মর্কুস13
1ইশু দেমসাসো নোপানুওয়া ইচো য়োংতোংহা জাংয়ে, “উটকেওয়া কাংকে, ই দেমসাকো টেরবো টেরবো লুংতুইবিহিং আসা এনতাওয়া এনতাওয়া সাবিহিং!”2ইশুহা জাংয়ে, “ই দেমসাকো সাবিহিং তিংমকোতা? আদো আজিপ্পারাং কা নাবিহিংয়া জাংদিংয়ো, ই লুংটুইবিহা ইচোকো তোইতা ইচোরে মায়ুংরোওয়া, তাংসা হ্যাপুরোওয়া।”3আম্যই নোইতা ইশুহা দেমসাকো নুব্যাতা জেইতুন য়্যাগোতা গাদিংমি। আত্রংহা পত্রস, য়াকুব, য়হুন্না আসা আন্দ্রিয়াসহা চেকেপা আকোতা লেমসা উইয়ে,4“কাবিহিং জাং, ই তাংসা নুওয়াংবিহা হাত্রং জিংকোগা? নাকো জাংওয়া ই তাংসা নুওয়াংবি জিংকো তোংপায়ে তামসা কাবিহা হেপা সিদা চ্যইকোগা?”5ইশুহা আবিহিং জাংয়ে, “কাং, হাংসুরে দোসরাকো ল্যহপাওয়াতা মাদেংকো।6উইসে কুং মিংতা লেরোওয়া আসা জাংরোওয়া, ‘কা আকু মুক্তি পিচাওয়া সেংজাকো জেংওয়া জাইপুগা’ আসা উইসে দিংঙাবিহা আবিকো ল্যহপাওয়াতা ল্যহচপুরোওয়া।7হাত্রং নাবি লুইশুওয়া আসা লুইশুরো তাওয়া নুওয়াংবি হিং, আত্রংহা নাবিহা মাচ্চুংগে। আদো আত্রংতারাং ই বাসিমতিহা মাদাংরোওয়া।8ইচো জ্যাহা দোসরা জ্যাকো তোইতা, ইচো দেশহা দোসরা দেশকো তোইতা য়েরোওয়া। উইসে লোইতাহা নিংঙা হ্যারোওয়া আসা চাওয়া-আংওয়া মামুংপা জিংপুরোওয়া। ই তাংসাহা দুঃখকো শুরু মেংচেগা।9নাবিহা হোশিয়ার য়ুং। দিংঙাবিহা নাবিহিংয়া প্যইমসা জোংসুওয়া সাতা পুরারোওয়া। আসা জোংসুওয়া সাতা পুরামসা সোটাসো ডুরোওয়া। কুং নুওয়াং জাংকো সোতা দেশকো মাটাবি আসা নাবিহা আউতা নিওয়া জাইপুবিকো নাগাইতা জানেরোওয়া।10আদো নাগাইহা নাবিহা তাংসা জ্যাকো প্যাকোতা সেংজাকো এনতাওয়া দেরেং হিংপানেরোওয়া।11হাত্রং আবি নাবিহিং প্যইপুমসা কাইজিকোতা পুরা, আত্রংহা হাং য়্যইনেকোমে তামসা নাবিহা হাইরে মোনোগে। নাবিহা আবিকো নাগাই জানুওয়া নাবি হাই মুংচা আকুরাং জাং, হাংপাতানাহা নাবিহা হাই য়্যই আকুহা নাবি মোকো, আদো পবিত্র লাংবেরাং নাবিকোতা জিংমসা য়্যইরোওয়া।12“আত্রংহা দিংঙাবিহা আপনিকো ডুওয়াহা এবিহিং স্যাকো তামসা স্যইপুরোওয়া। আপাহা চেংওয়া-চেমেবিহিং আসা চেংওয়া চেমেবিহা আপা আয়ুকো তোইতা মেংতাপা নোমসা আবিহিং স্যাপারোওয়া।13কুং নুনুই হুইওয়াকো সোতা নাবিহিংয়া দিংঙাহা আচকাপা জোরোওয়া, আদো হাংসু নোইস্যাতা চোইপা য়ুং আকুহা বাচেরোওয়া।”14“দেপাওয়া দিনবিতাহা পবিত্র দেমসাবিতাহা আচকাওয়া মুর্তি জাপাদিংওয়া তিংরোওয়া। আকু মুর্তিহা আউতা নিমতুকোগা। আকু মুর্তিসোহা আকু দেমসাহিংয়া মেংতাপা তিংপাপুরোওয়া। আসা আত্রংহা য়হুদিয়াতা নিমবিহা য়্যাগ্যইতা ক্যাচপুকো।15সাকো তোইতা নিমবিহা লিতা উইমসা সাকো নাপোতা হাইক্রি লাকো হোমঘ্যইকো।16লোংনিংতা কাম জোদিংবিহা আংদুংবি লাকো তামসা সাকো নাপোতা মোহোকো।17আত্রংহা চেং বুংওয়া মেমে আসা নুইতা নিওয়া চেংকো আয়ুবিহা হাসেকো বিজোক জিংকোমে।18ই নুওয়াংবি সেইগু চিকিংনু মেদেয়োংকো তামসা সেংজা আপাকোতা পাচাই।19হাংপাতানাহা সেংজাহা ই বাসিমতি দিংনুসোহা এপা জিংওয়া চুসুং-মাইশুংক্যইপা কোইচ্যাওয়া নেচোইপা মাজিংয়াংতো, আসা ন্যাসা হাত্রংরে মাজিংরোওয়া।20সেংজাবেমি আকু দিনবি লিয়োপা মোজোপিনাহা হাংসুরে মাবাচেকোগা। আদো আকো জেংওয়া দিংঙাবিকো সোতা আকু দিনবিহা সেংজাহা লিয়োপা জোপিমি নিও।21আকু কোইচ্যাইওয়া সময়তা লেরাহা নাবিহিংয়া জাংরোওয়া, সেংজাকো জেংওয়া জাইপু খ্রীষ্টহা ইতা নিও জাইপু খ্রীষ্টহা উতা নিও তারোওয়া, আদো নাবিহা এপা জাংওয়াতা মাদেং।22হাংপাতানাহা এপা জিংওয়া প্যায়োং খ্রীষ্ট আসা প্যায়োং অগমবক্তাবি ওয়াংরোওয়া। আসা আবিহা টেরবো টেরবো আআংপেপেচপুওয়া কামবি তিংপামসা সেংজাকো জেংওয়া চেংবিহিংনে ল্যহপাকো চুরোওয়া।23নাবিহা হোশিয়ার য়ুং! কাং, ই তাংসা জিংনুরোমা নাগাই কা নাবিহিং জাংপুনতেও।”24“আকু কোইচ্যাওয়াকো দিন পেংপুনতেনুকো নোইতাহা সানিহা নাটিংপা জিংপুরোওয়া আসা তারিরে হাংজি মিচারোওয়া।25পুইমাবিহা ডিংবাসো হুইচারোওয়া আসা ডিংবাকো তাংসা সেবিরে দিদিচপুরোওয়া।26আকো নোইতাহা দিংঙাকো চেংওয়াহিংয়া দিংঙাবিহা টেবো সে আসা সেংজাকো মহিমাহিংপা ডিংবাসো লেপাদাংওয়া তিংরোওয়া।27আসা আকুহা লোডিংবাকো পোইংবিহিং নিংপুরোওয়া, আবিহা বাসিমতিকো তাংসা জায়গাসো দাংসো, মাংসো, দিসো, নুসো, সেংজাকো জেংওয়াবিহিং গুপামসা পারারোওয়া।”28ইশুহা ন্যাসারাং জাংয়ে, “মুইরাকো সিংতেংসো হাইক্রি ঝি। মুইরাসেকো গেইবেতা নোইচু নোইনুওয়া বোওয়া সময় দেয়োংতেহে তামসা সিদা চ্যইমগা।29এপারাং কুং জাংওয়া বেপারাং সানি নাতুংপুওয়া তিংনুওয়া কা লেপাদাংতেও তামসা নাবিহা গেরোওয়া।30আজিপ্পারাং কা নাবিহিং জাংরোওয়া, ই নুওয়াংবি হাত্রং চোইপা মাজিং, আত্রং চোইপা নেকো দিংঙাবিহা মিসিরোওয়া।31লোডিংবাসো বাসিমতিহা দাংপুরো, আদো কুং য়্যইদিবিহা হাত্রংরে মাদাং।”32“আদো আত্রংকো দিন আসা সময়হা হাত্রং লেকোমে হাংসুরে মেগে, লোডিংবাকো পোইংবিরে আসা চেংওয়ারে মেগে, আদো আকু নুওয়াংহা সেংজা আপা মেংচে গেমগা।33আকো সোতা হোশিয়ার য়ুং, হাংপাতানাহা আকু সময় হাত্রং লেকোমে নাবিহা সিদা মোচ্যইরোওয়া।34আকুহা ডেইয়াবিকো খুইতা সা ত্যইতেমসা তানাংতা কোইয়াকো হোপুওয়া গিরি বেপাগা। গিরিওয়াহা ডেইয়াবিহিং আপনি আপনিকো কাম এনতাপা জোকো তামসা ত্যইতেওয়া আসা সা খুইওয়া দিংঙাহিংনে এনতাপা কাংকো তামসা আজ্ঞা জোতেহে।35আকো সোতা হোশিয়ার য়ুং, হাংপাতানাহা গিরি হাত্রং দেয়োংকোমে, নাবিহা সিদা মোচ্যইরোওয়া। আকুহা জিরুং, লিইশুং, কেকা ওদাংনু, হাপকুং, হাত্রং জিংদো দেয়োংকো চুরোওয়া।36আসা তাত্রিংপা আকু দেয়োংনুওয়া নাবিহিংয়া জিংদিংওয়া মোদোসুকো।37নাবিহিং জাংমবেপারাং কা তাংসা দিংঙাবিহিং জাংরোওয়া, হোশিয়ার জিংমসা য়ুং।”
The Seed Company