এস্টার4
1ই তাংসা নুওয়াং হিংমসা মোর্দোকৈহা তুংসিং চিচাপুমসা আপনিকো লুউওয়া আংদুং ছিয়ে, আকুহা বোড়াকো আংদুং আসা পোরোতা চেকা ন্যামসা ঙাচ্রিংপা কাইমসা শহরকো আরিকোংপে সিওপা বিলাপ জোমসা হুরায়ে।2আকুহা জাইপুকো মোহলকো লাপুংতা দেয়োংয়ে। আকুহা মোহলকো নাপোতা মোহোতো, হাংপাতানাহা বোড়াকো আংদুং লুওয়া দিংঙাহিংয়া নাপোতা হোকো মিচামগা।3জাইপুকো আদেশ হিংপাওয়া তাংসা রাজ্যবিতাহা য়হুদিবিকো প্যাকোতা শোক জিংপুদাংয়ে। আবিহা উপাস য়ুংসুয়ে, কাইসুয়ে আসা বিলাপ জোয়ে। সিওচে য়হুদিবিহা বোড়াকো আংদুং লুউয়ে আসা চেকাতা গাসুয়ে।4এস্তরকো ডেইয়ামে আসা নোপুংসোকবিহা মোর্দোকৈহা হাং জোদিংমমে, আকুহা আকুহিং হিংপায়ে, আকুহা আফসোস জিংপুয়ে। বোড়াকো আংদুংকো জায়গাতা লুউকো আকুহা মোর্দোকৈহিং আংদুংবি কাইপিয়ে, আদো আকুহা আকু আংদুং লুউকো মেকেংতো।5মোর্দোকৈকোতা হোমসা হাং নুওয়াংমে আসা হাংকো কারণসো এপা জিংদিংমমে, আকু কোইকো সোতা আকুহা ইচো নোপুংসোক ডেইয়া হতাকহিং নিংপুয়ে। হতাকহা মোহলকো নোপুংসোকবিতাহা জাইপুকোসো এস্তরকো ডেইয়া জিংকো খটাইওয়া দিংঙা নিমগা।6হতাকহা মহলকো লাপুংতা নিওয়া শহরকো চোকতা মোর্দোকৈকোতা হোয়ে।7মোর্দোকৈহা হতাকহিংয়া আপনিহিংপা নিওয়া তাংসা নুওয়াং, আকুহিংপাহা তাংসা য়হুদিবিহিংমি স্যাপুনাহা হাসে টাংকা হামানহা রাজমহলতা পিচাকো প্রতিজ্ঞা জোমি নিমমে, আকুরে হিংপায়ে।8য়হুদিবিহিং নাশ জোওয়া আজ্ঞা আসা শুশনতা লাওয়া ঘোষনা পত্রকো ইচো নকলি আকুহা হতাকহিং পিচায়ে। আকু পুমসা এস্তরহিং পিচা আসা তাংসা নুওয়াং আকুহিং জাংপিকো আসা আকুহা জাইপুকোতা হোমসা বিনতি জোপিকো তামসা মোর্দোকৈহা এস্তরকোতা দেরেং হিংপাকো হতাকহিংয়া লাপাপুয়ে।9হতাকহা মোর্দোকৈকো জাংওয়া নুওয়াং এস্তরকোতা হোমসা হিংপায়ে।10এস্তরহা ই দেরেং কাইপুমসা হতাকহিং মোর্দোকৈকোতা ন্যাসারাং নিংপুয়ে,11“হাংসু জিংদো পোজা কিতা মেমে জাইপুকো আজ্ঞা মামুংপা আকু মহলকো নাপোতা হোমসা জাইপুহিং দোসপানাহা আকুহা সিনেরোওয়া। লিংপাংহা এপারাং নিও। জাইপুকো সল্লাকারবিকোসোহা জায়গা জায়গাকো তাংসা দিংঙাবিহা ই নুওয়াং গেমগা। ই লিংপাংসো বাচেকোহা ইচো মেংচে ন্যাতা নিও। জাইপু আপনিকো রাজমহলতা দন্ড পিচাওয়া সুনকো দ্যই আকু দিংঙাকো (মেমে অথবা পোজাকোতামি) ন্যাপানাহা আকো প্রাণহা বাচেরোওয়া। জাইপুকো কাহিং মোমোউওয়াহা নেচোইপাহা তারি ইরি বাংতেয়ো।”12এস্তরকোসো ই দেরেং মুংতেনুকো নোইতা13মোর্দোকৈহা আকুহিংয়া এপাজিংওয়া চেতাউনি পিচামসা দেরেং কাইপুয়ে, “নাতি আপনিহা রাজমহলতা নিনা তামসা দোসরা য়হুদিবি সিপুনুওয়া কাহা বাচেরোওয়া তামসাহা মোনোগ্যই।14এপা জিংওয়া সময়তা নাতিমি চেকেপা য়ুংনাহা হানিসো জিংদো য়হুদিবিহা সহায়তা মুংচারোওয়া আসা আবিহা বাচেরোওয়া, আদো নাতিহা সিপুরোওয়া আসা নাকো আপাকো সন্তানহা য়াংপুরোওয়া। হাংসু গেদিংগাসা, না এপা জিংওয়া সময়কো সোতারাং নাতিহা জাইমু জিংমাইমে?”15এস্তরহা মোর্দোকেইহিংয়া এপাজিংওয়া জবাব কাইপুয়ে,16“হ্যামসা শুশনতা নিওয়া তাংসা য়হুদিবিহিং জম্মা জো। উপাস য়ুংমসা কুং সোতা পাচাইপি। সাসুংয়ু জেইসুং আসা সাসুংয়ু লিশুং হাইরে মাচা আসা হাইরে মাআং। কা আসা কুং ডেইয়ামেবিরে এপারাং জোরোওয়া। আকো নোইতা কানুনকো বিরুদ্ধতা জিংদো কা জাইপুকোতা হোরোওয়া। এপামি জোনাহা কা সিনেদো সিরকোরে তৈয়ার নিও।”17আকো নোইতা মোর্দোকৈহা আউসো হ্যাপুয়ে। আসা এস্তরহা আকুহিং জাংওয়া সেই তাংসা নুওয়াং জোয়ে।
The Seed Company