য়হুন্না16
1ইশুহা জাংয়ে, “নাবিহা দেংওয়া মাল্যাকো তামসা কা ই তাংসা নুওয়াং জাংমগা।2নাবিহিংয়া য়হুদিবিকো জোংসুওয়া সাবিসো নোপাপুরোওয়া। এপাজিংওয়া সময়রে ওয়াংরোওয়া, নাবিহিং স্যামবিহা ‘সেংজাকো কাম জোদিংয়ো’ তামসা নোরোওয়া।3আপাহিং আসা কাহিং মানাইওয়াকো সোতারাং দিংঙাবিহা নাবিহিংয়া এপা জোরোওয়া।4ই তাংসা নুওয়াং জিংপাদাংনুওয়া নাবিহা ‘কাবিহিংয়া তাংসা নুওয়াং আকুহা নাগাইসোরাং জাংপুনতেমগা’ তামসা নোরোওয়া। আকো সোতারাং কা নাবিহিংয়া ই নুওয়াংবি জাংমগা। কা নেচোইপা নাবিহিংপা নিমকো সোতা নাবিহিংয়া ই নুওয়াংবি জাংদিংয়ো।5“কা নেহা কাহিং নিংপুওয়াকোতা হোদাংয়ো। আদো ‘নাতিহা হাংতা হোদাংগা?’ তামসা নাবিহা হাংসুরে মাউইতো।6কাহা ই তাংসা নুওয়াং জাংওয়াকো সোতা নাবিহিংয়া তুংসিং চিচাপুমি নিও।7আদো কা আজিপ্পারাং নাবিহিং জাংরোওয়া, কা ইসো হোওয়ারাং নাবিকো সোতা এনতারোওয়া, হাংপাতানাহা কা মোহোনাহা নাবিহিং য়ুজ্রুওয়া পবিত্র লাংবেহা নাবিকোতা মেলেরোওয়া। আদো কামি হোনাহা আকুহিংয়া নাবিকোতা নিংপুরোওয়া।8আকু লেপুনতেনুকো নোইতাহা বাসিমতিকো দিংঙাবিহিংয়া পাপ, তাংজিকো নুওয়াং আসা সেংজাকো ন্যায়কো তোইতা দোষি তিংপারোওয়া।9পাপকো তোইতা, কাহিং মাদেংওয়ারাং পাপগা তামসা আকুহা নাবিহিংয়া তিংপাপুরোওয়া।10তাংজিকো তোইতা, হাংপাতানাহা কা আপাকোতা হোদাংয়ো আসা ন্যাসারাং নাবিহা কাহিং মাতিংরোওয়া।11আসা ন্যায়কো তোইতা, হাংপাতানাহা ই বাসিমতিকো মাটাহা নাগাইসোরাং দোষ জিংপুনতেমি নিও।12“কাহা নাবিহিংয়া জাংকো নুওয়াংবিহা উইসে নিও, আদো নেহা ইরোমা সিওপা নাবিহা কোইমক্যইরোওয়া।13আদো আজিপ্পাকো লাংবে লেপুনতেনুকো নোইতাহা আকুরাং আজিপ্পা হাংমে তাওয়া নুওয়াংহা নাবিহিং কোইপাপিরোওয়া। আকুহা আপনিকো কাটুসো নুওয়াং মোয়্যইরোওয়া। আকুহা হাই হিংবা, আকুরাং নাবিহিং জাংরোওয়া আসা নোইতা জিংপাদাংওয়া নুওয়াংবিরে ল্যাইতেরোওয়া।14কুং জাংওয়া নুওয়াংবিহা নাবিহিং জাংমসা আকুহা কুং মহিমা জোরোওয়া।15আপাহিংপা হাইনি, আকুহা তাংসা কুংরাংগা। আকো সোতা কাহা ‘আজিপ্পাকো লাংবেহা নাবিকোতা কুং নুওয়াংবি তিংপারোওয়া’ তামসা জাংমগা।”16ইশুহা জাংয়ে, “আম্যই সময় নোইতাহা নাবিহা কাহিংয়া মাতিংরোওয়া, আদো আম্যইকো নোইতাহা ন্যাসারাং নাবিহা কাহিং তিংরোওয়া।”17আকুহা আম্যই নোইতাহা কাহিংয়া মাতিংরোওয়া, আদো ন্যাসারাং আম্যইকো নোইতাহা নাবিহা কাহিংয়া তিংরোওয়া, “কা আপাকোতা হোদাংয়ো” তামসারে জাংদিংয়ো, “ইহা হাং জাংমমে? তামসা আকো য়োংতোংবিহা তাইবিলারাই উইসুয়ে।18আসা জাংসুয়ে, ই ‘আম্যই নোইতা’ তাওয়াহা হাংমমে? আকুহা হাংকো সোতা জাংদিংমমে, কাবিহা মোকোইতো।”19আবিহা ই নুওয়াংকো তোইতা উইরোওয়া তামসা গেমসা ইশুহা আবিহিংয়া জাংয়ে, “কাহা জাংয়ো ‘আম্যই সময় নোইতা নাবিহা কাহিংয়া মাতিংরোওয়া, আদো আম্যই সময় নোইতাহা ন্যাসারাং তিংরোওয়া।’ ই নুওয়াংকো তোইতারাং নাবিহা আপনি লারাই উইসুমদিংকোতা?20আজিপ্পারাং কা নাবিহিং জাংরোওয়া, নাবিহা কাইরোওয়া আসা চিলিংরোওয়া, আদো বাসিমতিকো দিংঙাবিহা য়াংতাসুরোওয়া। নাবিহা তুংসিং চিচাপুরোওয়া, আদো নাবিকো তুংসিং চিচাপুওয়াহা গাগ্রুওয়াতা ওয়াংরোওয়া।21চেং কেদাংনুওয়া আয়ুহা ফেমা সুউলোমসা ইতা উতা তোইংমগা, আদো চেং কেনতানি ‘বাসিমতিতা ইচো চেং কেমি নিও’ তামসা আকুহা তাংসা ফেমা তুচাওয়াবিহা লারিংপুমসা গাগ্রুমগা।22নাবিহিংনে এপারাং জিংরোওয়া। নেহা নাবিহা তুংসিং চিচারোওয়া, আদো কা নাবিহিংয়া ন্যাসারাং দোষপাকো লেনুওয়া, নাবিকো তুংসিংহা য়াংতাওয়াসো মেইপুরোওয়া আসা এপাজিংওয়া য়াংতাওয়াহা হাংসুরে নাবিকোসো গিংচামসা পুচামক্যইরোওয়া।23আত্রংহা নাবিহা কাহিংপা হাইরে মাউইরোওয়া। কা আজিপ্পারাং জাংরোওয়া, কুং মিংতা হাই য়াদো আপাহা নাবিহিংয়া পিচারোওয়া।24নেচোইপা নাবিহা কুং মিংতা হাইরে মায়াচায়াংতো। য়াচা, নাবিহা মুংচারোওয়া আসা নাবিকো য়াংতাওয়াহা সিওপা জিংরোওয়া।”25ইশুহা জাংয়ে, “নেহা কা নাবিহিংয়া হুরাপামসা মিংচিকো নুওয়াং ত্যাবাপা ল্যাদিয়ো, আদো নোইতা কা নাবিহিংয়া আপাকো তোইতা হুরাপামসা মাজাংপা চোসোপা কোইপারাং জাংরোওয়া।26আত্রংহা নাবি আপনিবিরাং কুং মিংতা য়ারোওয়া, কাহা নাবিকো সোতা আপাকোতা য়াপিরোওয়া তামসা নাবিহিংয়া মাজাংরোওয়া,27হাংপাতানাহা আপা আপনিরাং নাবিহিংয়া জেজেংপা জোরোওয়া, নাবিহা কাহিং জেজেংপা জোমি নিও, আসা কাহা সেংজাকোসো লেমগা তামসা নাবিহা দেংমি নিও।28কা আপাকোসোরাং ই বাসিমতিতা লেমগা আসা নেহা বাসিমতিহিং হুইতেমসা ন্যাসারাং আপাকোতা লাকাদাংয়ো।”29আত্রংহা য়োংতোংবিহা ইশুহিং জাংয়ে, “নেহা নাতিহা মাহুরাপাপা কাবিহিং জাংতোংপা জাংদিংয়ো।30নেহা নাতিহিংয়া হাংসুরে উইমগ্যইরোওয়া, হাংপাতানাহা নাতিহা তাংসা নুওয়াং গেমি নিও তামসা কাবিহা গেদিংয়ো। আকো সোতারাং কাবিহা নাতিহিংয়া সেংজাকোসো লেমগা তামসা দেংমগা।”31ইশুহা আবিহিং জাংয়ে, “নেহা নাবিহা দেংদিংগা?32আদো সময় দেপাদাংতেয়ো, আসা আবেইতা দেয়োংতেয়ো, আত্রংহা নাবিহা তাংসা ইতা উতা জিংপুরোওয়া। নাবিহা আপনি আপনি সাতা হোপুরোওয়া আসা কাহিং ইচোহিংদাং হুইতেরোওয়া। আদো কাং, কাহা ইচোদাং মোতোরোওয়া, হাংপাতানাহা কাহিংপাহা কুং আপারে নিরোওয়া।”33ইশুহা জাংয়ে, “নাবিহা কুংতা জিংমসা তিমেওয়া মুংচাকো তামসারাং কাহা নাবিহিংয়া তাংসা নুওয়া জাংমগা। বাসিমতিতা নাবিহিংয়া মুচুম্যান্যাপা জিংরোওয়া, আদো সাডিংপা য়ুং, হাংপাতানাহা কাহা বাসিমতিহিংয়া জিয়োনতেমি নিও।”
The Seed Company