এস্টার8
1আকু দিন অহাসুরস জাইপুহা য়হুদিবিকো দুসমান হামানকো তাংসা ধন-সন্পত্তি এস্তর জাইমুহিং পিচায়ে। মোর্দোকৈহা কুং আপনিকো দিংঙা তামসা জাইমু এস্তরহা জাইপুহিং জাংওয়াকো সোতা মোর্দোকৈহা জাইপুকো নাগাইতা ওয়াংয়ে।2জাইপুহা আপনিকো ছাপ নিওয়া আংটি নোপায়ে (আকু আংটিহা হামানকোসো লাচাওয়া আংটি নিমগা) আসা মোর্দকেইহিং পিচায়ে। এস্তরহা হামানকো ধন-সন্পত্তিহা মোর্দোকৈকোতা চি ত্যইপুয়ে।3আকো নোইতা এস্তরহা জাইপুকো কোকোইতা নুউয়ে আসা কাইমসা ন্যাসা আকুহিং জাংচায়ে। অগাগকো সন্তান হামানহা য়হুদিবিকো বিরোদ্ধতা নোওয়া আগো নোচেংহিং য়োইপিকো হাই জিংদো জোপি তামসা আকুহা জাইপুহিং জাংচায়ে।4জাইপুহা আকো আপনিকো সুনকো রাজ দন্ডকো দ্যইহা এস্তর কাটুতা ন্যাপায়ে, আত্রংহা এস্তর জাইমুহা জামসা জাংয়ে,5“জাইপু, নাকোমি অনুমতি জিংদানাহা আসা কুং তোইতা লামতুপা জিংনাহা আসা ই নুওয়াংবেমি নাতিহিং এনতাপা জিংনাহা হামানকো পিচাওয়া আজ্ঞা পালনহা মোজোপিকো তামসা ইচো চুবে আদেশ নোপাপিকো। অগাগকো সন্তান হম্মদাতাকো চেংওয়াহা রাজ্যতা নিওয়া তাংসা য়হুদিবিহিং স্যাকো তামসা পিচাওয়া আজ্ঞাহা রদ্দ জোমসা দোসরা ঘোষনা পত্র লাপিকো।6আকো কোইচ্যা-বিংচ্যাওয়াহা কুং জ্যাতামি দেয়োংনাহা আসা কুং আপনি প্যাপ্যাম্যাম্যামি সিপুনাহা কা হেপা সহায়কোগা?”7জাইপু অহাসুরসহা জাইমু এস্তর আসা য়হুদি মোর্দোকৈহিংয়া জাংয়ে, “কাং, য়হুদিবিকো বিরোধতা য়োজনা জোওয়াকো সোতা কাহা হামানহিংয়া আকো আপনিকো বানাইওয়া কাঠকো ফাঁসীতা আকুহিংয়া থ্যইপুয়ে। আকো ধন-সন্পত্তিহা কাহা এস্তরহিং পিচাপুয়ে।8নেহা য়হুদি কাটুসো নাবিহিং এনতাওয়া ইচো দোসরা শিলকো আদেশ কুং মিংতা নোপা আসা আউতাহা জাইপুকো মিংকো শিল লাগাই। ইহা প্যারাপাকো জো, জাইপুকো মিংতা লাওয়া রাজমহলকো শিল নিওয়া আংটিতা লাগাইমসা লাওয়া চিঠিহা রদ্দ জোকোহা মাছু।”9সীবান তাওয়া তেস্রো মহিনাকো ইকাইসো সাসুংয়ুকো দিনতা ই নুওয়াং জিংপুমগা। মোর্দোকৈহা জাইপুকো অধিকারিবিহিং মোউমসা চিঠিবি লাপায়ে। ভারতসোহা ইথিয়োপিয়া দেশ চোইপা ১২৭ সোরা জায়গাকো টেবো মাটা কাইজিবি আসা অধিকারিবি আসা য়হুদিবিহিং আকু চিঠি কাইপুকো আদেশ পিচায়ে। জায়গা জায়গাতা চিঠিবি কাইপুয়ে। জায়গা জায়গাতা তাংসাকো ক্যাবিতা আসা লিপিবিতা আসা য়হুদিবিহিংনে আবিকো লিপিতারাং আকু চিঠিবিহা লাওয়া নিমগা।10মোর্দোকৈহা আকু চিঠি জাইপুকো মিংতা লাপায়ে আসা জাইপুকো মিংকো শিল লাগাইপুয়ে। জাইপুকো ও্যইংঙা গুওয়ালিকো সেন্নেপা বাংওয়া ও্যইংঙাবিতা বাইপামসা আবিহা আকু চিঠিহা জায়গা জায়গাতা মোর্দোকৈহা সাপায়ে।11তাংসা শহরবিহা আপনিহিং বাচাইমসা একো সোতা য়হুদিবিহা জমা জিংকো ছুরোওয়া আসা এপা জোকো জাইপুকো আদেশ নিও তামসা আকু চিঠিতা লাওয়া নিমগা। লেরা জায়গাতাহা লেরা জ্যাকো দিংঙাবিহা হাত-হাতিয়ার পুমসা য়হুদিবি আবিকো মেবি, চেংওয়া চেমেবিকো তোইতা হামলা জোকো য়হুদিবিহা আবিকো আবেইতা লুইসুকো আসা স্যাকো ছুরোওয়া আসা আবিকো ইচো ইচোহিং দাংপামসা আবিকো মোংটো-কেটো, ধন-সন্পত্তি এচাকো মুংছারোওয়া তাওয়া নুওয়াংরে লাওয়া নিও।12য়হুদিবিহিং স্যাকো তামসা জাংওয়া দিন অর্থাৎ অধার তাওয়া তারি বার্রিকো তেরো দিনতা ই আজ্ঞাহা তাংসা ফারস-সম্রাজ্যতা জিংকো নিমগা।13তাংসা জায়গাকো তাংসা প্রজাহিং ই কানুন বানাইওয়া নিও তামসা হিংপানেকোগা আসা এপারাং য়হুদিবিহা আকু দিন আপনিকো দুসমানবিহিংপা বদলা লাংকো তৈয়ার য়ুংকো ছুদিংমগা।14আকো সোতা জাইপুকো আজ্ঞাসো ও্যইংঙা বাইমবিহা রাজমহলকো ও্যইংঙাতা বাইমসা সেন্নেপা আকু দেরেং পুমসা হায়ে। রাজধানী শুশন শহরতারে আকু দেরেংহা দিংঙাবিকো প্যাকোতা আদেশ হিংপায়ে।15য়ৌনিংওয়া আসা হাংপাওয়া লেইলেইওয়া বেইগুনি রাজমহলকো আংদুং আসা পোরোতা সুনকো সহায়ক্যইওয়া মুকুট লুমসা মোর্দোকৈহা রাজমহলসো নোয়ে। শুশনকো ন্যাতা-ন্যাতাতা য়াংতাওয়াকো আওয়াজ হিংয়ে।16য়হুদিবিকো সোতা আকু দিনহা য়াংতাওয়া, চুসুংওয়াসো ছুটকারা, গাগ্রুওয়া আসা জিয়োওয়াকো দিন নিমগা।17তাংসা শহর আসা লোইবিতা, হাংতা হাংতা জাইপুকো আদেশ পড়াইওয়া নিমমে, য়হুদিবিহা য়াংতামসা গাগ্রুয়ে আসা ভোজ চায়ে। দোসরা জ্যাকো দিংঙাবিরে সিওচেহা য়হুদি জিংপুয়ে, হাংপাতানাহা আবিহা য়হুদিবিহিংপা চুসুংপুওয়া নিমি।
The Seed Company