প্রেরিত6
1আত্রংকো দিনতা সেংজাহিং দেংওয়া দিংঙাবিহা সিওপা বেইপুদাংনুওয়া হিব্রু ক্যা য়্যইওয়া য়হুদি আসা গ্রিক ক্যা য়্যইওয়া য়হুদিবিহা স্যাসুয়ে, হাংপাতানাহা গ্রিক য়্যইওয়া য়হুদিবিহা সদাইদিনকো চাওয়া-আংওয়াবি মুংচানেকোতাহা “কাবিকো মুরিংবিহা এনতাপা মোমুংচানা তামসা জাংয়ে।”2এপাজিংপুনুওয়া বার্চো পোইংবিহা তাংসা প্রভুকো য়োংতোংবিহিং মোউমসা জাংয়ে, “সেংজাকো য়্যইদি হিংপাকো ল্যামসা চাওয়া-আংওয়াতা নোকোহা কাবিহিংয়া এনতাপা মাজিং।3আকো সোতা ও এবাই, নাবিকোসো পবিত্র লাংবে আসা দুংজি নিওয়া আসা তাংসাকো প্যাকোতা আদর মুংওয়া নীচো দিংঙাহিং জেং। হাংসুহিং কাবি ই কামতা জাপাকো চুকোমে।4আদো কাবিহা পাচাইওয়া আসা ইশুকো দেরেং হিংপোইওয়া কামতা কাবিকো তাংসা সময়বি পিচারোওয়া।”5আসা আবিহা পবিত্র লাংবে আসা দেংওয়াসো জুপাতা মেইপুওয়া স্তিফনস, ফিলিপ, প্রখুরস, নিকনোর, তিমোন, পর্মিনাস আসা এন্টিঅখিয়া শহরকো য়হুদি লিংপাংহিং মানেওয়া নিকোলাসহিং জেংয়ে।6আবিহা ই নীচো দিংঙাবিহিংয়া জেংওয়া পোইংবিকো নাগাইতা পারায়ে জেংওয়া পোইংবিহা আবিকো তোইতা খুই ওইমসা পাচাইপিয়ে।7এপা জোমসারাং সেংজাকো য়্যইদি বেইপুয়ে আসা সেংজাহিং দেংমবিহা য়রুশালেমতা সিও-সিওপা জিংপুয়ে। উইসে য়হুদি পাউবিরে ইশুহিং দেংসুয়ে।8স্তিফনসহা সেংজাকো অনুগ্রহ আসা সেসো মেইপুমসা দিংঙাবিকো প্যাকোতা টেরবো টেরবো আআংপেপেচপুওয়া কাম তিংপায়ে।9আদো লেরা য়হুদিবিহা আউতা লেহে আসা স্তিফনসহিংপা স্যাসুয়ে। আকু য়হুদিবিহা ছুটকারা পারাকো জোংসুওয়া সাসো লেমি নিমি। আবিহা কুরেনি, আলেকজান্দ্রিয়া শহর, কিলিকিয়া আসা এশিয়াকো দিংঙাবি নিমি।10আদো স্তিফনসহা পবিত্র লাংবেকো দুংজিসো য়্যইওয়াকো সোতা আবিহা আকুহিংপা য়্যইমক্যইতো।11আত্রংহা আবিহা চেকেপা ইচো নিহসো দিংঙাবিহিং দুদুইপামসা জাংপায়ে, “কাবিহা ইহিংয়া মোসা আসা সেংজাকো তোইতা মোতুপা জাংওয়া হিংয়ে।”12এপারাং আবিহা য়হুদি মাটা ওয়ারাংপাবিহিং আসা তাংজিকো উটকেওয়াবিহিং দুদুইপায়ে, আসা স্তিফনসকো খুই তাইমসা লাচি জাংওয়াতা পারায়ে।13আবিহা এপা প্যায়োং জাংবিহিং নাগাই নিংপুয়ে, আসা আকু প্যায়োং য়্যইওয়া দিংঙাবিহা এপা জাংয়ে, “ই দিংঙাহা পবিত্র দেমসা আসা মোসাকো নোপাওয়া লিংপাংহিং মেংতাপা জাংকো মাল্যাতো।14আসা ইকো এপা জাংওয়া কাবি হিংয়ো, ‘নাসরতকো ইশুহা ই দেমসাহিংয়া য়্যারোওয়া আসা মোসাকো পিচাওয়া লিংপাংহিংয়া সোপুরোওয়া’।”15জোংসুওয়া সাতা গাদিংওয়া আবি তাংসা স্তিফনসহিংয়া মিসরোইপা নোইসুয়ে। হাংপাতানাহা আকো য়ুওয়াইহা লোডিংবাকো পোইংকো য়ুওয়াই ত্যাবাপা হুহুইপা তিংয়ে।
The Seed Company