ন্যায়কর্তা1
1য়হোশু সিপুনুকো নোইতাহা ইস্রাইলিবিহা প্রভুসেংজাহিং উইয়ে, “য়োংকো হানি জিরিসো অগুওয়াই জোমসা কনানীবিকো তোইতা আক্রমন জোওয়ানেকোগা?”2প্রভুসেংজাহা জাংয়ে, “নাগাই য়হুদাকো জিরি আক্রমন জোকো। কাহা আকু দেশহিংয়া আবিকো খুইতা স্যইপুনতেমি নিও।”3য়হুদাকো দিংঙাবিহা আপনিকো ডুওয়া এবি শিমিয়োনিবিহিংয়া জাংয়ে, “কাবিকো কাটুতা পরেওয়া জায়গাতা কাবিহিংপারাং ওয়াং, আসা য়াংবিহা কনানীবিহিংপা লুইসুসি। আসা কাবিরে আবিকো কাটুতা পরেওয়া জায়গাতা নাবিহিংপা হোরোওয়া।” আকো সোতা শিমিয়োনহা আবিহিংপা হোয়ে।4আত্রংহা য়হুদাহা আক্রমন জোকো নাগাই গ্যইয়ে, আসা প্রভুসেংজাহা কনানী আসা পরিজ্জীবিহিংয়া আবিকো খুইতা স্যইপুয়ে। আবিহা আবিকো দশ হাজার দিংঙাবিহিংয়া বেজেকতা স্যাপুয়ে।5আউতা আবিহা অদোনী-বেজেকহিং দোসুয়ে আসা আকুহিংপা লুইসুয়ে।6আকুহা ক্যাপুয়ে, আদো আবিহা নুনুই নুনুই ঘিপুমসা আকুহিংয়া প্যইপুয়ে। আকো খুইকো আসা কোকোইকো ডিয়োওয়া কোপুবি থেপুয়ে।7অদোনী-বেজেকহা জাংয়ে, “খুই আসা কোকোইকো ডিয়োওয়া কুপুবি থেপুওয়া সুংকাইসো ত্যাচো জাইপুবি কুং টেবিলকো লিতা ক্যাপুওয়া আমাবি য়োচাংমগা। কাহা আবিহিংয়া হেপা জোমি নিমমে, সেংজাহা কাহিংনে ওইপারাং জোমি নিও।” আত্রংহা আবিহা আকুহিংয়া য়রুশালেম পুরায়ে আসা আকুহা আউতা সিপুয়ে।8য়হুদাকো দিংঙাবিহা য়রুশালেমকো তোইতা হামলা জোমসা কব্জা জোয়ে। আবিহা আকো দিংঙাবিহিংয়া তালওয়ারসো স্যাপুয়ে, আসা আকু শহরতা মেহ চুংপুয়ে।9আকো নোইতা য়হুদাকো দিংঙাবিহা ম্যাব্যাচেকো সেক্কোইওয়া জায়গাতা য়ুংওয়া য়্যাগ্যইকো দেশতা, নেগেবতা আসা লেতা ওয়াংবোইতা য়ুংওয়া কনানীবিকো তোইতা আবিহা আক্রমন জোয়ে।10হেব্রোন শহরতা য়ুংওয়া কনানীবিকো তোইতা আবিহা আক্রমন জোয়ে। আসা শেশৌ, অহীমন আসা তল্মৈকো জিরিহিংয়া দাংপাপুয়ে। (হেব্রোনকো নাগাইকো মিংহা কির্য়ত-অর্বা নিমগা।)11আকো নোইতা য়হুদাকো দিংঙাবিহা দবীর শহরতা আক্রমন জোয়ে। (আত্রংকো সময়তাহা দবীরহিংয়া ক্রিয়াত-সেপের তামসা জাংমগা।)12আবিকো প্যাকোতাহা কালেব মিং নিওয়া ইচো দিংঙাহা জাংয়ে, “হানি দিংঙা ক্রিয়াত-সেপেরহিং কোব্জা জো, আকুহিংয়া কা কুং চেংমে অক্শাহিংপা বিয়ৌ জোকো পিচারোওয়া।”13আত্রংহা কালেবকো এ কনজকো চেংওয়া অৗত্নিয়েলহা আকু শহরহিং কব্জা জোয়ে। আসা কালেবহা আপনিকো চেমে অক্শাহিং আকুহিংপা বিয়ৌ জোপিয়ে।14বিয়ৌকো দিনতা অত্নীয়েলহা অক্শাহিং আপনিকো আপাকোতা মোংটো য়াপায়ে। আকুহা আপনিকো বাইদিংওয়া গাদাসো লিতা ঊইয়ে। আপাহা আকুহিংয়া “নেহা হাং ঘ্যইকোগা?” তামসা উইয়ে।15আকুহা জাংয়ে, “নাতিহা কাহিংয়া সেক্কোউওয়া ম্যাব্যাচেকো জায়গা পিচাওয়াতা নেগেবতা কাহিংয়া ইচো নিহসো তিকো পাটিংবি ঘ্যইরোওয়া।” কালেবহা আকুহিংয়া তোইকো আসা লিকো তিকো পাটিংবি পিচায়ে।16য়রিহোসোহা য়হুদা জিরিকো দিংঙাবিহিংপা মোসাকো জুওয়াকো চিমাকো দিংঙা কেনিবিহা খজুরকো সিংতেংবিকো শহরসোহা আরাধকো আবেইকো ম্যাব্যাচোকো সেকোইওয়া জায়গা নেগেবতাতা নিওয়া বার্পুইবিরিতা হোয়ে। আসা আবিহা আমালেকিবিকো প্যাকোতা য়ুংসুদাংয়ে।17আকো নোইতাহা য়হুদাকো দিংঙাবিহা আপনিকো আপু এবি শিমিয়োনবিহিংপা হোমসা সপততা য়ুংওয়া কনানিবিহিং আক্রোমন জোয়ামসা আকু শহরহিংয়া দাংপাপুয়ে। আকো সোতা আকু শহরকো মিংহা হোর্মা এহে।18প্রভুসেংজাহা য়হুদাকো দিংঙাবিহিং য়ুজ্রুয়ে আসা আবিহা য়্যাগ্যইকো দেশবিহিং গাজা, অশ্কলোন, এক্রোন আসা আকো হুরাপা নিওয়া জায়গাবিহিংয়া আক্রোমন জোয়ে। আসা আবিহা য়্যাগ্যইকো দেশবিতা অধিকার জোয়ে, আদো আকো দিংঙাবিহিংয়া আবিহা ঘিকো মাছুতো, হাংপাতানানা আবিকোহা চাকো ও্যইংঙা গারিবি নিমগা।20মোসাকো আজ্ঞা জোওয়া সেই কালেবহা হেব্রোন মুংচায়ে। আকু শহরসোহা অনাককো সুংচো জিরিবিহিং কালেবহা ঘিইপুয়ে।21বেন্জামিন জিরিকো দিংঙাবিহা য়রুশালেমতা য়ুংওয়া য়বুসীবিহিংয়া মাঘিইতো। আকো সোতা য়রুশালেমতা হিনি চোইপা য়বুসীবিহা বেন্জামীনীবিহিংপারাং য়ুংদিংমি নিও।22এফ্রাইম আসা মনশ্শেকো জিরিবিহা বেথেল শহরকো তোইতা আক্রমন জোয়ে। আত্রংকো সময়তাহা বেথেলহিংয়া লুজ তামসা জাংমগা। প্রভুসেংজাহা আবিহিংয়া য়ুজ্রুয়ে। আবিহা শহরতা জাসুস নিংপুয়ে।24জাসুসবিহা ইচো দিংঙাহিংয়া শহরসো নোপাদাংওয়া তিংয়ে আসা জাংয়ে, “ই শহরতাহা হেপা হোকো চুকোগা, কাবিহিংনে জাংপি, কাবিহা নাতিহিংয়া হাইরে খতি মাজোরোওয়া।”25আকু দিংঙাহা ন্যাতা তিংপাপিয়ে। আকু দিংঙা আসা আকো প্যাপ্যাম্যাম্যা ল্যামসা শহরকো লেরা তাংসা দিংঙাবিহিংয়া এফ্রাইম আসা মনশ্শেকো দিংঙাবিহা স্যাপুয়ে।26আকো নোইতাহা আকু দিংঙাহা হিত্তীবিকো দেশতা হোয়ে আসা আউতা ইচো শহর বানাইয়ে। আকুহা আকো মিংহা লুজ এহে আসা হিনি চোইপা আকু শহরকো মিংহা আকুরাং নিও।27বেথ-শান, তানাক, ডোর, য়িবলাম, মগিদ্দো আসা আকো হুরাপা শহরবিতা য়ুংওয়া দিংঙাবিহিংয়া মনশ্শে জিরিকো দিংঙাবিহা মাঘিইতো। আসা আউতা কনানীবি য়ুংসুয়ে।28ইস্রাইলিবিহা ন্যাসারাং সিওপা সাডুংপা জিংপুনুওয়া আবিহা কনানীবিহিংয়া আপনিকো কাম জোকো কর জোপুয়ে, আদো আবিহিংয়া মাঘিইতো।29গেজের শহরতা য়ুংওয়া কনানীবিহিংয়া এফ্রাইম জিরিবিহা মাঘিইতো, কনানীবিহা আবিহিংপা আউতা য়ুংসুয়ে।30কিত্রোন আসা নহলোল শহরতা য়ুংওয়াবিহিংয়া জবুলুন জিরিকো দিংঙাবিহা মাঘিইতো, কনানীবিহা আবিহিংপা আউতা য়ুংসুয়ে আসা ইস্রাইলিবিহা আবিহিংয়া আপনিকো সোতা কাম জোকো কর জোপুয়ে।31আসোর জিরি অক্কো, সীদোন, অহলাব, অকজীব, হেলওয়া, অপেক আসা রহোব শহরতা য়ুংওয়া দিংঙাবিহিংয়া মাঘিইতো।32আশেরীবিহা আউতা য়ুংওয়া কনানীবিহিংপা য়ুংসুয়ে।33নপ্তালী জিরিহা বেথ-শেমেশ আসা বেথ-অনাথ শহরতা য়ুংওয়া দিংঙাবিহিংয়া মাঘিইতো। আউতাহা আবিহা কানানীবিহিংপারাং চিত্তা য়ুংসুয়ে আসা আবিহিংয়া আপনিকো সোতা কাম জোকো কর জোয়ে।34দান জিরিকো দিংঙাবিহা এমোরীবিহিংয়া য়্যাগ্যইকো জায়গাবিতা ঘিইপুয়ে আসা ওয়াংবোইতা লেকো মিচাতো।35এমোরিবিহা অয়্য়ালোন, সাল্বিম আসা হেরেসবিহা য়্যাগ্যইতা য়ুংসুয়ে। আদো এফ্রাইম আসা মনশ্শেকো জিরিহা আবিহিংয়া আপনিকো অধিনতা এহে আসা আপনিকো সোতা কাম জোপাকো কর জোপুয়ে।36এমোরিবিকো লুংবি অক্রব্বিম ঘ্যাদোংসোহা সেলাকো দাংব্যাচেসো জিংমসা হ্যাপুমগা।
The Seed Company