এস্টার5
1উপাস য়ুংওয়াকো সাসুংয়ুতা এস্তরহা রাজমহলতা লুউনেওয়া আংদুং লুউয়ে আসা রাজমহলকো নাপোতা হোমসা গাদিং এওয়া সিরিতা ন্যইমসা জায়ে। জাইপুহা সিরি নাপোসো লাপুং কাটুতা নাইমসা গাদিংতা গাদিংওয়া নিমি।2জাইপু হাত্রং এস্তর জাইমুহিং বাইরেতা জাদিংওয়া তিং, আত্রংহা আকুহা জাইপুকো লামতুওয়া মুংচায়ে। জাইপুহা আকো নাগাই সুনকো দ্যই ন্যাপাহে। আকুহা নাগাই গ্যইয়ে রাজদন্ডকো সুনকো দ্যইহিংয়া সুয়ে।3জাইপুহা আকু জাইমুহিং উইয়ে, “জাইমু এস্তর, নাতিহা হাং ঘ্যইকোগা? কাহিং জাং আসা নাতিহা মুংচারোওয়া, কুং রাজ্যকো ইওয়্যা রাজ্য জিংদো কা নাতিহিংয়া পিচারোওয়া।”4এস্তরহা জাংয়ে, “য়দি নাতিমি কাহিং লাপতুপা জোপিনাহা কুং তৈয়ার জোওয়া ভোজতা হিনিহা হামানহিংপা নাতিরে ওয়াংপি।”5জাইপুহা এস্তরকো আরসিং জিংমসা হোকো সেন্নেপা ওয়োংকো তামসা হামানহিং আজ্ঞা জোয়ে। জাইপুসো হামানহা এস্তরকো ভোজতা হোয়ে।6পুটকুই আংসুদিনুওয়া জাইপুহা আকুহিংয়া উইয়ে, “নাতিহা হাং ঘ্যইকোগা? কাহিং জাং আসা আকুহা নাতিহা মুংচারোওয়া। কু ইওয়্যা রাজ্য য়াদো কা নাতিহিংয়া পিচারোওয়া।”7এস্তরহা জবাব পিচায়ে, “কা নাতিহিংয়া সুজামসা জাংচারোওয়া,8জাইপুবেমি কুং জাংওয়া নুওয়াংমি হিংদানাহা জুকুং ন্যাসারাং নাকো সোতা তৈয়ার জোওয়া ভোজতা হামানহিংপারাং ওয়াংপি। আত্রংরাং কা হাং ঘ্যইকোমে নাকোতা জাংরোওয়া।”9হামান চাওয়া-আংওয়াকো ভোজসো নোনুওয়া আকো তুংসিংতাহা গাগ্রুপা নিমগা। হামানহা মোর্দোকৈহিং মহলকো লাপুংতা গাদিংওয়া তিংয়ে। আকু হ্যাদাংনুওয়া মোর্দোকৈহা জামসা সম্মান মাতিংপাতো, আত্রং হামানহা সিওপারাং সেদ্রাংপুয়ে।10আদো আপনিহিং সেদ্রাংওয়াসো য়োইমসা আকুহা সাতা হোপুয়ে। আকুহা আপনিকো ব্যারোবিহিং সাতা মোউয়ে। আসা আপনিকো মে জেরেসহিংনে মোউয়ে।11আপনিকো হাসে পুংজিবি আসা চেংওয়াবি নিমমে, আসা জাইপুহা হেপা আপনিহিং তোইকো পদতা নিয়ুক্ত জোমমে আসা জাইপুকো অধিকারিবিকো প্যাকোতা আপনিহা হাসেকো টেবো মাননীয় নিমমে, আকু নুওয়াংতা আকুহা আবিকো নাগাইতা পুংটা তিংপায়ে।12“এসে মেংচে মোকো,” হামানহা জাংয়ে, “এস্তর জাইমুহা জাইপুসো কাহিং চাওয়া-আংওয়া ভোজ পিচায়ে আসা জুকুংরে ভোজতা জাইপুসো কাহিং মেংচে মোউমি নিও।13আদো হাত্রং চোইপা য়হুদি মোর্দোকৈহিং মহলকো লাপুংতা গাদিংওয়া তিং, আত্রং চোইপা কাহিংয়া ই তাংসাসোহা সন্তুষ্টরাং মাজিং।”14আকো মে আসা ব্যারোবিহা জাংয়ে, “পচাশ হাত হিয়োপা (কাঠকো) ফাঁসী বানাইপাকো জো। জুকুং হাপকোং মোর্দোকৈহিং থ্যইকো জাইপুহিং জাংচাকো জো। আউসো মেংচে ভোজতা য়াংতামসা হ্যাচামুংরোওয়া।” ই নুওয়াংহা হামানহিংয়া এনতাচপুয়ে আসা আকুহা ফাঁসীকো কাঠ বানাইপায়ে।
The Seed Company