য়হুন্না7
1আকো নোইতা ইশুহা গালীলকো আবেইকো লোইকো জায়গাতারাং কোইদিংমি। আকুহা য়হুদিয়া জায়গাতা হোকো মেকেংতো, হাংপাতানাহা আকো য়হুদি ওয়ারাংপাবিহা আকুহিংয়া স্যাকো কেংদিংমি।2আত্রংহা য়হুদিবিকো গ্যই বানাইমসা মানেওয়া মানক্যা দেপাদাংতেওয়া নিমি।3আকো সোতা ইশুকো এবিহা আকুহিং জাংয়ে, “গালীল জায়গা হুইতেমসা য়হুদিয়াতা হোতু। নাকো জোদিংওয়া আআংপেপেচপুওয়া কামবিহা আউতারে য়োংতোংবি তিংকো।4মিং তিংপাকো কেংবিহা আপনিকো জোওয়া কামবিহা ম্যইমসা একো মেকেংমগা। এপারাং নাতিরে কামবি জোকো কেংনাহা, আপনিহিং বাসিমতিকো দিংঙাবিহিং তিংপা।”5হাংপাতানাহা আকো এবিরে আকো তোইতা মাদেংমি।6ইশুহা আবিহিংয়া জাংয়ে, “কুং সোতা এনতাওয়া সময়বিহা নেদোপা মাদেয়োংয়াংতো। নাবিকো সোতাহা হানি সময় জিংদো এনতাওয়ারাংগা।7বাসিমতিকো দিংঙাবিহা নাবিহিংয়া আচকাপা জোমক্যই, আদো কাহিংয়া আচকাপা জোরোওয়া, হাংপাতানাহা আবিকো জোওয়া কামহিংয়া কাহা মেংতাপা নিও তামসা তিংপাপুচাংমগা।8নাবিহা মানক্যাতা হ্যাতু, কা ই মানক্যাতা মোহোরোওয়া, হাংপাতানাহা কুং সময়হা নেচোইপা মায়োংয়াংতো।”9এসে জাংমসা আকুহা গালীলতারাং য়ুংতেয়ে।10ইশুকো এবিহা মানক্যাতা হোপুনতেনুকো নোইতাহা আকুহা হাংসুরে সিদা মোচ্যইপা য়রুশালেমতা হোপুয়ে।11মানক্যাতাহা য়হুদি মাটাবিহা আকুহিং মোদিংমি। “ইশু হাংতা নিংগা?” তামসা আবিহা উইদিংমি।12উইসে দিংঙাবিহা ইশুকো নুওয়াং য়্যইসুদিংমি। লেরাহা জাংসুদিংমি, “ই দিংঙাহা এনতাপা নিও।” আদো লেরাহা জাংসুদিংমি, “মোকোমি, আকুহা দিংঙাবিহিং ল্যইপাদিংনা।”13আদো য়হুদিবিকোসো চুসুংওয়াকো সোতা হাংসুরে ইশুকো বিষয়তা তাংসা দিংঙাবি সিদা চ্যইক্যইপা জাংমক্যইতো।14ই মানক্যাকো আদি বেলা জিংতেনু ইশুহা দেমসাতা হোমসা ঝিপাদাংয়ে।15য়হুদি মাটাবিহা সিয়োপা আআংপেপেচপা জিংপুমসা জাংয়ে, “ই দিংঙাহা মাঝিপারাং ই ঝিপাওয়া হেপা গেমেতা?”16ইশুহা আবিহিংয়া জাংয়ে, “কুং ঝিপাওয়া নুওয়াংহা কুং মোকোমি, আদো কাহিং নিংপুওয়া সেংজাকোগা।17হানি দিংঙা সেংজাকো কাম জোকো কেং, ই ঝিপাওয়াহা সেংজাকোসোমে, না কা আপনিকোসোরাংমে আকুহা সিদা চ্যইরোওয়া।18আপনিকো সেসো য়্যইওয়াহা আপনিকো আদর মোওয়াগা, আদো আপনিহিং নিংপুওয়াকো আদর মোওয়াবিহা আজিপ্পা দিংঙাগা, আসা আকোতাহা ল্যহপাওয়া মাতামগা।19মোসাহা নাবিহিংয়া লিংপাং পিচামকোতা? আদো নাবিহা হাংসুরে আকুহিংয়া পালন মোজোমগা। হাংপা নাবিহা কাহিংয়া স্যাকো কেংদিংগা?”20উইসে দিংঙাবিহা আকুহিংয়া জাংয়ে, “নাতিহিংয়া জেসাং বাইমি নিও, হাংসু নাতিহিংয়া স্যাকো কেংদিংগা?”21ইশুহা জাংয়ে, “কা ইচো কাম জোয়ে, আউতাহা নাবিহা আআংপেপেচপুয়ে।22নেহা কাং, মোসাহা খতনা জোনেরোওয়া তামসা জাংতেমগা। (আদো ই কামহা মোসাকো তেংতেওয়া মোকো, ইহা নাবিকো আটাবি তেংতেমগা।) আদো সানুকো দিনতারে নাবিহা আপনিকো চেংওয়াবিকো খতনা জোমগা।23নেহা নাবিহা মোসাকো পিচাওয়া লিংপাং মায়াংকো তামসা সানুকো দিনতা খতনা জোনাহা, কা সানুকো দিনতাহা ইচো দিংঙাহিংয়া তাংসা সাংপাওয়াতা নাবিহা হাংপা কাহিংপা সেদ্রাংপামগা?24দিংঙাবিকো য়োওয়াই ন্যইমসা ন্যায় মোজো, আদো আজিপ্পা ন্যায় জো।”25আত্রংরাং য়রুশালেমকো ইচো নিহসো দিংঙাবিহা জাংয়ে, “আবিকো স্যাকো কেংওয়া দিংঙাহা ইরাং মোকোমগা?26কাং, ইহা তাংসাকো নাগাইতা য়্যইদিংয়ো, আদো হাংসুরে ইকো তোইতাহা হাইরে জাংমক্যইতো। ইহা সেংজাকো সেকেং ত্যাওয়া খ্রীষ্টগা তামসা য়োংকো মাটাবিহা আজিপ্পারাং ইহিংয়া সিদা চ্যইংগা?27আদো ইহা হানিসো লেমমে য়াংবি তাংসা গেমি নিও। খ্রীষ্ট লেপানুওয়া আকুহা হানিসো লেকোমে তাওয়া হাংসুরে সিদা মোচ্যইরোওয়া।”28ইশুহা দেমসাতা ঝিপাদিংনুওয়া আকুহা তাংসা হিংক্যইপা জাংয়ে, “নাবিহা কাহিংয়া আজিপ্পারাং নাইমগা? কাহা হানিসো লেমমে, আকুহা নাবিহা আজিপ্পারাং গেমগা? কাহা আপনিকো ইচ্ছাসো লেওয়া মোকো, কাহিং নিংপুওয়াহা আজিপ্পা নিও, আদো নাবিহা আকুহিংয়া মানাইতো।29আদো কাহা আকুহিংয়া নাইমগা, হাংপাতানাহা কাহা আকোসোরাং লেমগা। আকুরাং কাহিংয়া নিংপুমগা।”30ই হিংমসা আবিহা ইশুহিং প্যইকো কেংয়ে, আদো হাংসুরে আকুহিংয়া প্যইমক্যইতো, হাংপাতানাহা ইশুকো সময়হা মাদেয়োংয়াংমি।31আকু উইসে দিংঙাকো প্যাকোতা নিওয়া লেরা দিংঙাবিহা আকুহিংয়া দেংয়ে আসা আবিহা জাংয়ে, “হাত্রং খ্রীষ্ট লে, আত্রংহা আকুহা ই দিংঙারোমা সিয়োপা আআংপেপেচপুওয়া কামবি জোকো চুকোগাসা?”32উইসে দিংঙাবিহা ইশুকো নুওয়াং ল্যাসুদিংওয়া ফরিসিবিহা হিংয়ে। আকো সোতা ফরিসি আসা মাটা পাউবিহা হুইসুমসা ইশুহিং প্যইকো দেমসাহিং খুইওয়া সিপাইবিহিং নিংপুয়ে।33ইশুহা জাংয়ে, “নেহা কা আম্যই চোইপা নাবিহিংপা য়ুংরোওয়া, আসা আকো নোইতাহা কাহিং নিংপুওয়াকোতা কা হোপুরোওয়া।34আত্রংহা নাবিহা কাহিং মোরোওয়া, আদো মোদোরোওয়া, হাংপাতানাহা কা হোওয়াতা নাবিহা ওয়াংমক্যইরোওয়া।”35ই হিংমসা য়হুদি মাটাবিহা তাইবিলারাই জাংসুয়ে, “ই দিংঙাহা হাংতা হ্যাকো কেংদাংমে, আসা য়াংবিহা ইহিংয়া মোদোসুকোমে? ইহা গ্রিকবিকো প্যাকোতা হিংচ্যাইবিরিপা য়ুংওয়া য়হুদিবিকোতা হোমসা গ্রিকবিহিং ঝিপাকোতুং?36‘নাবিহা কাহিং মোরোওয়া, আদো মোদোরোওয়া, হাংপাতানাহা কা হোওয়া জায়গাতা নাবিহা হোমক্যইরোওয়া’?”37মানক্যাকো নোইস্যাকো আসা হাংসুরোমা এনতাওয়া দিনতাহা ইশুহা জামসা তাংসাহিং হিংক্যইপা জাংয়ে, “নাবিকো প্যাকোতা হাসে ইচো তি সেকেংপুওয়ানি, কুংতা ওয়াংমসা আংকো।38তাংজিকো হিগাতা জাংমি ত্যাবাপা কাহিং দেংওয়া দিংঙাবিকো তুংসিংসোহা সাদি পিচাওয়া জোরাবি বাংরোওয়া।”39ই নুওয়াংহা ইশুহা আপনিকো তোইতা দেংওয়াবিকো মুংচাওয়া পবিত্র লাংবেকো নুওয়াং জাংমগা, হাংপাতানাহা আত্রং চোইপা ইশুহা লোডিংবাতা মোহোয়াংওয়াকো সোতা সেংজাহা পবিত্র লাংবে মিনিংপুয়াংমি।40ইশুকো নুওয়াং হিংমসা উইসে দিংঙাকো প্যাকোসো লেরা দিংঙাবিহা জাংসুয়ে, “ই দিংঙাহা আজিপ্পারাং সেংজাকো য়াংবিকোতা নিংপুদাংওয়া অগমবক্তাগা।”41লেরাবিহা জাংসুয়ে, “ইহা সেংজাকো সেকেং ত্যাওয়া খ্রীষ্ট” আদো লেরাহা জাংসুয়ে, “খ্রীষ্টহা গালীলসো লেকোগাসা?42খ্রীষ্টহা দাউদকো জিরিসো লেরোওয়া, আসা দাউদকো লোইকো বেথলেহেমতারাং কেরোওয়া তামসা তাংজিকো হিগাতা লাওয়া মাতাংগা?”43আকো সোতা দিংঙাবিহা নিদ্যা জিংমসা ওয়েংসপুয়ে।44লেরাহা আকুহিং প্যইসুকো কেংয়ে, আদো হাংসুরে আকো তোইতা খুই ওইমক্যইতো।45ইশুহিং প্যইকো নিংপুওয়া দেমসাকো সিপাইবিহা এপারাং লারেয়ে। ফরিসি আসা মাটা পাউবিহা আবিহিং উইয়ে, “নাবিহা হাংপা ইশুহিংয়া প্যইপামসা মাপারামগা?”46সিপাইবিহা জাংয়ে, “আকো নুওয়াং হিংনুওয়া কাবিহা আআংপেপেচপুনা। কাবিহা এপাজিংওয়া নুওয়াংহা হাত্রংরে মাহিংয়াংমি।”47ফরিসিবিহা জাংয়ে, “নাবিরে আকো নুওয়াংতা দেংচপুংগা?48কাবিকো মাটা পাউবি আসা ফরিসিবিকো প্যাকোতা আকুহিংয়া হাংসু দেংমি নিংগা?49উইসে দিংঙাবিহা মোসাকো লিংপাং মেগেমগা, আদো আবিকো তোইতাহা সেংজাকো লেইসাওয়া হুইনতেমি নিও।”50আউতা ফরিসিবিকো প্যাকোতা নিওয়া লিসুং ইশুহিং দোসপাকো হোওয়া নিকোদোমেসহা জাংয়ে,51“মোকোয়ে, ই দিংঙাহা হাং জোদিংমে তাওয়া এনতাপা মোকোইপা দোষ তিংপাকো য়াংবিহিংয়া লিংপাংরে মিচা?”52আদো আবিহা জাংসুয়ে, “নাতিরে গালীলিগা? তাংজিকো হিগা এনতাপা পড়াই আসা নাতিহা গেরোওয়া, গালীলসোহা হাংসুরে অগমবক্তা মেলেরোওয়া।”53[আকো নোইতাহা আবিহা তাংসা আপনি আপনিকো সাতা লাকাপুয়ে।
The Seed Company