য়হুন্না3
1নিকোদোমাস মিং নিওয়া ইচো য়হুদিহা জোংসুওয়া সাকো মাটা দিংঙাবিকো প্যাকোকো ইচো দিংঙা নিমি। আকুহা ফরিসি নিমি।2সাইয়ু লিসুং আকুহা ইশুকোতা ওয়াংমসা জাংয়ে, “উটকেওয়া, নাতিহা সেংজাকোসো লেমগা তামসা কাবিহা দেংরোওয়া। ই নুওয়াং কাবি সিদা চ্যইমি নিও। সেংজামি নাতিহিং মায়ুজ্রুনাহা হাংসুরে নাকো জোমি ত্যাবাপা আআংপেপেচপুওয়া সেকো কামবিহা জোকো মাচু।”3ইশুহা জাংয়ে, “আজিপ্পারাং কা নাতিহিং জাংরোওয়া, চুবে জিংমসা মেকেনু চোইপা হাংসুরে সেংজাকো রাজ্যহিং তিংমক্যইরোওয়া।”4নিকোদোমাসহা জাংয়ে, “ওয়ারাংপুনতেওয়া দিংঙাহা ন্যাসারাং হেপা কেকো চুকোগা? আকুহা ন্যাসারাং আয়ুসো কেকো ছুকোগাসা?”5ইশুহা জাংয়ে, “আজিপ্পারাং কা নাতিহিং জাংরোওয়া, তি আসা লাংবেসো মেকেনু চোইপা হাংসুরে সেংজাকো রাজ্যতা হোকো মাছু।6জুপাসো কেওয়াহা জুপারাংগা আসা লাংবেসো কেওয়াহা লাংবেরাংগা।7নাতিহা চুবে জিংমসা কেনেরো তাওয়া নুওয়াংতা আআংপেপেচপা মাজিংগে।8বিংঙাহা হাংতা হ্যাদাংপা তিং, আউতারাং ভিমগা। নাতিহা বিংঙা ভিওয়াহা হিংমগা, আদো হানিসো ওয়াংমে আসা হাংতা হামে, নাবিহা সিদা মোচ্যইমগা। লাংবেসো কেওয়া দিংঙাবিরে এপারাং জিংমগা।”9নিকোদোমাসহা উইয়ে, “ইহা হেপা জিংকো চুকোগা?”10ইশুহা জাংয়ে, “নাতিহা ইস্রাইলিবিকো টেবো উটকেওয়াগা, আদো ই নুওয়াং মোকোইমগা?11আজিপ্পারাং কা নাতিহিংয়া জাংরোওয়া, কাবিহা গেওয়া নুওয়াংকো তোইতা য়্যইমগা আসা আপনিকো তিংওয়া নুওয়াংরাং হিংপামগা। আদো নাবিহা কাবিকো জাংওয়া নুওয়াংবিহা মাদেংমগা।12নাবিহা কা ই বাসিমতিতা নিওয়া নুওয়াংরাং য়্যইদিংদো নাবিহা মাদেংনাহা, মাতিংওয়া লোডিংবাকো নুওয়াং কা য়্যইনুওয়া নাবিহা হেপা দেংকো চুকোগাসা?13লোডিংবাসো লেওয়া দিংঙাকো চেংওয়া ল্যামসা লেরা হাংসুরে লোডিংবাতা হোমসা মালারেয়াংতো।14ইস্রাইলিবি চিচ্চোওয়া জায়গাতা নিনু মোসাহা পিতলকো পুইয়া বানাইমসা কেংপ্রাতা তোরোইমসা এমি ত্যাবাপা দিংঙাকো চেংওয়ারে তোরোইচপুনেরোওয়া।15এপারাং আকো তোইতা দেংমবিহা তাংসারাং হাত্রংরে মিসিওয়া সাদি মুংচারোওয়া।”16সেংজাহা বাসিমতিহিং সিওপা জেজেংপা জোওয়াকো সোতারাং, আকুহা আপনিকো ইচো চিংওয়া চেংওয়াহিং পিচায়ে, আকো সোতা সেংজাকো চেংওয়াকো তোইতা দেংওয়াবিহা হাংসুরে মাসি, আদো আবিহা হাত্রংরে মিসিওয়া সাদি মুংচারোওয়া।17সেংজাহা আপনিকো ইচো চিংওয়া চেংওয়াহিং বাসিমতিকো দিংঙাবিহিং দোষ তিংপাকো মোকো, আদো আবিহিং আকোসো বাচাইকো তামসা নিংপুমগা।18নেহা সেংজাকো ইচো চিংওয়া চেংওয়াকো তোইতা দেংওয়াবিহা হাংসুরে দোষি মাজিং, আদো আকো তোইতা মাদেংওয়াবিহা নাগাইসোরাং দোষি জিংপুমি নিও, হাংপাতানাহা আবিহা সেংজাকো ইচো চিংওয়া চেংওয়াহিং মাদেংয়াংতো।19দোষহা এপা হুইরোওয়া, হাহাইওয়াহা বাসিমতিতা লেমি নিও, আসা দিংঙাবিকো কাম মেংতাপা নিমকো সোতা আবিহা হাহাইওয়াহিংরোমা নাঘিইওয়াহিং জেজেংমগা।20হাংপাতানাহা মেংতাপা কাম জোওয়া তাংসাহা হাহাইওয়াহিংয়া আচকাপা জোমগা। হাহাইওয়াতা আবিকো জোওয়া কামবিহা তিংকোদোওয়া তামসা চুসুংমসা আবিহা হাহাইওয়াতা মায়োংমগা।21আদো আজিপ্পা নুওয়াং মানেওয়া দিংঙাবিহা হাহাইওয়াতা ওয়াংরোওয়া আসা এপারাং আকো কামহা সেংজাতা জোয়ে তাওয়া নুওয়াংহা চোসোপা তিংরোওয়া।22আকো নোইতাহা ইশুহা আপনিকো য়োংতোংবিহিংপা য়হুদিয়া লোইকো লুংবিতা হোয়ে আসা আম্যই চোইপা আবিহিংপারাং আউতারাং গায়ে আসা দিংঙাবিহিং বাপ্তিস্মা পিচায়ে।23য়হুন্নারে সালিমকো আবেইতা এনোন তাওয়া জায়গাতা বাপ্তিস্মা পিচাদিংমি, হাংপাতানাহা আউতা উইসে তি নিমি। আউতারে দিংঙাবিহা বাপ্তিস্মা লাংরেকো লেচাংমি।24আত্রং চোইপা য়হুন্নাহিংয়া জেলতা মাসুংয়াংমি।25তি হুমসা চোসোপা জিংওয়া নুওয়াংকো তোইতা য়হুন্নাকো য়োংতোংবিহা ইচো য়হুদিহিংপা উইসু জাংসুদাংয়ে।26আবিহা য়হুন্নাকোতা ওয়াংমসা জাংয়ে, “ও উটকেওয়া, য়র্দন নুব্যা নিনুওয়া নাতিহিংপা ইচো দিংঙা নিদিংমি। নাতিহা কাবিহিংয়া আকো নুওয়াং জাংমি নিমগা। নেহা আকুরাং বাপ্তিস্মা পিচাদিংয়ো আসা তাংসা আকোতারাং হোদিংয়ো।”27য়হুন্নাহা জাংয়ে, “সেংজামি লোডিংবাসো মিচানাহা দিংঙাহা হাইরে মামুংমগা।28‘কা মুক্তি পিচাওয়া খ্রীষ্ট মোকোমগা, কাহা আকো নাগাই নিংপুওয়া দিংঙা মেংচেগা’ তামসা কুং জাংওয়া নুওয়াং নাবিহা আপনিরাং হিংমি নিও।29হাংসুহিংপা বিয়ৌলিনি, আকুরাং বিয়ৌলাগা। বিয়ৌলাহিংপা আবেইতা জাওয়া ব্যারোহা বিয়ৌলাকো ক্যা হিংমসা গাগ্রুরোওয়া। আকো সোতা নেহা কুং ই গাগ্রুওয়াহা তাংসা জিংমি নিও।30আকুহা নাগাই গ্যইপুমসা হোনেরোওয়া, আদো কাহা নুনুই জিংতেনেরোওয়া।”31লোডিংবাসো লেওয়াহা তাংসারোমা টেবোগা। বাসিমতিতা কেওয়া দিংঙাবিহা বাসিমতিকোরাংগা আসা বাসিমতিকো নুওয়াংবি য়্যইমগা। আদো লোডিংবাসো লেওয়াহা তাংসারোমা টেবোগা।32আকুহা আপনিকো তিংওয়া আসা হিংওয়া নুওয়াংরাং জাংমগা, আদো আকো জাংওয়া নুওয়াংহা হাংসুরে মাদেংমগা।33আদো আকো জাংওয়া নুওয়াং দেংওয়াবিহা সেংজাহা আজিপ্পারাংগুং তামসা প্রমাণ পিচামগা।34হাংপাতানাহা হাংসুহিং সেংজা নিংপু, আকুহা সেংজাকো নুওয়াংরাং য়্যইমগা, হাংপাতানাহা সেংজাহা নোকো মাছুক্যইপা পবিত্র লাংবে পিচামগা।35সেংজাহা আপনিকো চেংওয়াহিংয়া জেজেংপা জোমগা আসা তাংসা নুওয়াং আকো খুইতারাং এপিমি নিও।36সেংজাকো চেংওয়াহিং দেংওয়াবিকোতাহা হাত্রংরে মাসিওয়া সাদি নিও, আদো চেংওয়াকো জাংওয়া মাহিংবিকোতাহা হাত্রংরে সাদি মায়ুং। আদো সেংজাকো সেদ্রাংহা আকো তোইতা হুইরোওয়া।
The Seed Company