য়হুন্না10
1ইশুহা জাংয়ে, “আজিপ্পারাং কা নাবিহিং জাংরোওয়া, লুকাকো গ্যইতা লাপুংসো মোহোপা ইদ্যাসো হোনাহা আকুহা কুইওয়া আসা মেংদাংগা।2আদো লুকাকো গোইত্রহা লাপুংসো হোমগা।3আকুহিংয়া গ্যই খুইওয়াহা লাপুং ওয়েপিমগা। গোইত্রহা আপনিকো লুকাহিং মিং চু-চুমসা মোউনুওয়া আবিহা আকো আওয়াজ হিংমগা আসা আকুহা আবিহিং চুংমসা বাইরেতা পারামগা।4এপারাং আপনিকো লুকাবিহিং নোপাপুনতেনুওয়া আকুহা নাগাই নাগাই হোমগা আসা লুকাবিহা নুনুই নুনুই হোমগা, হাংপাতানাহা আবিহা আকো আওয়াজ নাইমগা।5গোইত্র ল্যামসা দোসরাবেমি মোউনাহা লুকাবিহা আকো নুনুই মাহ্যামগা। আদো আকো আওয়াজ মানাইমসা লুকাবিহা ক্যাপুমগা।”6ইশুহা ই নুওয়াংহা ত্যাপামসা জাংমগা। আদো হিংবিহা ই নুওয়াংসোহা হাং জাংমে মোকোইতো।7আকো সোতা ইশুহা ন্যাসারাং জাংয়ে, “আজিপ্পা কা নাবিহিংয়া জাংরোওয়া, লুকাকো গ্যইতা হোওয়া লাপুংহা কারাংগা।8কারোমা নাগাই লেওয়াহা কুইওয়া আসা মেংদাংগা, আদো লুকাবিহা আবিকো নুওয়াংহা মাহিংতো।9লাপুংহা কারাংগা, কুংসো নাপোতা হোওয়াবিহা তাংসা বাচেরোওয়া। আবিহা নাপো বাইরে ওয়াংওয়া হ্যাওয়া জোরোওয়া আসা ল্যাচ্যইওয়া জায়গাতা য়োচোই মুংরোওয়া।10কুইওয়াহা কুইকো, স্যাকো আসা দাংপাকো তামসা মেংচে লেমগা, আদো কাহা নাবি সাদি মুংচাকো, আসা আকু সাদিহা সিয়োপারাং মুংচাকো তামসা লেমগা।11“এনতাওয়া গোইত্রহা কারাংগা। এনতাওয়া গোইত্রহা আপনিকো লুকাবিকো সোতা সাদি পিচাকোরে চুরোওয়া।12আদো লুকা কাংওয়া কাম জোমবিহা দোমাহিং তিংনুওয়া লুকাহিং হুইতেমসা ক্যাপুমগা, হাংপাতানাহা লুকাবিহা আকো আপনিকো মোকো। দোমাহা লুকাবিহিং য়েমগা আসা লুকাবিকো পারাহিং ইতা উতা জোপুমগা।13আকুহা কাম জোওয়া মেংচেগা। আকুহা লুকাবিহিংয়া এনতাপা মাকাংমগা, আকো সোতা আকুহা ক্যাপুমগা।14“এনতাওয়া গোইত্রহা কারাংগা। আপাহা কাহিং আসা কাহা আপাহিং নাইমি ত্যাবাপা কা কুং লুকাবিহিংয়া নাইমগা, কা কুং লুকাবিকো সোতা আপনিকো সাদি পিচাকোরে চুরোওয়া।16নেহা ই পারাতা মাতাওয়া কুং দোসরা লুকাবিরে নিও, আসা কা আবিহিংনে পারানেরোওয়া। আবিহা কুং আওয়াজ হিংরোওয়া, আসা কুং তাংসা লুকাবিহা ইচো পারা জিংমসা ইচো গোইত্রকোরাং জিংরোওয়া।17“কুং আপাহা কাহিং জেজেংপা জোমগা, হাংপাতানাহা কা কুং সাদিহা আকোতা ত্যইপুরোওয়া আসা ন্যাসারাং লাচারোওয়া।18হাংসুরে কুং সাদিহিংয়া কুংসো গিংচামক্যইরোওয়া, আদো ইহা কা আপনিরাং য়াংতামসা পিচাপুরোওয়া। কাহিংয়া সাদি পিচাকো আসা লাচাকো অধিকাররে নিও। কুং আপাকো কাহিং খুইওয়ারে ইরাংগা।”19ই নুওয়াং হিংমসা য়হুদিবিহা ন্যাসারাং ওয়েংসপুয়ে।20উইসে দিংঙাবিহা জাংসুয়ে, “ইহিংয়া জেসাং বাইমি নিও। ইহা চোইরুংগা। হাংপা নাবিহা ই দিংঙাকো নুওয়াং হিংমগা?”21আদো লেরাবিহা জাংসুয়ে, “জেসাং বাইওয়া দিংঙাহা এপা জিংওয়া নুওয়াং য়্যইমক্যই! জেসাং বাইওয়া দিংঙাহা মিচো মিতিংওয়া দিংঙাকো মিচোহা তিংপাকো চুকোগাসা?”22সেইগুকো সময় নিমি আসা য়রুশালেম দেমসাহিং লোপাওয়া মানক্যা নিমি।23আত্রংহা ইশুহা দেমসাকো সোলোমন তাওয়া লাংগাংতা কোইদিংমি।24য়হুদিবিহা আকো হুরাপা লেমসা জাংয়ে, “নাতিহা হাত্রং চোইপা ই নুওয়াং ম্যমসা একোগা? কাবিহিং চোসোপা জাংপু্ই, নাতিহা আজিপ্পারাং মুক্তি পিচাওয়া জাইপু খ্রীষ্টগা?”25ইশুহা জাংয়ে, “কাহা নাগাইসোরাং জাংপুনতেও, আদো নাবিহা মেদেংমগা। কাহা কুং আপাকো পিচাওয়া অধিকার মুংমসা জোওয়া কামবিসোরাং কা হাংসুমে তামসা তিংপামগা।26আদো নাবিহা কুং লুকা মোকো, আকো সোতা নাবিহা কাহিং মেদেংমগা।27কুং, লুকাবিহা কুং আওয়াজ হিংমগা। কা আবিহিং নাইমগা আসা আবিহা কুং নুনুই হুইমগা।28কা আবিহিংয়া হাত্রংরে মিসিওয়া সাদি পিচারোওয়া। আবিহা হাত্রংরে মাদাংরোওয়া, আসা হাংসুরে আবিহিংয়া কুংসোহা গিংচামসা পুরাচামক্যই।29আবিহিং কুংতা ত্যইওয়া কুং আপাহা হাংসুরোমা টেবোগা, আসা কুং আপাকো খুইসোহা আবিহিংয়া হাংসুরে গিংচামক্যই।30আপাসো কাহা ইচোরাংগা।”31ই হিংমসা য়হুদিবিহা ন্যাসারাং ইশুহিং স্যাকো লুংটুই য়োয়ে।32আদো ইশুহা আবিহিংয়া জাংয়ে, “আপাকো খুইওয়া উইসে এনতাওয়া কামবি কাহা নাবিকো নাগাইতা জোমি নিও। আকু কামবিতাহা হানি কামকো সোতা নাবিহা কাহিং লুংটুই টোকো কেংদিংগা?”33য়হুদিবিহা জাংয়ে, “কাবিহা নাতিহিংয়া নাকো এনতাওয়া কামকো সোতা লুংটুই তোদাংওয়া মোকো, আদো নাতিহা সেংজাহিং বিরোধ জোমি নিও। আকো সোতারাং কাবিহা নাতিহিং তোদাংমগা। নাতিহা দিংঙা জিংমসারে আপনিহিং সেংজা তামসা জাংদিংয়ো।”34ইশুহা জাংয়ে, “নাবিকো আপনিকো লিংপাংকো হিগাতা ‘সেংজাহা জাংমগা, নাবিহা চোইসুংবিরাংগা’ তামসা লামি মাতাংগা?35সেংজাহা ইতাহা হাংসুহিংপা য়্যইমি নিমমে, আবিহিংয়া আকুহা চোইসুংবিগা তামসা জাংয়ো, আসা তাংজিকো হিগাহা অ্যাজাপা জিংমক্যই।36আদো আপাহা কাহিংয়া পবিত্র বানাইমসা বাসিমতিতা নিংপুমগা। এপা বেনাহা ‘কাহা সেংজাকো চেংওয়াগা’ তানুওয়া হেপা নাবিহা কাহিংয়া সেংজাহিং বিরোধ জোয়ে তাকো চুকোগা?37কুং আপাকো পিচাওয়া কামবিমি কা মোজোনাহা নাবিহা কাহিংয়া মাদেংগে।38আদো ই কামহিং কুং আপাকোগা তামসা জাংনাহা কাহিং মাদেংদো, কুং কামবিহিং কাংমসা দেং, আপাহা কুংতা নিও আসা কাহা আপাকোতা নিও, তাওয়া নুওয়াং নাবিহা সিদা চ্যইরোওয়া।”39ই হিংমসা আবিহা আকুহিংয়া ন্যাসারাং প্যইকো কেংয়ে, আদো আকুহা আবিকো প্যাকোসো ক্যাপুয়ে।40ইশুহা ন্যাসারাং য়র্দন জোরাকো নুব্যা য়হুন্নাকো নাগাইকো বাপ্তিস্মা পিচাওয়া জায়গাতা হায়ে আসা আউতারাং য়ুংয়ে।41উইসে দিংঙাবিহা আকোতা লেহে। আবিহা তাইবিলারাই জাংসুয়ে, “য়হুন্নাহা আআংপেপেচপুওয়া কামবিহা মোজোতো, আদো আকো জাংতেওয়া ইকো নুওয়াংবিহা আজিপ্পারাংগুং।”42এপারাং আকু জায়গাকো দিংঙাবিহা উইসে ইশুকো তোইতা দেংয়ে।
The Seed Company