য়হুন্না5
1সাইয়ু নিহয়ুকো নোইতাহা য়হুদিবিকো মানক্যা দেয়োংয়ে আসা ইশুহা য়রুশালেমতা হোয়ে।2য়রুশালেম শহরকো নাপোতা হোওয়া লুকা মিং নিওয়া লাপুং নিমি। আকো আবেইতা ঙাচো লাঙাং নিওয়া দাব্রি নিমি। ই দাব্রিহিংয়া হিব্রু ক্যাতাহা বেথসেদা তামসা জাংমি।3আউতা উইসে হাইমবি আসা মিচো মাতিংওয়া, তেইমক্যইওয়া আসা খুই কোকোই চা সিওয়াবি গাওয়া নিচাংমি। [আবিহা হাত্রং দাব্রিকো তি য়াকোমে তামসা খুইসুচাংমি,4হাংপাতানাহা আম্যই আম্যইতা প্রভুকো ইচো পোইং লিতা লেমসা দাব্রিকো তিহিং য়াপাপিচাংমি। আত্রংহা তি য়াওয়া কোকোইত্তা নাগাইকো দাব্রিতা হোমবিহা হেপা জিংওয়া য়োংন্যা জিংদো সাংচাপুচামি।]5আউতাহা ইচো আত্রিস বর্ষাসো চা সিওয়া দিংঙারে নিমি।6ইশুহা আকুহিংয়া আউতারাং জিংদিংওয়া তিংয়ে। আকুহা উইসে লোসো হাইমকোগুং তাওয়া সিদা চ্যইমসা ইশুহা আকুহিংয়া জাংয়ে, “নাতিহা সাংকো কেংমগা?”7আকু হাইওয়া দিংঙাহা জাংয়ে, “উটকেওয়া, তি য়াপানুওয়া কাহিংয়া দাব্রিতা পুরামসা নুউপাপিওয়া কুংহা হাংসু দিংঙারে মোতোনা। কা হোচাদাংওয়ারোমা নাগাই দোসরা হোপুনতেচাংমি।”8আত্রং ইশুহা জাংয়ে, “লো, আসা আপনিকো ন্যাগু য়োমসা তেই।”9আত্রংতারাং আকু দিংঙাহা সাংচাপুয়ে! আপনিকো ন্যাগু য়োমসা তেইয়ে!
আদো আকু দিনহা সানুকো দিন নিমি।10আকু তিংনুওয়া য়হুদি মাটাবিহা আকু সাংচাপুওয়া দিংঙাহিং জাংয়ে, “হিনিহা পবিত্র সানুকো দিনগা, নাতিহা ন্যাগু পুউকো লিংপাংহা মিচারোওয়া।”11আসা আকুহা জাংয়ে, “হাংসু কাহিং সাংপা, আকুরাং কাহিং ‘ন্যাগু পুমসা তেই’ তামসা জাংমি নিনা।”12আবিহা উইয়ে, “নাতিহিং ন্যাগু পুমসা তেই তাওয়া দিংঙা হাংসুগা?”13আদো আপনিহিং সাংপাওয়া দিংঙাহা হাংসুমে তামসা আকুহা মানাইয়াংমি। উইসে দিংঙা নিওয়াকো সোতা ইশুহা আউসো হ্যাপুনতেওয়া নিমি।14আকো নোইতা ইশুহা আকুহিংয়া দেমসাতা দোসুমসা জাংয়ে, “কাং, নাতিহা সাংচাপুমি নিও। নেহা পাপ মোজো, মোকোনাহা নাতিহা ইরোমা সিওপা কোইচ্যানেরোওয়া।”15আকো নোইতা আকু দিংঙাহা য়হুদিবিকো মাটাবিকোতা হোয়ে আসা আপনিহিং সাংপাওয়াকো মিংহা ইশু গুং, তামসা আবিহিং হিংপায়ে।16আকো সোতা ইশুহা ই কামহা সানুকো দিনতা জোওয়াকো সোতা য়হুদি মাটাবিহা আকুহিংয়া কোইচ্যাপাকো কেংয়ে।17আদো ইশুহা আবিহিংয়া এপা জাংমসা হিংপায়ে, “কুং আপাহা হাত্রং জিংদো কাম জোমগা, আকো সোতা কারে কাম জোরোওয়া।”18ই নুওয়াং হিংমসা য়হুদি মাটাবিহা ন্যাসারাং আকুহিং স্যাকো কেংয়ে, হাংপাতানাহা আকুহা সানুকো দিনতাহা কাম জোমতুকোগা তাওয়া লিংপাং মেংচে মায়াংপাতো, আদো সেংজাহিংয়া আপা তামসা আপনিহিংনাং সেংজা ত্যাবাপা নোমি নিও।19ইশুহা আবিহিং জাংয়ে, “আজিপ্পারাং, কা নাবিহিং জাংরোওয়া, চেংওয়া আপনিদাং হাইরে জোমক্যই, আদো আপা হাই জোওয়া তিং, আকু মেংচে জোরোওয়া, হাংপাতানাহা আপা হাই জো, চেংওয়ারে এপারাং জোমগা।20আপাহা চেংওয়াহিংয়া জেজেংপা জোমগা, আসা আপনিকো জোওয়া কামবি তাংসা চেংওয়াহিং তিংপামগা। ইরোমা টেরবো টেরবো কামবি আকুহা চেংওয়াহিং তিংপারোওয়া, আসা নাবিহা আআংপেপেচপুরোওয়া।21হেপা আপাহা সিপুমবিহিং লোপামে আসা আবিহিং সাদি পিচামে, এপারাং চেংওয়ারে হাংসুহিং ইচ্ছা জো, আকুহিংয়া হাত্রংরে মিসিওয়া সাদি পিচারোওয়া।22এসে মেংচে মোকো, আপা আপনিহা হাংসুকোরে ন্যায় মোজোমগা। দিংঙাবিহা আপাকো আদর জোমি ত্যাবাপা চেংওয়াহিংনে আদর জোকো তামসা আপাকো ন্যায় জোওয়া কামহা চেংওয়াহিংনাং স্যইপুমি নিও। চেংওয়াহিং আদর মোজোমবিহা, চেংওয়াহিং নিংপুওয়া আপাকোরে আদর মোজোরোওয়া।24“কা আজিপ্পারাং নাবিহিং জাংরোওয়া, হাংসু কুং নুওয়াং হিংমে, আসা কাহিং নিংপুওয়াকো তোইতা দেংমে, আকুহিংপা হাত্রংরে মিসিওয়া সাদি নিও। আকুহা ন্যায়তা মাজারোওয়া, আদো আকুহা সিপুওয়াসোহা সাদিতা সুইপুনতেওয়া নিরোওয়া।25আজিপ্পারাং কা নাবিহিং জাংরোওয়া, আকু সময় দেয়োংদাংতেয়ো, আসা আকু সময়হা ইরাংগা, হাত্রং সিপুমবি সেংজাকো চেংওয়াকো আওয়াজ হিং, আত্রংহা হিংবিহা ঙারোরোওয়া,26হাংপাতানাহা হেপা আপা আপনিকোতা সাদি নিমমে, এপারাং আকুহা চেংওয়াহিংনে আপনিসোরাং সাদি পিচাকো ছুওয়া অধিকার পিচামি নিও।27আসা আকুহিংয়া ন্যায় পিচাকো চুওয়া অধিকাররে পিচামি নিও, হাংপাতানাহা আকুহা দিংঙাকো চেংওয়াগা।28নাবিহা আআংপেপেচপা মাজিংগে, হাংপাতানাহা সময় দেপানতেয়ো, হাত্রং তোম্যইতা নিমবি দিংঙাকো চেংওয়াকো আওয়াজ হিং,29আত্রংহা ঙারোরোওয়া, এনতাপা কাম জোমবিহা ঙারোমসা হাত্রংরে মিসিওয়া সাদি মুংচারোওয়া, আসা মেংতাপা কাম জোমবিহা ঙারোমসা দন্ড মুংরোওয়া।30“কা আপনিসোদাং হাইরে জোমক্যই, কা হেপা হিং, এপারাং ন্যায় জোরোওয়া। কুং ন্যায় আজিপ্পা নিও, হাংপাতানাহা কা কুং ইচ্ছাসো মোকো, আদো কাহিং নিংপুওয়াকো আপাকো ইচ্ছাসোরাং কাম জোরোওয়া।31“কা আপনিরাং কুং তোইতা গাওয়াই পিচানাহা আকু গাওয়াইহা আজিপ্পা মাজিং।32কুং বিষয়তা গাওয়াই পিচাওয়াহা ইচো নিও, আসা কা গেমি নিও, কুং বিষয়তা আকুমি গাওয়াই পিচানা আকু গাওয়াইহা আজিপ্পা জিংরোওয়া।33“য়হুদি মাটাবিহা নুওয়াং কোইকো আপনিকো দিংঙাবিহিং বাপ্তিস্মা পিচাওয়া য়হুন্নাকোতা নিংপুয়ে আসা আকুহা আবিহিংয়া আজিপ্পাকো গাওয়াই পিচায়ো।34কুং সোতা দিংঙাবিকো গাওয়াই জিংনেরো তাওয়া মোতো, আদো নাবিকো উদ্ধার জিংকো তামসা কাহা ই নুওয়াং জাংমগা।35য়হুন্নাহা লারাইওয়া আসা হাহাইওয়া দিব্রি ত্যাবাপা নিমগা, আসা নাবিহা আকো হাহাইওয়াতা আম্যই চোইপা গাগ্রুসুকো কেংয়ো।36“আদো কাহিংপা হানি গাওয়াইনি, আকুহা য়হুন্নাকোরোমা টেবো নিও, হাংপাতানাহা হানি কাম জোকো আপাহা কাহিং পিচামিনি, আকু কামহা কা জোদিংমি নিও, আসা আপাহা কাহিং নিংপুমগা তামসা আকু আআংপেপেচপুওয়া কামবিরাং কুং তোইতা গাওয়াই পিচাদিংমি নিও।37কাহিং নিংপুওয়া আপা আপনিরাং কুং তোইতা গাওয়াই পিচামি নিও। আদো নাবিহা আকো আওয়াজহা হাত্রংরে মাহিংয়াংতো, আসা আকো য়ুওয়াইরে হাত্রংরে মাতিংয়াংতো।38নাবিহা আকো য়্যইদিহিংয়া তুংসিংতা মেএমগা, হাংপাতানাহা হাংসুহিং আকুহা নিংপুমিনি, নাবিহা আকো তোইতা মাদেংমগা।39তাংজিকো হিগাতা হাত্রংরে মিসিওয়া সাদি নিও তামসা, নাবিহা আউতা মোমগা, আদো কুং তোইতা গাওয়াই পিচাওয়ারাং তাংজিকো হিগাগা।40আদো নাবিহা হাত্রংরে মিসিওয়া সাদি মুংচাকো কুংতা মাওয়াংমগা।41“কাহা দিংঙাবিকোসো পিচাওয়া তাচাওয়া মোওয়া মোকো।42আদো নাবিকো তুংসিংতাহা সেংজাহিং জেজেংওয়া মোতো তামসা কা গেদিংয়ো।43কা কুং আপাকো অধিকার পামসা লেমি নিও, আদো নাবিহা কাহিংয়া নাবিকোতা লেই তামক্যইতো, আদো আপনিবিকো অধিকার পামসা লেমবিহিংয়া নাবিহা লেইতাহে।44নাবিহা ইচোহা ইচোসো তাচাওয়া মেংচে মোমগা। আদো ইচো মেংচে সেংজাসো মুংচাওয়া তাচাওয়াহিংয়া ইচ্ছা মেএনাহা, হেপা নাবিহা কাহিংয়া দেংকো চুকোগাসা?45“কা নাবিহিংয়া আপাকো নাগাইতা দোষ তিংপারো তাওয়া মোনোগ্যই। আদো নাবিকো আশা জোওয়া মোসারাং নাবিহিংয়া দোষ তিংপারোওয়া।46আজিপ্পারাং নাবিহা মোসাহিং দেংনাহা কাহিংনে দেংকোগা, হাংপাতানাহা আকুহা কুং বিষয়তা লাতেমি নিমগা!47আদো নাবিহা আকো লাওয়া নুওয়াংহিংনাং মেদেংনাহা, কুং জাংওয়া নুওয়াংবিতাহা হেপা দেংকো চুকোগাসা?”
আদো আকু দিনহা সানুকো দিন নিমি।10আকু তিংনুওয়া য়হুদি মাটাবিহা আকু সাংচাপুওয়া দিংঙাহিং জাংয়ে, “হিনিহা পবিত্র সানুকো দিনগা, নাতিহা ন্যাগু পুউকো লিংপাংহা মিচারোওয়া।”11আসা আকুহা জাংয়ে, “হাংসু কাহিং সাংপা, আকুরাং কাহিং ‘ন্যাগু পুমসা তেই’ তামসা জাংমি নিনা।”12আবিহা উইয়ে, “নাতিহিং ন্যাগু পুমসা তেই তাওয়া দিংঙা হাংসুগা?”13আদো আপনিহিং সাংপাওয়া দিংঙাহা হাংসুমে তামসা আকুহা মানাইয়াংমি। উইসে দিংঙা নিওয়াকো সোতা ইশুহা আউসো হ্যাপুনতেওয়া নিমি।14আকো নোইতা ইশুহা আকুহিংয়া দেমসাতা দোসুমসা জাংয়ে, “কাং, নাতিহা সাংচাপুমি নিও। নেহা পাপ মোজো, মোকোনাহা নাতিহা ইরোমা সিওপা কোইচ্যানেরোওয়া।”15আকো নোইতা আকু দিংঙাহা য়হুদিবিকো মাটাবিকোতা হোয়ে আসা আপনিহিং সাংপাওয়াকো মিংহা ইশু গুং, তামসা আবিহিং হিংপায়ে।16আকো সোতা ইশুহা ই কামহা সানুকো দিনতা জোওয়াকো সোতা য়হুদি মাটাবিহা আকুহিংয়া কোইচ্যাপাকো কেংয়ে।17আদো ইশুহা আবিহিংয়া এপা জাংমসা হিংপায়ে, “কুং আপাহা হাত্রং জিংদো কাম জোমগা, আকো সোতা কারে কাম জোরোওয়া।”18ই নুওয়াং হিংমসা য়হুদি মাটাবিহা ন্যাসারাং আকুহিং স্যাকো কেংয়ে, হাংপাতানাহা আকুহা সানুকো দিনতাহা কাম জোমতুকোগা তাওয়া লিংপাং মেংচে মায়াংপাতো, আদো সেংজাহিংয়া আপা তামসা আপনিহিংনাং সেংজা ত্যাবাপা নোমি নিও।19ইশুহা আবিহিং জাংয়ে, “আজিপ্পারাং, কা নাবিহিং জাংরোওয়া, চেংওয়া আপনিদাং হাইরে জোমক্যই, আদো আপা হাই জোওয়া তিং, আকু মেংচে জোরোওয়া, হাংপাতানাহা আপা হাই জো, চেংওয়ারে এপারাং জোমগা।20আপাহা চেংওয়াহিংয়া জেজেংপা জোমগা, আসা আপনিকো জোওয়া কামবি তাংসা চেংওয়াহিং তিংপামগা। ইরোমা টেরবো টেরবো কামবি আকুহা চেংওয়াহিং তিংপারোওয়া, আসা নাবিহা আআংপেপেচপুরোওয়া।21হেপা আপাহা সিপুমবিহিং লোপামে আসা আবিহিং সাদি পিচামে, এপারাং চেংওয়ারে হাংসুহিং ইচ্ছা জো, আকুহিংয়া হাত্রংরে মিসিওয়া সাদি পিচারোওয়া।22এসে মেংচে মোকো, আপা আপনিহা হাংসুকোরে ন্যায় মোজোমগা। দিংঙাবিহা আপাকো আদর জোমি ত্যাবাপা চেংওয়াহিংনে আদর জোকো তামসা আপাকো ন্যায় জোওয়া কামহা চেংওয়াহিংনাং স্যইপুমি নিও। চেংওয়াহিং আদর মোজোমবিহা, চেংওয়াহিং নিংপুওয়া আপাকোরে আদর মোজোরোওয়া।24“কা আজিপ্পারাং নাবিহিং জাংরোওয়া, হাংসু কুং নুওয়াং হিংমে, আসা কাহিং নিংপুওয়াকো তোইতা দেংমে, আকুহিংপা হাত্রংরে মিসিওয়া সাদি নিও। আকুহা ন্যায়তা মাজারোওয়া, আদো আকুহা সিপুওয়াসোহা সাদিতা সুইপুনতেওয়া নিরোওয়া।25আজিপ্পারাং কা নাবিহিং জাংরোওয়া, আকু সময় দেয়োংদাংতেয়ো, আসা আকু সময়হা ইরাংগা, হাত্রং সিপুমবি সেংজাকো চেংওয়াকো আওয়াজ হিং, আত্রংহা হিংবিহা ঙারোরোওয়া,26হাংপাতানাহা হেপা আপা আপনিকোতা সাদি নিমমে, এপারাং আকুহা চেংওয়াহিংনে আপনিসোরাং সাদি পিচাকো ছুওয়া অধিকার পিচামি নিও।27আসা আকুহিংয়া ন্যায় পিচাকো চুওয়া অধিকাররে পিচামি নিও, হাংপাতানাহা আকুহা দিংঙাকো চেংওয়াগা।28নাবিহা আআংপেপেচপা মাজিংগে, হাংপাতানাহা সময় দেপানতেয়ো, হাত্রং তোম্যইতা নিমবি দিংঙাকো চেংওয়াকো আওয়াজ হিং,29আত্রংহা ঙারোরোওয়া, এনতাপা কাম জোমবিহা ঙারোমসা হাত্রংরে মিসিওয়া সাদি মুংচারোওয়া, আসা মেংতাপা কাম জোমবিহা ঙারোমসা দন্ড মুংরোওয়া।30“কা আপনিসোদাং হাইরে জোমক্যই, কা হেপা হিং, এপারাং ন্যায় জোরোওয়া। কুং ন্যায় আজিপ্পা নিও, হাংপাতানাহা কা কুং ইচ্ছাসো মোকো, আদো কাহিং নিংপুওয়াকো আপাকো ইচ্ছাসোরাং কাম জোরোওয়া।31“কা আপনিরাং কুং তোইতা গাওয়াই পিচানাহা আকু গাওয়াইহা আজিপ্পা মাজিং।32কুং বিষয়তা গাওয়াই পিচাওয়াহা ইচো নিও, আসা কা গেমি নিও, কুং বিষয়তা আকুমি গাওয়াই পিচানা আকু গাওয়াইহা আজিপ্পা জিংরোওয়া।33“য়হুদি মাটাবিহা নুওয়াং কোইকো আপনিকো দিংঙাবিহিং বাপ্তিস্মা পিচাওয়া য়হুন্নাকোতা নিংপুয়ে আসা আকুহা আবিহিংয়া আজিপ্পাকো গাওয়াই পিচায়ো।34কুং সোতা দিংঙাবিকো গাওয়াই জিংনেরো তাওয়া মোতো, আদো নাবিকো উদ্ধার জিংকো তামসা কাহা ই নুওয়াং জাংমগা।35য়হুন্নাহা লারাইওয়া আসা হাহাইওয়া দিব্রি ত্যাবাপা নিমগা, আসা নাবিহা আকো হাহাইওয়াতা আম্যই চোইপা গাগ্রুসুকো কেংয়ো।36“আদো কাহিংপা হানি গাওয়াইনি, আকুহা য়হুন্নাকোরোমা টেবো নিও, হাংপাতানাহা হানি কাম জোকো আপাহা কাহিং পিচামিনি, আকু কামহা কা জোদিংমি নিও, আসা আপাহা কাহিং নিংপুমগা তামসা আকু আআংপেপেচপুওয়া কামবিরাং কুং তোইতা গাওয়াই পিচাদিংমি নিও।37কাহিং নিংপুওয়া আপা আপনিরাং কুং তোইতা গাওয়াই পিচামি নিও। আদো নাবিহা আকো আওয়াজহা হাত্রংরে মাহিংয়াংতো, আসা আকো য়ুওয়াইরে হাত্রংরে মাতিংয়াংতো।38নাবিহা আকো য়্যইদিহিংয়া তুংসিংতা মেএমগা, হাংপাতানাহা হাংসুহিং আকুহা নিংপুমিনি, নাবিহা আকো তোইতা মাদেংমগা।39তাংজিকো হিগাতা হাত্রংরে মিসিওয়া সাদি নিও তামসা, নাবিহা আউতা মোমগা, আদো কুং তোইতা গাওয়াই পিচাওয়ারাং তাংজিকো হিগাগা।40আদো নাবিহা হাত্রংরে মিসিওয়া সাদি মুংচাকো কুংতা মাওয়াংমগা।41“কাহা দিংঙাবিকোসো পিচাওয়া তাচাওয়া মোওয়া মোকো।42আদো নাবিকো তুংসিংতাহা সেংজাহিং জেজেংওয়া মোতো তামসা কা গেদিংয়ো।43কা কুং আপাকো অধিকার পামসা লেমি নিও, আদো নাবিহা কাহিংয়া নাবিকোতা লেই তামক্যইতো, আদো আপনিবিকো অধিকার পামসা লেমবিহিংয়া নাবিহা লেইতাহে।44নাবিহা ইচোহা ইচোসো তাচাওয়া মেংচে মোমগা। আদো ইচো মেংচে সেংজাসো মুংচাওয়া তাচাওয়াহিংয়া ইচ্ছা মেএনাহা, হেপা নাবিহা কাহিংয়া দেংকো চুকোগাসা?45“কা নাবিহিংয়া আপাকো নাগাইতা দোষ তিংপারো তাওয়া মোনোগ্যই। আদো নাবিকো আশা জোওয়া মোসারাং নাবিহিংয়া দোষ তিংপারোওয়া।46আজিপ্পারাং নাবিহা মোসাহিং দেংনাহা কাহিংনে দেংকোগা, হাংপাতানাহা আকুহা কুং বিষয়তা লাতেমি নিমগা!47আদো নাবিহা আকো লাওয়া নুওয়াংহিংনাং মেদেংনাহা, কুং জাংওয়া নুওয়াংবিতাহা হেপা দেংকো চুকোগাসা?”
The Seed Company