লুক8
1সাইয়ু নিহয়ুকো নোইতা ইশুহা সেংজাকো রাজ্যকো এনতাওয়া দেরেংবি হিংপামসা শহর-শহরতা আসা লোই-লোইতা হোয়ে। আকুহিংপাহা বার্চো য়োংতোংবিরে নিমি।2মেংতাওয়া লাংবে আসা হাইওয়া মোংওয়া য়োংন্যাসো সাংচপুওয়া ইচো নিহসো মেমেবিরে নিমি। ইবিকো প্যাকোতাহা ইশুকো নীচো জেসাং নোপাওয়া মরিয়োম মোগদিলিনিরে নিমি।3হেরোদ জাইপুকো ন্যাস্যা এপিচাংওয়া খুজাসকো মে য়োঅন্না, আসা লেরা উইসে মেমেবিরে নিমি, হাংসু ইশু আসা আকো যোংতোংবিহিংনে আপনিকো ন্যাস্যা পিচামসা য়ুজ্রুচাংমে।4সাইয়ু শহর-শহরসো উইসে দিংঙাবি আকোতা দেরেয়ে। আত্রংহা আকুহা আবিহিংয়া ইচো মিংচি হিংপায়ে।5“ইচো দিংঙাহা লুংনিংতা হ্যামসা অংটি মিয়ে। অংটি মিদিংনুওয়া লেরা অংটিবিহা ন্যাতাতা হুইয়ে আসা দিংঙাবি হিংদ্যাপুয়ে, আসা জিয়াবি লেমসা চাপুয়ে।6লেরা অংটিবিহা লুংটুইবিরিতা হুইয়ে, আসা সেন্নেপা নিংয়ে, আদো চাওয়াংওয়া মোংটো মোতোওয়াকো সোতা সেন্নেপা সেংপুয়ে।7লেরা অংটিবিহা সোসাবিরিকো প্যাকোতা হুইয়ে। আসা আকু অংটিবিহিংপাহা সোসাবিরে ডেপুয়ে, আসা আকু অংটিবিহিংয়া ডেকো মিচাতো।8আদো লেরা অংটিবিহা পোপফ্যইওয়া মোংটোতা হুইয়ে, আসা এনতাপা ডেয়ে আসা ইতেং ইতেং সিংতেংহা একশোরোমা সিও-সিওপা সেয়ে।” এসে জাংপুনতেনুকো নোইতা ইশুহা ঙামসা জাংয়ে, “হাংসুকো হিংওয়া নানুং নি, আকুহা কুং ঝিপাওয়াতা এনতাপা হিংকো।”9ইশুহা ই মিংচি ল্যাপুনতেনুকো নোইতাহা আকো য়োংতোংবিহা আকুহিংয়া ই মিংচিতা জাংকো কেংওয়াহা হাংগা তামসা উইয়ে।10আকো সোতা ইশুহা আবিহিং জাংয়ে, “নাবিহিংয়া সেংজাকো রাজ্যকো নাপোকো নুওয়াং গেওয়া দুংজি পিচামি নিও। আদো দোসরাবিহিংয়া ই নুওয়াংবিহা মিংচি ল্যামসারাং জাংনেমগা, হাংপাতানাহা ‘ইবিহা ন্যইকোহা ন্যইমগা, আদো মাতিংমগা আসা হিংকোওয়া হিংমগা, আদো মোকোইমগা।’11“ই মিংচিতা জাংওয়া অংটিহা সেংজাকো য়্যইদিগা।12ন্যাতাতা হুইওয়া অংটিহা ই কোইপামগা, আবিহা সেংজাকো য়্যইদিহা হিংকোওয়া হিংমগা, আদো তুংসিংতা এমক্যইমগা, হাংপাতানাহা দেংমসা মাবাচেকো তামসা শয়তানহা লেমসা আবিকো তুংসিংসো হিংওয়া নুওয়াংবিহা য়োচপুমগা।13লুংটুইবিরিতা হুইওয়া অংটিবিহা ই কোইপামগা, আবিহা সেংজাকো নুওয়াং হিংমসা গাগ্রুমসা তুংসিংতা এমগা, আদো আকু য়্যইদিহা দেবে মাতামকো সোতা আম্যই চোইপা মেংচে আবিহা দেংমগা। আসা হাত্রং পরিকছা দেয়োং, আত্রংহা দেংওয়াবিরে য়াংপুমগা।14সোসাতা হুইওয়া অংটিবিহা ই কোইপামগা, আবিহা সেংজাকো য়্যইদিহা হিংমগা, আদো বাসিমতিকো সিংদুওয়া, মোংটো-কেটো, আসা লেংকে গাংকেসুওয়াকো সোতা দেংওয়াহিংয়া ডেকোরে মিচামগা, আসা আবিকোসোহা হাইরে অংসেবি মেসেমগা।15পোপফ্যইওয়া মোংটোতা হুইওয়া অংটিহা ই কোইপামগা, লেরাহা সেংজাকো য়্যইদি হিংমসা এনতাপারাং আপনিকো তুংসিংতা য়্যইদিহিংয়া এমগা, আকু ত্যাবাপারাং জোমগা আসা সময়তা উইসে অংসে সেমগা।16“হাংসুরে দিব্রি লারাইপামসা তোপাসো মাতুংমগা, আসা জিংদু খাটকো লিতারে মেএমগা। আদো সাকো নাপোতা ওয়াংওয়াবিহিংয়া হাহাইপা তিংকো তামসা তোলোংওয়া তিরাতা এমগা।17এপারাং নাপোতা নিওয়া নুওয়াংবিহা হাসেনি! আকুহা তাংসা ওয়েংপুরোওয়া, এপারাং কোইকো মোচুওয়া নুওয়াংবি হাসেনি! আকুহা চোসোপা কোইপারোওয়া আসা তাংসা এনতাপা কোইরোওয়া।18আকো সোতা হিংওয়া নুওয়াং এনতাপা হিং, হাংসু কুং ঝিপাওয়া নুওয়াং হিং, আকুহিংয়া উইসে কোইওয়া সে পিচারোওয়া, আদো হাংসু আকু নুওয়াং মিহিং, আকোতা হাইনি, আকুরে আকোসো গিংচাপুরোওয়া।”19সাইয়ুহা ইশুকো এবি আসা আয়ুহা আকুহিং দোসপাকো লেহে, আদো দিংঙাবি উইসে নিমকো সোতা দোসপামকোইতো।20ইচো দিংঙাহা ইশুহিং জাংয়ে, “নাকো আয়ুসো এবিহা নাতিহিং দোসপাকো বাইরেতা খুইসুদিংয়ো।”21আদো ইশুহা আবিহিং জাংয়ে, “সেংজাকো জাংওয়া নুওয়াং হাংসুহিং, আকুরাং কুং আয়ুসো এবিগা।” বিংঙাহিং য়োইওয়া22সাইয়ু ইশুহা আপনিকো য়োংতোংবিহিংপা নোওয়াইতা বাইয়ে, আসা আবিহিং জাংয়ে, “য়াংবিহা দাব্রিকো নুবাই হ্যাকো তে।” আসা আবিহা নোওয়াইতা বাইপুমসা হোসুয়ে।23আবি বাইপুমসা হ্যাদিংনুওয়া ইশুহা জিংজুয়ে। দাব্রিতা টেবো বিংঙা হ্যায়ে, নোওয়াইহা চুরা লোওয়া তিসো মেইপুদাংয়ে, আসা আবিহা মোচুম্যান্যাপা জিংপুয়ে।24এপা জিংপুনাহা য়োংতোংবিহা ইশুহিং এপা জাংমসা টুয়ে, “উটকেওয়া, ও উটকেওয়া, য়াংবিহা সিপুদাংতেনা।” ই হিংমসা ইশুহা লোয়ে, আসা বিংঙাহিংয়া চিংচাইয়ে। আত্রংতারাং বিংঙাহা সাংপুয়ে, আসা চুরা লোওয়াবিরে চিচোপুয়ে।25ইশুহা য়োংতোংবিহিং জাংয়ে, “হানি নাবিকো দেংওয়াহা?” আবিহা চুসুংপুমসা আআংপেপেচপুয়ে, আসা ইশুকো সে তিংমসা তাইবিলারাই জাংসুয়ে, “ইহা হাংসুমেতা? ই চিংচাইনুওয়া চুরা লোওয়া আসা টেবো বিংঙাবিরে ইকো জাংওয়ারে হিংকোইমি।”26ইশুসো আকো য়োংতোংবিহা গালীল দাব্রিকো নুবাই গেরাসিন তাওয়া জায়গাতা দেকায়ে।27আবিহা নোওয়াইসো ঊইনতানি আকু শহরকো ইচো দিংঙাহা ইশুহিং দোসপাকো লেহে। আকুহিংয়া সিংঙো দ্যইংচাপুমি নিমি। আকু দিংঙাহা উইসে দিনসো আংদুং মুলুচাপা আসা সাতারে মুয়ুংপা তোম্যইবিরিতারাং য়ুংচাংমি।28আকুহা ইশুহিং তিংয়ে, আসা চিলিংমসা আকো নাগাইতা চুইনুইমসা জাংয়ে, “ও ইশু, হাংসুরোমা টেবো সেংজাকো চেংওয়া, নাকোহা কাহিংপাহা হাং কাম নিংগা? কা জাংচারোওয়া, কাহিং হাইরে মোকোইচ্যাপাপি।”29ইশুহা সিংঙোহিংয়া নোপুমসা হ্যাকো তামসা জাংওয়াকো সোতা আকু দিংঙাহা এপা জাংমগা। সিংঙোহা আকুহিংয়া নেকো নেত্তা প্যইচাংমি। সাংগ্লিসো কোকোইতা তাইমসা খুইওয়া দিংঙাবি কাংকো এদো আকুহা সিংঙোকো সেসো সাংগ্লিবিহিংয়া দ্যইপামসা চিচ্চোওয়া জায়গাতা ক্যাপুচাংমি।30ইশুহা আকুহিংয়া উইয়ে, “নাকো মিংহা হাংগা?” আকুহা জাংয়ে, “কুং মিংহা ফৌজ” হাংপাতানাহা উইসে সিংঙোবি আকোতা হোপুমি নিমি।31সিংঙোবিহা ইশুহিংয়া জাংচায়ে, কাবিহিংয়া কোইচ্যাপাওয়া জায়গাতা মানিংপু।32আকু য়্যাগ্যইতাহা উইসে পাকাকো পারাবি য়োচোইদিংমি। আকু তিংনুওয়া সিংঙোবিহা “কাবিহিং আকু পাকাবিকোতা হোচাকো পিচা” তামসা ইশুহিং জাংচায়ে। ইশুহা হোপুই তামসা জাংয়ে।33আসা সিংঙোবিহা আকু দিংঙাসো নোপুমসা পাকাবিকোতা হোপুয়ে। আত্রংহা পাকাবিহা লেতা বাংপামসা য়্যাগ্যইসো দাব্রিতা হুইচায়ে আসা নুচপুমসা সিপুয়ে।34আত্রংহা পাকা ল্যাচোইওয়া গইত্রাবিহা ই তিংমসা চুসুংপুয়ে। আসা ঠুইপুমসা শহরতা আসা হুরাপা নিওয়া লোইবিতা ই নুওয়াং হিংপায়ে।35আসা দিংঙাবিহা হাং জিংপুমে তামসা ইশুকোতা লেহে। আবিহা আকু নাগাইকো সিংঙো দ্যইংচপুওয়া দিংঙাহিংয়া সাংমসা আংদুং লুমসা ইশুকো কোকোই কাটুতা গাদিংওয়া তিংমসা আবি তাংসা চুসুংপুয়ে।36এপা জিংপুওয়া তিংওয়াবিহা সিংঙো দ্যইংচপুওয়া দিংঙাহা “হেপা সাংমমে” আকু নুওয়াংহা আউতা ওয়াংওয়া দিংঙাবিহিং হিংপায়ে।37আসা গেরাসিন জায়গাকো দিংঙাবিহা ইশুহিংয়া “ইসো হ্যাপুই” তামসা সুজাচায়ে, হাংপাতানাহা আবিহা সিওপারাং চুসুংপুওয়া নিমি। আকো সোতা ইশুহা আউসো লাকাপুরো তামসা নোওয়াইতা বাইয়ে।38আত্রংহা সিংঙো দ্যইংচপুমসা সাংওয়া দিংঙাহা ইশুহিং জাংচায়ে। “কাহিংনে নাতিহিংপারাং পুরাপি।” আদো ইশুহা আকুহিংয়া এপা জাংমসা লাপাপুয়ে,39“নাতিহা নাকো সাতা হোমসা সেংজাহা নাকো তোইতা হাং কাম জোমে, আকু নুওয়াংবি হিংপাতু।” আসা আকু দিংঙাহা ইশু তাইকো তোইতা জোওয়া কামবিহা তাংসা শহরবিতা হোমসা হিংপায়ে।40ইশু দাব্রিকো নুবাইতা লারেমসা লেনুওয়া উইসে দিংঙাবিহা আকুহিং লেই তামসা জাংয়ে, হাংপাতানাহা আবিহা আকুহিং খুইমসা গাসুদিংমি।41আত্রংহা ইচো য়াইরোস মিং নিওয়া ইচো দিংঙা আউতা লেহে। আকুহা য়হুদিবিকো জোংসুওয়া সাকো মাটা নিমি। আকুহা ইশুকো কোকোইতা চুনুইমসা কুং সাতা ওয়াংপি তামসা জাংচায়ে।42হাংপাতানাহা আকো ইচোচিংরি চেমে লো বার্নিং জিংতেরি হাইমসা সিপদাংতেওয়া নিমি। আকো জাংওয়া হিংমসা ইশুহা আকুহিংপা হোদাংমি। ইশু হোদাংওয়া তিংমসা উইসে দিংঙাবিহা আকো হুরাপা এতুং-বেতুংপা জিংপুয়ে।43আকু দিংঙাবিকো প্যাকোতাহা হাংসুরে সাংপামকোইওয়া লো বার্নিংসো য়ুতি হুইওয়া মাচ্যাওয়া ইচো মেমে নিমি।44আকুহা নুনুইসো লেমসা ইশুকো আংদুংকো আরি সুরেয়ে। আকো আংদুং সুনতানি আকো য়ুতি হুইওয়া সাংচায়ে।45ইশুহা উইয়ে, “হাংসু কাহিং সুংগা?” আদো “কাহা মাসুয়াংনা তামসা” তাংসা জাংসুয়ে। আত্রংহা পত্রসহা জাংয়ে, “উটকেওয়া, এপারাং তাংসা দিংঙাবিরাং নাতিহিংয়া এচোইবেচোইক্যইপা জুইসুদিংনা।”46আদো ইশুহা জাংয়ে, “হাংসুমে কাহিং সুনা, হাংপাতানাহা কুং জুপাসো সে নোপুওয়া কা সিদা চ্যইয়ে।”47আকু মেমেরে “নেহা কা গুংমকোইরোগুং” তাওয়া সিদা চ্যইমসা চুসুংমসা পিপিং-দোদোউপা ইশুকো কোকোই কাটুতা ওয়াংয়ে। আসা ইশুকো আংদুং সুওয়া, আসা সুনতানি আপনিকো হাইওয়া সাংচপুওয়া নুওয়াংহা তাংসা দিংঙাবিকো প্যাকোতা ল্যায়ে।48ইশুহা আকু মেমেহিংয়া জাংয়ে, “চেমে, নাকো দেংওয়াসোরাং নাতিহা সাংচপুমি নিও। নেহা তিমেপা হ্যাতু।”49ইশু এপা জাংদিংনুওয়া জোংসুওয়া সাকো মাটা য়াইরোসকো সাসো ইচো দিংঙা লেমসা য়াইরোসহিং জাংয়ে, “ও কুং গিরিওয়া, নাকো চেমেহা সিপুনতেনা, নেহা উটকেওয়াহিংয়া মোকোইচ্যাপাগে।”50আদো ইশুহা আকু নুওয়াং হিংমসা য়াইরোসহিং জাংয়ে, “নাতিহা মাচ্ছুংগে, দেংকো জো। নাকো চেমেহা সাংরোওয়া।”51হাত্রং ইশু য়াইরোসকো সাতা দেকা, আত্রংহা আকুহা পত্রস, য়াকুব, য়হুন্না আসা মেমেকো আয়ু আপাহিং ল্যামসা হাংসুহিংনে মেমে নিওয়াতা হোচাকো মিচাতো।52আউতা নিওয়া দিংঙাবিহা কাইসুমসা মাসাং-মিরিংপা গাসুদিংমি। ইশুহা আবিহিংয়া জাংয়ে, “নাবিহা মাকাইগে, ইহা জিংজুওয়া মেংচেগা, মাসিয়াংতো।”53ই হিংমসা আবিহা তাংসা ইশুকো জাংওয়া নুওয়াংতা লেংসুয়ে, হাংপাতানাহা আবিহা মেমেহা সিপুনতেনা তামসা গেদিংমি।54আদো ইশুহা আকু সিপুনতেরি মেমেহিংয়া খুই চুংমসা জাংয়ে, “ও চেমে, লো।”55আকো লাংবেহা লায়ে, আসা তাত্রিংপা লোমসা গায়ে। ইশুহা আবিহিংয়া জাংয়ে “ইহিং হাইক্রি চাকো পিচা।”56আকো আয়ুসো আপাহা আআংপেপেচপা জিংপুয়ে, আদো ইশুহা “ই নুওয়াংহা হাংসুহিংনে আদ্যইসো মাল্যাকো” তামসা আবিহিং জাংয়ে।
The Seed Company