য়হুন্না6
1আকো নোইতা ইশুহা গালীল ঝাহাদিকো নুব্যাতা হ্যায়ে। আকুহিংয়া তিবেরিয়াস ঝাহাদিরে তামগা।2দিংঙাবিহা য়ায়া-য়ুয়ুপা আকু নুনুই হুইপুয়ে, হাংপাতানাহা হাইমবিহিং সাংপাওয়া চিহ্নহা আবিহা তিংমি নিমি।3আসা ইশুহা ইচো য়্যাগ্যইতা হোমসা য়োংতোংবিহিংপা গায়ে।4আত্রংহা য়হুদিবিকো মানক্যা নিস্তার তাওয়া দেয়োংদাংতেওয়া নিমি।5দিংঙাবিকো টেবো য়ায়া-য়ুয়ুওয়া আপনিবিকোতা দেপাওয়া তিংমসা ইশুহা আপনিকো য়োংতোং ফিলিপহিং উইয়ে, “ই দিংঙাবিহিং চাওয়া পিচাকোহা য়াংবিহা হাংতা কোব্রেং চোইয়ারগুং?”6ই নুওয়াং ইশুহা ফিলিপকো তুংসিংহিং জাঁচ জোমসা জাংওয়া নিমগা। ফিলিপহা হাং জোদাংমে, আকু নুওয়াংহা আকুহা গেমি নিমি।7ফিলিপহা জাংয়ে, “ইতা নিওয়া তাংসা দিংঙাবিহিংয়া দুইশো জাতাংকো টাংকাসো কোব্রেং চোইয়াদো আবিহিংয়া আত্যই আত্যইতিরে মাকাসুরোওয়া।”8ইশুকো দোসরা ইচো য়োংতোং সিমোন পত্রসকো এ আন্দ্রিয়াসহা জাংয়ে,9“ইতা ইচো পোজাহিংপা ঙাচো জোংকো কোব্রেং আসা নিহপু নায়া নিনা, আদো এসেপাকো দিংঙাবিহিংয়া হেপাগা তেংরিকোওয়া?”10ইশুহা য়োংতোংবিহিং জাংয়ে, “দিংঙাবিহিং গাপা।” আউতাহা উইসে লাংপা নিওয়া ওয়াংবোই নিমি, আত্রংহা দিংঙাবিহা আউতারাং গায়ে। আকু দিংঙাবিতাহা পোজা মেংচে পাঁচ হাজার নিমি।11ইশুহা কোব্রেং চুংমসা সেংজাহিং গারানি তায়ে আসা গাদিংওয়া দিংঙাবিহিং পিচাকো তামসা চোপায়ে আসা নায়াহিংনে এপা জোমসারাং চোপায়ে। দিংঙাবিহা গাইপা চায়ে।12আবি গাইপা চাপুনতেনুকো নোইতাহা ইশুহা য়োংতোংবিহিং জাংয়ে, “লাওয়া চোংব্রাবি য়ো, আত্যইত্যইরে মাহুইতেকো।”13চামসা লাওয়া আকু ঙাচো কোব্রেংকো চোংব্রাবি য়োনুওয়া বার্চো ডেংগে মেইপুয়ে।14এপা জিংওয়া আআংপেপেচপুওয়া কাম তিংমসা দিংঙাবিহা জাংয়ে, “আজিপ্পারাং বাসিমতিতা লেরো তামসা জাংওয়া য়াংবিকো আশা জোওয়া অগমবক্তাহা ইরাংগুং।”15আসা দিংঙাবিহা লেমসা ইশুহিংয়া মোজুই-মারাইপা জোমসা জাইপু বানাইদাংয়ে তাওয়া সিদা চ্যইমসা ইশুহা ন্যাসারাং ইচোদাং য়্যাগ্যইকো তোইতা হোয়ে।16সানি হুইপুনতেনুকো নোইতা ইশুকো য়োংতোংবিহা দাব্রিকো আরিতা উইমসা17নোওয়াইতা বাইমসা আবিহা কোর্ফরনহুম শহরতা লাকাদাংয়ে। আত্রংহা মারি মোপদাংতেমি, আদো ইশুহা মেলেয়াংমি।18বিংঙাহা টেবো ভিয়ে আসা তিকো চুরাবিহা লোপায়ে।19য়োংতোংবিহা পাঁচ ছয় কিলোমিটার নোওয়াই বাইপুমসা হাপুনতেনুওয়া আবিহা ইশুহিংয়া তিকো তোই-তোই তেইপামসা নোওয়াইকো আবেইতা লেপাদাংওয়া তিংয়ে। আবিহা সিওপা চুসুংপুয়ে।20আদো ইশুহা জাংয়ে, “কারাংগা, মাচ্ছুংগে!”21এপা জাংওয়া হিংমসা য়োংতোংবিহা গাগ্রুমসা ইশুহিং নোওয়াইতা বাইপায়ে আসা আত্রংরাং নোওয়াইহা আবিকো হ্যাদাংওয়া জায়গাতা দেকায়ে।22আসা দাব্রিকো নুব্যাতা নিওয়া দিংঙাবিহা আউতাহা ইচো মেংচে নোওয়াই তিংয়ে, আবিহা গেওয়া নিমগা। ইশুহা য়োংতোংবিহিংপা নোওয়াইতা ম্যাহ্যায়াংওয়া, আদো আকো য়োংতোংবি মেংচে হ্যাওয়া নিমগা।23আত্রংহা প্রভু ইশুহা গারানি তামসা দিংঙাবিহিং কোব্রেং চাকো পিচাওয়া জায়গাতা তিবেরিয়স শহরসো দোসরা নোওয়াইবিরে আউতা দেরেয়ে।24ইশু আসা আকো য়োংতোংবিহিং হাংসুনে মাতিংমসা আকু দিংঙাবিহা নোওয়াইতা বাইপুমসা কোর্ফরনহুম শহরতা মোকাকো হোয়ে।25ইশুহিং দাব্রিকো নুবাই কাটুতা দোসুমসা দিংঙাবিহা জাংয়ে, “উটকেওয়া, ইতা নাতিহা হাত্রং ওয়াংমগা?”26ইশুহা জাংয়ে, “আজিপ্পারাং কা নাবিহিংয়া জাংরোওয়া, কুং তিংপাওয়া চিহ্নবি তিংমসা মোকো, আদো গাইপা কোব্রেং চাচামুংওয়াকো সোতা নাবিহা কাহিং মোমগা।27দাংপুমসা হ্যাপুওয়া কোব্রেংকো সোতা মেংচে নাবিহা মোকোইচ্যাগ্যই, আদো হাত্রংরে মাদাংওয়া কোব্রেংকো সোতা কাম জো। ই তুতেংজু চোইপা য়ুংওয়া কোব্রেং দিংঙাকো চেংওয়া নাবিহিংয়া পিচারোওয়া, হাংপাতানাহা ইকো সোতারাং সেংজা আপাহা আকুহিং অধিকার পিচামগা।”28দিংঙাবিহা উইয়ে, “এপা বেনাহা সেংজাকো ঘ্যইওয়া কাম জোকো কাবিহা হাং জোনেকোগা?”29ইশুহা জাংয়ে, “সেংজাকো কামহা ইরাংগা, হাংসুহিং আকু নিংপুমিনি, আকো তোইতা দেংকো জো।”30আবিহা জাংয়ে, “কাবিহা নাতিহিং দেংকো সোতাহা নাতিহা কাবিহিংয়া হেপা জিংওয়া আআংপেপেচপুওয়া চিহ্ন তিংপাকো চুকোগা? নাতিহা হেপা জিংওয়া কাম জোকোগা?31য়োংকো আটা আজাবিহা চিচ্চোওয়া জায়গাতা মান্না তাওয়া কোব্রেং চায়ে। এপারাং তাংজিকো হিগাতারে লামি নিও, ‘আকুহা নাবিহিংয়া লোডিংবাকো কোব্রেং চাকো পিচায়ে’।”32ইশুহা আবিহিংয়া জাংয়ে, “আজিপ্পারাং কা নাবিহিংয়া জাংরোওয়া, মোসাহা নাবিহিংয়া লোডিংবাকো কোব্রেং পিচাওয়া মোকো, আদো কুং আপারাং নাবিহিংয়া লোদিংবাসো আজিপ্পাকো কোব্রেং পিচামগা।33হাংপাতানাহা সেংজাকো পিচাওয়া কোব্রেংহা আকুরাংগা, হাংসু লোডিংবাসো লিতা লেমসা বাসিমতিহিং সাদি পিচামে।”34আবিহা জাংয়ে, “প্রভু, আকু কোব্রেং কাবিহিং হাত্রংদো পিচা!”35ইশুহা আবিহিংয়া জাংয়ে, “সাদি পিচাওয়া কোব্রেংহা কারাংগা। কুংতা ওয়াংওয়াবিহা মাহাপাংরোওয়া আসা কুং তোইতা দেংওয়াবিহা হাত্রংরে মেসেকেংরোওয়া।36আদো নাবিহা কাহিংয়া তিংমসারে মেদেংরোওয়া তামসা কাহা আজিপ্পারাং জাংপুনতেমি নিও।37আদো কুং আপাকো কাহিং পিচাওয়াবিহা তাংসা কুংতা ওয়াংরোওয়া, আসা কুংতা ওয়াংবিহিংয়া কাহা হাত্রংরে মালাপারোওয়া।38কুং আপনিকো ইচ্ছা মোকো, আদো কাহিং নিংপুওয়াকো ইচ্ছা তাংসা জোকো কা লোডিংবাসো লিতা উইপামসা লেমগা।39কাহিং নিংপুওয়াকো ইচ্ছা ইগা, সেংজাহা কাহিং পিচামি নিওয়া সেই হাংসুহিংনে কা মায়াংপাকো, আদো আবিহিং নোইস্যাকো দিনতা ঙাপামুংকো।40ওই, কুং আপাকো ইচ্ছা ইরাংগা, তাংসা চেংওয়াহিং কাংওয়া আসা আকো তোইতা দেংওয়াবিহা হাত্রংরে মিসিওয়া সাদি মুংচাকো আসা নোইস্যাকো দিনতা কা আবিহিংয়া ঙারোপারোওয়া।”41ইশুহা “লোডিংবাসো লিতা ঊইপামসা লেওয়া কোব্রেংহা কারাংগা” তাওয়াকো সোতা য়হুদিবিহা আকো তোইতা ন্যাক্যানুকুপা য়্যইসুয়ে,42“ইকো আপাসো আয়ুহিংয়া য়াংবিহা নাইমগা, ই দিংঙাহা আকু য়োসেপকো চেংওয়া ইশু মোকোমগা? মেনাহা হেপা ইহা ‘কা লোডিংবাসো ঊইপামসা লেমি’ তামগা?”43ইশুহা জাংয়ে, “নাবিহা ন্যাক্যানুকুপা মোয়্যইগ্যই।44কাহিং নিংপুওয়া আপারাং কুংতা ওয়াংওয়া তুংসিং মিচানাহা হাংসুরে কুংতা ওয়াংকো মাচু, কুংতা ওয়াংওয়াবিহিংয়া নোইস্যাকো দিনতাহা কা ঙারোপারোওয়া।45তাংজিকো হিগাতা অগমবক্তাবিহা এপা লামি নিও, ‘সেংজারাং তাংসা দিংঙাবিহিং ঝিপারোওয়া’। এপারাং সেংজা আপাকো ঝিপাওয়া হিংওয়া আসা ঝিওয়া তাংসা কুংতা ওয়াংরোওয়া।46হাংসুরে সেংজা আপাহিংয়া মাতিংয়াংতো। সেংজা আপাসো লেওয়া মেংচে আকুহিং তিংমি নিও।47“আজিপ্পারাং কা নাবিহিং জাংরোওয়া, হাংসু আকো তোইতা দেং, আবিহিংপাহা হাত্রংরে মিসিওয়া সাদি নিও।48সাদি পিচাওয়া কোব্রেংহা কারাংগা।49নাবিকো আটা আজাবিহা চিচ্চোওয়া জায়গাতা মান্না তাওয়া কোব্রেং চায়ে। আদো আবিহা সিপুয়ে।50আদো লোডিংবাসো উইপামসা লেওয়া কোব্রেংহা ইরাংগা, হাংসু ই কোব্রেংহিং চা, আকুহা হাত্রংরে মাসি।51লোডিংবাসো উইপামসা লেওয়া ঙাজ্যইং কোব্রেংহা কারাংগা। ই কোব্রেং চামবিহা হাত্রংরে মিসিওয়া সাদি মুংমসা মাসিপা য়ুংরোওয়া। আকু কোব্রেংহা কুং জুপারাংগা। বাসিমতিকো দিংঙাবিহিং সাদি মুংচাকো তামসা কা কুং জুপা পিচারোওয়া।”52ই নুওয়াংকো তোইতা য়হুদিবিহা তাইবিলারাই এপা জাংসুয়ে, “ই দিংঙাহা য়াংবিহিং হেপা ইকো জুপা চাকো পিচাকো চুকোগা?”53ইশুহা আবিহিং জাংয়ে, “আজিপ্পারাং কা নাবিহিং জাংরোওয়া, নাবিহা দিংঙাকো চেংওয়াকো জুপা মাচানাহা আসা আকো য়ুতি মাআংনাহা নাবিকোতা সাদি মায়ুংরোওয়া।54আদো কুং জুপা চাওয়া আসা কুং য়ুতি আংওয়াবিহিংপা হাত্রংরে মিসিওয়া সাদি নিরোওয়া আসা নোইস্যাকো দিনবিতাহা কাহা আকুহিংয়া সিপুওয়াসো ঙারোপারোওয়া।55হাংপাতানাহা কুং জুপাহা আজিপ্পারাং চাতুওয়াগা আসা কুং য়ুতিহা আজিপ্পারাং আংতুওয়াগা।56কুং জুপা চাওয়াবি আসা য়ুতি আংওয়াবিহা কুংতা য়ুংরোওয়া, আসা কা আকোতা য়ুংরোওয়া।57মিসিওয়া সেংজা আপাহা কাহিং নিংপুয়ো আসা কা আকোতা জিংমসা বাচেমি নিও। এপারাং কাহিং চাওয়াবিহা কুংতা জিংমসা বাচেরোওয়া।58কারাং লোডিংবাসো উইপামসা লেওয়া আজিপ্পাকো কোব্রেংগা। ইহা নাবিকো আটাবিকো চাওয়া কোব্রেং ত্যাবাপা মোকো, আবিহা আকু চায়ে আসা সিপুয়ে, আদো কুং পিচাওয়া কোব্রেং চাওয়া দিংঙাবিহা হাত্রংরে মিসিওয়া সাদি মুংচামসা মিসিপা য়ুংরোওয়া।”59ই নুওয়াংবিহা ইশুহা কোর্ফরনহুম শহরকো জোংসুওয়া সাতা ঝিপানু জাংওয়া নিমগা।60ই নুওয়াংবি হিংমসা ইশুকো য়োংতোংবিতাহা লেরাহা জাংসুয়ে, “ই ঝিপাওয়াহা আজিপ্পারাং মুচু-ম্যান্যাক্যইপা নিও, ইহা হাংসু হিংকো চুকোগাসা?”61য়োংতোংবিকো প্যাকোতাহা ন্যাক্যানুকুপা য়্যইসুদিংয়ো তাওয়া নুওয়াং গেমসা ইশুহা আবিহিং জাংয়ে, “ই নুওয়াংসো নাবিহিংয়া য়োইদিংগা?62এপা বেনাহা নাবিহা দিংঙাকো চেংওয়াহিংয়া নাগাই আপনি নিওয়া লোডিংবাতা লাকাওয়া তিংনাহা হাং জোকোগা?63সাদি পিচাওয়াহা সেংজাকো লাংবেরাংগা। ই কামহা দিংঙাকো সেসো জিংক্যইওয়া নুওয়াং মোকো। কাহা নাবিহিং জাংওয়া নুওয়াংহা সেংজাকো লাংবেসোগা, হাংসু সাদি পিচামে।64আদো নাবিকো প্যাকোতাহা লেরাহা কাহিং দেংকোরে মেদেংমগা।” (ইশুহা ই নুওয়াং জাংমগা, হাংপতানাহা হাংসু হাংসু মাদেং আসা হাংসু আপনিহিং ধোকা পিচাকোমমে তাওয়া নুওয়াংহা আকুহা নাগাইসোরাং গেমি নিমগা।)65আকো নোইতা ইশুহা ন্যাসারাং জাংয়ে, “আকো সোতা কাহা নাবিহিংয়া জাংমগা, কুং আপা কুংতা ওয়াংকো মিচানু চোইপা হাংসুরে কুংতা ওয়াংকো মোচু।”66আত্রংসো য়ুতা ইশুকো উইসে য়োংতোংবিহা নুনুই ওয়েংপুয়ে আসা আকুহিংপা হুইসোইকো ল্যাপুইয়ে।67ইশুহা বার্চো য়োংতোংবিহিংয়া উইয়ে, “নাবিরে কাহিং হুইতেমসা হ্যাকোগা?”68আত্রংহা সিমোন পত্রসহা জাংয়ে, “ও প্রভু, কাবিহা হাংসুকোতা হাকোগা? হাত্রংরে মিসিওয়া সাদি পিচাওয়া য়্যইদিহা নাতিহিংপারাং নিও।69নাতিহা সেংজাকো নিংপুওয়া ইচো পবিত্র দিংঙাগা, তাওয়া গেমসা কাবিহা দেংমি নিও।”70ইশুহা আবিহিং জাংয়ে, “কা আপনিরাং নাবি বার্চোহিং জেংমকোতা? আদো নাবিকো প্যাকোতা ইচোহা শয়তানগা।”71ইশুহা ই নুওয়াংহা সিমোন ইস্করিয়োতকো চেংওয়া য়হুদাকো তোইতা জাংমি নিমগা, হাংপাতানাহা আকুহা বার্চো য়োংতোংবিতাহা ইচো জিংমসা ইশুহিং ধোকা পিচাংদাংওয়া নিমি।
The Seed Company