মর্কুস12
1ইশুহা আবিহিংয়া ইচো মিংচি ল্যাইমসা হিংপায়ে, “ইচো দিংঙাহা লুংনিংতা আংগুরকো সিংতেংবি তিংয়ে। আসা লুংনিং হুরাপা বিরি য়ায়ে, আসা আংগুরকো দুংরাইকো প্যাকোতা মোংটো দাইমসা সাইতি নোপাওয়া হোকরা বানাইয়ে, আসা আংগুরকো দুংরাইহিং কাংকো তামসা ইচো গ্যই বানাইয়ে, আসা আকু আংগুরকো দুংরাইহিংয়া দিংঙাবিকো খুইতা এতেমসা তাতিহা তানাংকো লোইতা হ্যাপুয়ে।2আংগুর মিংরো তোংপানুওয়া ইচো ডেইয়াহিং তাইকো কাটু মুংচাওয়া আংগুর লাপাকো নিংপুয়ে।3আদো আংগুরবিরিতা কাংপামবিহা আকু আংগুর লাংরেওয়া দিংঙাহিংয়া হাইরে মাকাইপুপা ডুমসা নিংপুয়ে।4আত্রংহা লুংনিংকো গিরিওয়াহা ন্যাসারাং ইচো ডেইয়াহিং নিংপুয়ে। কাংপামবিহা আকোরে পোরো ওয়্যাপাপুয়ে আসা আকুহিংপা মেংতাপা জোয়ে।5আকুহা ন্যাসারাং দোসরা ইচোহিং নিংপুয়ে। আকুহিংনে কাম জোমবিহা স্যাপুয়ে। এপা জোমসারাং আবিহা লেরা ডেইয়াবিহিংয়া ডুপুউয়ে আসা লেরাবিহিংয়া স্যাপুয়ে।”6“নোইস্যাতাহা আউতা নিংপুকোহা আকো ইচো জেজেংওয়া চেংওয়া মেংচে ল্যইতেওয়া নিমি। ‘কুং চেংওয়াহিংয়া আবিহা পক্কাই আদর জোকোদোওয়া’ তাওয়া নোমসা আকুহা আপনিকো চেংওয়াহিংয়া আবিকোতা নিংপুয়ে।”7“আদো আকু কাম জোমবিহা তাইবিলারাই হুইসুয়ে, ‘ইরাং নোইতা তাংসা ই মোংটোকো গিরিওয়া জিংরোওয়া। তে, য়াংবি আকুহিং স্যাকো, আকুহিংবেমি স্যাকো চুনাহা য়াংবিরাং ই মোংটো-কেটোকো গিরোওয়া জিংরোওয়া।’8আবিহা চেংওয়াহিং প্যইমসা স্যাপুয়ে আসা আংগুরকো দুংরাইবিরিসো নোপামসা বাইরেতা বাডোইপুয়ে।”9আত্রংহা ইশুহা দিংঙাবিহিং উইয়ে, “নেহা আংগুরকো গিরিওয়াহা আবিহিংয়া হাং জোকোগা? আকুহা লেমসা কাম জোমিবিহিংয়া স্যারোওয়া আসা আংগুরকো দুংরাইবিরিহিংয়া দোসরাকো খুইতা পিচাপুরোওয়া।10নাবিহা তাংজিকো হিগাতা লাওয়া মাপাড়াইংগা?‘সা বানাইদাংনু মোগ্যইরো তামসা হুইতেওয়ালুংটুংরাং আরিতা ঘ্যইওয়া মাটা লুংটুই জিংপুয়ে।11এপাহা সেংজা আপনিরাং জোমগা,আসা আকুহা য়োংকো মিচোকো নাগাইতাহা আআংপেপেচপুওয়া নুওয়াংগা’।”12আত্রংহা আকু তাংজিকো উটকেওয়াবিহা ইশুহিং প্যইকো কেংয়ে, হাংপাতানাহা আবিহা গেদিংমি নিমি, ইশুহা দুংরাইকো মিংচি ল্যাওয়াহা তাইবিকো তোইতারাং ল্যাদিংয়ো তামসা, আদো আবিহা দিংঙাবিকোসো চুসুংমসা ইশুহিং হুইতেমসা হোপুয়ে।13আসা আকু তাংজিকো মাটাবিহা নিহসো সুংচো দিংঙাবিহিং ইশুকোতা নিংপুয়ে। আবিহা ফরিসি আসা হেরোদ জাইপুকো দিংঙাবি নিমি। আবিহিংয়া ইশুহিং য়্যইওয়া-য়্যইওয়াতা ফসাইকো তামসা নিংপুওয়া নিমি।14আবিহা ইশুকোতা ওয়াংমসা জাংয়ে, “ও উটকেওয়া, নাতিহা আজিপ্পা নুওয়াং য়্যইমগা তামসা কাবিহা গেমগা। দিংঙাবিহা হাং জাংকোমে তামসা নাতিহা প্যারামাপামগা। নাতিহা হাংসুকো য়ুওয়াই নোইমসারে মোয়্যইমগা। নাতিহা আজিপ্পারাং সেংজাকো ন্যাতা তিংপামগা। নেহা কাবিহিং জাং, লিংপাংতা নিমি ত্যাবাপা রোমি সরকারহিং তোংক্যা তাকোওয়া এনতাওয়াগা না মেংতাওয়াগা?15কাবিহা তাকোগা না মাতাকোগা?”
ইশুহা আবিকো তুংসিং নাপোকো মেংতাপা নোওয়াবি সিদা চ্যইমসা আবিহিং জাংয়ে, “মোতুওয়া নুওয়াং জাংমসা নাবিহা কাহিং হাংপা ফসাইকো কেংদাংমগা? আকু টাংকা ইতা পা, কা কাংরে।”16আবিহা আকুহিংয়া টাংকা পিচায়ে। আসা ইশুহা আবিহিংয়া উইয়ে, “ই টাংকাতা কাং, ইতাহা হাংসুকো য়ুওয়াই আসা মিং নিংগা?”
আবিহা জাংয়ে, ইহা রোমি মাটা জাইপু সিজারকো।17আসা ইশুহা আবিহিংয়া জাংয়ে, “নাকোতা হাই সিজারকো নি, আকুহা সিজারহিং পিচা আসা সেংজাকো হাইনি, আকুহা সেংজাহিংনাং পিচা।”
ইশুকো ই নুওয়াং হিংমসা আবিহা আআংপেপেচপুয়ে।18আকো নোইতা সদুকি তাওয়া জ্যাবিহা দিংঙাহা সিপুওয়াকো নোইতা মাঙারোমগা তামসা নোমি। ইচো নিহসো সদুকিবিহা ইশুকোতা লেমসা উইসুয়ে,19“ও উটকেওয়া, মোসাহা তাংজিকো হিগাতা কাবিকো সোতা এপা লাপিমি নিও, ইচো দিংঙাকো ডুওয়া চেং মাজিংপা সিপুনাহা ডুওয়াকো চেং জিংকো তামসা এহা লুংঙাহিং বিয়ৌ জোনেরোওয়া। আকু দিংঙাহা আকো ডুওয়াকো মেহিং বিয়ৌ জোনেরোওয়া আসা এপা জোমসারাং আকো বংশ য়োইরোওয়া।20আউতাহা আবিহা নীচো এবি নিমি। নাগাইকো ডুওয়াহা বিয়ৌ জোমসা চেং মাজিংপা সিপুয়ে।21আকো নুনুইকো এরে লুংঙাহিং বিয়ৌ জোয়ে, আদো আকুরে চেংচুং মাজিংপা সিপুয়ে। সাইলা এরে এপারাং জোয়ে।22এপা জোমসা নীচিংপুকোসারাং চেংচুং মাজিংপা সিপুয়ে। নোইস্যাতাহা আকু লুংঙারে সিপুয়ে।23এপা বেনাহা সিপুনুকো নোইতা ঙারোনুওয়া আকু মেমেহা হাংসুকো মে জিংকোগাসা? হাংপাতানাহা নীচো ডুওয়া-এবিরাং আকুহিংপা বিয়ৌ জোয়ে।”24ই নুওয়াংতা ইশুহা জাংয়ে, “নাবিহা টেবো ভুল জোদিংয়ো, হাংতানাহা নাবিহা তাংজিকো হিগাহিংনে মেগেয়াংতো আসা সেংজাকো সেহিংনে মেগেয়াংতো।25সিপুনতেওয়াবিহা হাত্রং ঙারো, আত্রংহা আবিহা বিয়ৌরে মোজোমগা, হেপা লোডিংবাকো পোইংবি বিয়ৌ মোজোমমে।26সিমসা লোমবিকো তোইতা এপারাং কা ন্যাসারাং জাংরোওয়া। সেংজাহা মোসাহিং সিংচাকো লারাইদিংওয়াসো জাংওয়া মিংচিহা নাবিহা মাপাড়াইংগা? আত্রংহা সেংজাহা মোসাহিংয়া এপা জাংয়ে, ‘কা অব্রাহামকো, ইসাককো, য়াকুবকো সেংজাগা।’ আদো নাবিহা গেমি নিও অব্রাহাম, ইসাক, য়াকুববিহা সিপুনতেয়ে।27সেংজাহা সিপুনতেমবিকো সেংজা মোকোমগা, আকুহা ঙারোমবিকো আসা মিসিওয়াবিকো সেংজাগা! আকো সোতা আবিহা ঙারোরোওয়া। নাবিহা টেবো ভুল জোদিংয়ো।”28ইচো তাংজিকো উটকেওয়া আউতা লেমসা আবিকো য়্যইওয়া হিংদিংমি। ইশুহা সদুকিবিহিং এনতাপা ঝিপাদিংওয়া হিংমসা আকুহা ইশুহিং উইয়ে, “ও উটকেওয়া, সেংজাকো আজ্ঞাবিতাহা উইসে জোনেওয়া নিও, আউতাহা তাংসারোমা টেবো আজ্ঞাহা হাংগা।?”29ইশুহা জাংয়ে, “হাংসুরোমা টেবো আজ্ঞাহা ইরাংগা: ‘ও ইস্রাইল জ্যাবাই, হিং, য়োংকো প্রভুসেংজাহা ইচো মেংচে প্রভুগা।’30নাতিহা প্রভু নাকো আপনিকো সেংজাহিং জেজেংপা জোনেরোওয়া, নাকো তুংসিংসো, আসা তাংসা লাংবেসো, নোচেংসো, আসা তাংসা সেসো সেংজাহিং জেজেংপা জোনেরোওয়া।”31আসা দোসরা টেবো আজ্ঞাহা ইগা, “নাকো সাবেইবিহিং আপনিহিং বেপা জেজেংপা জো। ইরোমা টেবো জোনেওয়া দোসরা হাইরে মাতোতো।”32ই নুওয়াং হিংমসা তাংজিকো উটকেওয়াহা ইশুহিং জাংয়ে, “ও উটকেওয়া নাতিহা আজিপ্পারাং জাংয়ে, নাকো জাংমমেপারাং সেংজাহা ইচোরাংগা। আকু ল্যামসা দোসরা হাংসুরে মোতো।33আকো সোতা য়াংবিহা সেংজাহিং তাংসা তুংসিংসো আসা তাংসা নোচেংসো, তাংসা সেসো জেজেংপা জোনেরোওয়া আসা আপনিকো সাবেইবিহিং আপনিহিং ত্যাবাপা জেজেংপা জোওয়ারাং, তাংসারোমা টেবোগা। ই নিহসো জোওয়ারাং হাংসুরোমা টেবো আজ্ঞাগা। সেংজাহিং হোমবলি আসা ভেটিবি পিচাওয়ারোমা টেবোগা।”34আকো দুংজি নিওয়া নুওয়াং হিংমসা ইশুহা আকুহিং জাংয়ে, “নাতিহা সেংজাকো রাজ্যসো তানাং মাতাতো।” আসা তাংসা দিংঙাবিহা ইশুহিং উইকোরে চুসুংসুয়ে।35ইশুহা য়হুদিবিকো দেমসাতা দিংঙাবিহিং ঝিপায়ে। “তাংজিকো উটকেওয়াবিহা মুক্তি পিচাওয়া জাইপু খ্রীষ্টহিংয়া দিংঙাবিহা হেপা দাউদকো চেংওয়া তামসা জাংকো চুকোগা?36দাউদহা পবিত্র লাংবেসো জাংয়ে,‘প্রভুসেংজাহা কুং প্রভুহিং জাংয়ে,কা নাতিহিং মেংতাপা জোমবিহিংহাত্রং চোইপা নাকো কোকোইকো তাংবাতা মেএআত্রং চোইপা নাতিহা কুং দাংক্রেং কাটুতা য়ুং।’37দাউদ আপনিরাং খ্রীষ্টহিংয়া কুং প্রভু তানাহা, আকুহা হেপা দাউদকো চেংওয়া জিংকো চুকোগা?” আউতা নিওয়া উইসে দিংঙাবিহা ইশুকো য়্যইওয়াহা হিংতাপা জোমসা হিংদিংমি।38ন্যাসারাং ইশুহা দিংঙাবিহিং ঝিপামসা জাংয়ে, “তাংজিকো উটকেওয়াবিহা লিংপাংকো উইদাংওয়া আংদুং লুমসা হাটিতা নিওয়া দিংঙাবি আবিহিং নোংপিকো তাওয়া ইচ্ছা জোমগা আসা হাতিতা কোইকো কেংমগা,39আসা জোংসুওয়া সাবিতারে এনতাওয়া গাওয়া গাদিং আসা টেরবো টেরবো ভোজবিতা এনতাওয়া আদরকো জায়গাবি মোমগা।40আসা মুরিংবিহিং প্যায়োং ল্যহপামসা আবিকো মোংটো-কেটোবি গিংচামসা, আবিহা দিংঙাবিহিং তিংপাকো তামসা উইদাং পাচাইমগা, এপা জিংওয়া দিংঙাবিহা উইসে দন্ড মুংরোওয়া।”41আকো নোইতাহা ইশুহা দেমসাকো ন্যাস্যা এওয়া বাকোসিকো আবেইতা গামসা দিংঙাবিকো ন্যাস্যা পিচাওয়া ন্যইদিংমি। উইসে পুপুউবিহা উইসে ন্যাস্যা পিচায়ে।42আসা আউতা ইচো জোরোংরি মুরিংমু লেমসা তামাকো নিহসে টাংকা পিচায়ে।43আত্রংহা ইশুহা য়োংতোংবিহিং মোউমসা জাংয়ে, “কা নাবিহিং আজিপ্পারাং জাংরোওয়া, ই জোরোংরি মুরিংমু মেমেহা হাংসুরোমা সিওপা ন্যাস্যা বাকোসিতা ওয়্যামি নিও।44আকু পুপুউ দিংঙাবিহা আবিকো সিওপা নিওয়া ন্যাস্যাসো নোপামসা পিচায়ে, আদো ই মুরিংমুহা জোরোংদো তাইকোতা নিওয়া সেই তাংসা ন্যাস্যারাং পিচাপুয়ে।”
ইশুহা আবিকো তুংসিং নাপোকো মেংতাপা নোওয়াবি সিদা চ্যইমসা আবিহিং জাংয়ে, “মোতুওয়া নুওয়াং জাংমসা নাবিহা কাহিং হাংপা ফসাইকো কেংদাংমগা? আকু টাংকা ইতা পা, কা কাংরে।”16আবিহা আকুহিংয়া টাংকা পিচায়ে। আসা ইশুহা আবিহিংয়া উইয়ে, “ই টাংকাতা কাং, ইতাহা হাংসুকো য়ুওয়াই আসা মিং নিংগা?”
আবিহা জাংয়ে, ইহা রোমি মাটা জাইপু সিজারকো।17আসা ইশুহা আবিহিংয়া জাংয়ে, “নাকোতা হাই সিজারকো নি, আকুহা সিজারহিং পিচা আসা সেংজাকো হাইনি, আকুহা সেংজাহিংনাং পিচা।”
ইশুকো ই নুওয়াং হিংমসা আবিহা আআংপেপেচপুয়ে।18আকো নোইতা সদুকি তাওয়া জ্যাবিহা দিংঙাহা সিপুওয়াকো নোইতা মাঙারোমগা তামসা নোমি। ইচো নিহসো সদুকিবিহা ইশুকোতা লেমসা উইসুয়ে,19“ও উটকেওয়া, মোসাহা তাংজিকো হিগাতা কাবিকো সোতা এপা লাপিমি নিও, ইচো দিংঙাকো ডুওয়া চেং মাজিংপা সিপুনাহা ডুওয়াকো চেং জিংকো তামসা এহা লুংঙাহিং বিয়ৌ জোনেরোওয়া। আকু দিংঙাহা আকো ডুওয়াকো মেহিং বিয়ৌ জোনেরোওয়া আসা এপা জোমসারাং আকো বংশ য়োইরোওয়া।20আউতাহা আবিহা নীচো এবি নিমি। নাগাইকো ডুওয়াহা বিয়ৌ জোমসা চেং মাজিংপা সিপুয়ে।21আকো নুনুইকো এরে লুংঙাহিং বিয়ৌ জোয়ে, আদো আকুরে চেংচুং মাজিংপা সিপুয়ে। সাইলা এরে এপারাং জোয়ে।22এপা জোমসা নীচিংপুকোসারাং চেংচুং মাজিংপা সিপুয়ে। নোইস্যাতাহা আকু লুংঙারে সিপুয়ে।23এপা বেনাহা সিপুনুকো নোইতা ঙারোনুওয়া আকু মেমেহা হাংসুকো মে জিংকোগাসা? হাংপাতানাহা নীচো ডুওয়া-এবিরাং আকুহিংপা বিয়ৌ জোয়ে।”24ই নুওয়াংতা ইশুহা জাংয়ে, “নাবিহা টেবো ভুল জোদিংয়ো, হাংতানাহা নাবিহা তাংজিকো হিগাহিংনে মেগেয়াংতো আসা সেংজাকো সেহিংনে মেগেয়াংতো।25সিপুনতেওয়াবিহা হাত্রং ঙারো, আত্রংহা আবিহা বিয়ৌরে মোজোমগা, হেপা লোডিংবাকো পোইংবি বিয়ৌ মোজোমমে।26সিমসা লোমবিকো তোইতা এপারাং কা ন্যাসারাং জাংরোওয়া। সেংজাহা মোসাহিং সিংচাকো লারাইদিংওয়াসো জাংওয়া মিংচিহা নাবিহা মাপাড়াইংগা? আত্রংহা সেংজাহা মোসাহিংয়া এপা জাংয়ে, ‘কা অব্রাহামকো, ইসাককো, য়াকুবকো সেংজাগা।’ আদো নাবিহা গেমি নিও অব্রাহাম, ইসাক, য়াকুববিহা সিপুনতেয়ে।27সেংজাহা সিপুনতেমবিকো সেংজা মোকোমগা, আকুহা ঙারোমবিকো আসা মিসিওয়াবিকো সেংজাগা! আকো সোতা আবিহা ঙারোরোওয়া। নাবিহা টেবো ভুল জোদিংয়ো।”28ইচো তাংজিকো উটকেওয়া আউতা লেমসা আবিকো য়্যইওয়া হিংদিংমি। ইশুহা সদুকিবিহিং এনতাপা ঝিপাদিংওয়া হিংমসা আকুহা ইশুহিং উইয়ে, “ও উটকেওয়া, সেংজাকো আজ্ঞাবিতাহা উইসে জোনেওয়া নিও, আউতাহা তাংসারোমা টেবো আজ্ঞাহা হাংগা।?”29ইশুহা জাংয়ে, “হাংসুরোমা টেবো আজ্ঞাহা ইরাংগা: ‘ও ইস্রাইল জ্যাবাই, হিং, য়োংকো প্রভুসেংজাহা ইচো মেংচে প্রভুগা।’30নাতিহা প্রভু নাকো আপনিকো সেংজাহিং জেজেংপা জোনেরোওয়া, নাকো তুংসিংসো, আসা তাংসা লাংবেসো, নোচেংসো, আসা তাংসা সেসো সেংজাহিং জেজেংপা জোনেরোওয়া।”31আসা দোসরা টেবো আজ্ঞাহা ইগা, “নাকো সাবেইবিহিং আপনিহিং বেপা জেজেংপা জো। ইরোমা টেবো জোনেওয়া দোসরা হাইরে মাতোতো।”32ই নুওয়াং হিংমসা তাংজিকো উটকেওয়াহা ইশুহিং জাংয়ে, “ও উটকেওয়া নাতিহা আজিপ্পারাং জাংয়ে, নাকো জাংমমেপারাং সেংজাহা ইচোরাংগা। আকু ল্যামসা দোসরা হাংসুরে মোতো।33আকো সোতা য়াংবিহা সেংজাহিং তাংসা তুংসিংসো আসা তাংসা নোচেংসো, তাংসা সেসো জেজেংপা জোনেরোওয়া আসা আপনিকো সাবেইবিহিং আপনিহিং ত্যাবাপা জেজেংপা জোওয়ারাং, তাংসারোমা টেবোগা। ই নিহসো জোওয়ারাং হাংসুরোমা টেবো আজ্ঞাগা। সেংজাহিং হোমবলি আসা ভেটিবি পিচাওয়ারোমা টেবোগা।”34আকো দুংজি নিওয়া নুওয়াং হিংমসা ইশুহা আকুহিং জাংয়ে, “নাতিহা সেংজাকো রাজ্যসো তানাং মাতাতো।” আসা তাংসা দিংঙাবিহা ইশুহিং উইকোরে চুসুংসুয়ে।35ইশুহা য়হুদিবিকো দেমসাতা দিংঙাবিহিং ঝিপায়ে। “তাংজিকো উটকেওয়াবিহা মুক্তি পিচাওয়া জাইপু খ্রীষ্টহিংয়া দিংঙাবিহা হেপা দাউদকো চেংওয়া তামসা জাংকো চুকোগা?36দাউদহা পবিত্র লাংবেসো জাংয়ে,‘প্রভুসেংজাহা কুং প্রভুহিং জাংয়ে,কা নাতিহিং মেংতাপা জোমবিহিংহাত্রং চোইপা নাকো কোকোইকো তাংবাতা মেএআত্রং চোইপা নাতিহা কুং দাংক্রেং কাটুতা য়ুং।’37দাউদ আপনিরাং খ্রীষ্টহিংয়া কুং প্রভু তানাহা, আকুহা হেপা দাউদকো চেংওয়া জিংকো চুকোগা?” আউতা নিওয়া উইসে দিংঙাবিহা ইশুকো য়্যইওয়াহা হিংতাপা জোমসা হিংদিংমি।38ন্যাসারাং ইশুহা দিংঙাবিহিং ঝিপামসা জাংয়ে, “তাংজিকো উটকেওয়াবিহা লিংপাংকো উইদাংওয়া আংদুং লুমসা হাটিতা নিওয়া দিংঙাবি আবিহিং নোংপিকো তাওয়া ইচ্ছা জোমগা আসা হাতিতা কোইকো কেংমগা,39আসা জোংসুওয়া সাবিতারে এনতাওয়া গাওয়া গাদিং আসা টেরবো টেরবো ভোজবিতা এনতাওয়া আদরকো জায়গাবি মোমগা।40আসা মুরিংবিহিং প্যায়োং ল্যহপামসা আবিকো মোংটো-কেটোবি গিংচামসা, আবিহা দিংঙাবিহিং তিংপাকো তামসা উইদাং পাচাইমগা, এপা জিংওয়া দিংঙাবিহা উইসে দন্ড মুংরোওয়া।”41আকো নোইতাহা ইশুহা দেমসাকো ন্যাস্যা এওয়া বাকোসিকো আবেইতা গামসা দিংঙাবিকো ন্যাস্যা পিচাওয়া ন্যইদিংমি। উইসে পুপুউবিহা উইসে ন্যাস্যা পিচায়ে।42আসা আউতা ইচো জোরোংরি মুরিংমু লেমসা তামাকো নিহসে টাংকা পিচায়ে।43আত্রংহা ইশুহা য়োংতোংবিহিং মোউমসা জাংয়ে, “কা নাবিহিং আজিপ্পারাং জাংরোওয়া, ই জোরোংরি মুরিংমু মেমেহা হাংসুরোমা সিওপা ন্যাস্যা বাকোসিতা ওয়্যামি নিও।44আকু পুপুউ দিংঙাবিহা আবিকো সিওপা নিওয়া ন্যাস্যাসো নোপামসা পিচায়ে, আদো ই মুরিংমুহা জোরোংদো তাইকোতা নিওয়া সেই তাংসা ন্যাস্যারাং পিচাপুয়ে।”
The Seed Company