য়হুন্না9
1সাইয়ু তেইপুমসা হোদাংনুওয়া ইশুহা কেনুসোরাং মিচো মিতিংওয়া দিংঙাহিং তিংয়ে।2আকো য়োংতোংবিহা আকুহিং উইয়ে, “উটকেওয়া, হাংসুকো পাপকো সোতা ই দিংঙাহা কেনুসোরাং মিচো মিতিংমগা? আয়ু আপাকো পাপকো সোতাগা না আকু আপনিকো পাপকো সোতাগা?”3ইশুহা জাংয়ে, “আকুহা আপনি পাপকো সোতারে মোকো, আসা আকো আয়ু আপাকো পাপকো সোতারে মোকো, আদো সেংজাকো কাম আকোতা তিংকো তামসা আকুহা মিচো মিতিংপা জিংপুমগা।4জেইসুংকো হাহাইওয়া নিনুসোরাং কাহিং নিংপুওয়াকো কাম য়াংবিহা জোনেরোওয়া। নাঘিপা জিংপুনাহা হাংসুরে কাম জোমক্যই।5বাসিমতিতা নিনুরাং কা বাসিমতিকো হাহাইওয়াগা।”6এসে নুওয়াং জাংপুনতেনুওয়া ইশুহা মোংটোতা তোতি তোতোয়ে আসা তোতিসো আত্যইত্যই মোংতো নেমসা আকো মিচোতা ন্যায়ে আসা জাংয়ে,7“হ্যাতু, সিলোয়ামকো দাব্রিতা হোমসা দুওয়াতু।” (সিলোয়াম তাওয়াহা “নিংপুওয়া”।) আকু দিংঙাহা দাব্রিতা হোমসা মিচো দুওয়ায়ে আসা আকুহা তিংকো চুমসা ওয়াংয়ে।8আকো সাবেইবি আসা আকুহিং নাগাইসো য়াদিংওয়া তিংওয়াবিহা “ইহা আকু মিচো মাতিংওয়া য়াওয়া দিংঙা মোকোমগা?” তামসা তাইবিলারাই উইসুয়ে।9লেরাহা জাংসুয়ে, “আজিপ্পারাং, ইহা আকু য়াওয়া দিংঙারাংগা।” দোসরাবিহা জাংয়ে, “আজিপ্পারাং ইহা আকু ত্যাবাপা তিংক্যইমি, আদো আকু মোকোমি।” আকুহা আপনিরাং জাংয়ে, “আজিপ্পারাং কাহা আকু দিংঙারাং।”10আবিহা উইয়ে, “মেনাহা নাতিহা হেপা তিংকো চুংগাসা?”11আকুহা জাংয়ে, “ইশু মিং নিওয়া দিংঙাহা মোংতো নেমসা কুং মিচোতা ন্যাপিমি আসা সিলোয়ামকো দাব্রিতা হোমসা মিচো দুওয়াতু তামি। আউতা হোমসা দুওয়ানতানি কাহা তিংচপুয়ে।”12আবিহা উইয়ে, “আকু দিংঙাহা হাংতা হোংগা?”
আকুহা জাংয়ে, “কা মেগেরো।”13আকো নোইতা আবিহা আকু মিচো তিংচপুওয়া দিংঙাহিংয়া ফরিসিবিকোতা পুরায়ে,14হাংপাতানাহা ইশুহা মোংতো নেমসা আকু দিংঙাহিং সাংপাওয়া দিনহা পবিত্র সানুকো দিন নিমি।15আকো সোতা ফরিসিবিহা আকু দিংঙাহিংয়া “নাতিহা হেপা মিচো তিংগা?” তামসা উইয়ে। আকুহা জাংয়ে, “আকুহা মোংতো নেমসা কুং মিচোতা নাইপিমি, আসা আকু মোংতো দুওয়ানুওয়া কা তিংকো চুয়ে।”16লেরা ফরিসিবিহা জাংসুয়ে, “ই ইশু তাওয়া দিংঙাহা সেংজাকোসো লেওয়া মোকোরোওয়া, হাংপাতানাহা আকুহা সানুকো দিনতাহা কাম মোজোকো তাওয়া লিংপাংহিং মাহিংতো।” আদো লেরাহা জাংসুয়ে, “পাপি দিংঙারে এপাজিংওয়া আআংপেপেচপুওয়া কামবিরে জোকো ছুকোগাসা?” এপারাং আবিহা আপনি লারাই ওয়েংসপুয়ে।17ফরিসিবিহা আকু মিচো মিতিংওয়া দিংঙাহিংয়া ন্যাসারাং ইকোই উইয়ে, “আকু দিংঙাহা নাকো মিচোহিং সাংপাপিয়ো। নেহা নাকো নোচেংতাহা আকুহা হাংসুগা?”
আকুহা জাংয়ে, “আকুহা অগমবক্তাগা।”18য়হুদি মাটাবিহা আকুহা আজিপ্পারাং মিচো মিতিংওয়া নিমি আসা তিংকো চুয়ে তাওয়া নুওয়াংতা মাদেংতো। আকো সোতা আবিহা আকো আয়ু আপাহিং মোউমসা উইয়ে,19“ইহা নাবিকো চেংওয়ারাংগা? ইহা কেনুসোরাং মিচো মিতিংমগা? এপা বেনাহা নেহা ইহা হেপা তিংকো ছুংগাসা?”20আকো আপা আয়ুহা জাংয়ে, “ওই, ইহা কাবিকো চেংওয়ারাং, আসা ইহা কেনুসোরাং মিচো মিতিংমি,21আদো ইহা হেপা তিংকো ছুমমে আসা হাংসু ইকো মিচো সাংপাপিমে, আকুহা কাবি মেগেরো। নাবিরাং ইহিং উইপুই, ইকো লো চাংতেও আসা ইরাং জাংকো চুরোওয়া।”22য়হুদিবিসো চুসুংমসা আকো আয়ু আপাহা ই নুওয়াং জাংমগা, হাংপাতানাহা ইশুহিং হাংসু হাংসু মুক্তি পিচাওয়া জাইপু খ্রীষ্ট তামসা দেংমে, আবিহিংয়া জোংসুওয়া সাসো নোপারো তামসা আবিহা নাগাইসোরাং হুইসপুনতেমি নিমি।23আকো সোতারাং আকো আয়ু আপাহা “আকো লো চাংতেওয়া, আকুহিংনাং উইপুই” তামসা জাংমগা।24য়হুদি মাটাবিহা আকু মিচো মিতিংওয়াহিং ন্যাসারাং মোউমসা জাংয়ে, “আজিপ্পা নুওয়াং য়্যইমসা সেংজাহিং তাচা। কাবি গেমি নিও, আকু ইশু তাওয়া দিংঙাহা পাপিগা।”25আকুহা জাংয়ে, “পাপিমে না পাপি মোকোমে আকুহা কা মেগেরো! আদো কা ইচো মেংচে গেমি নিও, কা মিচো মাতিংমগা, আদো নেহা তিংকো চুয়ে।”26আবিহা ন্যাসারাং উইয়ে, “আকুহা নাতিহিংয়া হাং জোংগা, আসা হেপা নাতিহিংয়া মিচো তিংপাংগা?”27আকুহা জাংয়ে, “কা নাবিহিংয়া নেতেইসোরাং জাংপুনতেও, আদো নাবিহা মাহিংতো। ন্যাসারাং আকু নুওয়াং হাংপা হিংকো কেংদিংগা? মেনা নাবিরে আকো য়োংতোং জিংকো কেংদিংগা?”28ই হিংমসা আবিহা আকুহিংপা সেদ্রাংপামসা য়েংমসা জাংয়ে, “নাতিগা আকো য়োংতোংনা, কাবিহা মোসাকো য়াংতোংগা।29মোসাহিংপাহা সেংজা য়্যইমি নিমগা, আকুহা কাবি গেমি নিও। আদো আকুহা হানিকো দিংঙামে কাবি মেগে।”30আত্রং আকুহা জাংয়ে, “ইহা হেপা জিংওয়া আআংপেপেচপুওয়া নুওয়াংগা! আকুহা কুং মিচোহিং তিংপায়ে। আকুহা হানিসো লেমমে নাবিহা মেগেমগা?31সেংজাহা পাপিবিকো নুওয়াং মিহিংমগা তামসা য়াংবি তাংসা গেমি নিও, আদো আকুহা আকোসো চুসুংওয়া আসা আকো ইচ্ছাসো কাম জোমবিকো মেংচে নুওয়াং হিংমগা।32ই বাসিমতি দিংনুসোহা নেচোইপা কেনুসো মিচো মিতিংওয়াহিংয়া হাংসুরে সাংপাওয়া হাত্রংরে মাহিংয়াংতো।33ই দিংঙাহা সেংজাকোসো লেওয়া মোকোনাহা আকুহা হাইরে জোমক্যইকোগা।”34আবিহা আকুহিং এপা জাংয়ে, “নাতিহা পাপতা কেমসা পাপতারাং ডেওয়া দিংঙাহা কাবিহিং ঝিপাদাংমগা?” তামসা আকুহিংয়া জোংসুওয়া সাসো বাইরে নোপাপুয়ে।35য়হুদি মাটাবিহা আকুহিং নোপাপুয়ে তাওয়া ইশুহা হিংয়ে। আসা ইশুহা আকুহিং দোসুমসা জাংয়ে, “নাতিহা দিংঙাকো চেংওয়াকো তোইতা দেংমগা?”36আকুহা জাংয়ে, “উটকেওয়া, আকুহা হাংসুগা? কাহিং জাং, আসা কা দেংরোওয়া।”37ইশুহা জাংয়ে, “নাতিহা আকুহিংয়া তিংতেয়ো, আসা নাতিহিংপা য়্যইওয়াহা আকুরাংগা।”38ই হিংমসা আকুহা ইশুকো তাংবাতা নুউমসা জাংয়ে, “প্রভু, কা দেংরো।”39আসা ইশুহা জাংয়ে, “মিচো মাতিংওয়া দিংঙাহা তিংকো ছুকো আসা তিংদিংয়ো তাওয়াবিহা মাতিংকো তামসা কা বাসিমতিতা ন্যায় জোকো লেমগা।”40ই হিংমসা আবেইতা নিওয়া ফরিসিবিহা জাংয়ে, “কাবিরে মিচো মিতিংওয়াগা?”41ইশুহা জাংয়ে, “নাবিহা মিচো মিতিংনাহা পাপকো দোষ মিজিংকোগা, আদো নাবিহা কাবি তিংদিংয়ো তাওয়াকো সোতা নাবিকোতাহা নেচোইপা পাপ নিও।”
আকুহা জাংয়ে, “কা মেগেরো।”13আকো নোইতা আবিহা আকু মিচো তিংচপুওয়া দিংঙাহিংয়া ফরিসিবিকোতা পুরায়ে,14হাংপাতানাহা ইশুহা মোংতো নেমসা আকু দিংঙাহিং সাংপাওয়া দিনহা পবিত্র সানুকো দিন নিমি।15আকো সোতা ফরিসিবিহা আকু দিংঙাহিংয়া “নাতিহা হেপা মিচো তিংগা?” তামসা উইয়ে। আকুহা জাংয়ে, “আকুহা মোংতো নেমসা কুং মিচোতা নাইপিমি, আসা আকু মোংতো দুওয়ানুওয়া কা তিংকো চুয়ে।”16লেরা ফরিসিবিহা জাংসুয়ে, “ই ইশু তাওয়া দিংঙাহা সেংজাকোসো লেওয়া মোকোরোওয়া, হাংপাতানাহা আকুহা সানুকো দিনতাহা কাম মোজোকো তাওয়া লিংপাংহিং মাহিংতো।” আদো লেরাহা জাংসুয়ে, “পাপি দিংঙারে এপাজিংওয়া আআংপেপেচপুওয়া কামবিরে জোকো ছুকোগাসা?” এপারাং আবিহা আপনি লারাই ওয়েংসপুয়ে।17ফরিসিবিহা আকু মিচো মিতিংওয়া দিংঙাহিংয়া ন্যাসারাং ইকোই উইয়ে, “আকু দিংঙাহা নাকো মিচোহিং সাংপাপিয়ো। নেহা নাকো নোচেংতাহা আকুহা হাংসুগা?”
আকুহা জাংয়ে, “আকুহা অগমবক্তাগা।”18য়হুদি মাটাবিহা আকুহা আজিপ্পারাং মিচো মিতিংওয়া নিমি আসা তিংকো চুয়ে তাওয়া নুওয়াংতা মাদেংতো। আকো সোতা আবিহা আকো আয়ু আপাহিং মোউমসা উইয়ে,19“ইহা নাবিকো চেংওয়ারাংগা? ইহা কেনুসোরাং মিচো মিতিংমগা? এপা বেনাহা নেহা ইহা হেপা তিংকো ছুংগাসা?”20আকো আপা আয়ুহা জাংয়ে, “ওই, ইহা কাবিকো চেংওয়ারাং, আসা ইহা কেনুসোরাং মিচো মিতিংমি,21আদো ইহা হেপা তিংকো ছুমমে আসা হাংসু ইকো মিচো সাংপাপিমে, আকুহা কাবি মেগেরো। নাবিরাং ইহিং উইপুই, ইকো লো চাংতেও আসা ইরাং জাংকো চুরোওয়া।”22য়হুদিবিসো চুসুংমসা আকো আয়ু আপাহা ই নুওয়াং জাংমগা, হাংপাতানাহা ইশুহিং হাংসু হাংসু মুক্তি পিচাওয়া জাইপু খ্রীষ্ট তামসা দেংমে, আবিহিংয়া জোংসুওয়া সাসো নোপারো তামসা আবিহা নাগাইসোরাং হুইসপুনতেমি নিমি।23আকো সোতারাং আকো আয়ু আপাহা “আকো লো চাংতেওয়া, আকুহিংনাং উইপুই” তামসা জাংমগা।24য়হুদি মাটাবিহা আকু মিচো মিতিংওয়াহিং ন্যাসারাং মোউমসা জাংয়ে, “আজিপ্পা নুওয়াং য়্যইমসা সেংজাহিং তাচা। কাবি গেমি নিও, আকু ইশু তাওয়া দিংঙাহা পাপিগা।”25আকুহা জাংয়ে, “পাপিমে না পাপি মোকোমে আকুহা কা মেগেরো! আদো কা ইচো মেংচে গেমি নিও, কা মিচো মাতিংমগা, আদো নেহা তিংকো চুয়ে।”26আবিহা ন্যাসারাং উইয়ে, “আকুহা নাতিহিংয়া হাং জোংগা, আসা হেপা নাতিহিংয়া মিচো তিংপাংগা?”27আকুহা জাংয়ে, “কা নাবিহিংয়া নেতেইসোরাং জাংপুনতেও, আদো নাবিহা মাহিংতো। ন্যাসারাং আকু নুওয়াং হাংপা হিংকো কেংদিংগা? মেনা নাবিরে আকো য়োংতোং জিংকো কেংদিংগা?”28ই হিংমসা আবিহা আকুহিংপা সেদ্রাংপামসা য়েংমসা জাংয়ে, “নাতিগা আকো য়োংতোংনা, কাবিহা মোসাকো য়াংতোংগা।29মোসাহিংপাহা সেংজা য়্যইমি নিমগা, আকুহা কাবি গেমি নিও। আদো আকুহা হানিকো দিংঙামে কাবি মেগে।”30আত্রং আকুহা জাংয়ে, “ইহা হেপা জিংওয়া আআংপেপেচপুওয়া নুওয়াংগা! আকুহা কুং মিচোহিং তিংপায়ে। আকুহা হানিসো লেমমে নাবিহা মেগেমগা?31সেংজাহা পাপিবিকো নুওয়াং মিহিংমগা তামসা য়াংবি তাংসা গেমি নিও, আদো আকুহা আকোসো চুসুংওয়া আসা আকো ইচ্ছাসো কাম জোমবিকো মেংচে নুওয়াং হিংমগা।32ই বাসিমতি দিংনুসোহা নেচোইপা কেনুসো মিচো মিতিংওয়াহিংয়া হাংসুরে সাংপাওয়া হাত্রংরে মাহিংয়াংতো।33ই দিংঙাহা সেংজাকোসো লেওয়া মোকোনাহা আকুহা হাইরে জোমক্যইকোগা।”34আবিহা আকুহিং এপা জাংয়ে, “নাতিহা পাপতা কেমসা পাপতারাং ডেওয়া দিংঙাহা কাবিহিং ঝিপাদাংমগা?” তামসা আকুহিংয়া জোংসুওয়া সাসো বাইরে নোপাপুয়ে।35য়হুদি মাটাবিহা আকুহিং নোপাপুয়ে তাওয়া ইশুহা হিংয়ে। আসা ইশুহা আকুহিং দোসুমসা জাংয়ে, “নাতিহা দিংঙাকো চেংওয়াকো তোইতা দেংমগা?”36আকুহা জাংয়ে, “উটকেওয়া, আকুহা হাংসুগা? কাহিং জাং, আসা কা দেংরোওয়া।”37ইশুহা জাংয়ে, “নাতিহা আকুহিংয়া তিংতেয়ো, আসা নাতিহিংপা য়্যইওয়াহা আকুরাংগা।”38ই হিংমসা আকুহা ইশুকো তাংবাতা নুউমসা জাংয়ে, “প্রভু, কা দেংরো।”39আসা ইশুহা জাংয়ে, “মিচো মাতিংওয়া দিংঙাহা তিংকো ছুকো আসা তিংদিংয়ো তাওয়াবিহা মাতিংকো তামসা কা বাসিমতিতা ন্যায় জোকো লেমগা।”40ই হিংমসা আবেইতা নিওয়া ফরিসিবিহা জাংয়ে, “কাবিরে মিচো মিতিংওয়াগা?”41ইশুহা জাংয়ে, “নাবিহা মিচো মিতিংনাহা পাপকো দোষ মিজিংকোগা, আদো নাবিহা কাবি তিংদিংয়ো তাওয়াকো সোতা নাবিকোতাহা নেচোইপা পাপ নিও।”
The Seed Company