য়হুন্না2
1আকো সানিহয়ু নোইতাহা গালীল জায়গাকো কানা শহরকো ইচো সাতা বিয়ৌ নিমি। ইশুকো আয়ুহা আকু বিয়ৌতা হোমি নিমি।2ইশু আসা আকো য়োংতোংবিহিংনে আকু বিয়ৌতা মোউমি নিমি।3আকু বিয়ৌতা পিচাওয়া আংগুরকো য়ু মাচানতেওয়াকো সোতা ইশুকো আয়ুহা ইশুহিং জাংয়ে, “য়ুহা মাচানতেমকো গুং।”4ই হিংমসা ইশুহা জাংয়ে, “আয়ো, কা হাং জোনেকোমে, নাতিহা কাহিংয়া জাংমঘ্যই, হাংপাতানাহা কুং কাম জোওয়া সময়হা নেচোইপা মাজিংয়াংনা।”5আকো নোইতা ইশুকো আয়ুহা ডেইয়াবিহিং জাংয়ে, “ইশু হাই জাং, নাবিহা আকুরাং জো।”6আকো আবেইতা লুংটুই ছুইপামসা বানাইওয়া তুয়ো জিয়ো নিমি। আকু জিয়োবিতাহা তি ওয়্যাইনাহা একশো একশো লিটার হোপুকো বেপা নিমি। এপাজিংওয়া জিয়োবিহা য়হুদিবিহা আপনিহিং সাংতাংওয়া কামতা নোপাচাংমি।7ইশুহা ডেইয়াবিহিংয়া জাংয়ে, “ই তাংসা জিয়োবিতা তি মেইপা।”ডেইয়াবিহা জিয়োবিতা তি মেইপায়ে। আবিহা আকু তাংসা জিয়োবিতা তি মেইপায়ে।8আকো নোইতা আকুহা জাংয়ে, “ই আস্যস্যই ওয়্যামসা বিয়ৌকো মাটা দিংঙাহিং আংকো সাতু।” আবিহা ইশুকো জাংমেপা জোয়ে।9আসা মাটাহা আকু তি আংনুওয়া আংগুরকো য়ু জিংপুনতেমি নিমি, আদো আকু য়ুহা হানিসো পামে, আকু নুওয়াংহা আকু মাটা দিংঙাহা সিদা মোচ্যইয়াংমি। আকুহা সোংকো ওয়াংওয়া ডেইয়া মেংচে গেওয়া নিমি। বিয়ৌকো মাটাহা বিয়ৌলাহিং মোউমসা জাংয়ে,10“লেরা দিংঙাবিহা নাগাইহা এনতাওয়া আংগুরকো য়ুবি আংকো পিচামগা আসা ওয়াংওয়াবিহিং উইসে য়ু আংপুনতেনুকো নোইতা মেংচে চেপপেদাংওয়া য়ু পেয়াংমগা, আদো নাতিহা নেচোইপা হানিরোমা এনতাওয়া য়ু লাপামসা এমি নিমকোগুং।”11এপারাং গালীলকো কানা শহরতা ই আআংপেপেচপুওয়া কামতা ইশুহা সেংজাকো মহিমা তিংপাওয়া হানিরোমা নাগাইহা আউতারাং নিমগা। আসা আকো য়োংতোংবিহা আকো তোইতা দেংয়ে।12আকো নোইতা ইশু, আকো আয়ু, এ আসা য়োংতোংবিহা কোর্ফরনহুম তাওয়া শহরতা হোয়ে আসা সাইয়ু নিহয়ু চোইপা আউতারাং য়ুংয়ে।13য়হুদিবিকো নিস্তার মানক্যা দেয়োংদাংতেওয়া নিমি। আত্রংহা ইশুহা য়রুশালেমতা হোয়ে।14আকুহা দিংঙাবিহিংয়া দেমসাতা পোরোই, লুকা, পিকাবি পিচোইদিংওয়া আসা ন্যাস্যাবি সোদিংওয়া তিংয়ে।15ই তিংমসা ইশুহা সাটা বানাইমসা দেমসাতা নিওয়া পিকাবি, লুকাবি, তাংসাহিং ঘিপুয়ে, ন্যাস্যা সোমবিকো ন্যাস্যাবি গাপুয়ে আসা টেবিলবি দিরাইপাপুয়ে।16ইশুহা পোরোই পিইচোইমবিহিং য়েংমসা জাংয়ে, “নাবিকো সোংসাবি ইসো পুচা। কুং আপাকো সাহিংয়া নাবিহা পিইচাওয়া চোইচাওয়া হাতিকো জায়গা বানাইচা মোমুং।”17আত্রংহা আকো য়োংতোংবিহা তাংজিকো হিগাতা লাওয়া ই নুওয়াংবি নোয়ে, “ও সেংজা! নাকো সাকো সোতা কুং জোদাংবেওয়া কুং তুংসিং নাপোতা মে ত্যাবাপারাং লারাইদিংয়ো।”18আদো য়হুদি মাটাবিহা ইশুহিং জাংয়ে, “নাকোতা এপা জোকো অধিকার নিংগা? নিদানাহা কাবিহিং হাইক্রি আআংপেপেচপুওয়া কামবি তিংপাপি? আসা কাবি গেরোওয়া”19ইশুহা আবিহিংয়া জাংয়ে, “ই দেমসাহিং য়্যাপুই, আসা কা ইহিংয়া সাসুংয়ুংতা বানাইরোওয়া।”20আত্রংহা আবিহা জাংয়ে, “নাতিহা সাসুংয়ুংতা লোপাকো চুকোগাসা? ই দেমসা বানাইকোহা নিহকাইসো লো টুনিং ঘ্যইয়ো!”21আদো ইশুকো জাংওয়া দেমসাকো নুওয়াংহা আকো আপনিকো জুপাকো তোইতা জাংওয়া নিমি।22হাত্রং ইশু সিপুনতেনুকো নোইতাহা ঙারো, আত্রংহা আকো য়োংতোংবিহা ইশুকো জাংওয়া ই নুওয়াংহিং নোয়ে। আবিহা তাংজিকো হিগা আসা ইশুকো জাংওয়া নুওয়াংতা দেংয়ে।23নিস্তার মানক্যাকো সময়তা ইশু য়রুশালেমতা নিদিংনুওয়া আকুহা আআংপেপেচপুওয়া কামবি জোয়ে। ই তিংমসা উইসে দিংঙাবিহা আকো তোইতা দেংয়ে,24আদো ইশুহা আবিকো তোইতা দেংমক্যইতো, হাংপাতানাহা আকুহা তাংসা দিংঙাবিহিং এনতাপা নাইমি নিমি।25আকুহা দিংঙাকো তুংসিংকো নাপোকো নুওয়াংহিং গেদিংওয়াকো সোতা হাংসুরে আকুহিংয়া হাংসুহিংনে নাইপামঘ্যইতো।
The Seed Company