গালাতি2
1চৗদ্ধ বর্ষাকো নোইতা বার্নাবাসহিংপা তিতোসহিংনে চিত্তা পুরামসা কা ন্যাসা য়রুশালেমতা হোয়ে।2সেংজাকো তিংপাওয়া সেই কা আউতা হোয়ে, আসা আবিকো নাগাইতা আকু এনতাওয়া দেরেং এহে, হানি কা য়হুদি মোকোমবিহিং হিংপাদিংমমে। আবি, হাংসু টেবো আগুওয়াবি ত্যাবাপা নিমমে, আবিকো নাগাইতাহা কাহা ইহা গুপ্ততা হিংপায়ে, তাকি কুং কোইচ্যাদিংওয়া আসা ঠুইদিংওয়াবিহা ব্যর্থ মাজিংকো।3আদো আবিহা কাহিংপা য়ুংওয়া তিতোসহিংয়া গ্রিক জ্যাকো জিংদো খতনা জোকো তামসা হাংসুরে মোসুজাতো।4আদো ই নুওয়াংবিহা লেরা ইচো নিহসো প্যায়োংকো দেংওয়াবিহা মন্ডলিকো নাপোতা ওয়াংওয়াকো সোতা জিংপুয়ে। আবিহা জাসুসি জোমসা য়োংকো খ্রীষ্ট ইশুকোতা নিওয়া ছুটকারা পুচাকো কেংয়ে আসা কাবিহিং লিংপাংকো ডেইয়া বানাইকো কেংয়ে।5আদো এনতাওয়া দেরেংকো আজিপ্পাহা নাবিহিংপা হাত্রংদো য়ুংকো তামসা কাবিহা আবিহিংপাহা হাত্রংরে লিতা মাঝুইতো।6আদো আকু টেবো আগুওয়াবিহা হাসেকো টেবো জিংদো কাহিংয়া হাইরে ফরক মাজিং। সেংজাহা দিংঙাকো য়ুওয়াই মাকাংমগা। আকু আগুওয়াবিহা কাহিংয়া হাইরে সল্লাহ মিচাতো।7আদো তুইপেং আবিহা তিংয়ে, য়হুদি মোকোওয়া দিংঙাবিহিং এনতাওয়া দেরেং হিংপাকো ভারহা কাহিং পিচামি নিও, হেপা য়হুদিবিহিং এনতাওয়া দেরেং হিংপাওয়া ভার পত্রসহিং পিচামি নিমমে।8পত্রসহিং য়হুদিবিকোতা এনতাওয়া দেরেং হিংপাকো জেংওয়া পোইং বানাইওয়া সেংজাহা কাহিংনে য়হুদি মোকোমবিকো প্যাকোতা কাম জোওয়া জেংওয়া পোইং বানাইমগা।9য়াকুব, পত্রস আসা য়হুন্না, হাংসু মন্ডলিকো হুটিংবি নিমমে, আবিহা কুং তোইতা সেংজাকো পিচাওয়া ঙেরোংহিং সিদা চ্যইনুওয়া বার্নাবাস আসা কাহিংপা খুই মিলাইমসা আপনিবিকো সংঙ্গতিতা এচপুইয়ে। কাবিহা য়হুদি মোকোমবিকো প্যাকোতা কাম জোওয়া জিংপুয়ে, আসা আবিহা য়হুদিবিকো প্যাকোতা কাম জোওয়া জিংপুয়ে।10আবি তাংসাকোহা ই ইচ্ছা নিমগা, জোরোংবিহিংয়া য়াংবিহা কাংনেরোওয়া। আকু নুওয়াং জাংকোরাং কারে সিওপা ইচ্ছা নিমগা।11আদো হাত্রং পত্রস এন্টিঅখিয়া ওয়াং, আত্রং আকুহিংয়া কাহা দোংনাংতা বিরোধ জোয়ে। হাংপাতানাহা আকুহা দোষি নিমগা।12য়াকুবকো নিংপুওয়া দিংঙাবি ওয়াংনুরোমা নাগাইহা আকুহা য়হুদি মোকোওয়াবি, হাংসু খতনা মাজিংয়াংমমে, আবিহিংপা গামসা চাচাংমগা। আদো আবি ওয়াংনুওয়া য়হুদি মোকোমবিহিংপা ওয়েংমসা য়ুংয়ে, হাংপাতানাহা আকুহা খতনা জোওয়া দলহিংপা চুসুংপুওয়া নিমগা।13ই কারণকো সোতা আকু দোসরা য়হুদি দেংওয়াবিরে পত্রস ত্যাবাপারাং কপটি কাম জোয়ে। আবিকো ছল জোওয়া ব্যবহার তিংমসা বার্নাবাসরে এপারাং জোওয়া জিংপুয়ে।14আদো হাত্রং এনতাওয়া দেরেংকো আজিপ্পাতা আবি মেতেইওয়া কা তিং, আত্রংহা আবি তাংসাকো নাগাইতা পত্রসহিংয়া কাহা জাংয়ে, “নাতিহা য়হুদি জিংমসা য়হুদিবিকো তেই-য়ুংওয়াতা এনতাপা তিংপামক্যইনাহা, হেপা য়হুদি মোকোওয়া দিংঙাবিহিংয়া য়হুদিবিকো তেই-য়ুংওয়াতা পারাকো কর লগাইকো ছুকোগা?”15য়াংবিহা কেনুসোরাং য়হুদিগা, য়হুদি মোকোওয়া পাপি দিংঙাবি ত্যাবাপা মোকো।16আদো কাবিহা গেদিংয়ো, লিংপাংকো কামসোহা দিংঙাহা তাংজি মাতিংমগা, আদো ইশু খ্রীষ্টকোতা দেংমসা তাংজি তিংমগা। আকো সোতা কাবিরে কাবিকো দেংওয়াহা খ্রীষ্ট ইশুকোতা এহে, তাকি কাবিহা লিংপাংকো কামসো মোকো, আদো খ্রীষ্টকোতা এওয়া দেংওয়াসো তাংজি জিংকো ছুকো, হাংপাতানাহা লিংপাংকো কামসোহা হাংসুরে তাংজি জিংকো মাছুমগা।17আদো য়দি য়াংবি খ্রীষ্টতা তাংজি জিংকো কেংদাংনুওয়া, য়াংবিকোতামি পাপ দোদানাহা, খ্রীষ্টহা পাপহিংয়া উৎসাহ পিচাকোগাসা? আঁহা, আধুইসোরাং মোকো।18য়দি কাবেমি আপনিরাং য়্যাপুওয়া নুওয়াংহিং ন্যাসারাং আপনিরাং লোপামসা বানাইনাহা, কা আপনিরাং অপরাধী জিংপুরোওয়া।19তাকি সেংজাকো সোতা বাচেকো ছুকো তামসা লিংপাংসোহা লিংপাংকো সোতা কাহা সিপুমি নিও।20কাহা ক্রুসতা খ্রীষ্টহিংপারাং সিপুনতেমি নিও, নেহা ইসো য়ুতাহা য়ুংওয়াহা কা মোকো, আদো খ্রীষ্টহা কুংতা য়ুংরোওয়া। হানি সাদি জুপাতা কা নে য়ুংদিংমে, আকুহা সেংজাকো চেংওয়াকোতা দেংমসা য়ুংদিংয়ো, হাংসু কাহিং জেজেংপা জোমমে, আসা কুং সোতা আপনিকো সাদিরাং পিচামমে।21কাহা সেংজাকো অনুগ্রহহিংয়া হেলা জোকো মাছু, হাংপাতানাহা লিংপাংসোমি তাংজি জিংকো ছুনাহা খ্রীষ্টহা ব্যর্থতা সিপুয়ে।
The Seed Company