এস্টার3
1সাইয়ু-নিহয়ুকো নোইতাহা অহাসুরস জাইপুহা হামান মিং নিওয়া দিংঙাহিংয়া দোসরা ব্যারোবিরোমাহা টেবো পদতা বড়াইমসা এয়ে। হামানহা অগাগ জিতেংকো (বংশ) হম্মদাতাকো চেংওয়া নিমি।2তাংসা চুনুইমসা হামানহিংয়া আদর পিচাকো তামসা জাইপুহা আপনিকো সেওয়া জোওয়া অধিকারিবিহিং আজ্ঞা জোয়ে। তাংসারাং আকু আজ্ঞাহিং পালন জোয়ে, আদো মোর্দোকৈহা আকু আজ্ঞাহিংয়া পালন মোজোতো।3সাইয়ুহা রাজমোহলকো দিংঙাবিহা মোর্দোকৈহিংয়া জাংয়ে, “নাতিহা হাংপা জাইপুকো আজ্ঞাহিংয়া মামানেমগা?”4জাইপুকো আজ্ঞা পালন জোকো তামসা সদাইবিরি মহলকো দিংঙাবিহা মোর্দোকৈহিংয়া কোইপাচাংমি: আদো মোর্দোকৈহা আবিকো নুওয়াংহা মাহিংতো। আকুহা জাংচাংমি, “কাহা য়হুদিগা। কা হামানহিংয়া চুইনুইমসা নোংকো মাছুরো।” আকু নুওয়াংহা আবিহা হামানহিং হিংপাপুয়ে। মোর্দোকৈকো ব্যবহার হামানহা সহায়কো ছুকোমে না মোছুকোমে আবিহা কোইকো কেংদিংমি।5মোর্দোকৈহা আকুহিং দন্ডবত মোজোরো তাওয়া নুওয়াং সিদা চ্যইমসা হামানহা সেদ্রাংপুয়ে।6মোর্দোকৈহা য়হুদিগা তামসা গেমসা আকুহা মোর্দোকৈহিং মেংচে দন্ড মাপিচাপা, আকুহা অহাসুরস জাইপুকো রাজ্যতা নিওয়া তাংসা য়হুদিবিহিং, হাংসু মোর্দোকৈকো দিংঙা নিমমে, আবিহিংনে স্যাকো তামসা উপায় মোউয়ে।7অহাসুরসকো রাজ্যকালকো লো বার্নিং নাগাইকো তারি, অর্থাৎ নীসান তাওয়া তারিতা, হামানহা আপনিকো ষড়যন্ত্র পুরা জোকো দিন আসা তারি নোপাকো চিঠা ওয়্যাপায়ে। (আকু চিঠাহিংয়া ‘পুরিম’ তামসা জাংমি।) চিঠাহা তারি বার্রি অর্থাৎ অদার তারিতা চুইয়ে।8আত্রংহা হামানহা জাইপুহিংয়া জাংয়ে, “নাকো রাজ্য ভরিতা নিওয়া তাংসা জ্যাকো প্যাকোতা ইচো জ্যা ইতা উতা বেইপুমসা য়ুংমি নিও। আবিহা দোসরা জ্যাবিরোমা লারাংসা ল্যইচ্যইপ্যইচ্যই মানেমগা, আকুদাং মোকোপা আবিহা রাজ্যকো আইন কানুনরে মামানেমগা আবিহিংয়া যুংকোরে পিচামতুরোওয়া।9য়দি নাতিবেমি অনুমতি মুংনাহা আবিহিংয়া স্যাকো তামসা ইচো আজ্ঞা জোকো ছুরোওয়া। এপামি জোদানাহা কাহা ৩৪০০০০ জাতাংকো টাংকা সাম্রাজ্যকো শাসনকো কামকো সোতা জাইপুকো ভণ্ডারতা পিচাকো ছুরোওয়া।”10জাইপুহা রাজ-ঘোষনাতা ছাপ নিওয়া আংতি ক্রোইসো নোপামসা য়হুদি জ্যাবিকো দুসমন অগাগী হম্মদাতাকো চেংওয়া হামানহিং পিচায়ে।11জাইপুহা আকুহিং জাংয়ে, “ই জাতাংকো টাংকাহা নাকোরাংগা। আসা দিংঙাবিহিংয়া নাতি হেপা জোদাংপা তিং ওইপারাং জো।”12আকো সোতা নাগাইকো তারিকো তেরো তারিখতা হামানহা জাইপুকো তাংসা সরকারি লাওয়া কাম জোওয়াবিহিং মোউয়ে, আকুহিংয়া আবিকো কোইওয়া ক্যাতা অনুবাদ জোমসা তাংসা জাইপুকো শাসকবি, রাজ্যপালকো দিংঙাবিকোতা, আসা তাংসা জ্যাকো মাটাবিকোতা কাইপুকো আদেশরে পিচায়ে। অহাসুরস জাইপুকো মিংতা আকো আংতিকো ছাপ লাগাইমসা আকু আদেশ নোপায়ে।13আদেশ পত্র চুংমসা হুলাকিবিহা রাজ্যকো তাংসা জায়গাতা হোয়ে। আউতাহা ই লাওয়া আদেশ নিমি, অদার তাওয়া তারি বারিকো তেরো তারিকতা তাংসা য়হুদিবিহিং: ওয়াংটেংটেংগেংওয়াবি, ওয়ারাংপাবি, মেমেবি আসা আপে-চোপেবি তাংসাহিং সাইয়ুত্তা স্যামসা দাংপাপুই। হাইরে মালামতুপা আবিহিং স্যাকো আসা আবিকো সম্পত্তি গিংচাকো।14আদেশ পত্রতা নিওয়া নুওয়াং তাংসা জায়গাতা প্রজাবিহিং হিংপাতু আসা আকু দিন দেয়োংনুওয়া তাংসা দিংঙাবিহা তৈয়ার জিংকো তাওয়া নুওয়াংরে আউতা লিংপাংকো রুপতা লাওয়া নিমগা।15জাইপুকো আজ্ঞাসো আকু আদেশহা রাজধানী শুশনতা নিওয়া প্রজাবিহিংনে হিংপায়ে। হুলাকিবিহা আকু দেরেংহা রাজ্য-রাজ্যতা দেপায়ে। শুশন শহরতাহা গোলমাল জিংপুয়ে। জাইপু আসা হামানহা আংকো গায়ে।
The Seed Company