ন্যায়কর্তা3
1এপারাং কনান দেশতা লুইসুওয়াতা ভাগ মালাংওয়া ইস্রাইলিবিহিং জাঁচ জোকো প্রভুসেংজাহা দোসরা জ্যাকো দিংঙাবিহিং দেশতা এয়ে।2ইস্রাইলকো তাংসা পুস্তাহিংয়া, বিশেষ হাংসু মুলুইসুয়াংমে আবিহিং লুইসুওয়া হাংমমে, ঝিপাকো প্রভুসেংজাহা এপা জোওয়া নিমগা।3ই জ্যাবিহা ইরাংগা: পলিশতিবিকো ঙাচো মাটাবি, তাংসা কনানীবি, সিদোনিবি আসা লেবানান য়্যাগ্যইতা বাল-হর্মান য়াগ্যইসোহা লেবো-হমাত গ্যাদোং চোইপা য়ুংওয়া হিব্বীবি নিমগা।4ইস্রাইলিবিকো জাঁচকো সোতা আসা আবিহা আবিকো আটা-আজাবিহিংয়া প্রভুসেংজাহা মেহসো পিচাওয়া মোসাকো আজ্ঞা পালন জোকোমে না মোজোকোমে আকু জাঁচেকো সোতা দোসরা জ্যাবিহিংয়া এমগা।5এপা জোমসা কনানী, হিত্তী, এমোরী, পরিজ্জী, হিব্বী আসা য়বুসীবিকো প্যাকোতা ইস্রাইলিবিহা য়ুংসুয়ে।6আবিহা আবিকো চেংচুংবিহিংপা বিয়ৗ-বিতি জোসুয়ে আসা দোসরা জ্যাকো চোইসুংবিকো সেওয়া জোসুয়ে।7ইস্রাইলিবিহা সেংজাকো বিরুদ্ধতা পাপ জোয়ে। আপনিকো পরমপ্রভু সেংজাহিংয়া আবিহা লারিংপুয়ে আসা বাল-চোইসুং আসা অসেরা-চোইসুংকো মুর্তিবিহিং নোংসুয়ে।8আকো সোতা প্রভুসেংজাহা ইস্রাইলিবিহিংপা সেদ্রাংপায়ে আসা আবিহিংয়া আরাম-নাহারেমকো জাইপু কুশন-রিশাতৈমকো খুইতা স্যইপুয়ে আসা লো য়্যানিং চোইপা আবিকো অধিকারতা ইস্রাইলিবিহা য়ুংনেয়ে।9আত্রংহা ইস্রাইলিবিহা প্রভুসেংজাহিং সহায়তাকো সোতা মোউসুয়ে। আকুহা আবিহিংয়া ছুটকারাকো সোতা ইচো দিংঙাহিং নিংপুয়ে। কালেবকো এ কনজকো চেংওয়া অত্নিয়েলহা আকু দিংঙা নিমগা।10প্রভুসেংজাকো লাংবে আকো তোইতা লেহে আসা আকুহা ইস্রাইলকো ন্যায়কর্তা জিংপুয়ে। আকুহা লুইসুকো তামসা হ্যায়ে আসা পরমপ্রভুহা আকুহিংয়া আরাম-রিশাতৈমকো জাইপুকো তোইতা জিয়োপায়ে।11আকো নোইতা চালিশ বর্ষা চোইপা দেশতাহা তিমেপা জিংপুয়ে। আত্রং মেংচে অত্নিয়েলহা সিপুয়ে।12ইস্রাইলকো দিংঙাবিহা ন্যাসারাং প্রভুসেংজাকো বিরুদ্ধতা পাপ জোয়ে। আকো সোতা প্রভুসেংজাহা মোআবকো জাইপু এগ্লোনহিং ইস্রাইলরোমা সাডুপা বানাইয়ে।13এগ্লোনহা অম্মোনী আসা অমালেবিহিংপা চাংসপুয়ে আসা আবিহা চাংসুমসা ইস্রাইলিবিহিংয়া পোঙাপাপুয়ে আসা খেজুরকো সিংতেংকো শহর য়রিহোহিংয়া আপনিকো অধিকারতা জোপুয়ে।14আঠারো বর্ষা চোইপা মোআবকো জাইপু ইস্রাইলিবিহা এগলোনকো অধীনতা য়ুংয়ে।15আত্রংহা ইস্রাইলিবিহা পরমপ্রভুহিংয়া মোউয়ে আসা আবিহিংয়া ওয়েংপাকো সোতা আকুহা ইচো দিংঙা নিংপুয়ে। আকু দিংঙাহা বেন্জামিন জিরিকো গেরাকো চেংওয়া এহুদ নিমি। এহুদহা কেক্রেং খুই চালাইমগা। ইস্রাইলিবিহা আকুহিংয়া আইসি তোংক্যাবি কাইপুমসা মোআবকো জাইপু এগ্লোনকোতা নিংপুয়ে।16এহুদহা আপনিকো সোতা খুইসো ইচু দালৈওয়া নিহদ্যা বিং নিক্যইওয়া তলওয়ার বানাইমি নিমগা। আকুহা আকু তলওয়াহা দাংক্রেং কাটুতা আপনিকো লুদিংওয়া আংদুংকো নাপোতা মেরোংমসা আপনিকো ওয়াইবেতা থ্যইদিংওয়া নিমগা।17আকো নোইতা আকুহা মোআবকো জাইপু এগলোনকোতা তোংক্যা পুমসা হোয়ে। এগলোনহা বুচ্চুইক্যইওয়া দিংঙা নিমি।18আকুহিং লেংপাপুনেতেনুকো নোইতাহা আকু পামসা ওয়াংওয়া দিংঙাবিহিংয়া এহুদহা সাতা লাপাপুয়ে।19আদো আপনিহা গিলগালকো আবেই, মুর্তি নিওয়া জায়গাসো লায়োওংমসা এগ্লোনকোতা হোমসা জাংয়ায়ে, “জাইপু, নাতিহিংয়া হাইক্রি কুং নাপোকো নুওয়াং জাংকো নিনা।” জাইপুহা ডেইয়াবিহিং বাইরে হ্যাকো আজ্ঞা পিচায়ে আসা আবিহা বাইরে নোয়ে।20আত্রংহা জাইপুহা ইচোদাং মহলকো নাপোকো তোইকো সিরিতা গাদিংনুওয়া এহুদহা আবেইতা হোমসা “নাতিহিংয়া সেংজাকোসো ইচো দেরেং নিও” তামসা জাংয়ে। আকু হিংমসা জাইপুহা জায়ে।21এহুদহা কেক্রেং খুইসো দাংক্রেং কাটুসো তলওয়ার য়োমসা জাইপুকো ফেমাতা বাপুয়ে।22তলওয়ারহা ফেমাকো নাপোতা হোপে আসা সৗবেসো লিচাপুয়ে। তলওয়ারহা নাপোতা হোমসাপারাং ইদ্যাসো নোপুয়ে আসা এহুদহা আকু তলওয়ার মানোপাপা এপারাং এপুয়ে।23আকুহা বাইরে নোয়ে, লাপুংবি গিইয়ে আসা বাইরেসো ডিমি দাপুয়ে।24আসা আকুহা আউসো হ্যাপুয়ে। জাইপুকো ডেইয়াবিহা ওয়াংয়ে আসা লাপুংবিহা ডিমি দাওয়া আসা গিওয়া তিংমসা জাইপুহা নাপোতারাং আসি এংপায়ে তামসা নোয়ে।25খুইওয়া-খুইওয়া জোপুনতেনুকো নোইতারে হাত্রং জাইপু লাপুং ওয়েমসা বাইরেতা মোনো, আত্রং আবিহা গোইচো পুমসা লাপুং ওয়েহে। আবিহা আপনিকো গিরিওয়াহিংয়া লিতা সিপুওয়া তিংয়ে।26আবি খুইদিংনুওয়া এহুদহা ক্যাইপুনতেওয়া নিমি। আকুহা মুর্তিকো আবেইসো জিংমসা সীরা তাওয়া জায়গাতা ক্যাপুমসা হোপে।27আউতা এফ্রাইমকো য়্যাগ্যইতা দেকানুওয়া ইস্রাইলিবিহিংয়া লুইসুকো আকুহা পেপনে মুইমসা মোউয়ে। আবিকো নাগাই নাগাই জিংমসা আকুহা য়্যাগ্যইসো লিতা ঊইয়ে।28আকুহা আবিহিং জাংয়ে, “কুং নুনুই লেই। প্রভুসেংজাহা নাবিহিংয়া আপনিকো দুসমন মোওয়াবকো তোইতা জিয়োপামি নিও।” আবিহা এহুদকো নুনুই নুনুই ঊইপামসা লেহে আসা মোওয়াবিবিহা য়র্দন জোরা পেংওয়া জায়গাহিং আপনিকো অধিকারতা এচপুয়ে। আবিহা হাংসু মোআববিবিহিংনে জোরা পেংকো মিচাতো।29আত্রংকো দিন আবিহা দশ হাজার টেরবো টেরবো মোআববি সিপাইবিহিং স্যাপুয়ে। হাংসুরে ক্যাচা মামুংতো।30আকু দিনতাহা ইস্রাইলিবিহা মোআববিবিহিংয়া পোঙাপানুকো নোইতাহা আকু দেশতাহা আশি বর্ষা চোইপা তিমেপা জিংপুয়ে।31আকো নোইতাহা অনাতকো চেংওয়া শমগরহা ন্যায়কর্তা জিংপুয়ে। আকুহা পিকা দিওয়া দ্যইসো ছয়শো পলিশ্তিবিহিং স্যামসা ইস্রাইলিবিহিংয়া বাচাইয়ে।
The Seed Company