গালাতি4
1কুং জাংকো কেওয়াহা, উত্তরাধিকারিরে আপেচাদাংনুওয়া আপাকো তাংসা পুংজিকো গিরিরাং জিংদো ডেইয়া ত্যাবাপা মেংচে জিংমগা।2আদো আপা কাং-য়োনু চোইপা আকুহা কাং-য়োওয়াকো অধীনতারাং য়ুংমগা।3য়াংবিরে এপারাং আপে নিনুওয়া বাসিমতিকো চোইসুংবিকো সেবিকো ডেইয়াবি নিমগা।4আদো হাত্রং য়োজনা জোওয়া সময় পুরা জিংপু, আত্রংহা সেংজাহা আপনিকো চেংওয়াহিং নিংপুয়ে। আকুহা মেমেকো ফেমাসো কেমসা লেহে আসা লিংপাংকো অধীনতা কেহে।5লিংপাংকো অধীনতা নিমবিহিং মোল টামসা ছুটকারা জোকো আকুহিংয়া নিংপুমগা, তাকি সেংজাহা য়াংবিহিংয়া আপনিকো চেংওয়া-চেমেকো রূপতা গ্রহন জোকো ছুকো,6নাবিহা সেংজাকো চেংওয়া-চেমেগা তামসা তিংপাকো আকুহা আপনিকো চেংওয়াকো লাংবেহা য়াংবিকো তুংসিংতা নিংপিয়ে, হাংসু “ও অব্বা, ও আপা!” তামসা মোউমমে।7আকো সোতা নাবিহা নেহা ডেইয়া মোকো, আদো সেংজাকো চেংওয়া-চেমেগা। চেংওয়া-চেমেবিমি বেনাহা সেংজাহা নাবিহিংয়া উত্তরাধিকারিরে বানাইমি নিও।8নাগাই নাগাই হাত্রং নাবি সেংজাহিং মানাইয়াং, নাবিহা চোইসুংবিকো ডেইয়াবি নিমগা, হানি সভাউসোরাং চোইসুংবি মোকোমমে।9আদো নেহা নাবিহা সেংজাহিং নাইমি নিও, অর্থাৎ সেংজাহা নাবিহিংয়া নাইমি নিও, আদো ন্যাসারাং হেপা নাবিহা আকু কমজোর আসা নাগাই নাগাইকো কাম মালাগেওয়া ল্যইচ্যইপ্যইচ্যইতা লাকাকো আসা ন্যাসারাং আকো ডেইয়া জিংকো কেংদিংগা?10নাবিহা বিশেষ দিনবি, তারিবি, রিতুবি, আসা লোবিহিং মানেদিংয়ো।11কাহিংয়া চিন্তা জিংদিংয়ো, কি নাবিকো সোতা কুং কোইচ্যাদিংওয়াহা ব্যর্থ জিংপুয়ে।12ও ডুওয়া এবাই আসা হুম্রিবাই, কা জাংচারোওয়া, নাবিরে কা বেপারাং জিংপি, হাংপাতানাহা কারে নাবি ত্যাবাপারাং জিংপিমি নিও। নাবিহা কাহিং হাইরে মেংতাপা মোজোয়াংতো।13নাবিহা গেমিরাং নিও, কি জুপাতা হাইওয়াকো সোতারাং কাহা নাগাই নাবিহিং এনতাওয়া দেরেং হিংপামগা।14আকু সময়তা কুং হাইওয়াহা নাবিকো সোতাহা ইচো পরিক্ছা নিমগা, আদো নাবিহা কাহিংয়া তিরস্কার আসা আচকাপা মোজোতো, আদো তুইপেংরাং নাবিহা সেংজাকো পোইংহিং আসা খ্রীষ্ট ইশুহিং ত্যাবাপা কাহিং স্বাগত জোয়ে।15নাবিকো অনুভব জোওয়া য়াংতাওয়াহা হাংতা হ্যাপুংগা? হাংপাতানাহা কা সাক্ছি পিচাকো ছুরোওয়া, আত্রংহা ঘ্যইনুওয়া কুং সোতা নাবিহা আপনিকো মিচোরে নোপামসা পিচাকোরে তৈয়ার নিমগা।16নেহা কা আজিপ্পা নুওয়াং য়্যইওয়াকো কারণ নাবিকো দুসমন জিংপুংগাসা?17নাবিহিংয়া আপনিকো কাটু ডেইকো আবিহা সিওপারাং জোস তিংপামগা, আদো এনতাপা নোমসাহা মোকো, নাবিহা সিওপারাং উৎসাহিত সাথ আবিহিং স্বীকার জো তামসা আবিহা কাবিকোসো নাবিহিং ওয়েংপাকো কেংমগা।18আসল নুওয়াংকো সোতা জসিলো জিংকোহা এনতাওয়াগা, আদো কা নাবিহিংপা নিনু মেংচে জোস তিংপাকোহা এনতাওয়া মোকো।19কুং জেজেংওয়া চেংবাই, নাবিকোতা খ্রীষ্টকো লোংস্ত্যাইওয়া মোবোনেনু চোইপা ন্যাসারাং সু লোওয়া চেংকো আয়ু ত্যাবাপা কাহিংয়া দুঃখ জিংপুমি নিও।20নেহা কা নাবিহিংপা চিত্তামি নিনাহা নাবিহিংপা কুং য়্যইওয়া তরিকা বদলি জোকো ছুনাহা এনতাপা জিংকোগা, হাংপাতানাহা নাবিকো বিষয়তা কাহা হাং জোকোমে মোজোকোমে মাইপা জিংদিংয়ো।21নাবিহা লিংপাংকো অধীনতা য়ুংকো কেংওয়াবিহা কাহিং জাং, লিংপাংহা হাং জাংমগা, নাবিহা মোকোইয়াংগা?22হাংপাতানাহা লামি নিও, অব্রাহামকোহা নিহসো চেংওয়াবি নিমগা, ডেইয়ামু মেকোসো ইচো আসা স্বতন্ত্র মেকোসো ইচো।23ডেইয়ামু মেকো কাটুকোহা জুপাকো ইচ্ছাসো কেমি নিমগা, আদো স্বতন্ত্র মেকো কাটুসো কেওয়া চেংওয়াহা সেংজাকো প্রতিজ্ঞা জোওয়াসো নিমগা।24ইসোরাং য়াংবিহা ই উদারণ লাংকো ছুরোওয়া, আকু নিহসো মেমেবিহা নিহসো নাপোইওয়া করারহিং কোইপামগা। সিনোই লাগাসো ডেইয়া জিংকো সোতা সন্তান চেংপাওয়াহা হাগারগা।25হাগারহা অরব দেশকো সিনাই লাগাগা, আসা নেকো নিওয়া য়রুশালেমহিংপা তুলনা জোকো ছুরোওয়া, হাংপাতানাহা আকুহা আপনিকো চেংবিহিংপা চিত্তা দাসত্ত্বতা নিও।26আদো লোডিংবাকো য়রুশালেমহা স্বতন্ত্র নিও, হানি য়োংকো আয়ুমে।27হাংপাতানাহা তাংজিকো হিগাতারে লামি নিও, “ও চেংপামগ্যইওয়া বেংডি, গাগ্রুমসা য়ুং, ও সু-লোওয়া সিদা মাচ্যইরি, তুংসিং ওয়েমসা ঙা, হাংপাতানাহা ওয়া নিওয়াকোরোমাহা পেইপুওয়া মেকো চেংচুংবি উইসে নিও।”28নেহা ও ডুওয়া এবাই আসা হুম্রিবাই, ইসহাক ত্যাবাপারাং য়াংবিরে প্রতিজ্ঞাকো সন্তানবিগা।29আদো আত্রংকো সময়তাহা হেপা জুপাকো অনুসার কেওয়াহা পবিত্র লাংবেকো সেসো কেওয়াহিংয়া সতায়চাংমমে, নেরে এপারাং নিও।30আদো তাংজিকো হিগাহা হাং জাংমগা? “ডেইয়ামু আসা আকো চেংওয়াহিংয়া নোপাপুই, হাংপাতানাহা ডেইয়ামুকো চেংওয়াহা স্বতন্ত্র মেকোসো কেওয়া চেংওয়াহিংপা উত্তরাধিকারি জিংকো মাছু।”31আকো সোতা কুং ডুওয়া এবাই আসা হুম্রিবাই, য়াংবিহা ডেইয়ামু কাটুকো মোকো, আদো স্বতন্ত্র কাটুকো আয়ুকো সন্তানগা।
The Seed Company