ন্যায়কর্তা12
1এফ্রাইমকো দিংঙাবিহা লুইসুকো তৈয়ার জিংয়ে। আবিহা য়র্দন জোরা পেংমসা সাপোনতা হোয়ে আসা য়িপ্তাহিং জাংয়ে, “অম্মোনীবিহিংপা লুইসুকো হোনুওয়া কাবিহিংয়া হাংপাসা মোমোউমগা? কাবিহা নাতিহিংয়া নাকো সাসোরি ওংপাপুরোওয়া!”2য়িপ্তাহা আবিহিং জাংয়ে, “কা আসা কুং দিংঙাবিকোহা অম্মিনিবিহিংপা ইচো টেবো স্যাসুওয়া নিমগা। কাহা নাবিহিংয়া মোউয়ে; আদো নাবিহা কাবিহিংয়া আবিকো খুইসো মাবাচাইতো।3হাত্রং কা নাবিকোসো হাইক্রি সহায়তা মুংকো বেপা মাজিং, আত্রংহা কাহা আপনিকো প্রাণ বিপদতা ওয়্যামসা লুংবি পেংপুমসা হোমসা আবিহিংপা লুইসুয়ে। প্রভুসেংজাহা কাহিংয়া আবিকো তোইতা জিয়োপায়ে। এপা বেনাহা নেহা হাং জাংমসা নাবিহা কাহিংপা লুইসুকো ওয়াংগাসা?”4আত্রংহা য়িপ্তাহা গিলাদকো তাংসা দিংঙাবিহিংয়া জমা জোয়ে আসা এফ্রাইমিবিহিংপা লুইসুয়ে আসা আবিহিংয়া পোংঙাপায়ে। (এফ্রাইমিবিহা জাংমি নিমগা, “নাতি, এফ্রাইম আসা মনশ্শে গিলাদতা য়ুংওয়া গিলাদীবিহা ক্যাপেইবিগা!”)5এফ্রাইমিবিহিং ক্যাকো মিচাকো তামসা য়র্দন জোরা পেংকো ছুওয়া গ্যাদোংবিহা তাংসা গিলাদিবিহা কব্জা জোচপুয়ে। হাত্রং হাংসু জিংদো ক্যাদিংওয়া এফ্রাইমিবি জোরা পেংকো অনুমতি য়া, আত্রংহা গিলাদীবিহা আকুহিং উইচাংমগা, “নাতিহা এফ্রাইমিগা?” আকুমি মোকোমি তামসামি জাংনাহা6আকুহিংয়া ‘শিব্বোলেত’ তামসা জাংপাচাংমগা। আদো আকু শব্দহা আকুহা ঠিক জাংকো মাছুনুহা আকুহা ‘সিব্বোলেত’ তামসা জাংচাংমগা। আত্রংহা আবিহা আকুহিংয়া প্যইমসা জোরা পেংওয়া গ্যাদোংতারাং স্যাপুচাংমগা। এপা জোমসারাং আত্রংকো বেলাতাহা ৪২ হাজার এফ্রাইমিবিহিংয়া স্যাপুয়ে।7য়িপ্তাহা লো টুনিং চোইপা ইস্রাইলিবিহিং ন্যায়কর্তা জোয়ে। আকো নোইতা আকুহা সিপুয়ে আসা আকুহিংয়া গিলাদকো ইচো শহরতা লিপুয়ে।8য়িপ্তাকো নোইতাহা ইস্রাইলকো মাটাহা বেথলেহেমকো ইব্সান জিংপুয়ে।9আকোহা ইকাইসো ত্যাচো চেংওয়া আসা ইকাইসো ত্যাচো চেমেবি নিমি। আকুহা আপনিকো চেমেবিহিংয়া আপনিকো জিরিকো বাইরেতা বিয়ৌ পিচাপুয়ে আসা বাইরেসোরাং চেংওয়াবিকো সোতারে নামাবি পারেয়ে। ইব্সানহা লো নীনিং চোইপা মাটা জিংমসা য়ুংয়ে।10আকো নোইতাহা আকুহা সিপুয়ে আসা বেথলেহেমতা লিপুয়ে।11ইব্সানকো নোইতা জুবুলুনকো এলোনহা লো ত্যানিং চোইপা ইস্রাইলকো মাটা জিংয়ে।12আকো নোইতা আকুহা সিপুয়ে আসা জবুলুনকো অয়্য়ালোন তাওয়া জায়গাতা লিপুয়ে।13এলোনকো নোইতা পিরাতোনীকো হিল্লেলকো চেংওয়া অব্দোনহা ইস্রাইলকো মাটা জিংপুয়ে।14আকো নিকাইচো চেংওয়া আসা ইকাইসো ত্যাচো চুওয়াবি নিমি আসা আবিহা সুংকাইসো ত্যাপু গধাবিতা বাইমসা তেইচাংমি। অব্দোনহা লো য়্যানিং চোইপা ইস্রাইলকো মাটা য়ুংয়ে।15আকো নোইতা আকুহা সিপুয়ে আসা পিরাতোনিতা লিপুয়ে। পিরাতিনিহা অমালিকিবিকো য়্যাগ্যইকো দেশতা এফ্রাইমকো জায়গাকো নাপোতা পরেমগা।
The Seed Company