য়হোশু23
1উইসে দিনকো নোইতা প্রভুসেংজাহা ইস্রাইলবিহিংয়া আকো হুরাপা নিওয়া দুসমানবিসোহা য়োইমসা এপিয়ে। আত্রংকো সময় চোইপাহা য়হোশুহা সিওপারাং ওয়ারাংপুনতেমি নিমি।2আকুহা তাংসা ইস্রাইলি, ওয়ারাংপাবি, অগুওয়াবি, ন্যায়কর্তাবি আসা অধিকারিবিহিং মোউমসা জাংয়ে, “নেহা কাহা সিওপারাং ওয়ারাংপুয়ে।3নাবিকো সোতাহা পরমপ্রভু নাবিকো সেংজাহা ই তাংসা জ্যাবিহিংপা হাং জোমমে, আকুহা তাংসা তিংমি নিও। পরমপ্রভু নাবিকো সেংজাহা নাবিকো সোতাহা লুইসুংদিংমি নিও।4নুব্যা য়র্দন জোরাসোহা দিব্যা ভুমদ্ধ জাহাদি চোইপা আকু জ্যাবিকো জায়গা, হানি কা জিয়োনতেমমে আসা জিয়োকো বাকি নিমমে, আকুহা তাংসা কাহা নাবিকো জিরিবিহিং পুংজিকো রুপতা পোপিমি নিও।5পরমপ্রভু নাবিকো সেংজাহা নাবিহিংয়া নুনুই ওয়েংপাকো লাগাইরোওয়া আসা নাবি নাগাই গ্যইপুমসা হোনুওয়া আবিহিংয়া ঘিরোওয়া। পরমপ্রভু নাবিকো সেংজাহা নাবিহিংপা প্রতিজ্ঞা জোমি ত্যাবাপা নাবিহা আবিকো জায়গাতা অধিন জোরোওয়া।6আকো সোতা হশিয়ার জিংমসা মোসাকো লিংপাংবিকো হিগাতা লাওয়া তাংসা নুওয়াং মানেকো জো আসা জোকো জো। আকো হানি ভাগহিংনে ম্যাল্যা,7আসা নাবিকো প্যাকোতা ল্যইতেওয়া ই জ্যাবিহিংপা হাইরে সম্নদ্ধ মাবানাই, আবিকো চোইসুংবিকো মিংরে মালাংগ্যই, আকু মিংহা বাকল জোনুরে মালাংগ্যই, আকু চোইসুংহিংয়া সেওয়ারে মোজোগ্যই আসা আকো নাগাইতা আপনিকো পোরোরে মোনুগ্যই।8আকুরোমাহা হেপা নেচোইপা নি, এপা জোমসারাং প্রভুসেংজাকোতা দেংমসা য়ুং।9নাবিহা নাগাই গ্যইপুমসা হ্যানুওয়া পরমপ্রভুহা টেবো সে নিওয়া জ্যাবিহিং ঘিপুয়ে আসা হাংসুরে নাবিকো বিরুদ্দতা জাকো মাছুয়াংতো।10নাবিকো প্যাকোতারে হাংসু জিংদো হাজার দিংঙাবিহিং ঘিকো ছুরোওয়া, পরমপ্রভুহা আপনিকো প্রতিজ্ঞা সেই নাবিকো সোতা লুইসুরোওয়া।11আকো সোতা হশিয়ার জিংমসা পরমপ্রভু নাবিকো সেংজাহিং জেজেংপা জো।12নাবিহা সেংজাহিং ল্যাপুয়ে নাবিকো প্যাকোতা বাকি নিওয়া জ্যাবিহিংপা ইচো জিংপুয়ে আসা আবিহিংপামি বিয়ৌমি জোনাহা13আজিপ্পারাং ই গেকো জো, কি পরমপ্রভু নাবিকো সেংজাহা নাবি নাগাই গ্যইপুমসা হোনুওয়া আকু জ্যাবিহিংয়া ন্যাসারাং মাঘিরোওয়া। আদো, আবিহা নাবিকো সোতাহা ইচো ফাসো আসা মিমোক্যইওয়া হোক্রা ত্যাবাওয়া চুসুং-মাইসুংক্যইপা জিংপুরোওয়া আসা নাবিকো জুপাহা সাটা মেংচি মিচোতা সোসা হোপুমমেপা দুঃখ জিংরোওয়া। পরমপ্রভু নাবিকো সেংজাহা নাবিহিং পিচাওয়া ই এনতাওয়া জায়গাসো নাবি তাংসা মাদাংনু চোইপা ই নুওয়াংহা জিংদিংরোওয়া।14“নেহা কাহা সির্কো সময় জিংতেয়ো। নাবিহা আপনি আপনিকো তুংসিং আসা নোচেংতা ই নুওয়াং গেদিংমগা, কি পরমপ্রভু নাবিকো সেংজাহা আপনিকো প্রতিজ্ঞা জোওয়া তাংসা এনতাওয়া নুওয়াং নাবিহিং পিচামি নিও। আকো জোওয়া তাংসা প্রতিজ্ঞাবিহা পুরা জিংমি নিও, ইচোরে ম্যাল্যইপাতেয়াংতো।15আদো হেপা নাবিহিংপা জোওয়া তাংসা প্রতিজ্ঞা আকুহা পুরা জোমমে, এপারাং আকুহা আপনিকো তাংসা য়েংওয়াবিরে পুরা জোরোওয়া।16পরমপ্রভু নাবিকো সেংজাহা নাবিহিং পিচাওয়া করারহা নাবিহা পালন মোজোনাহা আসা দোসরা চোইসুংবিকো সেওয়া আসা আরাধনামি জোনাহা আকুহা আপনিকো সেদ্রাংওয়াতা নাবিহিংয়া দন্ড পিচারোওয়া আসা আকো নাবিহিং পিচাওয়া ই এনতাওয়া জায়গাতা ইচোরে য়ুংচা মামুংরোওয়া।”
The Seed Company