গালাতি5
1স্বতন্ত্রতাকো সোতা খ্রীষ্টহা য়াংবিহিংয়া স্বতন্ত্র জোমি নিও। আকো সোতা নাবিহা সাডুংপা জিংমসা জা, আসা ন্যাসারাং ডেইয়াকো টোং পুউমঘ্যইকো।2হিং, কা পাউলরাং নাবিহিং জাংদিংয়ো, নাবিমি খতনা জোনাহা খ্রীষ্টকোসোহা নাবিহিংয়া হাইরে তোইংদ্যারাং মাজিংরোওয়া।3খতনা জোওয়া তাংসাহিং কা ন্যাসারাং চেতাউনি পিচারোওয়া, কি তাংসা লিংপাং পালন জোকো আকুহা বাধ্য জিংরোওয়া।4লিংপাংহিং পালন জোমসা তাংজি জিংকো কেংওয়া নাবিহা খ্রীষ্টকোসো লারাংসা জিংপুমি নিও। নাবিহা সেংজাকো অনুগ্রহসো লিতা হুইচামি নিও,5হাংপাতানাহা য়াংবিহা পবিত্র লাংবেতা জিংমসা দেংওয়াসো তাংজিকো আশাহিং খুইমসা য়ুংমগা।6খ্রীষ্ট ইশুকোতাহা খতনা জোদো, মোজোদো হাইরে ত্যইংদ্যা মাজিংমগা, আদো ইচো নুওয়াংকো মেংচে দাম নিও, আকুহা জেজেংওয়াসো কাম জোওয়া দেংওয়াগা।7নাবিহা এনতাপারাং ঠুইদিংমগা, হাংসু নাবিহিংয়া আজিপ্পাহিং পালন জোকো বাধা পিচাংগা?8নাবিহিং মোউওয়া সেংজাকোসোহা ই নোইপাওয়া-ত্যাপাওয়া কাম জিংওয়াহা মোকো।9আস্যস্যই সোরাসোহা তাংসা পিটোহিংয়া ভুইপাওয়া বানাইমগা।10কা প্রভুকোতা ভরসা এরোওয়া, কি নাবিহা কাহিং ল্যামসা দোসরা নোচেংবিহিংয়া গ্রহন মোজোরোওয়া। নাবিহিং ওইরোইপোইমসা মেংতাওয়া ন্যাতাতা পুরাওয়া হাংসু জিংদো আকুহা দন্ড মুংরোওয়া।11ও ডুওয়া এবাই আসা হুম্রিবাই, য়দি কামি ন্যাসারাং খতনা জোকো তামসামি হিংপোইনাহা, কুং তোইতা ই তাংসা সতাওয়াট হাংপা ওয়াংগা? এপা বেনাহা ক্রুসসো ওয়াংওয়া বাধাহা ওয়েংপুমি নিও।12নাবিহিং দুঃখ পিচামবিহা বরু আপনিকো অঙ্গহিংনাং ঠেপুদো ক্যাচিংকোগা।13ও ডুওয়া এবাই আসা হুম্রিবাই, নাবিহিংয়া স্বতন্ত্র জিংকো মোউমগা। আকু স্বতন্ত্রহিংয়া পাপ জিংওয়া লোংস্ত্যাইওয়াতা প্রয়োগ মোজো, আদো জেজেংওয়াতা নাবিহা ইচোহা ইচোকো নম্র জিংমসা সেওয়া জো,14হাংপাতানাহা তাংসা লিংপাংকো নুওয়াংহা ইচো আজ্ঞাতারাং পুরা জিংমি নিও, “নাতিহা আপনিকো সাবেইবিহিং আপনিহিং ত্যাবাপা জেজেংপা জো।”15আদো নাবিহা চুংচাকো সেংচেংবি ত্যাবাপা ইচোহা ইচোহিং চিসু-য়্যাসুনাহা হোশিয়ার জিং, নাবিহা ইচোহা ইচোকোসো দাংপুমসা হ্যামগ্যইকো।16আকো সোতা কা জাংরোওয়া, পবিত্র লাংবেকো আগুয়াইতা তেই, আসা জুপাকো পাপি ইচ্ছাবি পুরা মোজো।17হাংপাতানাহা পাপি লোংস্ত্যাইওয়াহা পবিত্র লাংবেকো বিরোধকো ইচ্ছাতা নিমগা, আসা পবিত্র লাংবেকো ইচ্ছাহা পাপ জিংওয়া লোংস্ত্যাইওয়াকো বিরোধকো ইচ্ছাতা নিমগা। ইবিহা নিহদ্যাসা লুউসুমগা, নাতি হাং জোকো কেংমমে, আউসো নাবিহিং য়োইকো সোতা ইহা ইচোহা ইচোকো বিরোধতা নিমগা।18আদো য়দি নাবিমি পবিত্র লাংবেকো আগুয়াই সেই তেইনাহা, নাবিহা লিংপাংকো অধীনতা মোতো।19পাপ জিংওয়া লোংস্ত্যাইওয়াকো কামবিহা তিংমি নিও, আকুহা ইবিরাংগা-নুংনাংসুওয়া, অপবিত্র, লাংচ্যা জোওয়া,20মুর্তিহিং হুইওয়া, তন্ত্র-মন্ত্র জোওয়া, দুসমন জোওয়া, স্যাসু-তোইংসুওয়া, ইর্ষা, সেদ্রাংপাওয়া, আপনি মেংচে উন্নতি জিংকো কেংওয়া, স্যাসপাওয়া, গুটবন্দি জোওয়া,21মিচওয়া, গাইওয়া, য়াংতা-কেতাওয়া আসা এপারাং দোসরা, হানিকো বিষয়তা কা নাবিহিং চেতাউনি পিচামমে, আসা নাগাইরে কা পিচামরাংগা। হাংসু হাংসু এপাজিংওয়া কামবি জোদিংমমে, আবিহা সেংজাকো রাজ্যতা হকদার জিংকো মাছুরোওয়া।22আদো পবিত্র লাংবেকো ফলবিহা ইরাংগা-জেজেংওয়া, গাগ্রুওয়া, তিমেওয়া, ধর্য্য, লামতুওয়া, ভলাই, ভরসা য়োগ্য়্য,23নম্রতা, আপনিকো মেংতাওয়া ইচ্ছাহিং য়োইওয়া, এপা জিংওয়াকো বিরোধতা হাই লিংপাংরে মোতো,24আদো আবি, হাংসু খ্রীষ্ট ইশুকোমে, আবিহা আপনিকো জুপাহিংয়া আকো তাংসা ইচ্ছা আসা অভিলাসাহিংয়া ক্রুসতা থ্যইপুনতেমি নিও।25য়াংবিমি পবিত্র লাংবেসোমি য়ুংনাহা লাংবেকো আগুয়াইতারাং তেইসি।26য়াংবিহা পুংটা জিংমদিংরোওয়া, ইচোহা ইচোহিং মেসেদ্রাংপাসি আসা ইচোহা ইচোহিং ইর্ষা মোজোসি।
The Seed Company