য়হুন্না17
1ই নুওয়াং জাংপুনতেনুকো নোইতা ইশুহা লোডিংবাতা ন্যইমসা পাচাইয়ে, “ও আপা, নেহা সময় দেয়োংতেয়ো। নাকো চেংওয়াহা নাকোরাং মহিমা তিংপাকো ছুকো তামসা আকুহিং মহিমা পিচা,2হাংপাতানাহা নাতিহা আকুহিংয়া তাংসা দিংঙাবিকো তোইতা অধিকার পিচামি নিও, আকো সোতারাং নাকো পিচাওয়া অধিকারহা আকুহা তাংসাহিং হাত্রংরে মিসিওয়া সাদি পিচাকো।3হাত্রংরে মিসিওয়া সাদি তাওয়াহা ইরাংগা, নাতি ইচো মেংচে আজিপ্পাকো সেংজাহিং আবিহা নাইকো, আসা নাকো নিংপুওয়া ইশু খ্রীষ্টহিংনে নাইকো।4নাতিহা কাহিং পিচাওয়া কামবিহা তাংসা জোমসা কাহা নাতিহিং তোরোইমি নিও।5নেহা ও আপা, নাতিহা বাসিমতিহিং দিংনুরোমা নাগাই নাতিহিংপা চিত্তা নিনু কাহিংপা হেপা মহিমানি, নাকো আবেইতা নিনু আকু মহিমারাং কাহিং পিচা।6“বাসিমতিসো নাতিহা কাহিং পিচাওয়া দিংঙাবিহিংয়া কাহা নাতিহিং নাইপামি নিও। আবিহা নাকোরাং নিমগা। আসা নাতিরাং কাহিং পিচামগা। আবিহা নাকো য়্যইদিহিং হিংমসা জোমি নিও।7নাতিহা কাহিং পিচাওয়া য়্যইদি আসা কামহা নাকোসোরাং লেমগা তামসা আকুহা আবিহা গেমি নিও।8হাংপাতানাহা নাকো ঝিপাওয়া কাহা আবিহিং পিচামি নিও, আসা আবিহা আকুহিংয়া হিংমসা জোকোরে জোদিংয়ো। কা আজিপ্পারাং নাকোসো লেমগা তাওয়া আবিহা কোইমি নিও। আকুরাং কাহিংয়া নিংপুমগা তাওয়া আবিহা দেংমি নিও।9“আবিকো সোতা কা পাচাইদিংয়ো, তাংসা বাসিমতিকো দিংঙাবিকো সোতাহা মোকো, আদো নাতিহা কাহিং পিচাওয়া দিংঙাবিকো সোতা মেংচে কা পাচাইদিংমি নিও, হাংপাতানাহা আবিহা নাকোরাংগা।10কাহিংপা নিওয়াহা তাংসা নাকোরাংগা আসা নাকোতা নিওয়ারে কুংরাংগা। আসা আবিকোসোহা কুং মহিমা জিংমি নিও।11কা নেহা নাকোতা ওয়াংপাদাংয়ো। কা সিওপা সময় চোইপা ই বাসিমতিতা মায়ুংরোওয়া, আদো ইবিহা ই বাসিমতিতা য়ুংরোওয়া। ও পবিত্র আপা, নাতিসো কা ইচো জিংমি ত্যাবাপা, আবিরে ইচো জিংকো তামসা নাতিহা কাহিং পিচাওয়া সে নিক্যইওয়া মিংসো আবিহিং জোগাইমসা এপি,12আবিহিংপা নিনুওয়া কাহা আবিহিংয়া নাকো মিংকো সে মুংমসা এনতাপা এহে। দাংপুনেওয়া দিংঙা ল্যামসা কাহা হাংসুহিংনে দাংকো মিচাতো। আদো আকু তাংজিকো হিগাতা লাওয়া য়্যইদি তাংসারাং পুরা জিংনেকোরাং নিমগা।13“আদো কা নেহা নাকোতা ওয়াংদাংয়ো আসা আবিকো তুংসিং কুং য়াংতাওয়াসো মেইপুকো তামসা কাহা ই নুওয়াংবি বাসিমতিতা নিনুরাং জাংমগা।14আবিহিংয়া নাকো ঝিপাওয়ারাং কা ঝিপায়ো আসা আবিহা কা ত্যাবাপা ই বাসিমতিকো মোকোমকো সোতা দিংঙাবিহা আবিহিংয়া আচকাপা জোদিংয়ো।15আবিহিংয়া বাসিমতিসো পুরাতু তামসা কাহা মাপাচাইরোওয়া, আদো আবিহিংয়া মেংতাওয়া জেসাংসো য়োইপি তামসা কা পাচাইদিংয়ো।16হেপা কা ই বাসিমতিকো মোকোমে, এপারাং আবিরে ই বাসিমতিকো মোকো।17আবিহিংয়া আজিপ্পাতা পবিত্র বানাইপি। নাকো য়্যইদিহা আজিপ্পারাংগা।18নাতিহা কাহিং বাসিমতিতা নিংপুমি ত্যাবাপা কারে আবিহিংয়া বাসিমতিতা নিংপুমি নিও।19আবিহা তাংসা সাদিহা নাকোতা ত্যইকো ছুকো তামসা কারে আপনিকো সাদি নাকোতা ত্যইদাংয়ো।20“কা ইবিকো সোতা মেংচে মোকো, আদো ইবিকো ঝিপাওয়া য়্যইদি হিংমসা কুং তোইতা দেংওয়াবিকো সোতারে পাচাইদিংমি নিও।21আবিহা তাংসা ইচো জিংকো ছুকো তামসা কাহা পাচাইদিংয়ো। ও আপা, নাতিহা কুংতা আসা কাহা নাকোতা জিংমসা য়াংবি ইচো জিংমি ত্যাবাপা আবিরে য়াংবিতা জিংমসা ইচো জিংকো ছুকো, আসা নাতিরাং কাহিংয়া নিংপুমগা তামসা বাসিমতিহা দেংকো ছুকো।22নাতিহা কাহিং হানি মহিমা পিচামি নিমে, আকু মহিমারাং কা নেহা আবিহিংনে পিচামি নিও, হেপা নাতিসো কা ইচোমে, এপারাং আবিরে ইচো জিংকো,23কা আবিকোতা আসা নাতিহা কুংতা নিও। এপারাং আবিরে ইচো তুংসিং জিংকো। ইসোরাং নাতিরাং কাহিং নিংপুমগা তাওয়া আসা নাতিহা কাহিং জেজেংপা জোমি ত্যাবাপা আবিহিংনে জেজেংপা জোরোওয়া তামসা বাসিমতিকো দিংঙাবি গেকো ছুকো।24“ও আপা, কা ইচ্ছা জোরোওয়া, নাতিহা কাহিং পিচাওয়াবিহা কা হাংতা নিবা কাহিংপারাং নিকো আসা নাতিহা কাহিং পিচাওয়া মহিমা আবিহা তিংকো ছুকো। হানি মহিমা নাতিহা বাসিমতি দিংনুরোমা নাগাইসোরাং কাহিং জেজেংমকো সোতা পিচামে।25“ও আজিপ্পা ন্যায় জোওয়া আপা, বাসিমতিকো দিংঙাবিহা নাতিহিংয়া মানাইতো, আদো কা নাতিহিংয়া নাইয়ো আসা নাতিরাং কাহিংয়া নিংপুমগা তামসা ইবিহা কোইরোওয়া।26কাহা নাকো মিংহা ইবিকোতা তিংপারেয়ে, আসা নাকো মিংহা হাত্রংদো ইবিকোতা তিংপাচাংরোওয়া, হানি জেজেংওয়াসো নাতিহা কাহিং জেজেংপা জোম্মে, আকুহা আবিকোতা নিকো, আসা কা আবিকোতা নিকো।”
The Seed Company