১ পত্রস1
1কা ইশু খ্রীষ্টকো জেংওয়া পোইং পত্রসকোসো পোন্তোস, গালাতিয়া, কাপাদোকিয়া, এশিয়া, আসা বেথিনিয়াতা বিদেশী জিংমসা হিংচাইবিরিপা য়ুংওয়া সেংজাকো জেংওয়া দিংঙাবিহিং ই চিঠি লাদাংয়ো।2নাগাইসোরাং আপনিকো য়োজনা জোমি ত্যাবাপা সেংজা আপাহা নাবিহিংয়া আপনিকো পবিত্র দিংঙা জিংকো জেংমগা। ইশু খ্রীষ্টকো য়ুতিসো পবিত্র জিংমসা আকো খুইওয়া নাবি মানেকো ছুকো তামসা আকুহা নাবিহিংয়া লাংবেসো আপনিকো বানাইয়ে। নাবিকো তোইতা অনুগ্রহ আসা তিমেওয়া সিওপারাং নিকো।3সেংজা আসা য়োংকো প্রভু ইশু খ্রীষ্টকো আপা সেংজাকো প্রশংসা জিংকো। ইশু খ্রীষ্টহিং সিপুওয়াসো ঙারোপামসা টেবো লামতুওয়াসো আকুহা য়াংবিহিংয়া চুবে জিংমসা কেপামি নিও। আকো সোতা য়াংবিহা ঙাজ্যইং আশা মুংচামি নিও।4আকুহিংপাহা লোডিংবাতা সেংজা আপাহা হাত্রংরে মাদাংওয়া, অশুদ্ধ মাতাওয়া আসা হাত্রংরে মাঅ্যাওয়া উত্তরাধিকারিবিহা নাবিকো সোতা তৈয়ার জোমসা এপিমি নিও।5দেংওয়াসোরাং নাবিহিংয়া সেংজাকো সেসো মুক্তিকো সোতা সুরক্ষা জোমসা এপিমি নিও, আকু মুক্তিহা নাবিকো সোতাহা তৈয়ার জোমসা এমি নিও আসা নোইস্যাকো সময়তাহা তিংরেরোওয়া।6ই নুওয়াংবিতা নাবিহা গাগ্রুকো জো। কোকোহা, নেহা নাবিহা কিসিম-কিসিমকো দুঃখ সহায়নেমি নিও।7ইকো উদ্দেশ্যহা নাবিকো দেংওয়াহা আজিপ্পা নিও তামসা তিংপাকো সোতাগা। দাংপুমসা হ্যাপুওয়া সুনহিংনে মেহতা খারেমসা শুদ্ধ জোনাহা নাবিকো দেংওয়াহা শুদ্ধ সুনরোমা এনতাপা নিও। আকো সোতা ই দেংওয়াহিংয়া শুদ্ধ জোকো জাঁচ জোমগা। আকো সোতা ইশু খ্রীষ্ট তিংরেনুকো দিনতাহা সেংজাকো মান, ইজ্জত আসা প্রশংসা জিংরোওয়া।8নাবিহা মাতিংদো আকুহিংয়া জেজেংপা জোমগা আসা নেরে মাতিংদো আকুহিংয়া দেংমগা। আসা ব্যাখারাং জোকো মাছুওয়া টেবো মহিমিত গাগ্রুওয়াসো নাবিকো তুংসিংহা য়াংতারোওয়া,9হাংপাতানাহা আকোতা দেংওয়াকো ফলহা নাবিহা লাংবেকো মুক্তি মুংচামি নিও।10নাবিকো মুংচাওয়া ই মুক্তিকো বিষয়তা অগমবক্তাবিহা মোমসা ছানবিন জোয়ে, আসা সেংজাহা নাবিহিং পিচাদাংওয়া অনুগ্রহকো বিষয়তা নাগাইসোরাং জাংওয়া নিমগা।11অগমবক্তাবিহা ই নুওয়াংবিহা হেপা আসা হাত্রং জিংকোমে তামসা গেকো কেংয়ে। খ্রীষ্টকো লাংবেহা আবিহিংয়া খ্রীষ্টহা কোইচ্যানেরোওয়া আসা আকো নোইতাহা টেবো আদর মুংরোওয়া তামসা নাগাইসোরাং তিংপামি নিমগা।12নাবিহিংয়া ই তিংপামি নিমগা, কি আবিহা আপনিকো মোকো, আদো নাবিকো সেওয়া জোদিংমি নিমগা। ই নুওয়াংহা লোডিংবাসো নিংপুওয়া পবিত্র লাংবেসো নাবিহিং হিংপাওয়া এনতাওয়া দেরেং হিংপামবিকোসো নেহা নাবিহিংয়া ঘোষনা জিংমি নিও। ই নুওয়াংহা লোডিংবাকো পোইংবিরে সিওপারাং কাংকো ইচ্ছা জোমগা।13আকো সোতা কাম জোকো নাবিকো তুংসিংহা তৈয়ার জিংকো। হোশিয়ার জিং, আসা ইশু খ্রীষ্ট লেনুওয়া নাবিকো মুংচানেওয়া অনুগ্রহতারাং ভরসা এ্যহ।14সেংজাকো আজ্ঞাকারি চেংবি জিংওয়াকো কারণ নাগাইকো মেগেয়াংনু জোওয়া অভিলাষাকো কামবিহা নেহা মোজো।15নাবিহিং মোউওয়া সেংজাহা পবিত্র নিও। আকো সোতা নাবিরে তাংসা য়ুংওয়া-তেইওয়াবিতা পবিত্র জিং।16হাংপাতানাহা তাংজিকো হিগাতা জাংমি নিও, “পবিত্র জিং, হাংপাতানাহা কা পবিত্র নিও।”17পাচাইনুওয়া নাবিহা সেংজাহিংয়া আপা তামসা পাচাইমগা। আকুহা হাংসুহিংনে পক্ছপাত মোজোপা আপনিকো কাম অনুসার ন্যায় জোমগা। আকো সোতা বিদেশী ত্যাবাপা জিংমসা য়ুংনুওয়া নাবিহা সেংজাতা চুসুংওয়া পুউমসা য়ুং।18নাবিহা আপনিকো আজা-আটাবিসো ওয়াংওয়া তেংবেকো সাদি মুংচামি নিমগা, আকু দাংপুমসা হ্যাপুওয়া সুন আসা জাতাংসো চোইমসা আকু সাদিসো নাবিহিংয়া বাচাইওয়া মোকো,19আদো খ্রীষ্টকো পাংক্যইওয়া য়ুতিসোরাং নাবিহিংয়া ছুটকারা পিচামি নিও। আকুহা নির্দোষ আসা মেংটা মোতোওয়া সেংজাকো লুকাগা।20সেংজাহা বাসিমতিহিং দিংনুরোমা নাগাইসোরাং নাবিহিং ছুটকারা জোকো আকুহিং জেংমি নিমগা, আদো নাবিকো সোতা ইহা নোইস্যাকো দিনতা আকুহা তিংরেয়ো।21আকোসোরাং নাবিহা সেংজাহিং দেংয়ো, হাংসু আকুহিং সিপুওয়াসো ঙারোপামমে আসা আকুহিং মহিমা পিচামমে, আকো সোতা নাবিকো দেংওয়া আসা আশাহা সেংজাকোতা এদিংয়ো।22নেহা নাবিহা আজিপ্পাহিং পালন জোমসা আপনিহিং ছোসোপা জোওয়াকো সোতা আপনিকো ডুওয়া এবিহিং আজিপ্পারাং জেজেংপা জো, আসা তুংসিং নাপোসোরাং ইচোহা ইচোহিং জেজেংপা জো।23সেংজাকো ঙাজ্যইং আসা হাত্রংদো য়ুংওয়া য়্যইদিসো নাবিহা চুবে জিংমসা কেমি নিও। নাবিহা দাংপুমসা হ্যাপুওয়া আপাকো চেংওয়া মোকো, আদো হাত্রংরে মাদাংওয়া আপাকো চেংওয়াগা।24হাংপাতানাহা তাংজিকো হিগাতা লামি নিও, “তাংসা দিংঙাবিহা স্যাম্যা ত্যাবাপা নিও, আসা আবিকো জেজেংক্যইওয়ারে চুংচাকো মাইবে ত্যাবাপা নিও।স্যাম্যাহা য়োংপুমগা, আসা মাইবেহা হুইচামগা।25আদো প্রভুকো য়্যইদিহা হাত্রংদো য়ুংমগা।”
আসা নাবিহিং হিংপাওয়া এনতাওয়া দেরেংরে ই য়্যইদিরাংগা।
আসা নাবিহিং হিংপাওয়া এনতাওয়া দেরেংরে ই য়্যইদিরাংগা।
The Seed Company