ন্যায়কর্তা7
1সাইয়ুহা হাপকোংসো য়রুব-বাল, হাংসু গিদোনমে আসা আকো দিংঙাবিহা লোয়ে আসা হরোদ জোরাকো পাটিংতা তাম্বু বানাইয়ে। গিদোনকো তাম্বুকো দাংব্যা কাটুতাহা মিদ্দানীবিকো তাম্বুবি নিমি। মিদ্দানিবিকো তাম্বুহা মোরে য়্যগ্যইকো ওয়াংবোইতা নিমি।2প্রভুসেংজাহা গিদোনহিং জাংয়ে, “নাতিহিংপাহা উইসে দিংঙাবি নিও, কা নাবিহিংয়া মিদ্দানীবিকো তোইতা জিয়োকো পিচাকো মেকেংরোওয়া। কাবি আপনিবিরাং জিয়োমগা তামসা নাবিহা নোকোদোওয়া আসা কাহিংয়া হাইরে আদর মোজোকোদোওয়া।3আসা দিংঙাবিহিংয়া এপা জাং ‘হাংসু হাংসু চুসুংদিং, আকুহা সাতা লাকাপুদো তুরোওয়া, কাবিহা ইতা গিলাদ য়্যাগ্যইতা য়ুংরোওয়া’।” এপারাং বাইস হাজার দিংঙাবিহা লাকাপুয়ে; আদো দশ হাজারহা আউতা য়ুংতেয়ে।4আত্রংহা প্রভুসেংজাহা গিদোনহিংয়া জাংয়ে, “ন্যাসারাং নাকো দিংঙাবিহা উইসে নিও। আবিহিংয়া লেতা জোরাতা পুরাতু আসা কা আউতা আবিহিংয়া লারাংসা জোরোওয়া। হানি দিংঙাহিং ‘নাতিহিংপা হ্যাতু’ তামসা জাং, আকুহা নাতিহিংপা হ্যারোওয়া, আদো হাংসুহিং ‘ম্যাহা’ তামসা জাং, আকুহা নাতিহিংপা ম্যাহ্যারোওয়া।”5গিদোনহা দিংঙাবিহিংয়া জোরাতা পুরায়ে, আসা প্রভুসেংজাহা জাংয়ে, “হাংসু হাংসু কিয়াবেপা লেবেসো নেমসা তি আং, আবিহিংয়া লারাংসা এহ আসা দোসরা কাটুতাহা হাংসু হাংসু চুনুইমসা তি আং, আবিহিংনে লারাংসা এহ।”6তিনশো জনা দিংঙাবিহা লেবেসো নেমসা তি আংয়ে, লেরাহা তাংসা চুনুইমসা তি আংয়ে।7প্রভুসেংজাহা গিদোনহিংয়া জাংয়ে, “কিয়া বেপা লেবেসো নেমসা তি আংওয়া তিন সো জনা দিংঙাবিকোসো কা নাতিহিংয়া মিদ্দানীবিকো তোইতা জিয়োপারোওয়া। আসা নাবিহিংয়া বাচাইরোওয়া। লেরা তাংসাহিংয়া সাতা হোপুই তামসা জাং।”8গিদোনহা আকু তিনশো জনাহিং ল্যামসা লেরা তাংসাহিং সাতা নিংপুয়ে। আকু তিন সো জনাহা তাংসা চাওয়া আংওয়া আসা পেপনেবি এতেহে। মিদ্দানীবিকো য়ুংওয়াহা লেতা ওয়াংবোইতা নিমি।9আত্রংকো লিশুংহা পরমপ্রভুহা গিদোনহিংয়া আজ্ঞা পিচায়ে, “লো, আসা মিদ্দানীবিকো য়ুংওয়াকো তোইতা আক্রমন জো। কা নাতিহিংয়া জিয়োপারোওয়া।10আদো আক্রমন জোকো চুসুংনাহা আপনিকো ডেইয়া পুরাহহিংপা মিদ্দানীবিকো য়ুংওয়া তাম্বুতা হ্যাতু।11আবি হাং জাংদিংমমে আকু হিং, আসা নাতিহা আবিকো তোইতা আক্রমন জোকো সাহস জিংরোওয়া।” আসা গিদোনসো আকো ডেইয়া পুরাহহা লেতা আবিকো দুসমনবিকো তাম্বুকো আবেইতা হোয়ে।12ওয়াংবোইকো হুরাপা মিদ্দানী, অমালেকি আসা নুব্যাকো দোসরা জ্যাবিহা দিংজ্রাকো পারাবি সেই আউতা য়ুংসুদিংওয়া নিমি। আবিকো ত্যাইরম্যাবিহা ঝাহাদীকো বার্পুই সেই নিমি।13গিদোন আউতা দেয়োংনুওয়া ইচো দিংঙাহা ব্যারোহিং ইচো মাংবুইওয়া ল্যাদিংওয়া হিংয়ে। আকুহা জাংদিংমগা, “কাহা মাংবুইওয়াতা তিংয়ে গেহুংকো ইব্রেং কোব্রেং ডীপামসা মিদ্দানী তাম্বুতা সোকায়ে আসা তাম্বুহা হ্যাপুমসা লিতা ইপুয়ে।”14ব্যারোহা জাংয়ে, “ইহা আকু ইস্রাইলি য়োআসকো চেংওয়া গিদোনকো তলওয়ারগা। আকো দোসরা অর্থহা জিংকোরে মাজিং। সেংজাহা মিদ্দানীবিহিং আসা য়োংকো তাংসা সিপাইহিং আকো খুইতা স্যইপুনতেমি নিমি।”15আকু দিংঙাকো মাংবুইওয়া আসা আকো অর্থ হিংনুওয়া গিদোনহা চুনুইমসা সেংজাহিং নোংয়ে। আকো নোইতা ইস্রাইলিবিকো য়ুংওয়াতা লায়োংমসা আকুহা জাংয়ে, “লো, সেংজাহা নাবিহিংয়া মিদ্দানীবিকো সিপাইকো তোইতা জিয়োপামি নিও।”16আকুহা আপনিকো তিনশো দিংঙাবিহিং সুংদ্যা পারাতা পোয়ে। তাংসা দিংঙাবিহিংয়া আকুহা ইচো পেপনে আসা ইচো নাপো কাটুতা মেহ লালাইদিংওয়া গাংরু পিচায়ে,17আসা জাংয়ে, “হাত্রং কা দুসমনকো আবেইতা দেকা, কাহিং কাং, আসা কা হেপা জো, ওইপারাং নাবিরে জো।18কুং পারা আসা কা পেপেনে মুইনুওয়া নাবিরে তাম্বুকো হুরাপা আপনিকো পেপনে মুই আসা ঙামসা এপা জাংকো ‘প্রভুসেংজাকো সোতা আসা গিদোনকো সোতা’!”19গিদোন আসা আকুহিংপা নিওয়া একশো জনা দিংঙাবিহা আদি লিসুং জিংনুরোমা আইসি নাগাই তাম্বুকো আবেইতা দেয়োংয়ে। দুসমনবিহিং খুইসুমবিহা আম্যহ ম্যহ নাগাই মেংচে সোসুওয়া নিমি। আবিহা পেপনে মুইয়ে আসা আপনিকো পুউদিংওয়া জিও ওয়্যাপাপুয়ে।20আসা লেরা সুংদ্যা পারারে এপারাং জোয়ে। তাংসা আপনিকো কেক্রেং খুইতা মেহকো মেচেং চুংয়ে, আসা দাংক্রেং খুইতাহা পেপনে চুংয়ে আসা ঙামসা জাংয়ে, “প্রভুসেংজাকো সোতা আসা গিদোনকো সোতা তলওয়ার!”21তাংসা দিংঙা আপনিকো জায়গাতা তাম্বুকো হুরাপা জাসুয়ে আসা দুসমনকো তাংসা দিংঙাবিহা ঙাসুমসা ক্যাসপুয়ে।22গিদোনকো তিনশো দিংঙাবিহা আপনি আপনিকো পেপনে মুইনুকো সময়তাহা প্রভুসেংজাহা দুসমনহিংয়া আপনিবিকোতা ইচোহা ইচোকো তোইতা তলওয়ালসো ছেস্পাপুয়ে। আবিহা সরেরা কাটুতা ক্যাপুয়ে আসা বেথ-শিত্তা আসা তব্বাত আবেইকো হাবিল-মহোলা শহর চোইপা দেকায়ে।23আত্রংহা নপ্তালি, আশোর জিরিকো আসা মনশ্শে নিদ্যা জিরিকো দিংঙাবিহিং মোউপাকো নিংপুয়ে। আবিহা লেমসা মিদ্দানীবিহিং ঘিপুয়ে।24এফ্রাইম য়্যাগ্যইকো তাংসা লোইতা গিদোনহা দিংঙাবি নিংপুমসা দেরেং হিংপায়ে, “লেতা লেমসা মিদ্দানীবিহিংপা লুইসু। য়র্দন জোরা আসা বেদ-বরা চোইপা জোরাবিহা আপনিকো খুইতা এহ আসা মিদ্দানীবিহিংয়া প্যইমসা এহ আসা আবিহা ক্যাপুমসা হ্যাকো মাছুকো।” এফ্রাইমবিহা চিত্তা লেহে আসা য়র্দন জোরা আসা বেদ-বরা চোইপা আউতা নিওয়া জোরাবিরে কোব্জা জোয়ে।25আবিহা অরেব আসা জয়েব মিং নিওয়া মিদ্দানী মাটাবিহিং প্যইয়ে আসা অরেবহিংয়া অরেবকো প্যাতারুংতা আসা জয়েবহিংয়া জয়েবকো আংগুরকো সাইতি নোপাওয়া জায়গাতা স্যাপুয়ে। আবিহা মিদ্দানীবিহিংয়া ঘিইওয়া ঘিইওয়া জোয়ে আসা অরেব আসা জোয়েবকো পোরো গিদোনকোতা সোংয়ে। আত্রং গিদোনহা য়র্দনকো নুব্যাই কাটুতা নিমি।
The Seed Company