এস্টার9
1তারি বার্রিকো অর্থাথ অদারকো তারিকো তেরো দিনতা জাইপুকো আদেশ পুরা জোওয়া দিন দেয়োংয়ে। আকু দিনতা য়হুদিবিকো দুসমানবিহা আবিহিং আপনিকো অধীনতা পারাকো আশা জোদিংওয়া নিমগা, আদো আকো জায়গাতাহা তুইপেং জিংপুমসা য়হুদিবিহা আপনিকো দুসমানবিকো তোইতা জিয়োয়ে।2জাইপু অহাসুরসকো সাম্রাজ্যকো তাংসা শহরতা য়হুদিবিকো য়ুংওয়া জায়গাতা আপনিকো তোইতা হামলা জোমবিহিংপা লুইসুকো আবিহিংপা জম্মা জিংয়ে। হাংতা জিংদো দোসরা জ্যাবিহা আবিহিংপা চুসুংপুমি নিমি। হাংসুকোরে য়হুদিবিহিংপা লুইসুকো সে মাতাপা জিংপুয়ে।3কোকোহা আকু জায়গাকো অফিসারবি, টেবো কাইজিবি, মাটাবি আসা জাইপুকো অধিকারিবিহা য়হুদিবিহিং য়ুজ্রুয়ে, হাংপাতানাহা আবিহা তাংসা মোর্দোকৈসোহা চুসুংমি।4জাইপুকো য়ুংওয়া সাতাহা নেহা মোর্দোকৈহা শক্তিশালী দিংঙা জিংপুমি নিও আসা আকো মিংহা ন্যাসারাং সিওপা-সিওপা জিংপুমসা হোদিংয়ো তামসা সাম্রাজ্যকো তাংসারাং হিংমি নিমগা।5আকো সোতা য়হুদিবিহা আপনিকো নোমি ত্যাব্যাপা আপনিকো দুসমানবিহিংপা জোকো ছুকোগা। তালওয়ার খুইতা চুংসুমসা আবিহা দুসমানবিকো তোইতা হোমলা জোয়ে আসা আবিহিংয়া দাংপাপুয়ে।6রাজধানী শুশান শহরতা য়হুদিবিহা পাঁচশো দিংঙাবিহিং স্যামসা দাংপাপুয়ে।7আকো প্যাকোতাহা য়হুদিবিকো দুসমান হম্মদাতাকো চেংওয়া হামানকো ত্যাচো চেংওয়াবি নিমি: পর্শন্দাতা, দল্ফন, অস্পাতা, পোরাতা, অদলিয়া, অরিদাতা, পর্মশতা, অরিশৈ, অরিদৈ আসা বৈজাতা, আদো য়হুদিবিহা লুটপাট মোজোতো।11আত্রংকো দিন শুশনতা স্যাপুওয়া দিংঙাবিকো সংখ্যাহা জাইপুহিং হিংপায়ে।12আকো নোইতা আকুহা এস্তর জাইমুহিং জাংয়ে, “শুশানতা মেংচে য়হুদিবিহা পাঁচশো জনা দিংঙাবিহিং স্যাপুমকোগুং। আবিকো প্যাকোতাহা হামানকো ত্যাচো চেংবিরে নিমগুং। রাজ্য-রাজ্যতা য়হুদিবিহা হাং জোপুমমে? নেহা নাতিহা হাং য়াকোগা? আকুহা নাতিহিংয়া পিচারোওয়া। নাতিহিংবেমি দোসরা হাইক্রি ঘ্যইদানাহা কাহিং জাং আসা নাতিহিংয়া পিচারোওয়া।”13এস্তরহা জবাব পিচায়ে, “জাইপু, নাতিমি গাগ্রুনাহা শুশানকো য়হুদিবিহা হিনিবেপা জুকুংরে জোওয়া অনুমতি মুংচাকো। আসা হামানাকো ত্যাচো চেংওয়াবিকো সিপুওয়া জুপাহিংয়া ফাঁসীতা থ্যইকো তাওয়া আজ্ঞা পিচাকো।”14জাইপুহা ওইপারাং আজ্ঞা পিচায়ে। শুশনতা আকু আদেশ হিংপায়ে। হামানকো ত্যাচো চেংওয়াবিকো সিপুওয়া জুপাহিংয়া তাংসা দিংঙাকো দোংনাংতারাং থ্যইপুয়ে।15অদার তারিকো চৌদ্দ দিনতাহা শুশনকো য়হুদিবিহা ন্যাসারাং জমা জিংসুয়ে আসা শহরকো দোসরা ৩০০ জনা দিংঙাবিহিং স্যাপুয়ে, আদো আবিহা আকু দিনতারে লুটপিট মোজোতো।16রাজ্য রাজ্যতারে য়হুদিবিহা তাংসা ইচো জিংমসা আপনিহিং বাচাইয়ে। আপনিহিং আজকাপা জোওয়া পঁচাত্তর (৭৫) হাজার দুসমানবিহিং আবিহা স্যামসা আপনি দুসমানবিকো সংখ্যাহা লিয়োপাপুয়ে। আদো আবিহা আউতারে লুটপিট মোজোতো।17আকু ঘটনাহা অদার তারিকো তেরো দিনতা জিংপুওয়া নিমগা। আকো জুকুংহা চৌদ্দ দিনতা আবিহা হাংসুহিংনে ম্যাসাতো আসা আকু দিনহা য়াংতামসা চাওয়া আংওয়াকো ভোজকো চাড় মানাইয়ে।18শুশনকো য়হুদিবিহা পনেরো দিন চোইপা উৎসব মানাইয়ে, হাংপাতানাহা আবিহা আপনিকো দুসমানবিহিং তেরো আসা চৌদ্দ দিনতা সায়ে আসা পনেরো দিনতাহা য়োইয়ে।19ইকো কারণসোরাং আপে আপেচিংওয়া লোই-লোইতা য়হুদিবিহা অদার তারিকো চৌদ্দ দিন চোইপা গাগ্রুমসা উৎসব মানাইমগা, ভোজ পিচামগা আসা ইচোহা দোসরাহিং চাওয়া আংওয়াবি সোসুমসা উপহারবি কাইপুচাংমগা।20মোর্দোকৈহা ই তাংসা ঘটনাকো বিষয়তা লাপায়ে আসা জাইপু অহাসুরসকো তানাংকো আসা তোনাংকো রাজ্যতা নিওয়া য়হুদিবিহিংয়া ই চিঠি কাইপুয়ে।21তাংসা ফারস সাম্রাজ্যতা নিওয়াবিহিংয়া আকুহা অদার তারিকো চৌদ্দ আসা পনেরো দিনহা লোপোলেরে উৎসব মানাইকো তামসা লামসা চিঠি কাইপুয়ে।22আকু দিনতা য়হুদিবিহা আপনিকো দুসমানবিহিংয়া দাংপাপুওয়া নিমগা, ই তারিহিংনাং আবিহা ই শোক আসা লোচোপেংগেংওয়া সময়সোহা গাগ্রুওয়াতা পরিবর্তন জোমি নিমগা। আকু দিনতাহা নাবিহা ভোজ চাকো, উৎসব মানাইকো আসা জোরোংবিহিংনে ইচোহা ইচোহিং চাওয়া আংওয়া উপহার চোকো তামসা লাওয়া নিমগা।23আকো সোতা য়হুদিবিহা মোর্দোকৈকো আদেশ পালন জোয়ে আসা ই উৎসব মানাইওয়া চাড়হা আবিকোহা লোপোলেরে মানাইওয়া জিংপুয়ে।24অগাগকো বংশকো হম্মাদতাকো চেংওয়া য়হুদিবিকো দুসমান হামানহা য়হুদিবিহিং দাংপাকো দিন ছুটাইকো চিঠা ওয়্যামি নিমি (ইহিংয়া ‘পুরিম’ তামসা জাংওয়া নিমগা)। আকুহা য়হুদিবিকো মিংরাং ওয়েংপাকো কেংদিংমগা।25আদো জাইমু এস্তরহা জাইপুকোতা হায়ে আসা জাইপুহা লাওয়া আজ্ঞাহা কাইপুয়ে। আকো নোইতাহা হামানহা য়হুদিবিকো সোতা বানাইমসা এওয়া জেরেতাহা আপনিরাং পরেয়ে, ফাঁসীতাহা হামান আসা আকো চেংওয়াবিহিং থ্যইপুয়ে।26আকো সোতারাং আকু উৎসবকো দিনহিংয়া ‘পুরিম’ (চিঠা) তামসা জাংমগা। মোর্দোকৈকো চিঠি আসা আপনিকো তোইতা লেওয়া নুওয়াবিকো কারনসোরাং27য়হুদিবিহা আপনি আসা আপনিকো সন্তান আসা য়হুদি জিংওয়া তাংসাকো সোতা লোপোলেরে ঠিক সময়তা ই সানিহয়ুকো দিনহিংয়া ঠিক প্রকারসোরাং মোর্দোকৈকো আদেশ জোওয়া সেই চারকো রুপতা মানাইওয়া লিংপাং বানাইয়ে।28দেপাওয়া দিনবিতাহা য়হুদি পুস্তা পুস্তাবি, তাংসা প্যাপ্যাম্যাম্যাহা, তাংসা রাজ্যকো আসা শহরতা পুরিমকো দিনহিং প্যারাপামসা চার মানাইওয়া নিয়মরাং জিংপুয়ে। ই পুরিম তাওয়া চারহিংয়া য়হুদিবিহা মানাইনেরোওয়া, ই চারহিংয়া দেপাওয়া আবিকো চেংচুংবিরে হাত্রংরে লারিংমদিংরোওয়া।29আকো নোইতাহা অবিহেলকো চেমে জাইমু এস্তরহা মোর্দোকৈহিংপা চাংসুমসা দোসরা ইচো চিঠি লায়ে। আউতা আকুহা নাগাই মোর্দকৈইহা পুরিমকো বিষয়তা লাওয়া চিঠিহিংয়া আপনিকোতা নিওয়া পুরা অধিকারসো লায়ে।30আকু চিঠিহা তাংসা য়হুদিবিহিং কাইপুয়ে আসা আকো লাওয়া তাংসা জাইপু অহাসুরসকো সাম্রাজ্যকো ১২৭ সোরা রাজ্যতা কাইপুয়ে। আউতাহা য়হুদিবিকো সোতাহা তিমেওয়া আসা সুরক্ছাকো শুভকামনা নিমগা।31আকুহিংপাহা আওতাহা য়হুদিবিহিং হেপা আবিহা উপাস আসা বিলাপকো লিংপাংবি বানাইমমে, এপারাং আবি আসা আবিকো চেংওয়া চেমেবিহা পুরিমকো দিনবিহিংনে মানাইকো তাওয়া আদেশ পিচাওয়া নিমগা। মোর্দোকৈ আসা এস্তর নিহসোসারাং এপাজিংওয়া আজ্ঞা জোওয়া নিমগা।32পুরিমকো লিংপাংবিহা পক্কা জোমসা এস্তর জাইমুহা আপনিকো আজ্ঞা হিগাতা লামসা এহে।
The Seed Company