য়াকুব5
1নেহা নাবি পুপুউ দিংঙাবাই, কুং নুওয়াং হিং! নাবিকো তোইতা দেপাওয়া কোইচ্যাওয়াহিং নোমসা নাবিহা মিতি জাজাপা কাইমসা বিলাপ জো।2নাবিকো পুংজিবিহা কাম মালাগেপা জিংপুনতেমি নিও। আংদুংবিতা আংদুংহিং চাওয়া পেতা লাগেপুনতেয়ো।3সুন-জাতাংবিতা ন্যাচ্যা চাপুনতেমি নিও। আকু ন্যাচ্যারাং নাবিকো বিরোধতা সাক্ছি জিংরোওয়া আসা মেহ ত্যাবাপা আকু ন্যাচ্যাসোহা জুপাহিং দাংপারোওয়া। ই নোইস্যাকো দিনবিতাহা নাবিহা পুংজিবি দুংপামি নিও।4নাবিকো লুংনিংতা কাম জোমবিহিং পিচানেওয়া হাজিরাহা ধোকাবাজি জোমসা মিচায়াংতো। আবিকো বিলাপ জোওয়া হিং। নাকো মোইপ্যা য়োওয়া হাজিরাবিকো কাইওয়াহা সে নিওয়া প্রভুসেংজাকো নানুং চোইপা দেকানতেমি নিও।5বাসিমতিতা আবিহা সিওপারাং য়াংতা-কেতামি নিও আসা বলি পিচাকো দিনকো সোতা নাবিহিংয়া ল্যহপামসা এমি নিও।6আপনিহা আপনিহিং বাচাইকো মোচ্ছুওয়া নির্দোষহিং নাবিহা দোষ লাগাইমসা স্যাপুয়ে।7এপাজিংপুনুওয়া ডুওয়া এবাই আসা হুম্রিবাই, প্রভু মেলেনু চোইপা ধিরোজ জোমসা য়ুং। কাং, নিয়াংতা কাংপাওয়াহা পাংক্যইওয়া মোইপ্যা প্যাপাকোহা হাসেকো ধিরোজ জোমমে। আকুহা য়্যইচপোংকো আসা সেইগুকো ওয়্যাতি খুইমগা।8নাবিরে এপা ধিরোজ জোমসা আপনিকো তুংসিংহিং সাডুংপা জোমসা এ। হাংপাতানাহা প্রভুকো ন্যাসারাং লেপাওয়া দিনহা তোংনাংরাং নিও।9ও ডুওয়া এবাই আসা হুম্রিবাই, ইচোহা ইচোকো বিরোধতা ন্যাকা-নুকুপা মোজো। মোকোনাহা নাতিহা দোষি জিংপুরোওয়া, কাং, ন্যায়কর্তাহা লাপুংতারাং নিও।10ও ডুওয়া এবাই আসা হুম্রিবাই, ধিরোজ লাংওয়া আসা কোইচ্যাওয়াহিং সহায়ওয়াবিকো নামুনাকো রূপতা প্রভুকো মিংতা য়্যইওয়া অগমবক্তাবিহিং নো।11কাং, ধিরোজ জোমসা সহায়ওয়াবিহিংয়া কাবিহা আশিষিত নিও তামসা জাংরোওয়া, আয়ুবকো ধিরোজকো বিষয়তা নাবিহা হিংমিরাং নিও। নোইস্যাতাহা প্রভুহা আকুহিংয়া হেপা লামতুওয়া তিংপামে, আকুরে গেদিংয়ো। প্রভুহা লামতুওয়া আসা জেজেংওয়াসো মেইপুইয়াগা।12ও কুং ডুওয়া এবাই আসা হুম্রিবাই, তাংসা নুওয়াংরোমা নাগাইহা লোডিংবাকো কিতা দোসরা হাইক্রি নুওয়াংতারে মানাপোইঘ্যই। আদো আপনি দোষি মাজিংকো সোতা নাবিহা “আজিপ্পারাং” বেনাহা “আজিপ্পা” “আজ্যাপা” বেনাহা “আজ্যাপা” তামসা জাং। এপামি জোনাহা সেংজাহা নাবিহিংয়া সজায় মাপিচারোওয়া।13নাবিকো প্যাকোতাহা হাংসু দুঃখ নিবা, আকুহা পাচাইকো। হাংসু গাগ্রুপা নিবা, আকুহা প্রশংসাকো লেহদি লেহকো।14হাংসু হাইমি নিবা, আকুহা মন্ডলিকো মাটা ওয়ারাংপাবিহিং মোউকো, আসা আবিহা প্রভুকো মিংতা চুইতিতা অভিষেক জোমসা আকো সোতা পাচাইপিরোওয়া।15দেংমসা পাচাইওয়াকো সোতা হাইওয়া দিংঙাহা সাংরোওয়া আসা প্রভুহা আকুহিংয়া বাচাইপিরোওয়া, আকুমি পাপ জোওয়া নিনাহা আকো পাপহা ছমা জিংরোওয়া।16সাংকো সোতা আপনিকো জোওয়া পাপহা ইচোহা ইচোকো নাগাইতা স্বীকার জো, আসা ইচোহা ইচোকো সোতা পাচাইপি। সেংজাকো নাগাইতা তাংজি নিওয়া দিংঙাকো পাচাইওয়াতাহা সে নিমগা আসা আকুহা টেবো কাম জোকো ছুমগা।17অগমবক্তা এলিয়ারে য়াংবিকো স্বভাও নিওয়া দিংঙা নিমগা। আকুহা ভক্তিকো সাথ ওয়্যাতি ম্যাওয়্যাকো তামসা পাচাইনুওয়া লো সুংনিং তারি তুরি চোইপা ওয়্যাতি মোওয়্যাতো।18ন্যাসারাং আকুহা পাচাইয়ে আসা ডিংবাসো ওয়্যাতি ওয়্যায়ে, আসা বাসিমতিতা উব্জনি জিংয়ো।19ও কুং ডুওয়া এবাই আসা হুম্রিবাই, নাবিকো প্যাকোসোবেমি লেরাহা আজিপ্পাসো তানাং জিংপুনাহা, আকুহিং লাপামসা পারা।20নাবিহা সিদা চ্যইকো, ইচো পাপিহিংয়া আকো মেংতাওয়া ন্যাতাসো লাপামসা পারাওয়াহা আকু দিংঙাকো লাংবেহিংয়া সিদিংসো বাচাইরোওয়া আসা উইসে পাপকো ছমা জোপারোওয়া।
The Seed Company