গালাতি3
1ও তোউজি গালাতিয়াবাই, হাংসু নাবিহিংয়া মোহোনি লাগাইমসা অধীনতা এপুংগা? নাবিকো মিচোকো নাগাইতারাং ইশু খ্রীষ্ট ক্রুসতা সিপুওয়াকো নুওয়াংহা স্পষ্ট বর্নণ জোপিমি নিমগা।2নাবিকোসো ইচো নুওয়াং কা গেকো কেংমি, লিংপাংকো কামবিসোহা নাবিহা পবিত্র লাংবে মুংচাংগা, না খ্রীষ্টকো নুওয়াং হিংমসা দেংওয়াসো মুংচাংগা?3নাবিহা হাংপা এসেপাকো তোউজি নিংগা? নাবিহা পবিত্র লাংবেতা আপনিকো দেংওয়া সাদি শুরু জোপুনতেনুওয়া, নেহা আপনিকো জুপাকো সেতা লাকাকো কেংমগা?4না নাবিহা ব্যর্থতা দুঃখ পুমগা? আজিপ্পারাং ইহা ব্যর্থ মাতামগা।5সেংজাকো কাটুসো নাবিহিং পবিত্র লাংবে পিচাওয়া, আসা নাবিকো প্যাকোতা আআংপেপেচপুওয়া কাম জোওয়া, ইহা তাংসা লিংপাংকো কামসো জিংপুমগা, কি হিংওয়া এনতাওয়া দেরেংতা দেংওয়াকো কারণসোগা?6তাংজিকো হিগাহা জাংমগা, “অব্রাহামহা সেংজাকোতা দেংয়ে আসা আকু দেংওয়াসোরাং সেংজাহা আকুহিংয়া তাংজি ঠহরাইয়ে।”7আকো সোতা নাবিহা গেনেরোওয়া, হাংসু হাংসু সেংজাহিং দেং, আবিরাং অব্রাহামকো সন্তানগা।8সেংজাহা য়হুদি মোকোমবিহিংয়া দেংওয়াসোরাং তাংজি ঠহরাইরোওয়া তাওয়াহা তাংজিকো হিগাহা নাগাইসোরাং তিংমসা অব্রাহামহিংয়া “নাকোসোরাং তাংসা জ্যাকো দিংঙাবিহা সেংজাকো আশিষ মুংরোওয়া” তাওয়া এনতাওয়া দেরেংহা নাগাইসোরাং হিংপায়ে।9আকো সোতা দেংওয়া দিংঙাবিহা দেংওয়াকো মাটা অব্রাহামহিংপারাং আশিষ মুংচারোওয়া।10লিংপাংকো কামবিকো তোইতা ভরসা জোমবিহা তাংসা শ্রাপকো অধীনতা নিও, হাংপাতানাহা লিংপাংকো হিগাহা এপা জাংমগা, “লিংপাংকো হিগাতা লাওয়া তাংসা নুওয়াংতা মায়ুংওয়াবি আসা আকু পালন মোজোমবি তাংসা শ্রাপিত জিংমগা।”11এপা জিংপুনুওয়া নেহা লিংপাংসোহা সেংজাকো নাগাইতাহা হাংসুরে তাংজি ঠহরেমক্যইরোওয়া তাওয়া নিশ্চিত নিও, হাংপাতানাহা লিংপাংকো হিগাতাহা লামি নিও, “তাংজি নিওয়া দিংঙাহা দেংওয়াসোরাং বাচেরোওয়া।”12আদো লিংপাংহা দেংওয়াহিংপাহা আধারিত মোতো, তাংজিকো হিগাতাহা লামি নিও, “হাংসু দিংঙা ই পালন জো, আকুহা আউসোরাং বাচেরোওয়া।”13য়োংকো সোতা শ্রাপ পুউমসা খ্রীষ্টহা য়াংবিহিংয়া লিংপাংকো শ্রাপসো দাম টামসা ছুটকারা পিচামি নিও, হাংপাতানাহা লিংপাংকো হিগাহা জাংমগা, “সিংতেংতা থ্যইচপুওয়া তাংসা শ্রাপিত নিও।”14আকুহা য়াংবিহিংয়া দাম টামসা ছুটকারা জোমগা, তাকি অব্রাহামহিং পিচাওয়া আশিষহা খ্রীষ্ট ইশুকোসো য়হুদি মোকোওয়া দিংঙাকোতা ওয়াংকো, আসা য়াংবিহা দেংওয়াসো প্রতিজ্ঞা জোওয়া পবিত্র লাংবে মুংকো ছুকো।15ও ডুওয়া এবাই আসা হুম্রিবাই, উদারণকো সোতা দিংঙাকো নুওয়াং জোসি। নিহসো দিংঙারে হাইক্রি নুওয়াংতা সহিছাপ জোপুনাহা, নোইতাহা আকুহা হাই নুওয়াংতারে ওয়েংপাকো মাছু আসা আউতা সিওপা অথবা লিয়োপাকোরে মাছু।16প্রতিজ্ঞাবিহা অব্রাহাম আসা আকো সন্তানহিং পিচাওয়া নিমগা। তাংজিকো হিগাহা “সন্তানবিহিং” তামসাহা মাজাংতো, ইসোহা উইসে দিংঙাবিহিং সংকেত জোমগা। আদো তাংজিকো হিগাহা “নাকো সন্তানহিং” তামগা, ইসোহা ইচো দিংঙাকো মেংচে সংকেত জোমগা, হাংসু খ্রীষ্টমে।17কুং জাংকো কেংওয়া নুওয়াংহা ইরাংগা, কি চারশো তিশ বর্ষাকো নোইতা ওয়াংওয়া লিংপাংসোহা আকু নাগাইকো সেংজাহিংপা নাপোইমসা পক্কা জোওয়া করারহিংয়া মেটেকো মাছু, মোকোনাহা প্রতিজ্ঞাহা খারেজ জিংপুকোগা,18হাংপাতানাহা উত্তরাধিকারহা লিংপাংসোমি মুংচাদানাহা, প্রতিজ্ঞাসোহা মুংচাওয়াহা নুওয়াংরাং মাজিংরোওয়া, আদো সেংজাহা প্রতিজ্ঞাসোরাং অব্রাহামহিংয়া ইহা পিচায়ে।19এপা বেনাহা লিংপাংকোহা হাংপা দরকার জিংপুংগাসা? হানি সন্তানহিং প্রতিজ্ঞা জিংমি নিমমে, আকু মেলেনু চোইপা পাপহিং নাইপাকো লিংপাং পিচায়ে, সেংজাহা লোডিংবাকো পোইংকোসো মোসাহিং প্যাকোতা এমসা লিংপাংকো স্থাপনা জোয়ে।20প্যাকোতা জিংকোহা নিহদ্যাসারাং নিনেমগা, আদো সেংজাহা ইচোরাংগা।21এপা বেনাহা লিংপাংহা সেংজাকো প্রতিজ্ঞাকো বিরোধিগাসা? আঁহা মোকোমি। য়দি লিংপাংমি দিংঙাহিং সাদি পিচাকো ছুনাহা, লিংপাং পালন জোনুওয়া দিংঙাহিংয়া সেংজাকো নাগাইতা তাংজি তিংপাকোগা।22আদো তাংজিকো হিগাহা জাংমগা, কি তাংসা নুওয়াংবিহা পাপকো কৈদতা নিও, তাকি হানি প্রতিজ্ঞাবি ইশু খ্রীষ্টকো তোইতা দেংওয়াসো পিচামমে, আকুহা দেংওয়াবিহিং পিচাকো।23আদো খ্রীষ্ট লেওয়ারোমা নাগাই য়াংবিহা লিংপাংকো অধীনতা নিমগা, আসা দেংওয়া মাতিংরেনু চোইপা য়াংবিহা মেইচপুমি নিমগা।24দেংওয়াসোরাং য়াংবিহা তাংজি জিংকো ছুকো তামসা লিংপাংহিং য়াংবিকো কাং-য়োওয়া জিংমসা য়াংবিহিং খ্রীষ্টকোতা চোইপা ত্যইংপিওয়া জিম্মা পিচায়ে।25আদো নেহা দেংওয়া লেওয়াকো সোতা য়াংবিহা আকু কাং-য়োওয়াকো অধীনতা মোতো।26হাংপাতানাহা দেংওয়াসোরাং খ্রীষ্ট ইশুতা নাবি তাংসা সেংজাকো সন্তানবি জিংপুমি নিও।27হাংপাতানাহা নাবিকো প্যাকোতাহা হাসে ইচোকো খ্রীষ্টকোতা বাপ্তিস্মা জিংপুমি নিমমে, নাবিহা তাংসা খ্রীষ্টহিং ধারণ জোমি নিও।28আকো সোতা ইশু খ্রীষ্টতা না য়হুদি না য়হুদি মোকোমবি, না ডেইয়া না ছুটকারা দিংঙা, না পোজা দিংঙা না মেমে দিংঙা তাওয়া মোতোমগা, ইশু খ্রীষ্টকোতাহা তাংসা ইচোরাংগা।29য়দি নাবিমি খ্রীষ্টকোবেনাহা অব্রাহামকো সন্তানগা, আসা প্রতিজ্ঞা জোওয়া সেই উত্তরাধিকারিবিগা।
The Seed Company