ন্যায়কর্তা2
1গিলগালসোহা বোকিমতা প্রভুসেংজাকো পোইং লেহে আসা ইস্রাইলিবিহিংয়া জাংয়ে, “কাহা আবিহিংয়া মিশ্র দেশসো নোপামসা নাকো আটা-আজাবিহিংপা নাপোইওয়া লোইতা পারায়ে। কাহা জাংমি নিমগা কি নাবিহিংপা জোওয়া কুং করারহা কা হাত্রংরে মালারিং,2আকু দেশতা য়ুংওয়া দিংঙাবিহিংপা হাত্রংরে নাবিহা হাই করাররে মোজোগ্যই আসা আবিকো বেদীরে হ্যাপাপুই। আদো নাবিহা কুং জাংমি ত্যাবাপাহা মোজোতো। আদো আকো তুইপেং নাবিহা জোমি নিও।3আকো সোতা কা নাবিহিংয়া জাংরোওয়া, নাবিহা নাগাই গ্যইপামসা ওয়াংনুওয়া কা ই প্রজাহিংয়া মাঘিইরোওয়া। ইবিহা নাকো দুসমন জিংপুরোওয়া আসা আবিকো চোইসুং হুইওয়া পাসোতা নাবিহা পরেরোওয়া।”4পোইংহা এসে জাংপুনতেনুওয়া তাংসা ইস্রাইলিবিহা কাইসুয়ে।5আকো সোতা আকু জায়গাহিংয়া বোকিম তামসা জাংমগা। আবিহা প্রভুসেংজাহিংয়া আউতাহা বলিদান পিচায়ে।6য়হোশুহা ইস্রাইলিবিহিং বিদা জোয়ে আসা আবিহা তাংসা আপনি আপনিকো ভাগতা মুংচাওয়া মোংটো অধিকার জোকো তামসা হোয়ে।7য়হোশু মিসিচেহা ইস্রাইলিকো দিংঙাবিহা প্রভুসেংজাকো সেওয়া জোয়ে। আকু সিপুনুকো নোইতারে ইস্রাইলকো সোতা প্রভুসেংজাকো জোওয়া টেবো কামবি তিংওয়া মাটা পোজা দিংঙাবি ঙাজ্যইং নিনু চোইপা আবিহা প্রভুসেংজাকো সেওয়া জোমসা য়ুংয়ে।8নুনকো চেংওয়া প্রভুসেংজাকো ডেইয়া য়হোশুহা একশো দশ বর্ষা লো চাংনুওয়া সিপুয়ে।9তিম্নথ-হেরেসকো আকো আপনিকো ভাগতা মুংচাওয়া জায়গাতা আকুহিংয়া লিপুয়ে। আকু মোংটোহা গাশ য়্যাগ্যইকো দ্যাব্যা কাটুকো এফ্রাইমকো য়্যাগ্যইকো দেশতা নিমগা।10য়হোশুকো সময়কো তাংসা দিংঙাবিহা সিপুয়ে। আকো নোইকো সময়কো দিংঙাবিহা প্রভুসেংজাকো ইস্রাইলিবিকো সোতা জোওয়া তাংসা কামহিংয়া লারিংপুয়ে।11হানি সেংজাকো নাগাইতা মেংতাপা নিমমে, ইস্রাইলিবিহা আকুরাং জোসুয়ে, আসা আবিহা বাল চোইসুংহিং সেওয়া জোসুয়ে।12আটা-আজাবিকো প্রভুসেংজা, হাংসু আবিহিং মিশ্র দেশসো উদ্ধার জোমি নিমমে, আবিহা আকুহিং সেওয়া জোকো ল্যাপুয়ে। দোসরা চোইসুংবি, আপনিকো হুরাপা য়ুংওয়া দিংঙাবিকো চোইসুংবিহিং আবিহা সেওয়া জোসুয়ে। চোইসুংবিকো নাগাইতা আবিহা পোরো নুসুচাংমগা আসা প্রভুসেংজাহিং সেদ্রাংপাচাংমগা।13প্রভুসেংজাহিং ভক্তি জোকো ল্যামসা বাল আসা অস্তোরেত চোইসুংবিহিং আবিহা সেওয়া জোচাংমগা।14আকো সোতা ইস্রাইলিবিহিংপা প্রভুসেংজাহা সিওপারাং সেদ্রাংপুয়ে আসা দুসমন আসা মেংদাংবিহিংয়া আবিকো তোইতা লুটেকো পিচায়ে। আসা আকুহা হুরাপা নিওয়া দুসমনবিহিংয়া আবিকো তোইতা আক্রোমন জোকো তামসা ল্যাপুয়ে। ইস্রাইলিবিহা নেহা আপনিকো রক্ছা জোকোপারাং মাছুপা জিংপুয়ে।15হাসে ইকোই আবি লুইসুকো তামসা নোচাং, প্রভুসেংজাকো জাংওয়া সেই প্রভুসেংজাহা আবিকো বিরুদ্ধতা জাচাংমগা। ইস্রাইলিবিহা টেবো কোইচ্যাইওয়াতা পোরেয়ে।16আসা প্রভুসেংজাহা ইস্রাইলিবিহিংয়া এপা জিংওয়া ন্যায়কর্তাবি পিচায়ে, হাংসু আবিহিং আক্রমন জোমবিকোসো রক্ছা জোকো ছুমমে।17আদো ইস্রাইলিবিহা আকু ন্যায়কর্তাবিকো নুওয়াংরে মাহিংতো। আবিহা প্রভুসেংজাকো তোইতা দেংকোরাং মাছুপা জিংপুয়ে। আসা দোসরা চোইসুংবিহিং সেওয়া জোয়ে। আবিকো আটা আজাবিহা পরমপ্রভুকো আজ্ঞা পালন জোমগা, আদো চুবে পুস্তাহা এপা জোকো ল্যাপুয়ে।18হাত্রং হাত্রং প্রভুসেংজাহা ইস্রাইলিবিকো তোইতা ন্যায়কর্তা নিংপুচাং, আত্রংহা প্রভুসেংজাহা আবিংহিংয়া য়ুজ্রুচাংমগা। আসা আবি সি-মিসিনু চোইপা দুসমনবিকোসো আবিকো রক্ছা জোচাংমগা। হাংপাতানাহা তুচানু আসা মাছুপুনুহা আবিহা বিলাপ জোমসা ঙাসুচাংমগা।19আদো ন্যায়কর্তাবি সিপুনুওয়া ইস্রাইলিবিহা জেবে লোংস্তাইওয়াতারাং লাকাপুচাংমগা আসা নোইকো দুঃখহা নাগাইকো দুঃখরোমা ঝান সিওপা জিংপুচাংমগা। আবিহা দোসরা চোইসুংবিহিং হুইসুচাংমগা আসা আপনিকো মেংতাওয়া কামতা জিয়োওমসুং জোমসারাং য়ুংচাংমগা।20আত্রংহা ইস্রাইলিবিহিংপাহা সিওপা সেদ্রাংপুমসা প্রভুসেংজাহা জাংয়ে, “কাহা ইবিকো আটা আজাবিহিং মানেকো পিচাওয়া করারহিংয়া ই দিংঙাবিহা ভঙ্গ জোমি নিও। ইবিহা কুং আজ্ঞা মামানেয়াংতো।21আকো সোতা য়হোশুকো সিওয়া সময়তা ই দেশতা নিওয়া দোসরা জ্যাবিহিংয়া কা নেহা মাঘিইরোওয়া।22আপনিকো আটাবি বেপা ই ইস্রাইলিবিহা কুং আজ্ঞা মানেওয়ামে না মামানেওয়ামমে, আকু কোইকো সোতা আকু জ্যাবিহিংয়া কামতা লাগাইরোওয়া।”23আকো সোতা প্রভুসেংজাহা আকু জ্যাবিহিংয়া ইস্রাইল দেশতা যুংকো পিচায়ে। আকুহা য়হোশুহিংয়া আবিকো তোইতা জিয়োকো মিচাতো আসা আকো সিপুওয়াকো নোইতারে সেংজাহা আবিহিংয়া সেন্নেপা মাঘিইতো।
The Seed Company