”61আদো ইশুহা চেকেইপারাং য়ুংয়ে। আকুহা হাইরে মোইয়্যইতো। ন্যাসারাং টেবো পাউহা ইশুহিং উইয়ে, “নাতিহা পবিত্র সেংজাকো চেংওয়া খ্রীষ্টরাংগা?”62ইশুহা জাংয়ে, “কারাংগা, আসা সাইয়ুহা নাবিহা কা দিংঙাকো চেংওয়াহিংয়া সেংজাকো দাংক্রেং কাটুতা গাদিংওয়া আসা ডিংবাসো এপা লেপাদাংওয়া তিংরোওয়া।”63ই হিংমসা টেবো পাউহা সেদ্রাংপুয়ে আসা আপনিকো আংদুং ছিমসা এপা জাংয়ে, “নেহা য়াংবিহিংয়া ইকো তোইতা দোসরা নুওয়াংহা হাং গেনেকোগা?64ইহা সেংজাহিং নিন্দা জোওয়াহা নাবিরাং হিংদিংয়ো। নেহা জাং, নাবিহা হাং নোংগা?”
আবি তাংসা জাংসুয়ে, “ইহা মেংতাওয়া কাম জোওয়াকো সোতা সিনেরোওয়া!”65আবিকো পাকোতা লেরাবিহা ইশুহিংয়া তোতি তোতোসুয়ে, আসা মিচো তুংমসা দ্যইসো পোমসা জাংয়ে, “অগমবাণী জাং, নাতিহিংয়া হাংসু পোংগা” আসা সিপাইবিরে আকুহিংয়া ডুমসা পুরায়ে।66আত্রংহা পত্রসহা লাঙাংতারাং গোইদিংমি। আসা আউতা টেবো পাউকো ডেইয়ামু লেহে। আসা পত্রসহিংয়া মেহ মেয়াংচাদিংওয়া তিংয়ে।67পত্রসহিং তিংমসা আকুহা মোসরোইপা ন্যইমসা জাংয়ে, “নাতিরে নাসরতকো ইশুহিংপারাং নিমকোতা?”68পত্রসহা জাংয়ে, “কাহা মোকোমি, নাতিহা হাং জাংদিংমে কা মোকোইনা।” আকো নোইতাহা পত্রসহা লাপুংকো আবেইতা হোপুয়ে, আত্রংহা ইক্যা কেকা ওয়ে।69পত্রসহিং লাপুংকো আবেইতা গাওয়া তিংমসা আকু ডেইয়ামুহা ন্যাসারাং দোসরা দিংঙাবিহিং জাংয়ে, “ইরে ইশুকো য়োংতোংরাংগা।”70আদো পত্রসহা ন্যাসারাং জাংয়ে, “কা মোকোমি।”
আম্যই নোইতাহা আউতা নিওয়া দিংঙাবিরে পত্রসহিং জাংয়ে, “নাতিহা মোকোমি তাচা মোতো। নাতিরে গালীলি আসা আকো য়োংতোংরাংগা।”71পত্রসহা ন্যাসারাং নাপোইমসা জাংয়ে, “কামি অ্যাজাপা ল্যহপানাহা সেংজাকো সেদ্রাংওয়া কুং তোইতা হুইকো, নাবিকো জাংওয়া দিংঙাহিংয়া কা নাইকোরে মানাইমি।”72এপা জাংওয়া কোকোইত্তা নিইক্যা কেকা ওপুয়ে, “নিক্যা কেকা ওনুরোমা নাগাই সুংকোই নাতিহা কাহিং মানাইনা তামসা জাংরোওয়া” তাওয়া ইশুকো জাংতেওয়া নুওয়াং পত্রসহা প্যারাতাংয়ে। আসা পত্রসহা মিতি জাজাপা কাইয়ে।
আবি তাংসা জাংসুয়ে, “ইহা মেংতাওয়া কাম জোওয়াকো সোতা সিনেরোওয়া!”65আবিকো পাকোতা লেরাবিহা ইশুহিংয়া তোতি তোতোসুয়ে, আসা মিচো তুংমসা দ্যইসো পোমসা জাংয়ে, “অগমবাণী জাং, নাতিহিংয়া হাংসু পোংগা” আসা সিপাইবিরে আকুহিংয়া ডুমসা পুরায়ে।66আত্রংহা পত্রসহা লাঙাংতারাং গোইদিংমি। আসা আউতা টেবো পাউকো ডেইয়ামু লেহে। আসা পত্রসহিংয়া মেহ মেয়াংচাদিংওয়া তিংয়ে।67পত্রসহিং তিংমসা আকুহা মোসরোইপা ন্যইমসা জাংয়ে, “নাতিরে নাসরতকো ইশুহিংপারাং নিমকোতা?”68পত্রসহা জাংয়ে, “কাহা মোকোমি, নাতিহা হাং জাংদিংমে কা মোকোইনা।” আকো নোইতাহা পত্রসহা লাপুংকো আবেইতা হোপুয়ে, আত্রংহা ইক্যা কেকা ওয়ে।69পত্রসহিং লাপুংকো আবেইতা গাওয়া তিংমসা আকু ডেইয়ামুহা ন্যাসারাং দোসরা দিংঙাবিহিং জাংয়ে, “ইরে ইশুকো য়োংতোংরাংগা।”70আদো পত্রসহা ন্যাসারাং জাংয়ে, “কা মোকোমি।”
আম্যই নোইতাহা আউতা নিওয়া দিংঙাবিরে পত্রসহিং জাংয়ে, “নাতিহা মোকোমি তাচা মোতো। নাতিরে গালীলি আসা আকো য়োংতোংরাংগা।”71পত্রসহা ন্যাসারাং নাপোইমসা জাংয়ে, “কামি অ্যাজাপা ল্যহপানাহা সেংজাকো সেদ্রাংওয়া কুং তোইতা হুইকো, নাবিকো জাংওয়া দিংঙাহিংয়া কা নাইকোরে মানাইমি।”72এপা জাংওয়া কোকোইত্তা নিইক্যা কেকা ওপুয়ে, “নিক্যা কেকা ওনুরোমা নাগাই সুংকোই নাতিহা কাহিং মানাইনা তামসা জাংরোওয়া” তাওয়া ইশুকো জাংতেওয়া নুওয়াং পত্রসহা প্যারাতাংয়ে। আসা পত্রসহা মিতি জাজাপা কাইয়ে।
The Seed Company